James 1

1Wii, James-aaq, Agayutem kevgaani Atanrem-llu Jesus Christ-am, angnimek tuyuramci Israel-aam kinguvrini qula malrugnek cipnelegni nunani skavngalriani.

Naspaamallerkaatnek, Piicagkun-llu Unangellerkaatnek

2Ilamaa, nunaniryukici ayuqenrilngurnek naspaamakuvci, 3nalluvkenaku man'a: ukverpeci naspaamallrakun asvairillerkarci. 4Tau͡gaam asvailucirci nuringanrilli, elpeci-llu qaqimalriaruniartuci tamalkiringaluci nau͡gg'un-llu nuringavkenaci.

5Ilasi umyugailkuni Agayutmun kaigakili, qunuyuilngurmun avalissarayuilngurmun, cikiumaciquq-llu. 6Tau͡gaam kaigakili ukverluni, nalirrugtevkenani. Tua-i nalirrugtellria imarpiim qairitun ayuqngan anuqem ayagaskiitun egqaqluku-llu. 7Tauna yuk umyuarteqenrilli camek unangnayukluni Atanermek. 8Yuk malrugnek umyualek caqassurarauguq ayuqucimikun. 9Ukvelriim ellmikutuuluni mayuqaniumallni angniutekekiliu. 10Tau͡gaam tukuulriim aciqvaqaniumallni quyakekiliu, tua-i can'gem kangratun piunrirciqngan. 11Akerta piskuni puqlanirluni cakneq nal'aqerciiqaa canek, kangra-llu iggluni, tangenqegcinarqelria-llu piunrirluni. Tuaten-llu cali tukuulria piunrirciquq.

12Atawaqertuq yuk naspaamallermini pektayiilkuni, naspaatni pellukuniu akurturciqngami unguvam nasqerrutiinek Atanrem akqutkellranek kenkestem̄inun. 13Yuk naspaamakuni qanenrilkili, “Agayutem naspaagaanga.” Wani-wa Agayun assiilngurmek naspaamasciigalan yuk-llu naspaangaunaku. 14Tau͡gaam yuk naspaamalartuq aglumallermikun iqlutmurucimaaqami. 15Aglumaciq-llu ayagnengumariaqami assiilngurmek taqutelartuq, assiilnguq-llu pimariaqami tuqumek taqutelartuq.

16Alarcaqunaci anelgutemni keneknarqelriani. 17Cikiun tamarmi assilria, natlugnerilnguq-llu cikiun pakmaken kingunengqetuuq, atraraqluni-llu tanqilriit Atiitnek, caqtaayuilngurmek pillinqigcuunani-llu. 18Elliin piyullermikun yuksagutaakut, piciunrem qaneryarartaakun piurtellerminun ciuqliusqelluta.

Qaneryaram Niitellra Atullra-llu

19Taumek anelgutemni, keneknarqelriani! Yuk tamarmi maligaurauskili, qanqataitevkenani, qenqerrngianani-llu. 20Tua-i yuum qenqertii Agayutem elluarucianek calingailan. 21Taumek caarrliqsarat tamalkuita pegciki, anagulluni-llu inerciigacaraq, akurturluku-llu ellmikutuuyarakun qaneryaraq, qanrutkumalria tarnerpecen̄ek anirturiyugngalria.

22Qaneryaramek atulriarukici, niiteqainalriaruvkenaci-llu, alarrnavkenaci. 23Tua-i kina niiteqainalriarukuni qaneryaramek aturpek'naku-llu, ayuquq yugtun kegginaminek tangvalriatun tarenriurutkun. 24Tua-i ellminek tangrraarluni ayagtuq, egmianun-llu ayuqucillni nalluyagulluku. 25Tau͡gaam kia imum naklekiyaram picirkiutii tangvakuniu, uluqsaunaku-llu, tuaten niiteqainarpek'nani tau͡gaam calilriaruluni, taum caliara atawaqercecimaarkauguq. 26Ilasi agayumayukekuni, alungutni tau͡gken nuqingavkenaku, alarciiquq agayumacia-llu ellmikuuguq. 27Menuilnguq agayumaciq, Agayutem-llu Atamta ciuqerrani caarrluilnguq waniwauguq: kusgualuki elliraat aipainret-llu nangteqellratni, nunamiutarnun-llu caarrluurcetevkenani.

Currently Selected:

James 1: YPK

Highlight

Copy