1 Kings 15

Judah-m Angayuqra Abijah

1Wani-wa akimiaq pingayunek cipluku (18) allrakut pitarillratni ataniurillra atanrem Jeroboam-aam Israel-aami, qetunraan Nebat-aam, Abijah ayagnirtuq atanruluni Judah-mi. 2Atanrullruuq Jerusalem-aami allrakuni pingayuni. Aanii atengqertuq Maacah-mek pania Abishalom-aam. 3Piyuallruuq-llu assiilngurkun atami pillruciatun ciumini; ircaqrua-llu tamalkiringavkenani Atanermun Agayutminun, ircaqruatun atami David-aam. 4Tuaten pingraan David-aaq pitekluku Atanrem Agayutiin cikillrua Abijah qetunrarkaanek ataniurisqelluku kinguakun Jerusalem-aami cayailkuciisqelluku-llu Jerusalem-aaq. 5Atanrem waten pivkaraa David-aaq pillruan elluarrluni tangvallrani, tuigteksaunani-llu alerquutainek yuullmi taktaciatun, tau͡gaam ataucirqumek Uriah-mun Hittite-amun pillermikun. 6Wani-wa anguyauqurallruuk ellmegnun Rehoboam-aaq Jeroboam-aaq-llu yuullmek taktaciatun. 7Allat pilallri Abijah-m, tamarmeng-llu pillri igausnganritut-qaa kalikarni igausngaviatni Atanrin Judah-m? Anguyauqurallruuk-llu ellmegnun Abijah-nkuk Jeroboam-aaq-llu.

8Abijah-m-llu tungmagcimallgutkai ciuliani; tungmagtaat Nunarpiinun David-aam, qetunraa-llu Asa enairluku angayuqrurtuq.

Judah-m Angayuqra Asa

9Yuinaurutiitni allrakut Jeroboam-aam atanirturillran Israel-aanek, Asa ayagnirtuq atanirturiluni Judah-mi, 10Atanrullruuq-llu Jerusalem-aami yuinaak malruk ataucimek ciplukek (41). Aanii atengqertuq Maacah-mek pania Abishalom-aam. 11Asa-llu caliuq elluarrluni tangvallrani Atanrem, David-aam atami pillratun. 12Piunrirtellrui angutet akissut, au͡g'arluki-llu agayutnguat atami piliallri. 13Au͡g'armia-llu aanani Maacah queen-auluni aanaullranek, tua-i-wa uuminarqeqapigtellriamek pingqerran piliaqumalriamek Asherah-mun; Asa-m-llu kepaa agayutnguani ekualuku-llu Kuicuarmi Kidron-aami. 14Tau͡gaam agayularviit agayutnguanun au͡gaumanritut. Tuaten pingraan Asa piciuguq Atanermun yuullermi taktaciatun. 15Elkartai-llu Agayuvigpagmun cat tamalkuita atami cikiutekellri Agayutmun, ilakluku suulutaaq, cat-llu qerrirlimek pilimalriit elliin cikiutni.

16Kesianek-llu Asa Judah-m Angayuqra, Baasha-llu Israel-aam Angayuqra anguyauqurallruuk angayuqaullermek taktaciatun. 17Baasha-m-llu atanran Israel-aam itraa Judah, cayailkuciraa-llu Ramah, arulairrnaluku yuut it'lallrat anlallrat-llu Asa-mun atanranun Judah-m. 18Tua-llu Angayuqam Asa-m tegui tamalkuita suulutaat qerrirlit-llu uitaqallret Agayuvigpagmi angayuqam-llu eniini, tuyuqluki-llu atanerruamikun Damascus-aamun, Syria-m Angayuqranun Benhadad-aamun, Tabrimmon-aam qetunraanun tutgariinun Hezion-aam, waten qanercirluki: 19“Ataki pillguteksagulluk wiinga elpet-llu, atapuk pillruciagtun; tuyuramken cikiutnek qerrirlimek suulutaamek-llu; ullagluku piunrircarturru ilakuyutsek Baasha-q-llu atanra Israel-aam, ayagnaurtuq anguyagten̄i malikluki nunamnek.”

20Benhadad-aam-llu niitaa Angayuqaq Asa, ayagtelluki-llu alerquastait anguyagtem̄i anguyagtait-llu anguyagluki nunarpait Israel-aat, cirlakluki-llu Ijon-aaq, Dan-aq, Abel Beth Maacah-q, tamalkuan-llu Chinneroth-aaq, nunii-llu tamalkuan Naphtali-m. 21Baasaha-m-llu niicamiu tuaten pillrat taqaa caliani Ramah-mi, ayagluni-llu Tirzah-mun.

22Angayuqaq-llu Asa alerquiguq tamalkuan Judah-mun kina pinritevkenaku ikayuulluki ayaucesqelluki teggalqut Ramah-mi muragpiit-llu, Baasha-m atullri asvairqellermini Ramah. Aturluki-llu Baasha-m asvairqucirak Mizpah Geba-llu, nunarpak Benjamin-aam nunautiinelnguq.

23Wani-wa tamarmeng caurallrin Asa-m, pinirtacimitun, tamarmeng-llu elliin pillri, nunarpiit-llu piliallri, igausnganritut-qaa tamarmeng kalikaitni igausngaviita caurallrit atanrin Judah-m? Tau͡gaam ak'allaurrluni naulluutengellruuq it'gamikun. 24Asa-m-llu tungmagcimallgutkai atani Nunarpiini David-aam atami; Jehoshaphat-aq-llu atanrurtuq enairluku.

Israel-aam Angayuqra Nadab-aq

25Nadab-aq qetunraa Jeroboam-aam ataniunguq Israel-aami aipaani allrakum ataniullran atanrem Asa-m Judah-mi; ellii-llu ataniullruuq Israel-aani allrakugni malrugni. 26Ellii pillruuq assiinani tangvallrani Atanrem, piyualuni-llu atami pillratun, assiilngillermikun-llu Israel-aat assiilngircetai.

27Baasha-q qetunraa Ahijah-m ilakellriarinek Issachar-am, uptuq nalluvkarluni inglukluku Nadab-aq; Baasha-m-llu tuqutaa Gibbethon-aami, Philistine-at nunautiitni; tuani Nadab-am tamarmeng-llu Israel-aat kassugusngallratni Gibbethon-aaq. 28Tua-i Baasha-m tuqutaa pingayuatni allrakut ataniullran atanran Asa Judah-m, atanrurrluni-llu enairluku. 29Tamaa atanrurcami tuqutai tamalkuita ilai Jeroboam-aam; uitaciinrituq iliinek Jeroboam-aam anernelegmek, maliggluku qanellra Atanrem pistem̄ikun Ahijah-kun Shilonite-akun. 30Tamana piuq pitekluku assiilngua Jeroboam-aam, Israel-aat-llu elliin assiilngirtelluki, qenngevkallruaku Ataneq Agayutiit Israel-aat.

31Wani-wa allat caurallri pillri-llu Nadab-am, igausnganritut-qaa igausngaviitni kalikarni atanrin Israel-aat? 32Kesianek-llu Asa Judah-m Angayuqra, Baasha-llu Israel-aam Angayuqra anguyauqurallruuk angayuqaullermek taktaciatun.

Israel-aam Angayuqra Baasha

33Pingayuatni allrakut Asa-m atanirturillran Judah-mi, Baasha qetunraa Ahijah-m atanirturinguq Israel-aani tamalkuita Tirzah-mek, atanrullruluni-llu allrakuni yuinaq cetamanek cipluku (24). 34Ellii-llu piluni assiitellriamek tangvallrani Atanrem, piyualuni-llu Jeroboam-aam pillratun assiilngillermikun-llu Israel-aat assiilngirtelluki.

Currently Selected:

1 Kings 15: YPK

Highlight

Copy