1 Kings 6

Solomon-aam Nautaa Agayuvigpak

1Yuinaat yuinaq yuinaat-wa cetaman (480) allrakut kinguatni Israel-aam yui ayaggaanratnek Egypt-aamek, allrakut-llu cetamiitni Solomon-aam atanirturillran Israel-aanek, iralum aipaani, iraluani Zif-am, Solomon-aam ayagniraa caliaqluku Agayuvigpak. 2Ilua taktaluni yuinaat cetaman qulmek cipluku (90) it'ganernek, yuinaq qulmek cipluku (30) it'ganernek iqtutaluni, yuinaak-llu malruk tallimanek cipluku (45) it'ganernek quyigtaluni. 3Iteryaraq-llu enecuar ilututaluni akimiarnek it'ganernek yuinaq-llu qulmek cipluku (30) iqtutaluni, iqtutaciluku agayuvik. 4Qacarneri Agayuvigpiim ukineliumaluteng, nequkillruaqluteng elalirnerit ilulirnemeggni. 5Elalirnerni qacarnerni, avategkeni tunuani-llu Agayuvigpiim, pingayunek qullilegmek ilaluku piliaqumalriartarluni, qulliq atauciq malrunlegen avegmek cipluki (7 1/2) qertutaluteng. 6Tamarmeng aciqlikacaarmi enecuaraat malrunelgen it'ganret avegmek cipluki (7 1/2) iqtutaluteng, akunleqlirmi qullirmi qulngunrita'arnek (9) it'ganernek iqtutaluteng, qullik'acagaq-llu qulliq qula avegmek cipluku (10 1/2) it'ganernek iqtutaluteng. Qacarneri Agayuvigpiim tamalkuitni qullirni mamkillruluteng natermi, tua-i enecuaraat uitayugngaluteng qacarnermi ayagtaileng'e'rmeng.

7Teggalqut-llu atuqengait Agayuvigpak nautellermeggni upcimaluteng tuani uitaviatni, taumek mulut'uulrianek niitnaituq, piqertualrianek, wall'u allanek cavignek calissuutnek Agayuvigpak naucimallrani.

8Iteryaraq atlikackacagarmun enemun ungalalirnera'antuq Agayuvigpiim, mayuryarartarluni tunglianun qullirmun pingayuatnun-llu qullirmun egmirluni. 9Tua-i Angayuqam Solomon-aam qaqitaa piliaqellerminek Agayuvigpak. Qiliraa-llu teggucirluku muragpagnek tuskanek-llu unailngurnek cedar-aanek. 10Pingayunek qullilek ilatii, qulliit tamarmeng enet pingayunelgat it'ganret avguaqluku qertutaluteng, taqumaut elalirnernun qacarnerinun Agayuvigpiim, itusngaluteng-llu muragpagnun unailngurnun cedar-aanun ayagten̄un.

11 Ataneq qanertuq Solomon-aamun, 12“Maligtaqukuvki tamalkuita picirkiutenka alerquutenka-llu, elpenun piciurciiqanka akqutellrenka atavnun David-aamun. 13Wiinga uitaciqua yum'a Israel-aat akunliitni wani Agayuvigpagmi piliaqek'ngavni, watqapik-llu unisngaitanka.”

14Tua-i Solomon-aam naulluku qaqivsiaraa Agayuvigpak.

Iluan Taqenqegcautai Agayuvigpiim

15Ilulirnermi qacarneret pategciumaut unailngurnek muragnek tumarngalrianek natermek qilii tekilluku, nateq-llu piliaqumaluni muragnek pine-anek. 16Iluqlikacaaq encuar aprumalria Tanqinruqapiar, naucimauq tunulirnerani Agayuvigpiim. Taktaluni yuinaq qulmek cipluku (30) it'ganernek capkuciumaluni-llu unailngurnek tuskanek cedar-aanek natermek qilii tekilluku. 17Enecuar ualirnerani Tanqinruqapiaralriim taktauq yuinarnek pingayunek (60) it'ganernek. 18Unailnguut tumarneret cedar-aat tangnircaumaut nuussitgun naucetaanek mamtulrianek qeltelegnek naucetaanek-llu; tamarmi-llu ilua patumaluni unailngurnek muragnek cedar-aanek tumarnernek qaqilluni, teggalqut qacarnermi tangrruungairutelluki.

19Tunulirnerani Agayuvigpiim iluqliq enecuar piliaqumauq, Atanrem Akqutiin Yaassiigegken uitavigkaagnek. 20Una iluqlikacaar ena taqumauq yuinaak malruk qulmek cipluku (30) it'ganernek taktaluni, yuinaak malruk qulmek cipluku (30) iqtutaluni, quyigtaluni-llu yuinaak cali malruk qulmek cipluku (30), tamarmi qallircimaluni suulutaamek. Ekuavik qallircimauq unailngurnek muragnek cedar-aanek tumarngalrianek. 21Ilua Agayuvigpiim qallircimauq suulutaamek, suulutaanek-llu kalivnernek ellivikumaluni qeratmun iteryaraa iluqliim, cali tauna patumaluni suulutaamek. 22Qaqilluni tamarmi ilua agayuvigpiim qallircimauq suulutaamek, ekuavik-llu tuaten Tanqinruqapiaralriim Uitaviani.

23Malruk yaqungqellriik piliak taqumalutek allakucinek napanek nalayuilngurnek olive wood-anek ellimalutek-llu Tanqinruqapiarmun, tamarmek akimiarnek it'ganernek sugtutalutek. 24-26Tamarmek ayuqlutek angtaciak eluciak-llu. Tamarmek malrugnek yaqurlutek, tamarmek yaqukek pingayunelgat it'ganret avguluku (7 1/2) taktalutek, taktaciak yaqum nuuganek ayagluni ikavet ingluan nuuganun akimiarnek (15) it'ganernek taktaluni. 27Ellimalutek-llu caniqliqlutek Tanqinruqapiaralriim Uitaviani, tamarmek yaqukek yagingalriik nuukek agtuusngallutek atunem natrem qukaan nalliini, yaqugkenka-llu inglukek yagingalriik agtumaluku qacarneq. 28Tamarmek yaqulgek piliak caqumalutek suulutaamek.

29Tamarmeng qacarneri enem iluqliim-llu tangnircaumaut nuussitgun pilianek elucilegnek yuguanek yaqulegnek, palm-anek napanek, naucetaanek-llu. 30Natra-llu qallircimaluni suulutaamek.

31Pategtelek ikirtuqaq piliaqumalria allakucinek napanek nalayuilngurnek olive wood-anek ellimauq iteryaraanun Tanqinruqapiaralriim; qulirneran amiigem cingikegglutek kangiraak. 32Amiiget-llu tangnircaumaluteng nuussitgun pilianek elucilegnek yuguanek yaqulegnek, palm-at napaitnek, naucetaanek-llu. Amiiget, yaqulget piliat, palm-at-llu napat qallircimaluteng suulutaamek. 33Iteryararkaa enemun taksurnilriamek yaassiiguamek unailngurmek muragmek cedar-aamek pikiuraat. 34Tuani amiigtangqertuq imtuliinek taqumaluteng napanek pine-anek 35tangnircaumaluteng nuussitgun yaqulegnek pilinguanek, palm-anek napanek, naucetaanek-llu, pitatekluteng qalliliumalrianek suulutaamek.

36Iluqliq apqaurvik piliaqumauq ciuqerrani Agayuvigpiim, avaciumaluni qacarnernek pingasuin qalliryagusngalriit teggalqut akuliliumaaqluteng muragnek cedar-aanek quaguluryagnek.

37Tusnganra Agayuvigpiim ellimallruuq tungliani iralum, iraluani Zif-am, cetamiitni allrakut ataniurillran Solomon-aam. 38Pingayunelgatni iralut, iraluani Bul-am, qula ataucimek cipneratni (11) allrakut ataniurraanranek Solomon-aaq, Agayuvigpak taqellruuq atuqapiarluku picirkiurumallra. Allrakut malrunelgen aturluki Solomon-aam piliaqellrua tauna.

Currently Selected:

1 Kings 6: YPK

Highlight

Copy