1 Kings 16

1 Atanrem-llu qaneryaraa taiguq Jehu-mun qetunraanun Hanani-am waten qanrutesqelluku Baasha, 2“Nalullruamken caunritlerpenek ciuliqagten͞gurrluten-llu yumnun Israel-aanun, piyuaguten-llu picillratun Jeroboam-aam, yuunka-llu Israel-aat assiilngirtelluki, eq'uqertellua assiilnguit pitekluki. 3Taumek au͡g'arciqaqa Baasha ilai-llu, Jeroboam-aaq pillrucimtun qetunraa Nebat-aam. 4Baasha-m ilakellriarin iliit nunarpagmi tuqukan qimugtet nerciqaat kina-llu imna ilii tuqukan yuilqumi yaqulgin ellam nerciqaat.”

5Wani-wa caurallrin Baasha-m ilait, pillri-llu alingurarpek'nani-llu callri igausnganritut-qaa kalikaitni Igausngaviita Atanrin Israel-aam? 6Baasha-m-llu tungmagcimallgutkai ciuliani tungmagcimaluni-llu Tirzah-mi; Elah-llu qetunraa atanrurtuq enairluku.

7Tamana ilaluku Atanrem qaneryaraa taillruuq prophet-aakun Jehu-kun qetunraakun Hanani-am, inglulirluku Baasha ilai-llu tamalkuita, tua-i-wa assiitellriamek pillruan tangvallrani Atanrem, qenngevkaraqluku Ataneq assiitellriakun caliamikun Jeroboam-aam pillruciatun, cali-llu tuqutellruaki tamalkuita Jeroboam-aam ilai.

Israel-aam Angayuqra Elah

8Yuinaq arvinlegnek cipluku (26) allrakungluku ataniullran Asa-m Judah-mi. Elah qetunraa Baasha-m ayagnirluni ataniungellruuq Tirzah-mi, atanruluni-llu allrakugni malrugni. 9Tau͡gaam pistii Zimri-q, alerquastiit avgita ikamrartain, picirkiurtuq inglukluku Elah. Tirzah-metlermini merluni taangiqluni eniini Arza-m, angayuqam eniin tarikestiin Tirzah-mi. 10Zimri iterluni iqutaa tuqulluku-llu, yuinaq malrunlegnek (27) cipnengqerluku ataniullra Asa-m atanran Judah-m, ataniurluni-llu enairluku.

11Ayagniami ataniurluni, ellminek aqumngami aqumllermun, tuqurqai ilai Baasha-m; uitaciinrituq atauciungraan angutmek tungelqurranek wall'u yugnikekiinek. 12Tua-i Zimri-m piunrirai ilai Baasha-m, qanellra Atanrem aturluku, Jehu-kun prophet-aakun. 13Agayutngualiulallermegnegun, Israel-aaq-llu maryarrluku assiilngurmun, Baasha-nkuk qetunrani-llu Elah eq'uqercetellruak Ataneq, Agayutii Israel-aam. 14Wani-wa caurallrin ilait Elah-m, pillri-llu tamarmeng, igausnganritut-qaa kalikarni igausngaviitni atanrin Israel-aam?

Israel-aam Angayuqra Zimri

15Yuinaq malrunelgatni (27) allrakut Asa-m ataniullran Judah-mi Zimri-q atanrullruuq ernerni malrunlegni, Tirzah-mi. Wani-wa Israel-aat anguyagtet avatairumaat Gibbethon-aaq Philistine-at nuniit. 16Anguyagtet-llu niicameng Zimri-m pillerkiullranek tuqulluku-llu angayuqaq, egmian Omri-q atanerruateng atanrurtaat Israel-aamun tuani ernermi. 17Tua-i Omri-q mayurtuq Gibbethon-amek, Israel-aat-llu tamarmeng maligtaat, avatairluku-llu Tirzah-q. 18Tuani-llu Zimri-m tangrramiu nunarpak tegumacia, itertuq iluqlikacagiinun atanruviim, ekuavkarluku-llu angayuqam enii, tuquluni-llu. 19Man'a waten pivkaraat assiilnguin elliin, caarrluuluni pilallran tangerqiini Atanrem, piyualallran tumaikun Jeroboam-aam, assiilngillermikun-llu Israel-aat assiilngircetaqluki. 20Wani-wa allat caurallri Zimri-m, aassaqluni-llu pillra igausnganritut-qaa Kalikarni igausngaviitni atanrin Israel-aam?

Israel-aam Angayuqra Omri

21Tua-llu yui Israel-aam avegtut malruirrluteng; avgita maligtaat Tibni-q qetunraa Ginath-aam, ataneqnaluku, avgita-llu maliggluku Omri-q. 22Tau͡gaam Omri-m maligcestain cirlakait maligcestai Tibni-m qetunraan Ginath-aam; tua-i Tibni-q tuquuq, Omri-llu atanrurtuq. 23Yuinaq qula ataucimek (31) cipnengellrani atanrullran Asa atanran Judah-m, Omri-q ayagnirtuq ataniurluki Israel-aat, atanruuq-llu qula malrugnek (12) cipluku; arvinlegni-llu atanruluni Tirzah-mi. 24Kiputaa-llu ingria Samaria-m Shemer-aamek tiissitsaanek arvinlegnek (6,000) akinek; pengegnairturluku-llu ingriq, acirluku-llu nunarpak piliallni, Samaria-mek, umyuaqluku Shemer-aam atra pikestellra ingrim.

25Omri-llu piuq assiitellriamek tangvallrani Atanrem, arcaqanruluni-llu allat ciuqlirmi pilallritni. 26Piyuaguq tamalkuitgun pillrikun Jeroboam-aam qetunraan Nebat-aam, assiilngurteggun-llu pillermikun assiilngircetai Israel-aat, qenngevkaraqluku Ataneq, Agayutiit Israel-aat agayutnguamegteggun. 27Wani-wa allat caurallri Omri-m, piniq-llu elliin nasvallra, igausnganritut-qaa kalikarni igausngaviitni pillrita angayuqrin Israel-aam. 28Omri-m-llu tungmagcimallgutkai ciuliani, tungmagcimaluni-llu Samaria-mun; Ahab-aq atanrurtuq enairluku.

Israel-aat Angayuqrat Ahab-aq

29Yuinaq akimiaq pingayunek cipluku (38) allrakut Asa-m ataniullran Judah-mi, Ahab-aq qetunraa Omri-m ayagnirtuq ataniurluki Israel-aat, Samaria-mi yuinaq malrugnek cipluku (22) allrakuni. 30Ahab-aq-llu qetunraa Omri-m assiitellriamek pillruuq tangvallrani Atanrem arcaqanruluni tamalkuitni ciuqlimini. 31Arcaqalriarunrilan ellmini piyualleq assiilnguikun Jeroboam-aam qetunraan Nebat-aam, nulirtullruuq Jezebel-aamek panianek Ethbaal-am atanrata Sidon-aarmiut, kevgiurluku-llu Baal-aq agayutnguaq ciktaarvikluku tuaten. 32Pilillruuq-llu ekuavigmek Baal-amun eniini, Samaria-mi piliallmini. 33Ahab-am arcaqanruluni qenngevkalallrua Ataneq, Agayutiit Israel-aat. Agayutngualillruuq-llu Asherah-mek. Arcaqanrullruuq tamalkuitni Israel-aani atanrullerni ciumini. 34Hiel-aam ataniullmi nalliini ataam nautellrua Jericho. Ciunguluku-llu Atanrem qanrutkellruciatun Joshua-kun, Nun-am qetunraakun, cagmarillrua ciuqliq qetunrani Abiram-aaq tusnganlillermini Jericho-q, nangnerat-llu qetunrani Segub-aaq piliaqellmini ikirtuqai.

Currently Selected:

1 Kings 16: YPK

Highlight

Copy