1 Kings 14

Tuqullra Jeroboam-aam Qetunraan

1Taum nalliini Abijah qetunraa Jeroboam-aam naulluunguq. 2Jeroboam-aaq-llu qanertuq nuliaminun, “Nangerrluten allaunguarluten aturaa elpenek, nallunaqniartuq nulirqucin Jeroboam-aamun, ayagluten-llu Shiloh-mun; Ahijah prophet-aaq tuantuq, qanlleq atanrunaqnilua ukunun yugnun. 3Ang'aqluten qulnek kelipanek, cake-aanek-llu, putiilekaamek-llu paatakaarngalngurmek, ullagluku-llu; qanruciiqaaten-llu qaillun pillerkaanek mikelnguum.”

4Jeroboam-aam nulirra tuaten piuq; nangerrluni ayagtuq Shiloh-mun. Tekilluni-llu eniinun Ahijah-m. Wani-wa Ahijah tangerciigatuq ak'allaurcami iik takvialiuk. 5Atanrem-llu qanrutaa Ahijah, “Tangerrluku nulirra Jeroboam-aam taiguq apqauryarturluten qetunrani pitekluku. Tauna naulluungan.” Atanrem-llu qanerkaanek qanrutaa.

Tekicami allaunguarluni piuq. 6Tau͡gaam Ahijah-m niicamiu piyuallra, amiigmun tekican, ellii qanertuq, “Itra, Jeroboam-aam nulirra; ciin allaunguarcit? Niitnirqenrilngurmek qanerkangqertua elpenun. 7Ayagluten qanrucarturru Jeroboam-aaq, Waten qanertuq Ataneq, Agayutiit Israel-aat: ‘Nalullruamken akuliitnek yuut, ciuliqagten͞gurrluten-llu yumnun Israel-aanun. 8Teguluku-llu angayuqauvik kinguvrinek David-aam tunluku-llu elpenun; tau͡gaam ayuqenrituten pistemtun David-aatun, alerquutma aturtekellratun, maligtesteklemtun-llu ircaquni tamalkirrluku, caliaqluni elluakekemnek tangvallemni. 9Tau͡gaam elpet caliuten, assiitellriamek anagvagluki ciuqliten ayagluten-llu elpenek agayut'liluten unatetgun taqumalrianek, qenngevkaraqlua, calligglua-llu kingunerpenun. 10Taumek man'a pitekluku assiitellria pivkarciqaqa atanirturillranun Jeroboam-aam, au͡g'arciqanka-llu tamalkuita angutet, teguat teguarunrilnguut-llu Israel-aani, piunrirarkauluki-llu ilai Jeroboam-aam, carriumaciqut anatun. 11Kina imna ilii Jeroboam-aam tuqukan nunarpagmi qimugtet ner'arkaugait; kina-llu tuqukan yuilqumi catailngurmi yaqulgin ellam ner'arkaugait; tua-i Atanrem qanrutkellruaku.’”

12“Nangerrluten taumek ayii enevnun, it'gagpet nunarpak itqatgu, mikelnguq tuquarkauguq. 13Tamarmeng-llu Israel-aat nepliutekarkaugaat, tungmagciiqaat-llu; tauna kiimi qunguumaarkauguq, tua-i-wa elliini ilukegcinarqellriartangqerran Atanermun Agayutiitnun Israel-aat. 14Tamana ilaluku Ataneq nangerciarkauguq atanirturtekaatnek tamarmeng Israel-aat, kepestekaat Jeroboam-aam kinguvrin-llu atanirturilallrat unuamek. Wak'nirnek-llu 15Atanrem anucimirqecetaarciqaa Israel-aaq, qiiveciquq iitaruaq angalacimalauciatun mermi, qecuumaciquq-llu Israel-aaq naumavikegcillranek nunami cikiutekellrani ciuliaritnun, cekavcimaciqut-llu yaatiinun Kuigem Euphrates-aam, tua-i-wa agayutnguamegteggun Asherim-aakun Ataneq qenngevkalaamegteggu. 16Elliin-llu pegciiqai Israel-aat tua-i-wa assiilngui pitekluki Jeroboam-aam.”

17Tua-i Jeroboam-aam nulirra nangertuq, ayagluni-llu tekituq-llu Tirzah-mun. Tua-llu wani-wa tekilluku amiigem tuc'araa mikelnguq tuquuq. 18Tamarmeng-llu Israel-aat tungmagtaat, nepliatekluku-llu, qanellruciatun Ataneq, pistem̄ikun Ahijah-kun prophet-aakun.

Tuqullra Jeroboam-aam

19Wani-wa allat Jeroboam-aam pillri, anguyautelallri, atanirturillra, tangerrluku tamakut igausngaut igausngaviitni atanrullret Israel-aani. 20Taktacia-llu atanirturillran Jeroboam-aam, allrakut yuinaq malrugnek cipluku (22); pillguciutuq-llu ciuliaminun qetunraan-llu Nadab-am enairluku atanrurtuq.

Judah-m Angayuqra Rehoboam-aaq

21Wani-wa Rehoboam-aaq atanrullruuq Judah-mi qetunraa Solomon-aam. Rehoboam-aaq yuinaak malruk ataucimek ciplukek (41) allrakungellruuq atanrurtellermini, atanirturillruluni-llu akimiaq malrugnek cipluku (17) allrakuni Jerusalem-aami, nunarpak Atanrem cucukellra ilakellgutkellriartainek Israel-aam, at'ni tuavet ellinaluku. Aaniin atra Naamah-ruuq Ammonite-auluni.

22Judah-llu assiinani pillruuq tangvallrani Atanrem, ellaita-llu ciknangevkallruat assiilngurnek pillermegteggun, arcaqerluku atiita pillran. 23Naucillruut ciktaalarvigkemeggnek, teggalqunek-llu qalliryagusngalrianek, Asherim-aam agayutnguameng nallunailkutainek qertulriani napat-llu talinilriit aciitni. 24Tamaani cali pitangqertuq angutnek, arnanek-llu akissunek nunami. Tuatnalartut uuminarqeqapiggluteng ilakellgutkelriaruluteng piciryarallritnek anevkallrin Atanrem ciunratnek Israel-aat.

25Allrakut tallimiitni atanrullran Rehoboam-aam, atanran Egypt-aam anguyagaa Jerusalem-aaq. 26Ayautai-llu tukuutai eniin Atanrem, tukuutai-llu angayuqam eniin; tegui cat tamalkuita, tapeqluki suulutaat anguyagcuutet capkutat Solomon-aam piliallri. 27Angayuqaq-llu Rehoboam-aaq tamakut cimirluki piliuq capkutanek punernernek, tunluki-llu atanerruaritnun tarikestet, qaunqilriit amiiginek angayuqam eniin. 28Ayallra tamalkuan Agayuvigpagmun nayurtet tegumiaqelarait ataam-llu ut'rulluki nayurtet uitaviatnun.

29Wani-wa caurallri Rehoboam-aam, caqallri-llu tamarmeng igausnganritut-qaa Kalikarni Caurallrita Atanrin Judah-m? 30Anguyauqu'rtuk-llu Jeroboam-aankuk Rehoboam-aaq-llu taqsuunatek. 31Tuqullgucirai-llu Rehoboam-aam atani tungmagcimallgutekluki-llu Nunarpiini David-aam. Aanii atengqerrluni Namah-mek Ammonite-auluni. Abijam-aaq-llu qetunraa enairluku atanrurtuq.

Currently Selected:

1 Kings 14: YPK

Highlight

Copy