Hinangan 4

Si Petros duk Yahiya si harapan meꞌ kakunsihalanin

1Sābu disi Petros duk Yahiya pe mamissā si meꞌ aꞌahin, niyaꞌ patudju pī si siye meꞌ imam duk kapitan meꞌ guwaldiya si langgal mahadje miyaꞌan duk meꞌ Sadduseo. 2Astel siye manamal peggeꞌ disi Petros magtoloꞌ si meꞌ aꞌahin, bugtuꞌande teꞌed weꞌ peggeꞌ ellum ne si Isa balik, ellum du isab balik meꞌ pateyin si pasōngan. 3Hangkan siniggew weꞌ de si Petros duk Yahiya. Peggeꞌ bayaꞌ kohap ne miyaꞌan, kinalabusu siye weꞌ de sampay salung. 4Saguwaꞌ ekka bakas makakale binissā disi Petrosin kahagad duk sandel ne pu si Isa. Lellahin hadja, ekkahanden niyaꞌ kulang-labi lime ngibu.

5Pagsasumuhin magtipun meꞌ kakunsihalanin laꞌi si Awrusalam. Siye miyaꞌan meꞌ kanakuraꞌan meꞌ Yahudihin, meꞌ kabahiꞌanin duk meꞌ guru si saraꞌ āgama Yahudihin. 6Laꞌi isab disi Annas imam nakuraꞌin, si Kayapas, duk si Yahiya, duk Iskandal, duk niyaꞌ pe seddili meꞌ usba imam nakuraꞌin. 7Manjari dinaꞌak binoꞌo weꞌ de si Petros duk Yahiya pī si siye. Tinilew siye weꞌ de, paꞌinde, “Saꞌingge paghinangbi miyaꞌan? Balakat ine atawa ēn sine ginunabin?”

8Manjari pagbayaꞌan si Petros weꞌ Niyawa Sutsihin duk nambung iye, paꞌinne, “Meꞌ kanakuraꞌan duk meꞌ kabahiꞌan, 9bang sumariyabi kami ellew inin sabab hinangan mahāp tahinang si aꞌa bakas makukuꞌ inin, duk bang saꞌingge kakawuliꞌnen, 10na, subey kaꞌam kēmon ngataꞌu duk kēmon aꞌa Israꞌilin isab, weꞌ hangkan aꞌa inin nengge tuꞌu si harapanbi kawuliꞌan ne, sabab balakat si Isa Almasi, aꞌa Nasaretin. Si Isa inin bakas dinaꞌak weꞌ bi ilansang diyataꞌ olom, duk pinakellum iye balik weꞌ Tuhanin. 11Sabab si Isa hep pinaꞌin dem kitabin, ‘Batu tinayikutanbi meꞌ pandey maghinang lumaꞌ batuhin peggeꞌ kannalbi gaꞌi taguna, kuweꞌitu iye ne miyaꞌan tamanan batu maniyaꞌ kagunahannen.’ 12Duk asal iye hadja dendangan makatimbul kitehin bi. Peggeꞌ tuꞌu si tibuꞌukan dunya inin, gaꞌ niyaꞌ seddili pangurung weꞌ Tuhanin makatimbul kite bi luwal si Isa hadja.”

13Manjari, ulaliꞌ teꞌed meꞌ kakunsihalanin pagkitede weꞌ bahani si Petros duk Yahiya missā, bu siye inin meꞌ aꞌa pandak du pangadjiꞌden duk diyawaꞌ du pagaꞌaden. Manjari taꞌessebde ne weꞌ siye inin bakas meꞌ saweꞌ si Isa. 14Saguwaꞌ gaꞌ niyaꞌ tabissāde panganjawabde siye, peggeꞌ laꞌi ne takitede aꞌa bakas makukuꞌin nengge si bihing si Petros duk Yahiya. 15Hangkan pinaluwas ne siye weꞌ de amban bilik paghukum-hukumanin duk magisun meꞌ kakunsihalanin didihande. 16“Ine enteꞌ subey hinangte bi si meꞌ aꞌa inin?” paꞌinde. “Bawag ne tuꞌu si Awrusalam weꞌ niyaꞌ hinangan balakatan tahinangde. Duk inin gaꞌi tapasuweyte bi. 17Saguwaꞌ,” paꞌinde, “supaya inin gaꞌi magkasōng bawagnen, sessaꞌante bi ne siye weꞌ subey siye gaꞌi missā sabab si Isa bisan pu sine-sine.”

18Hangkan ilinganan weꞌ de balik si Petros duk Yahiya duk sinessaꞌan weꞌ de, gaꞌi teꞌed siye dinaꞌak missā atawa magtoloꞌ sabab si Isa. 19Saguwaꞌ sinambungan siye weꞌ si Petros duk Yahiya, paꞌinde, “Kumpasun bi koꞌ, inggehin bentel si matahan Tuhan, kaꞌam tuhut kami atawa Tuhanin? 20Peggeꞌ gaꞌi kami makajari padeheng magaka-aka si meꞌ aꞌa sabab bakas takite kami duk takale kamihin.” 21Manjari tinunggaꞌan pe siye weꞌ meꞌ nakuraꞌin ubus bu pinaluwas ne siye. Gaꞌ meꞌ nakuraꞌin kaꞌaraꞌ-araꞌ ngalegga siye peggeꞌ kēmon aꞌa malaꞌihin, pudjide Tuhanin sabab hinangan balakatan bakas tahinang miyaꞌan. 22Aꞌa makawuliꞌan weꞌ hinangan balakatan miyaꞌan labi ne hep ampatpūꞌ tahun umulnen.

Meꞌ masandel pu si Isahin māku-māku si Tuhan

23Sakaliꞌ ne siye pinaluwas, hap pī si Petros duk Yahiya si meꞌ saweꞌden duk inaka weꞌ de si siye kēmon bakas pinaꞌin meꞌ imam nakuraꞌin duk meꞌ bahiꞌin. 24Pagkalede inin, māku-māku siye magsumbayaꞌ si Tuhan. Paꞌinde, “O Tuhan, kaꞌu magbayaꞌ-bayaꞌin duk kaꞌu magpapanjari bulak duk langitin duk tahikin, sampay kēmon bayuꞌ-bayuꞌan diyalemnen. 25Bakas pinabissā weꞌ nu daraꞌakannun, si Daꞌud, papuꞌ kamihin, duk pinanoloꞌan iye weꞌ Niyawa Sutsihin pamissānen, paꞌinne,

‘Weꞌey teꞌ meꞌ kabangsahan dumaꞌin Yahudihin magastel. Weꞌey teꞌ meꞌ aꞌahin magisun makaꞌat, bu gaꞌ niyaꞌ kapūsanne? 26Meꞌ kasultan-sultanan si dunyahin duk meꞌ nakuraꞌin magpanyap duk magtipun nguntarahan Tuhanin duk Almasi, tapeneꞌne magbayaꞌin.’

27“O Tuhan,” paꞌinde, “bennal pinaꞌin si Daꞌud miyaꞌan, peggeꞌ tiyaꞌ ne hep tuꞌu magtipun si lahat Awrusalam inin meꞌ Yahudihin duk meꞌ aꞌa dumaꞌin Yahudihin isab, magtuhut duk disi Sultan Herod duk Gubnul Pontiyus Pilatus. Kuntarahande si Isa, daraꞌakannu masutsihin, iye bakas ginellalnu Almasihin. 28Hininang inin weꞌ de peggeꞌ matuꞌuhin pe, amban bayaꞌnu duk balakatnu, sinakap ne weꞌ nu weꞌ inin subey maꞌumantagin. 29Duk kuweꞌitu Tuhan, pakalehun meꞌ tunggaꞌde si kamihin. Tabanganun kami, meꞌ daraꞌakannun, supaya kami bahani missā lapalnun. 30Pasōngun tangannun makawuliꞌ meꞌ masakihin duk makite kew meꞌ hinangan makaꞌulaliꞌ duk meꞌ hinangan balakatan amban balakat ēn si Isa, daraꞌakannu masutsihin.” 31Pagubus siye māku-māku si Tuhan, jedjeg weꞌ Tuhanin lumaꞌ pagtipunande miyaꞌan, duk pagbayaꞌan siye weꞌ Niyawa Sutsihin. Manjari minahalayak weꞌ de lapal Tuhanin gaꞌ teꞌed niyaꞌ talew-talewde si aꞌa.

Binahagiꞌan weꞌ de meꞌ saweꞌden

32Kēmon masandel pu si Isahin magdambuwaꞌ pikilan duk magtuhut diyalem atey. Ine-ine niyaꞌ si dangan, gaꞌ niyaꞌ magpaꞌin weꞌ di si iye hadja miyaꞌan, saguwaꞌ bahagiꞌanne isab meꞌ saweꞌnen. 33Duk meꞌ kawakilanin, gaꞌ siye pahali naksiꞌ sabab si Isa, Panuhutanin, weꞌ ellum balik, duk basag teꞌed panaksiꞌden. Inurungan kahāpan teꞌed siye kēmon weꞌ Tuhanin. 34Gaꞌ niyaꞌ siye kasukalan bisan dangan peggeꞌ magtekka-tekka meꞌ taga bulakin atawa lumaꞌin pinabellihan inin weꞌ de duk binoꞌo weꞌ de ulinen 35pī si meꞌ kawakilanin. Duk binahagiꞌ-bahagiꞌ si siye sīnin panabang sukal dangan-danganin.

36Na, niyaꞌ aꞌa laꞌi si siye inēnan si Yusup, inanakan laꞌi si pūꞌ Kiprus. Bangsa Yahudi iye, tubuꞌ si Libi. Inēnan isab iye weꞌ meꞌ kawakilanin si Barnabas, (hātinen, aꞌa maꞌasig atey). 37Si Barnabas inin, niyaꞌ bulakne pinabellihan weꞌ ne duk binoꞌo weꞌ ne ulinen pī si meꞌ kawakilanin.

Currently Selected:

Hinangan 4: yakV

Highlight

Copy