Hinangan 6

Pituꞌ aꞌa pinasukuhan hinang

1Masa miyaꞌan pagmagkaꞌekka ne meꞌ tindeg si Isahin, magsaggaꞌ meꞌ Yahudi inanakan si meꞌ lahat seddilihin, bissāhanden Girik, duk meꞌ Yahudi manggaꞌ maꞌusaꞌ amban lahatden, bissāhanden Hibrani. Muggut meꞌ Yahudi amban lahat seddilihin peggeꞌ paꞌinde weꞌ meꞌ kadendehande baluhin takayipat koꞌ binahagiꞌan sīn pagurung-urung kahabaꞌ ellewin. 2Hangkan tinawag weꞌ sampūꞌ duk duwe kawakilanin kēmon meꞌ tindeg si Isahin patipun. Duk paꞌinde si siye, “Gaꞌi sukat bang ambanan kami pagmahalayak lapal Tuhanin supaya kami magbahagiꞌ-bahagiꞌ sīn paggastuhin. 3Hangkan meꞌ kapungtinaꞌihan,” paꞌinde, “subey kaꞌam meneꞌ pituꞌ lella amban kaꞌam, meꞌ aꞌa asal kataꞌuhanbi pagbayaꞌan weꞌ Niyawa Sutsihin duk lalem kataꞌuden. Pasukuhan kami siye hinang inin. 4Manjari kami inin,” paꞌinde, “dambūs-būs hadja ngampun si Tuhan duk magmahalayak lapal Tuhanin.” 5Kasulutan kēmon tindeg si Isahin si bissāde miyaꞌan. Hangkan meneꞌ ne siye kēmon. Tapeneꞌden si Estepan, aꞌa sandel teꞌed si Tuhan duk pagbayaꞌan weꞌ Niyawa Sutsihin. Sinduwe tapeneꞌden pe disi Pilip, si Porokorus, si Nikanur, si Timon, si Parmenas, duk si Nikolas, aꞌa amban Antiyok. Si Nikolas inin dumaꞌin Yahudi saguwaꞌ bakas patuhut iye si āgama Yahudi. 6Manjari binoꞌo weꞌ de aꞌa pituꞌ miyaꞌan pī paharap si meꞌ aꞌa kawakilanin. Māku-māku meꞌ kawakilanin si Tuhan para si aꞌa pituꞌ miyaꞌan duk binettad weꞌ de meꞌ tanganden si siye, tandaꞌ weꞌ siye pinasukuhan hinang miyaꞌan.

7Magkasōng bawag lapal Tuhanin. Pasōng isab magkaꞌekka meꞌ tindeg si Isa si Awrusalamin. Ekka isab meꞌ imamin sandel ne pu si Isa.

Paniggew pu Estepanin

8Si Estepan miyaꞌan, aꞌa tinabangan teꞌed weꞌ Tuhanin, duk inurungan iye weꞌ Tuhanin balakat, hangkan maghinang iye meꞌ hinangan balakatan duk meꞌ hinangan makaꞌulaliꞌ diyaleman meꞌ aꞌa si Awrusalamin. 9Saguwaꞌ niyaꞌ meꞌ aꞌa nguntarahan iye. Meꞌ aꞌa miyaꞌan meꞌ anak-apuꞌ langgal inēnan Langgal meꞌ Aꞌa Luhaya. Siye meꞌ aꞌa amban lahat Kirene, amban puweblo Iskandal, amban Kilikiya, duk amban lahat Asiya isab. Jinawab weꞌ de si Estepan. 10Saguwaꞌ inurungan weꞌ Niyawa Tuhanin si Estepan kataꞌu hangkan sakaliꞌ iye missā, gaꞌ siye makaꞌatu si iye magjawab. 11Manjari nangdan siye meꞌ aꞌa dinaꞌak magdustaꞌ sabab Estepan. Paꞌin meꞌ aꞌa dinaꞌakde magdustaꞌin, “Bakas iye takale kami missā laꞌatan sabab si Musa ley duk sabab Tuhanin.” 12Sabab pagdustaꞌde miyaꞌan, kannal meꞌ aꞌahin weꞌ asal toꞌo pinaꞌinde sabab Estepanin. Hangkan astel pu Estepan meꞌ aꞌahin, duk meꞌ kabahiꞌanin, duk meꞌ guru si saraꞌ āgama Yahudihin. Hap pī siye niggew Estepan duk binoꞌo weꞌ de pī si meꞌ kakunsihalanin hinukum. 13Moꞌo isab siye pī meꞌ aꞌa dinaꞌak magdustaꞌ sabab Estepan. Paꞌin meꞌ aꞌa dinaꞌakde magdustaꞌ miyaꞌan, “Aꞌa inin luwal ngandiyawaꞌan langgalte bi masutsi inin duk luwal isab iye missā laꞌatan sabab saraꞌ āgamaten bi. 14Peggeꞌ bakas iye takale kami magpaꞌin weꞌ si Isa, aꞌa Nasaret ley, larakne koꞌ langgal hadje inin duk pindahanne koꞌ kēmon kaꞌaddatan panoloꞌ si Musa kitehin bi.” 15Manjari pagkale meꞌ kakunsihalanin pinaꞌinde miyaꞌan, mayam siye kēmon pahantap pu si Estepan. Takitede luwe Estepanin ngillap kuweꞌ luwe malaꞌikat.

Currently Selected:

Hinangan 6: yakV

Highlight

Copy