Hinangan 7

Missā Estepan si meꞌ kakunsihalanin

1Manjari tinilew Estepan weꞌ imam nakuraꞌin, paꞌinne, “Bennal ke pinaꞌinde miyaꞌan?” 2Nambung Estepan, paꞌinne, “Meꞌ kapungtinaꞌihanku duk meꞌ kamatettoꞌahan, pakalehun bi ku. Paꞌessebante kaꞌam sabab hininang meꞌ kapapuꞌante bi awwalley. Tuhan pinudjihin bakas hep pakite si papuꞌten bi Ibrahim paglahatne si Mesopotamiyahin. Gaꞌ pe iye miyaꞌan maglahat si Haran. 3Paꞌin Tuhanin si iye, ‘Ambananun lahatnu iyan duk meꞌ kaꞌusbahannun, duk hap pī kew si lahat panoloꞌanku du kaꞌu bang inggehin.’ 4Hangkan tahalaꞌ Ibrahim amban lahatnen duk laꞌi iye maglahat si Haran. Pagmatey ne samanen, dinaꞌak iye weꞌ Tuhanin maglalin pitu si lahat paglahatanbi ne kuweꞌitu inin. 5Gaꞌ pe miyaꞌan Ibrahim kaꞌurungan weꞌ Tuhanin bisan dan dangew masagiꞌ bulak lahat inin. Saguwaꞌ nanggup Tuhanin weꞌ pangurungne du lahat inin si iye, duk tepe si iye du duk si meꞌ tubuꞌnen. Pananggup Tuhan masa miyaꞌan, gaꞌ pe niyaꞌ anak Ibrahim. 6Paꞌin Tuhanin pe si iye, ‘Maglahat du meꞌ tubuꞌnun si lahat bangsa seddili duk laꞌi hinang banyagaꞌ siye duk tiniksaꞌ teꞌed siye weꞌ bangsa miyaꞌan dem ampat hatus tahun. 7Saguwaꞌ leggaku du bangsa mamanyagaꞌ meꞌ tubuꞌnun. Puwas miyaꞌan, paluwasku du siye amban lahat pamanyagaꞌan siye miyaꞌan duk balik du siye pitu si lahat inin ngisbat aku,’ paꞌin Tuhanin. 8Manjari magjanjiꞌ Tuhanin duk Ibrahim duk paꞌin Tuhanin pu Ibrahim weꞌ subey meꞌ lellahin magislam tandaꞌ weꞌ pasulut siye si pagjanjiꞌan miyaꞌan. Hangkan paginanakan ne si Isahak, inislam iye weꞌ Ibrahim kawalum bahanginen. Si Isahak isab inislam weꞌ ne anaknen si Yakub, duk si Yakub inislam isab weꞌ ne anakne sampūꞌ duk duwehin. Siye ne inin kapapuꞌan bangsate bi Yahudihin.

9“Manjari,” paꞌin Estepan, “si Yusup kinimbūhan weꞌ meꞌ sakanen, meꞌ anak si Yakub sinduwehin. Hangkan pinabellihan iye weꞌ de hinang banyagaꞌ laꞌi si lahat Misil. Saguwaꞌ Tuhanin laꞌi si iye. 10Pinaluwas iye weꞌ Tuhanin amban kēmon kasusehan matekka si iyehin. Inurungan isab iye weꞌ Tuhanin kataꞌu duk sakaliꞌ iye pī paharap si sultan Misilin, sinna sultanin si iye. Hangkan ginellal iye weꞌ sultanin gubnul si lahat Misil miyaꞌan duk pinabayaꞌ iye si meꞌ aꞌa dem astanaꞌnen. 11Manjari, niyaꞌ tekka unus si tibuꞌukan lahat Misil duk sampay si lahat Kanaꞌan, lahat disi Yakubin. Magtiksaꞌ teꞌed meꞌ aꞌahin. Meꞌ kapapuꞌanten bi gaꞌ niyaꞌ kapamangan kasuwaꞌde. 12Hangkan pagtakale si Yakub weꞌ laꞌi si lahat Misil niyaꞌ kinakan, dinaꞌak weꞌ ne pī melli kapamangan meꞌ anaknen, meꞌ kapapuꞌan bangsaten bi, duk inin tagnaꞌ papīde si Misilin,” paꞌin Estepan. 13“Kaminduwede ne pī, pakilale ne si Yusup si meꞌ pungtinaꞌinen. Duk inakahan isab weꞌ si Yusup sultanin, hangkan kataꞌuhan sultanin ne meꞌ kaꞌusbahan si Yusupin. 14Manjari pinasan weꞌ si Yusup samanen si Yakub. Dinaꞌak weꞌ ne si Yakub pī duk kēmon siye magtewtey-anakin hap Misil. Pitumpūꞌ duk lime siye kēmon. 15Hangkan hap pī ne disi Yakub hap Misil. Matey laꞌi ne si Yakub si lahat īꞌ, duk laꞌi du isab matey meꞌ anaknen, meꞌ kapapuꞌan bangsaten bi ne. 16Tinuranan meꞌ bangkeyden pī si Sekem duk laꞌi siye kinubul si pagkubulan bakas binelli weꞌ Ibrahim awwalley. Binelli miyaꞌan weꞌ ne amban meꞌ kaꞌanakan si Hamor laꞌi si lahat Sekem.

17“Pagsōng taꞌabut ne waktu pamaluwas siye amban Misilin sa pananggup Tuhan pu Ibrahimin, ekka ne teꞌed bangsate bi si Misil. 18Manjari, niyaꞌ pagantiꞌ magsultan si lahat Misil, gaꞌ kataꞌuhanne sabab si Yusup. 19Inakkalan weꞌ ne bangsaten bi duk bininasa manamal weꞌ ne meꞌ kapapuꞌanten bi. Ginagahan siye dinaꞌak pinaluwas meꞌ anakde madikiꞌ-dikiꞌin amban dem lumaꞌ bu inambanan duk siye ujud matey. 20Masa miyaꞌan, iye panganak pu si Musahin. Nakanak hāp teꞌed lella si Musa miyaꞌan. Dem tellum bulan katapukan pe iye dem lumaꞌ matettoꞌanen. 21Puwas tellum bulan pinaluwas iye amban dem lumaꞌ. Saguwaꞌ takasuwaꞌ iye weꞌ anak sultan dayang-dayangin duk hinangne iye anak. 22Kapanoloꞌan si Musa kēmon pangadjiꞌ bangsa Misilin duk bantu iye sabab meꞌ bissānen duk meꞌ hinangannen.

23“Pagampatptūꞌ tahun ne umul si Musahin,” paꞌin Estepan, “tapikilne pī mayaman meꞌ pagkasine Yahudihin, bangsa Israꞌilin. 24Manjari niyaꞌ takitene dambuwaꞌ pinapeddiꞌan weꞌ aꞌa bangsa Misil. Hap pī iye nabangan pagkasinen duk binalesan weꞌ ne pinapatey aꞌa Misilin. 25Kannalne weꞌ tahāti du weꞌ meꞌ bangsanen weꞌ guna Tuhanin iye maluhaya siye, saguwaꞌ gaꞌ tahātide. 26Pagsasumuhin, niyaꞌ takitene duwangan aꞌa Israꞌil magsuntuk. Batang siye paghāpne. ‘Bagay,’ paꞌinne, ‘saliꞌ kaꞌam bangsa Israꞌil. Weꞌey kaꞌam magpapeddiꞌ?’ 27Saguwaꞌ aꞌa mamapeddiꞌin, sinōgadan weꞌ ne si Musa duk paꞌinne, ‘Sine mangurungan kaꞌu kapatut magnakuraꞌ si kamihin? Weꞌey kaꞌu subey mangahukum kamihin? 28Weꞌ batang ku isab papateynu kuweꞌ pamapateynu aꞌa Misil diꞌilewin?’ 29Pagkale si Musa inin, talew iye peggeꞌ kataꞌuhan hatiꞌ bakas pamapateyne aꞌa Misilin. Hangkan lahi iye amban Misil duk maglahat iye si Midiyan. Paglaꞌi iye, maganda iye duk anakan iye duwe lella.

30“Manjari,” paꞌin Estepan, “paglabey ampatpūꞌ tahun tiggelan si Musa laꞌi si lahat Midiyan miyaꞌan, niyaꞌ malaꞌikat Tuhanin pabagala si iye dem kayat ebbut si poꞌon puhung. Laꞌi miyaꞌan si lahat makagindew-gindew tapit si punu Turusina. 31Ulaliꞌ teꞌed si Musa si takitene miyaꞌan, hangkan pī iye patapit ngalilingne. Manjari takalene suwala Tuhanin amban dem ebbutin. Paꞌin suwalahin, 32‘Aku Tuhan inisbat weꞌ meꞌ kapapuꞌannun, si Ibrahim, duk Isahak, duk si Yakub.’ Migpid si Musa hawal talewnen duk gaꞌ iye makatawakkal mayam. 33Paꞌin Tuhanin si iye, ‘Luwasanun tehompaꞌnun peggeꞌ antag panenggehannu iyan bulak sutsi.’ 34Manjari paꞌin Tuhanin pe, ‘Takiteku paminasa si meꞌ aꞌaku laꞌi si lahat Misilin. Takaleku pamuhunden duk duwaꞌi ku pitu maluwas siye. Dayiꞌ kew, daꞌakte kew hap Misil.’

35“Na,” paꞌin Estepan, “si Musa hep inin bakas tinayikutan meꞌ aꞌa Israꞌilin. Jinampa iye weꞌ de. Paꞌinde si iye, ‘Sine mangurungan kaꞌu kapatut magnakuraꞌ si kamihin? Weꞌey kaꞌu subey mangahukum kamihin?’ Si Musa hep dinaꞌak Tuhan magnakuraꞌin duk mamaluhaya meꞌ kapapuꞌanten bi,” paꞌin Estepan. “Duk tinabangan iye weꞌ malaꞌikat takitene si poꞌon puhung makayatin. 36Binoꞌo weꞌ ne meꞌ kapapuꞌanten bi, meꞌ bangsa Israꞌilin, paluwas amban Misil, lahat pamanyagaꞌan siyehin. Maghinang iye meꞌ hinangan balakatan duk meꞌ hinangan makaꞌulaliꞌ laꞌi si Misil duk laꞌi si Tahik Peyat, duk damikkiyan laꞌi dem lahat makagindew-gindewin dem ampatpūꞌ tahun. 37Si Musa ne inin bakas magpaꞌin si meꞌ kapapuꞌanten bi, bangsa Israꞌil, ‘Si pasōngan mapiyu du Tuhanin si kaꞌam dambuwaꞌ nabi kuweꞌ akuhin, duk aꞌa bangsabi du iye.’ 38Si Musa ne inin,” paꞌin Estepan, “malaꞌi magtuhut duk meꞌ kapapuꞌanten bi dem lahat makagindew-gindew īꞌ. Duk laꞌi isab iye duk malaꞌikat mamissā si iye diyataꞌ punu Turusinahin. Iye makasangka meꞌ lapal Tuhan mangurung umulin supaya tapangurungne si kite bi.

39“Saguwaꞌ meꞌ kapapuꞌanten bi,” paꞌin Estepan, “gaꞌ siye mabayaꞌ patuhut pu si Musa. Tinayikutan iye weꞌ de duk kabayaꞌanden weꞌ tabalik siye pī si lahat Misil. 40Manjari peggeꞌ tiggel si Musa laꞌi diyataꞌ punu, paꞌinde pu si Harun, ‘Hinanganun kite bi meꞌ tuhan-tuhan duk siye padehellu moꞌo kite bi. Gaꞌi kataꞌuhante bi bang ine ne maꞌumantag pu si Musa bakas mamoꞌo kite bi paluwas amban Misilin.’ 41Masa miyaꞌan hep,” paꞌin Estepan, “pangahinangde limbagan si bantuk anak sapiꞌin. Magkuluban siye si limbagan miyaꞌan duk maglami-lami siye pamahadjede hinangan bakas tanganden. 42Hangkan hep tinayikutan siye, meꞌ bangsa Israꞌilin, weꞌ Tuhanin. Duk pinasagadan siye weꞌ ne numba meꞌ poteꞌan diyataꞌ langitin. Inin pinasulat weꞌ Tuhan dem kitab kanabihanin, pinaꞌin,

‘O meꞌ aꞌa Israꞌil,’ paꞌin Tuhanin. ‘Dumaꞌin hep si aku pagkulubananbi meꞌ hayep sinumbaliꞌbi dem ampatpūꞌ tahun kalaꞌibi dem lahat makagindew-gindewin. 43Saguwaꞌ iye binoꞌo-boꞌobin pangennaꞌanbi limbagan tuhanbin si Molok, duk limbagan bantuk poteꞌan tuhanbin si Rompa. Siye meꞌ limbagan hininang weꞌ bi panumbahanbi. Hangkan patahalaꞌte du kaꞌam hap pī si dambiyaꞌan lahat Babilon.’

44“Laꞌi si lahat makagindew-gindew īꞌ,” paꞌin Estepan, “niyaꞌ lumaꞌ kuwit hayep panambahayangande Tuhanin peggeꞌ si lumaꞌ miyaꞌan panaꞌanan Tuhanin. Hininang lumaꞌ miyaꞌan sa pangandaꞌakan Tuhan si Musahin, ilekkat bakas pinakitehan si iyehin. 45Manjari lumaꞌ miyaꞌan inambanan weꞌ de si meꞌ tubuꞌde magpangkat-mamangkatin. Duk binoꞌo miyaꞌan weꞌ meꞌ kapapuꞌanten bi padiyalemde duk si Yussaꞌ mapitu si lahat inin, pagubus ne patahalaꞌ Tuhanin meꞌ kabangsa-bangsahan seddili maglahat matuꞌuhin. Duk lumaꞌ miyaꞌan tuꞌu pe sampay masa pagsultan si Daꞌudin. 46Kasulutan Tuhanin pu si Daꞌud. Maꞌid si Daꞌud ngahinang lumaꞌ para si Tuhanin, iye isab asal pagtuhanan papuꞌten bi, si Yakub. 47Saguwaꞌ iye mangahinangan Tuhan lumaꞌin, si Sultan Sulaiman.

48“Saguwaꞌ Tuhan Tamanan Malangkewin,” paꞌin Estepan, “gaꞌi patennaꞌ dem meꞌ lumaꞌ hinangan manusiyaꞌ. Bakas tasulat weꞌ dambuwaꞌ nabi pinaꞌin Tuhanin. Paꞌinne,

49‘Surgaꞌin siya paningkoloꞌanku magsultanin. Duk dunyahin pahalihan bettiskun. Gaꞌ niyaꞌ lumaꞌ tahinangbi patennaꞌanku, duk gaꞌ isab niyaꞌ tahinangbi pahalihanku,’ paꞌin Tuhanin. 50‘Peggeꞌ aku du mangahinang langit duk dunyahin.’ ”

51Manjari paꞌin Estepan si meꞌ kakunsihalanin duk si meꞌ aꞌahin, “Tuwas pahāp kōkbi iyan. Ateybin atey gaꞌi nuhut Tuhan. Duk bisu pahāp meꞌ tayingebi iyan. Gaꞌi pakalebi lapal Tuhanin. Kuweꞌ du kaꞌam meꞌ kapapuꞌanbi masaley. Gaꞌi du isab pakalebi Niyawa Sutsihin. 52Niyaꞌ ke bisan dambuwaꞌ nabi gaꞌ bininasa weꞌ meꞌ kapapuꞌanbin? Gaꞌ. Pinapatey weꞌ de masa awwalley meꞌ aꞌa dinaꞌak Tuhan malataꞌ sabab papitu daraꞌakanne mabentelin. Duk pagtapitu ne daraꞌakanne miyaꞌan, pinagbuddihan iye weꞌ bi duk pinapatey weꞌ bi. 53Kaꞌam iyan, kaꞌam ne makasangka saraꞌ Tuhan amban malaꞌikatin, saguwaꞌ kaꞌam ne manggaꞌi manuhut saraꞌin.”

Pagtibagande batu Estepan

54Pagkale meꞌ kakunsihalanin pinaꞌin Estepan miyaꞌan, astel teꞌed siye duk pagtageꞌotde meꞌ impenden hawal astelden. 55Saguwaꞌ Estepan pagbayaꞌan weꞌ Niyawa Sutsihin; mayam iye padiyataꞌ langit duk takitene sahaya Tuhanin duk si Isa nengge si kanawanan Tuhanin. 56“Payamanun bi,” paꞌin Estepan. “Takiteku luka surgaꞌin duk takiteku si Isa, Anak Manusiyaꞌin, nengge si kanawanan Tuhanin.” 57Saguwaꞌ magellang meꞌ aꞌahin papales. Tinampengan weꞌ de meꞌ tayingeden duk gaꞌi takalede binissā Estepanin. Duk magtawus siye kēmon pī nudju iye. 58Pinaglalasan iye weꞌ de pī si luwasan puweblo Awrusalam miyaꞌan. Manjari paglaꞌi si luwasan tinagnaꞌan ne weꞌ de pinagtibagan si Estepan duk batu. Meꞌ aꞌa manaksiꞌin, hātinen meꞌ manibag iye duk batuhin, iluwasan weꞌ de meꞌ badjuꞌden duk binettad weꞌ de si antag bettis dambuwaꞌ lella bataꞌ inēnan si Saul. 59Sasang si Estepan pinagtibagan weꞌ de, nabbut iye si Panuhutanin, paꞌinne, “O Isa, Panuhutankun, tayimaꞌun niyawakun.” 60Manjari nengge iye duk tuꞌutne duk ngalingan iye papales, paꞌinne, “O Tuhan, daꞌa siye leggahun sabab dusede inin.” Pagubus inin paꞌinne, magtawus iye matey.

Currently Selected:

Hinangan 7: yakV

Highlight

Copy