1 Kings 7

Solomon-aam Atanruvia

1Solomon-aaq cali eneliuq pikaminek, allrakuni qula pingayunek cipluku piliaqaa. 2-3Ena Napainek Lebanon-aam#7.2-3: enii napain Lebanon-aam: Angtuaq quyurtaarvik atanruvigmi, waten aciumanganani iluqliliumiimi unailngurnek napanek cedar-aanek. taktaluni yuinaat malrunelgen qulmek cipluku (150) it'ganernek taktaluni, yuinaat-llu pingayun akimiarmek cipluku (75) it'ganernek iqtutaluni, yuinaak-llu malruk tallimanek cipluku (45) it'ganernek qertutaluni. Pingasuinek nalleqliqellrianek naparyarluni unailngurnek napanek, cedar-aanek, akimiaruqa'aqluteng naparyat akiqliqellriit, qallirluteng napanek unailngurnek, cedar-aanek. Qilii napat unailnguut, cedar-aat patumaluku, cipneran elagyat ilakluki, nayumiqasterluteng napanek unailngurnek, cedar-aanek naparyanek. 4Avategkeni qacarneregni egalertangqerrluni pingayunek nalleqliqellrianek. 5Amiiget egalret-llu takernilrianek menglengqerrluteng pingasuin-llu nalleqliqellriit egalret tamarkegni qacarneregni caumaluki akiqliteng nalleqliqellriit.

6Pekcaraq naparyatgun taktallruuq yuinaat pingayun akimiarmek cipluku (75) it'ganernek, iqtutaluni-llu yuinaak malruk tallimanek cipluku (45) it'ganernek. Qilalegmek elaturrarluni, naparyanek ayagterluni.

7Atanruvik, Apqaurvigmek cali aterpagcimalria, Solomon-aam arenqiirturvia pinarqellrianek, qacarniumallruluni unailngurnek napanek cedar-aanek tumarnernek natrem engeliinek qilai tekilluki.

8Solomon-aam elliin nakmiin uitavii, allam apqaurviim tunuani, piliaqumaut allacetun ela'avkaacetun taqumalriacetun. Elliin cali ayuqiinek nuliani enelia, Egypt-aarmiut atanrata pania.

9Tamarmeng makut eneliat ilakluku angelria apqaurvik taqumaut teggalquqegtaarnek tusnganritnek ayagluki qilaita engeliitnun. Teggalqut upcimaluteng tegumavimeggni kepumaluteng engelqiulluki uitallerkaatnun, ilulirnerkait elatekait-llu manigcaumaluteng kegglarluki. 10Tusnganret piliaqumaluteng upcimaluteng-llu teguviatni taqumaluteng angelrianek teggalqunek ilait taktaluteng qula malrugnek cipluku it'ganernek (12) allat-llu akimiarnek it'ganernek (15). 11Qaingitni allanek teggalqurtarluni, kepumaluteng engelqiulluteng, napat-wa unailnguut cedar-aat naparyat. 12Atanruviim quyurrvia, iluqliq quyurrvia Agayuvigpiim, itraryarai-llu Agayuvigpiim qacarnengqertut muragnek unailngurnek cedar-aanek naparyanek atauciinek qalliqluteng pingasuingit teggalqunek kepumalrianek pingqerraqluteng.

Huram-aam Caliarkaa

13Angayuqaq Solomon-aaq taisqiuq angutmek aterluni Huram-aamek, pilinguarta uitaluni nunarpiini Tyre-am, punerneliuryaramek elisngalria. 14Elliin atii, unguvanrilleq, Tyre-armiungullruluni, elisngamillruluni-llu punernernek pilinguaryaramek; aanii kingunerluni Naphtali-m ilakellriarinek. Huram-aaq umyuartulriaruluni elisngalriaruluni-llu calinguaryaramek. Elliin ciuniuraa Solomon-aamek kelgumallni caliaqesqelluku tamalkuan punerneliuryaraq.

Malruk Nalleqliqellriik Punernerek Naparyak

15Huram-aam qallilirak malruk naparyak punernermek, tamarmek yuinaq malrunlegnek cipluku (27) it'ganernek sugtutalutek akimiaq-llu pingayunek cipluku (18) it'ganernek uivetmun angtalutek, ellilukek-llu iteryaraanun Agayuvigpiim. 16Malrugnek-llu cali piliuq punerneregnek kangerkiurluni atauciq pingayunelgat it'ganret avguluku (7 1/2) sugtutaluni, ellimaarkaulutek kangkegnun naparyak. 17Kangkek tamarmek naparyak tangnircaumalutek piirrimalrianek kalivnernek 18nalleqliqellrianek-llu punernernek qeltairyararngalngurnek atsanek.

19Kangrek taukuk eluciliumalutek naucetaatun lily-tun, arvinlegnek it'ganernek sugtutalutek, 20ellimalutek-llu uivenqellriamun quliitni uitalriamun piirrimalriit kalivneret. Pitangqertuq yuinarnek qulnek (200) qeltairyararngalngurnek atsanek nalleqliqellrianek kassutmun kangregni tamarkenka.

21Huram-aam elliak ukuk punernerek naparyak ciuqerranun iteryaraan Agayuvigpiim: ungalalirnermelnguq atengqertuq Jachin-aamek#7.21: Jachin-aamek: Uum atrem niitellra Hebrew-cetun ayuquq waten “piniakun” (Agayutem). neglirnermelnguq-llu aciraat Boaz-aamek. 22Naucetaatun lily-tun elucilgek kangerkak punernerek uitalutek naparyak kangkegni.

Tua-i caliaqumallrat naparyat qaqituq.

Punerneq Mervik

23Huram-aaq piliuq punernermek mervigmek, pingayunelgat it'ganret avguluku (7 1/2) et'utaluni, akimiarnek-llu it'ganernek uivenqegtaluni, yuinaak-llu malruk tallimanek cipluku (45) it'ganernek uivetmun angtaluni. 24Mengliini elalirnermi kassutmun merviim malruinek nalleqliqellrianek punernernek nuts-aarngalngurtarluni, kaugtuarumalrianek ilakliiyulluki mervigmun. 25Mervik tusngaluni tunuitnun qula malrugnek cipluku (12) punernernun kuluviit angucaluitnun elatmun caumalrianun, pingayuluteng caumallgutkaqluteng. 26Avatai merviim pingayunek cuqnernek mamtutaut. Qerrlua-llu qerrluatun saskam ayuqluni, cillangqaluni naucetaam lily-m naugillran cillarneratun. Mervik imangqerrsugngaluni tiissitsaanek qulnek (10,000) gallon-aanek.

Punerneret Ikamracuaraat

27Huram-aaq cali piliuq qulnek ikamracuanek punernernek; atauciq arvinlegnek it'ganernek taktaaqluni, arvinlegnek-llu it'ganernek iqtutaaqluni, tallimiit-llu avegluku (4 1/2) qertutaaqluni. 28Taqumaaqluteng yaassiigenqellrianek tumarnernek ellimaluteng tarenrarvignun avatellegnun, 29pilinguartarluteng yugtutulinek, angucalunek kuluvagnek, yaqungqellrianek-llu qaingatni tumarneret; qaingatni-llu tarenrarviit avatellget, quliitni aciatni-llu yugtutulit, angucalut-llu kuluviit, qilunguarngalngurnek cimiqaumasterluteng. 30Tamarmeng ikamracuaraat cetamanek punernernek akalriarluteng punernernek-llu nuvuterluteng akalriarit. Kangiraitni cetamani punernernek tegg'ucetarluni ermigcuutet nekaitnek; tegg'utet tangnircaumaluteng qilunguanek enairtaagulluteng. 31Uivenqellriartarluni kangritni tusngavigkanek ermigcuutnun. Caumaluni qulmun quyigtaluni akimiaq pingayunek cipluku cuqnek quliignek ikamrak malrunlegnek-llu cuqnek iluagnun acitmun pimaluni. Nuussitgun pilinguartarluni avatii. 32Akalriat yuinaq tallimanek cipluku (25) cuqnernek qertutaluteng; aciitnelluteng tumarneret, nuvutait akalriat ilakliiyusngaluteng ikamranun. 33Akalriat ayuqluteng pekcessuutet akalriaricetun; nuvutet, menglait, akalriat-llu teggutait, akalriat-llu patuit tamarmeng punerneruluteng. 34Cetamanek teggucetarluni atlirnerni cetamani kangiraitni ikamrat, ilakliiyusngaluteng ikamranun. 35Pitangqerrluni-llu qulngunrita'arnek cuqnek iqtutalrianek nemrutnek avataitni kangrita ikamrat; teggutait tumarneret-llu ilakliiyusngaluteng ikamranun. 36Tegg'utat tumarneret-llu tangnircaumaluteng elucilegnek yaqulegtun, yugtutulitun, napatun-llu palm-at nengqerrutaciicetun, qilunguarngalngurnek tamarmi avaterluni. 37Wani-wa, una, qaillun ikamrat taqumallruciat; ayuqurluteng, angtatekluteng, elucillgutekluteng-llu.

38Huram-aaq cali piliuq qulnek ermigcuutnek, ataucimek ikamraq piaqluku. Atauciq ermigcuun arvinlegnek it'ganernek uivenqegtaaqluni imangqerrsugngaaqluni-llu yuinarnek qulnek (200) gallon-aanek. 39Elliiguq tallimanek ikamracuarnek ungalalirneranun Agayuvigpiim, cali-llu tallimanek neglirneranun; mervik-llu ellia ungalam calaralirneranun kangiramun.

Tamarmeng Igausngallrit Agayuvigpiim Taqevsiarutain

40-45Huram-aaq cali pilillruuq egatnek, qanikciurutnek, miiskaanek-llu. Qaqitai tamalkuita caliani Angayuqamun Solomon-aamun Atanrem Agayuvigpiin pikai. Waniwa piliallri:

Malruk naparyak

Malruk qantatun elucilgek naparyak kangregkeni

Qaralit kuvyangalnguut kalivneret kangregken qaingatni

Yuinaat-llu yuinaat (400) punerneret qeltairyararngalnguut atsat, malruin nalketatekuurluteng yuinaat tallimauqaqluteng (100) avataitni kangrita

Qulen ikamracuat

Qulen ermigcuutet

Mervik

Qula malrugnek cipluku (12) angucalut kuluviit nayumiqastiit merviim

Egatet, qanikciurutet, miiskaat-llu

Tamarmeng makut aklukai Agayuvigpiim, Huram-aam piliallri Angayuqamun Solomon-aamun, pilimaut qevlercaumalriamek punernermek. 46Angayuqam piliaqevkallrui tegglinek urugcivigmi akuliigni Sukkoth-ankuk Zarethan-aaq-llu, kuignayugmi Jordan Valley-mi. 47Solomon-aam makut punernernek piliaqumalriit uqamaltassiillrunritai, amllessiyaagata, taumek qaillun uqamiita pitacia nallunriumanrilnguq.

48Solomon-aam cali pilivkarai suulutaat taqevsiarutai Agayuvigpiim: ekuavik, estuuluat kelipat elliitekumalriit Agayutmun, 49qulen kenurrarviit napalriit ciuqerrani Tanqikapiaralriim, talliman ungalalirnermenateng talliman-llu neglirnermi; naucetaat, kenurrat, pupsuut-llu uuqnarqellrianek; 50saskat, nipcissuutet, miiskaat, qantat aruviarcuutet, kenercissuutet-llu egatet, suulutaat; arivneri-llu amiigin Tanqikapiaralriim elaqliit-llu amiigin Agayuvigpiim. Tamarmeng makut taqumaut suulutaarrlainarnek.

51Tuani Angayuqam Solomon-aam qaqicamiki caliaqumaarkat Agayuvigpagmi, nek'egtai tamalkuita Agayuvigpiim elagyaanun tamalkuita cat atami David-aam umyuaqusngallri Atanermun —qerrirlit, suulutaat, allat-llu taqumalriit.

Currently Selected:

1 Kings 7: YPK

Highlight

Copy