James 2

Yuum Taungucianek Catkinrilucia

1Ilamaa, Atanermun Jesus Christ-amun ukverumacirci caqtaanrilli yuum taungucia pitekluku. 2Quyungqavigpecen̄un itellriartangqerqan suulutaamek kulutmek aturluni aturaqegtaarnek-llu, tuamta-llu cali itellriartangqerqan arrsaulriamek aturarrliqluni, 3elpeci pikegtakenrukuvciu aturaqegcilria qanrulluku-llu, “Aqumi wavet assilriamun,” arrsaulria tau͡gaam qanrulluku, “Nangernga tuani,” wall'u, “Natermun aqumi ketemnun,” 4tuaten-qaa piluci iqlutun umyuangqenrituci tangerrnakillerpeciuggun? 5Niicugnici, anelgutemni keneknarqelriani, Agayutem-qaa nakmikeksaitai nunam arrsaulriartai ukverkun tukuusqelluki, angayuqauvik-llu pikesqelluku akqutkellni kenkestem̄inun? 6Tau͡gaam elpeci caunrilkaci arrsaulriit. Caknaavkaqsaitaiceci-qaa tukuulriit, qaillukuarten̄un-llu tun'aqluci. 7Qacungakeksaitaat-qaa kenciknarqelria ateq aprutsi?

8Alerquun angtuamek aprumalria atuquvciu una, “Ilan kenkarkaugan elpetun pitarrluku.” Tua-i elluarrluci piciquci. 9Tau͡gaam yuut ayuqevkenaki pikuvciki, assiilngirtuci alerquun-llu atunritarci. 10Tua-i kia imum alerquutet atunge'rmiki, carrarkun tau͡gaam uniureskuniki narurciiqai tamalkuita. 11Tua-i qanlleq, “Akusrarutekiyaqunak,” qanellruuq cali, “Tuquciyaqunak.” Tua-i-llu akusrarutekinrilngerpet tuqucikuvet, alerquutet narurtaten. 12Taumek tuaten qallaskici yuuluci-llu naklekiyaram picirkiutiikun qanercetaarumaarkauluci. 13Takumcutailnguq takumcukumavkenani qanercetaarumaarkauguq. Naklekiyaraq pininruuq qanercetaarutmi.

Yuum Ukveran Nallunailucia Caliarikun

14Ilamaa, camek iqukegcia yuk ukverniluni qanngermi, caliarunani tau͡gken, ukveran-qaa anirturciqaa? 15Anelgutsi angun wall'u arnaq matangqakan kainiqluni-llu, 16ilavci-llu qanruskaki, “Uitanqegciluci ayagci, maqarqici ner'aqluci-llu,” amta-llu cikirpek'naki piilutaitnek, cakaniutnguciqa tamana? 17Tuaten-llu ukveq caliarilkuni tuqumauq kiimenani. 18Tau͡gaam, yuk qanerciquq, ukvengqertuten wii-llu caliarlua; nasvisnga ukverpenek caliarunak, wii-llu nasviciiqamken ukvemnek caliamkun. 19Ukvertuten Agayucetangqerrucianek ataucimek, elluarrluten piuten. Anernerrluut-llu ukvermiut uuleggluteng-llu. 20Umyugailnguuq, taringenritan-qaa ukveq caliarunaku tuqumacianek? 21Ciuliarput-qaa Abraham-aaq elluakumallrunrituq caliamikun, Isaac-aamek tun'illermini ekuavigmi. 22Tangrran-qaa qaillun ukverem piurtelaucia caliamikun, caliakun-llu ukveq pitalqeggilaucianek. 23Qaneryaraq-llu piciurtuq qanelria, “Abraham-aam Agayun ukveqaa, ellualriamek-llu aprumatekluku,” aterpagingallruuq-llu Agayutem yugnikekiinek. 24Tua-i-llu tangrrarci qaillun caliakun yuk elluakumalaucia, ukverkun kiingan pivkenani. 25Tuaten-llu akissuq Rahab, caliamikun elluakumallruuq ciuniurillermikun kevgagnek, qimagtellukek-llu tumyarakun allakun. 26Tua-i tema anernerunani catngunriluciatun, tuaten-llu ukveq caliarunani catngunrituq.

Currently Selected:

James 2: YPK

Highlight

Copy