Hinangan 5

Si Ananiyas duk si Sappira

1Saguwaꞌ niyaꞌ dambuwaꞌ aꞌa inēnan Ananiyas. Andanen si Sappira. Pinabellihan weꞌ ne niyaꞌ bulakde, 2saguwaꞌ inennaꞌ weꞌ ne uline sinduwehin para si iye. Inin kataꞌuhan weꞌ andanen. Sinduwe sīnin sinōngan weꞌ ne pī si meꞌ kawakilanin duk paꞌinne weꞌ iye du miyaꞌan ulinen. 3Paꞌin si Petros si iye, “Ananiyas, weꞌey pasagadannu nakuraꞌ seyitanin magbayaꞌ dem ateynu, hangkan kew magdustaꞌ si Niyawa Sutsihin? Sabab inennaꞌ weꞌ nu uli bulaknun sinduwe. 4Tiggelan gaꞌ miyaꞌan tapabellinu, dumaꞌin ke miyaꞌan si kaꞌu du? Duk sakaliꞌ miyaꞌan tapabellinu, dumaꞌin ke kaꞌu du magbayaꞌin bang inumey ulinen? Weꞌey tapikilnu maghinang sa inin? Dumaꞌin manusiyaꞌ pagdustaꞌannun saguwaꞌ Tuhanin.” 5Pagkale Ananiyas meꞌ bissā miyaꞌan, magtawus iye hebbaꞌ matey. Duk kēmon makakale sabab kamateyne miyaꞌan, paꞌasekan talew teꞌed. 6Manjari padiyalem pī meꞌ lella mabataꞌin naput Ananiyas duk binoꞌo weꞌ de paluwas kinubul.

7Paglabey niyaꞌ tellu ora, tekka anda Ananiyasin saguwaꞌ gaꞌ kataꞌuhanne bang ine bakas maꞌumantagin. 8Paꞌin si Petros si iye, “Akahanun ku. Inin du ke halgaꞌ tasangkabi ulihan bulakbin?” “Aweꞌ,” paꞌin dendehin, “iye du iyan ulinen.” 9Manjari paꞌin si Petros, “Weꞌey teꞌ pagisunanbi duk ellanun weꞌ suleyanbi ngakkalan Niyawa Tuhanin? Pakalehun,” paꞌin si Petros, “iyuꞌ ne si behe gawang meꞌ bakas mangubul ellanun. Duk boꞌode kew isab paluwas.” 10Magtawus dendehin hebbaꞌ si antag bettis si Petros duk matey. Pagdiyalem meꞌ lella mabataꞌin, kasuwaꞌde dendehin matey ne. Hangkan binoꞌo iye weꞌ de paluwas duk kinubul weꞌ de si bihing ellanen. 11Kēmon masandel pu si Isahin paꞌasekan talew teꞌed, duk damikkiyan kēmon meꞌ makakale sabab bakas maꞌumantag miyaꞌan talew isab.

Meꞌ hinangan balakatan duk meꞌ hinangan makaꞌulaliꞌ

12Ekka meꞌ hinangan balakatan duk meꞌ hinangan makaꞌulaliꞌ tahinang meꞌ kawakilan si Isahin si diyaleman meꞌ aꞌa si Awrusalamin. Kēmon meꞌ masandel pu si Isahin daran magtipun laꞌi si Simpey Sulaiman. 13Gaꞌ niyaꞌ meꞌ aꞌa sinduwehin makatawakkal patuhut laꞌi si siye, bisan du siye pinagaddatan teꞌed weꞌ meꞌ aꞌahin. 14Saguwaꞌ masi du magkatamba meꞌ aꞌa masandel pu si Isa, Panuhutanin, maglella-dende siye. 15Sabab meꞌ hinangan balakatan hininang meꞌ kawakilanin, binoꞌo weꞌ meꞌ aꞌahin meꞌ masakihin pī si meꞌ kalān-lānan, pinabāk diyataꞌ meꞌ tanggungan duk diyataꞌ meꞌ tapo supaya bang palabey si Petros laꞌi, kaw du siye sinduwe-sinduwe tewwaꞌ weꞌ lingewnen. 16Ekka isab meꞌ aꞌa pī amban meꞌ kalahatan mapaliput si Awrusalamin, magboꞌo meꞌ masakihin duk meꞌ pasayedan seyitanin, duk kawuliꞌan siye kēmon.

Bininasa meꞌ kawakilanin

17Manjari, imam nakuraꞌin duk meꞌ saweꞌne meꞌ Sadduseo si Awrusalamin, kinimbūhan teꞌed weꞌ de meꞌ kawakilanin. 18Hangkan daꞌakde siye siniggew duk kinalabusu. 19Saguwaꞌ sangem miyaꞌan, niyaꞌ dambuwaꞌ malaꞌikat Tuhanin hap pī ngaluka meꞌ gawang kalabusuhin maluwas siye. Paꞌin malaꞌikatin si siye, 20“Pī kaꞌam nengge dem langgal hadjehin duk akahanun bi meꞌ aꞌa malaꞌihin sabab bang saꞌingge duk siye taga umul salama-lama.” 21Tinuhut weꞌ de pangandaꞌakan malaꞌikatin duk subu-subu pe hap pī ne siye si langgal hadjehin magtoloꞌ.

Manjari tinawag weꞌ imam nakuraꞌin duk meꞌ saweꞌnen, dinaꞌak magtipun meꞌ kabahiꞌan si bangsa Israꞌilin. Siye inin meꞌ kakunsihalanin. Ubus ngandaꞌak siye meꞌ pulis pī si kalabusu ngeddoꞌ meꞌ kawakilanin. 22Saguwaꞌ pagtekka meꞌ pulisin laꞌi, gaꞌ siye kasuwaꞌde dem kalabusu. Hangkan balik siye pī si meꞌ kakunsihalanin magaka. Paꞌin meꞌ pulisin, 23“Pagtekka kami laꞌi si kalabusu, bagat teꞌed meꞌ gawang kalabusuhin. Duk meꞌ guwaldiyahin laꞌi du nengge manteyan meꞌ gawangin. Saguwaꞌ pagluka kami meꞌ gawangin, gaꞌ siye kasuwaꞌ kami diyalem.” 24Pagtakale inin weꞌ kapitan meꞌ guwaldiya si langgalin duk meꞌ nakuraꞌ meꞌ imamin, ulaliꞌ teꞌed siye bang ine maꞌumantag si meꞌ kawakilanin. 25Manjari niyaꞌ aꞌa tekka pī magaka si siye, paꞌinne, “Meꞌ aꞌa bakas kinalabusubin, īꞌ laꞌi dem langgal hadje magusihat si meꞌ aꞌahin.” 26Magtawus hap pī kapitanin duk meꞌ aꞌanen ngeddoꞌ disi Petros. Saguwaꞌ gaꞌ siye papeddiꞌande peggeꞌ talew siye kaw siye pagtibagan meꞌ aꞌahin duk batu.

27Binoꞌo weꞌ de meꞌ kawakilanin pī pinaharap si meꞌ kakunsihalanin. Manjari sinumariya siye weꞌ imam nakuraꞌin. Paꞌinne, 28“Bakas kaꞌam sinessaꞌan teꞌed weꞌ kami, gaꞌi kaꞌam dinaꞌak magtoloꞌ pasal aꞌa panuhutanbi miyaꞌan. Bu ine kew, latag ne dem Awrusalamin weꞌ toloꞌbi inin, duk kami pe tinuksaꞌbi makamatey aꞌa miyaꞌan.” 29Nambung si Petros duk meꞌ aꞌa kawakilan sinduwehin, paꞌinde, “Subey iye tuhut kami pangandaꞌakan Tuhanin, dumaꞌin pangandaꞌakan manusiyaꞌin. 30Si Isa miyaꞌan,” paꞌinde, “dinaꞌak weꞌ bi pinapatey ilansang diyataꞌ olom. Saguwaꞌ pinakellum iye balik weꞌ Tuhanin, iye asal pagtuhanan meꞌ kapapuꞌanten bi. 31Duk pinalangkew si Isa weꞌ Tuhanin pī si kanawananne, si lugal tamanan mabangsahanin. Kuweꞌitu iye Panuhutanin duk iye Manimbulin, supaya meꞌ aꞌa Israꞌilin pagsusunande duk lebbahande duseden duk siye inampun. 32Duk kami inin,” paꞌin si Petros, “naksiꞌ kami weꞌ bennal inin kēmon. Naksiꞌ du isab Niyawa Sutsihin, iye pinangurung weꞌ Tuhan si kēmon manuhut meꞌ pangandaꞌakannen.”

33Pagkale meꞌ kakunsihalanin inin, astel teꞌed siye hangkan kabayaꞌanden weꞌ pinapatey meꞌ kawakilanin. 34Saguwaꞌ dangan kakunsihalanin kuwat. Ēnnen Gamaliel. Dambuwaꞌ iye Pariseo duk guru pandey teꞌed si saraꞌ āgama Yahudi, duk pagaddatan iye weꞌ meꞌ aꞌahin kēmon. Dinaꞌak weꞌ ne meꞌ aꞌa sinumariya miyaꞌan binoꞌo dahuꞌ paluwas. 35Manjari paꞌinne si meꞌ kakunsihalanin, “Kaꞌam, meꞌ pagkasiku bangsa Israꞌil, pahatul-hatul kaꞌam ine-ine sōng hinangbi si meꞌ aꞌa inin. 36Essebun bi weꞌ gaꞌ du miyaꞌan tiggel, niyaꞌ dambuwaꞌ aꞌa inēnan Tudas mahadje dine. Niyaꞌ ampat hatus meꞌ aꞌa mapatindeg si iyehin. Saguwaꞌ ujud pinapatey du si Tudas inin duk meꞌ tindegnen kanat-kanat. Gaꞌ du niyaꞌ kaꞌujudande. 37Ubus si Tudas, niyaꞌ isab pasunuꞌ aꞌa Jalil inēnan si Judas, masa paglista ēn meꞌ aꞌahin. Ekka isab meꞌ aꞌa taboꞌone patuhut si iye, saguwaꞌ pinapatey du isab iye duk magkanat-kanat kēmon meꞌ tindegnen. 38Hangkan kuweꞌitu sessaꞌante kaꞌam sabab palkalaꞌ inin,” paꞌin Gamaliel. “Daꞌa usaꞌun bi meꞌ aꞌa inin. Pasagadanun bi siye. Peggeꞌ bang pikilande duk hininangde inin amban manusiyaꞌ, gaꞌ du iyan niyaꞌ pasōnganne. 39Saguwaꞌ bang inin amban Tuhan, asal gaꞌi siye tapagesbi. Bisan miyaꞌan kaw pe kaꞌam nungkaꞌan Tuhanin.” Manjari pinakale weꞌ meꞌ kakunsihalanin panessaꞌne miyaꞌan. 40Tinawag weꞌ de balik meꞌ kawakilanin duk dinaꞌak weꞌ de ilagutan. Ubus sinessaꞌan siye weꞌ de, gaꞌi teꞌed siye dinaꞌak missā balik pasal si Isa. Manjari pinaluwas ne siye weꞌ de. 41Tahalaꞌ meꞌ kawakilanin amban meꞌ kakunsihalan miyaꞌan duk kēgan teꞌed siye peggeꞌ kuweꞌitu kinimmatan ne siye weꞌ Tuhanin pataꞌ magsandal kabinasahan sabab sandelde pu si Isahin. 42Duk kahabaꞌ ellew matuyuꞌ siye magusihat laꞌi dem langgal hadje duk laꞌi si meꞌ kalumaꞌan meꞌ aꞌahin. Duk magmahalayak ne paꞌin siye aka-aka hāp sabab Isa Almasihin.

Currently Selected:

Hinangan 5: yakV

Highlight

Copy