Rukasi 13

Imarama maekwerà kõ rewarà

1Ãmẽ ãmõ kõ uu Jesu mogeta upa. Karireja wãnà kõ apisiawerà rè kee e'i Jesu pè kupa:

– Nekuwa põ kovenatu Piratu ojukaoka Karireja wãnà kõ mõ maekwerà? Kõi Janejare'e retã mè wemime'ẽ ãrã kõ ome'ẽ kupa upa remeve a'evo ekoi. Manyvo rewarà mõ põ Janejare'e opota tè a'evoa sõ ojinõ ijupe kõ? Õ'õ põ? Nivoi 'ete põkõ a'e kõ ekoi mijã? Aja rewarà mõ põ a'evo ekoi kupa? e'i ijupe kupa.

2Aepo rè kee e'i ãmẽ Jesu:

– Kee pejẽ tite maevo: “A'e kõ ywesõ nikatui ãmõ kõ wyi. A'e a'e kõ teipõ nivo miti ekoi ãmõ kõ wyi. Ajawyi põ a'evo sõ mãrãnai ijupe kõ?” pejẽ tite põ? 3Ãnĩ. Aja rewarà mõ rõwã a'evo ekoi kupa. Emã'ẽ. Pejẽ ve nivoi peiko ipi. Ajawyi tapejimosĩoka ikõ peaiwererà rè ky'y nẽ, a'e pejẽ. Tapejimome'u ikõ Janejare'e rovake peaiwererà reitypypyioka ijupe nẽ. Na'evoi sõ peiko remẽ, peopatà jimomorijaua kyty. Pepa wasutà, ivo kõ jẽ, e'i ijupe kõ. 4Pemã'ẽ. Pekuwa itõkõ jypy remẽ, 18 rõmõ imarama opa Siroe yy pyri tui mãe kõ. Tetã yvate'e mã'ẽ itõkõ okui i'aryvo kõ imoma kõ. Manyvo pejẽ põ a'evo mãe kõ pewarà mõ? “A'e kõ ywesõ teipõ nivoi 'eteay pirujẽ Jerusarẽ taa wãnà kõ wyi”, pejẽ tite sipõ? 5Ãnĩ. Na'evoi, a'e pejẽ. Ajawyi kee a'e pejẽ. Pejẽ ve nivoi peiko ipi. Ajawyi tapejimosĩoka ikõ peaiwererà rè ky'y nẽ, a'e pejẽ. Tapejimome'u ikõ Janejare'e rovake peaiwererà reitypypyioka ijupe nẽ. Na'evoi sõ peiko remẽ, peopatà jimomorijaua kyty kãramõ, ivo kõ jẽ, e'i ijupe kõ Jesu.

6Ãmẽ Jesu poromo'e jẽ poromosã'ãgaa rupi. Kee e'i:

– Kwaima'e mõ ojimitã ipi. Ãmẽ wemitã põ'õ mè moma'eyva'y mõ#13.6 Fruta de figo oõtã jypy remẽ ti'a mijã. Ajaire uu tite wemitã'akwerà mõ reka. Soõ, ni'ai. 7Ãwijã mẽ kee e'i wemĩgwai pè: “Ãwisõ ajo ipe moma'eyva'y mõ reka ipi. Ni'ai ipi. Moapy kwaray rõmõ tesõ ajo ipe eka. Ni'ai ajamã'ẽ. Nikatui. Ajawyi emopai ity ãwĩ ky'y. Moma'e rã põ yvy opãsarõ jẽtà ni'ai remẽ”, e'i. 8-9Aepo rè kee e'i ajamã'ẽ emĩgwai: “Ãnĩ, erõvijã. Emokatu jẽ rã'ĩ. Pe'ĩ kwaray pè taposiko ee esa. Ijypy rupi apãkõità rã'ĩ. Moma'e reposi jukwerà amoatytà imorya mõ. Ãmẽ tè simã'ẽ ee. I'atà põkõ? Ni'a'ãi põ ma'e remẽ? Ãmẽ sõsi i'a remẽ, ‘i'ete’ ja'età. Ni'ai sõ remẽ, emopaioka ãmẽ ityoka ky'y”, e'i emĩgwai oõvijã pè. “Hoõ” e'i tõvijã, e'i Jesu poromosã'ãga rupi.

[“Ãwĩvo ve Janejare'e nojikõtevẽi pemomaa rã rè”, jaa tè. “Wãrõ rã'ĩ pejimoteea”, jaa tè.]

Jesu omokatu wãivĩ jimoava 'arà mẽ remẽwarà

10Ajaire ãmõ 'ary pè Jesu poromo'e upa, Janejare'e ayvu rè jimo'ea retã mè. Jimoava 'arà mẽ a'evo ekoi. 11Ãmẽ wãivĩ mõ rè omã'ẽ, itekorã mã'ẽ mõ rè. Ãjãg tè omotekorã mã'ẽ tè a'e. Opõ'ã tarepe ipi. Ajamã'ẽ awyje ojapepy kõrijõ tè iko. Ijaty kwaray tesõ itekorã iko. 18 kwaray rõmõ tesõ itekorã iko. 12Ãmẽ a'e rè Jesu omã'ẽ remẽ, kee e'i ijupe:

– Wãivĩ, age'e amogwapatà netekorãnà newyi ky'y. Awyje nekatupatà ky'y, e'i ijupe.

13Ãmẽ Jesu oo ikoty. Opo oinõ i'aryvo. Ameve ikatupa ky'y. Ojãrapo'ãma ky'y. Omoe'e ywete Janejare'e iko ãmẽ ky'y.

14Ajamã'ẽ Janejare'e ayvu rè jimo'ea retã rõvijã mõ naoryi a'evoa rè omãjã. Ojimõarõ kõrijõ tè upa. “Kõi sõ jimoava 'arà mẽ Jesu poromokatu ipi”, e'i tè oupe. Ajaire kee e'i jane kõ itekorã mãe kõ pè:

– Ha! Semana upi upi 6 rõmõ mosikoa 'arà okwa ipi. Ãmẽ kõrijõ tè pejo kuwa pejimokatuoka ipi mijã. Jimoava 'arà mẽ rõwã, e'i ijupe kõ.#Jisyry. 20.9-10

15Ãmẽ aepo e'i remẽ, kee e'i Jesu ijupe, ivoarà kõ pè teve:

– Tyi põ, ivo rã'ãga peiko ipi. Pejẽ ve peposiko jimoava 'arà mẽ ipi. Pemã'ẽ. Teima kurarà kyty peo penima kõ jora eraa toy'u ipi, jimoava 'arà mẽ ipe remẽ. Pui kõ, ãmõ, jumẽtu kõ. Moko naperekoi sipõ ipi? Teima kõrijõ teipe mijã. Ajamã'ẽ peja'a katu jẽ ee kõ ipi. 16Ãwĩvo ve mirà kõ rè ywesõ tijaja'a katu jaiko ipi. Aã wãivĩ tãmõ Aparão jeapyry mõ, nijamokatu'ãi kuwasi põ mijã? Satanasi ojimorara puku ee imotekorã mijã. Ivo tè rõwã sipõkõ jimoava 'arà mẽ apijarà jamokatu ipi? e'i Jesu imoãtãre'ã kõ.

17Ãmẽ aepo e'i remẽ, Jesu ãpã kõ ojimosĩoka ojimõarõ ikoty. Ajamã'ẽ jane kõ oryvay wãivĩ mokatuawerà rè omãjã, ikatuay tesõ a'evo Jesu wereko rewarà mõ.

– Haa! Mire'eay tè Jesu, e'i e'i ãmẽ kupa.

Yvyra'akwerà rã'ãigwerà rè tè Jesu poromosã'ãga remẽwarà

(Mateusi 13.31-32; Maku 4.30-32)

18E'i jẽ Jesu poromogeta:

– Ãmõ tè mijẽ amome'utà peupe tapekuwa manyvotà Janejare'e ojikuwa Jõvijã wasu rõmõ remẽ. [Age'e pe'ĩpe'ĩ jane kõ omojõvijã ereko. Ajamã'ẽ kãramõ jane kõ mõa'ãrõwã omojõvijãtà o'arà kyty ky'y.] 19Jimitãa rè tè poromosã'ãgatà tapekuwa sa'u. Koo jarà yvyra rã'ãigwerà opyy itã okoo pè. A'e oẽ ajaire oryvay. Ajaate oẽme'e tè oo ky'y. Ãmẽ a'e rãkã rè wyra kõ uu ojiowaitynõ, e'i.

“Janejare'e remimota janeroupa”, e'i Jesu mã'ẽ

(Mateusi 13.33)

20E'i jẽ Jesu:

– Amome'u tarà mijẽ tapekuwa manyvotà Janejare'e janerereko Janerõvijã wasu rõmõ. 21Wemimota omuu inõ janepy'a pupe tijaneroupa ipi. Ãwitõ sautu jainõ janeremi'õ pupe imoje'a remẽ, ooupa janeremi'õ. Ãwĩvo ve Janejare'e remimota janepy'aoupa ipi. Janemotee wemimota rupi tijaiko ãmẽ, e'i. Kee mã'ẽ vo 'ejẽ jaiko. Ãwitõ wãivĩ mõ pão oinõtà remẽ, tiriku ku'ikwerà pupe omoãnẽ ãnẽ ena kõ. Moapy ena kõ omoãnẽ rã'ĩ eja. Ajaire imovororo mã'ẽ omoje'a ee, ajaate ooupa 'ete. Ãmẽ si ivororopa ky'y. Ãwĩvo 'ejẽ Janejare'e remimota janepy'aoupa, e'i Jesu.

“Tetã rova ikwa'igà mã'ẽ rupi peo Janejare'e kyty ipi”, e'i Jesu mã'ẽ

(Mateusi 7.13-14,21-23)

22Ajaire taa taa rupi oo Jesu okwa poromo'e ipi. Jerusarẽ taa kyty tè ootà iko. 23Ãmẽ ava mõ oporanu ijupe. Kee e'i:

– Jõvijã, pe'ĩpe'ĩ tè kõrijõ tè ootà Janejare'e pyri ipi? Ma'e ãmõ ãmõgwerà kõrijõ tè Janejare'e wereko katutà oupewarà mõ? Manyvo ere põ? e'i Jesu pè.

24Aepo e'i remẽ, Jesu tetã rova ikwa'igà mã'ẽ rè tè ojimosã'ãga:

– Õ'õ. Tetã rova ikwa'igà mã'ẽ rupi kõrijõ tè peo kuwa Janejare'e rena kyty ipi. Ajawyi pejimokasi ikenẽ a'e rupi tapeo, pejuve jẽ remeve, a'e pejẽ.#13.24 “Erupi kõrijõ tè peo kuwa Janejare'e kyty”, jaa tè aepo e'i. Jane kõ mõa'ãrõwã kee e'i ipetà: “Ãmõ rupi tè taẽ aa Janejare'e rena kyty”, e'i epetà. Ajamã'ẽ noo'ãi sire'e kupa, a'e kyty.

25– Tetã rova jarà vo 'ejẽ Janejare'e. Kãramõ wetã rova oovapytà. Oovapy paire, ava jẽ rõwã oiketà ky'y. Napeike amãtejẽi remẽ, tetã ypy pè tè pekutà. Tetã jarà pemotãtã titetà. Kee pejẽ ipetà: “Jõvijã, eovapyjavo taike!” pejẽ ipetà ãmẽ ky'y. Noovapyjavo'ãi pejẽ ajamã'ẽ. Kee e'i kõrijõtà tè: “Pejisyry. Noporokuwai ije”, e'ità kõrijõ tè pejẽ. 26Ãmẽ kee pejẽ ipetà jẽ: “Manyvo põ ‘noporokuwai’ ere oreupe? Jypy remẽ nereve orojimi'u ipi. Orerena rupi oremo'e jẽ rejupa mijã. Orekuwa katu rejupa mijã”, pejẽ ipetà. 27Ajamã'ẽ kee e'ità pejẽ: “Ãnĩ. Noporokuwai, a'e pejẽ. Mã taa wãnà kõ põ pejẽ rõmõ? Nakuwai. Pejisyry awi peo, a'e pejẽ. Nivoi mãe kõ tè pejẽ. Pejipe'a awi ewyi”, e'ità. #Jĩg. 6.8

28– Ajare kee a'e pejẽ. Kãramõ Janejare'e ojikuwa Jõvijã wasu rõmõ remẽ, jane kõ omuu muutà okoty, tojimoena ipyri ena pupe kupa. Janejare'e pyri tãmõ Aparão rè pemã'ẽtà. Ãmõ, tãmõ Isaki rè. Ãmõ, tãmõ Jako rè. Ãmõ, pirujẽ Janejare'e ayvu mojenuarà kõ rè pemã'ẽ tary ve. Janejare'e pyri ekoità kupa, pirujẽ. Pejẽ ãmẽ pejimojipe'aokatà a'e kõ wyi ky'y. Peja'o titetà peiko ãmẽ, e'i. [Ajawyi, “Ije kuwasi mokope aju mijã”, pejẽtà kuipe'e mã'ẽ ee remẽ.] Pejãpikãkãima ipetà pejimomorijau rõmõ peiko.#Mat. 22.12-13; 25.30 29A'evo remẽ ãmõ mirà põ'õmorà kõ ve uu uutà ojimoena Janejare'e pyri ena pupe. Pe'ĩrõwã uu uutà kupa. Ãmõgwerà kwaray ẽma kyty wyi uutà. Ãmõgwerà kwaray 'apa kyty wyi. Ãmõgwerà kwaray yke kyty wyi. Ãmõgwerà kwaray yke rovajarà kyty wyi, e'i. Pirujẽ uu uutà wapytà Janejare'e pyri ojimiwa. [Pejẽ ãmẽ napeike'ãi ipyri, napemoẽokai amãtejẽi pe'arà kyty rewarà mõ.]#Mat. 8.11-12 30Ajawyi kee a'e. Ajawyi apykyre kytywarà ootà tenoneporà rõmõ. Ãmõ, joãkãmorà ootà apyky rupi ky'y, e'i Jesu poromo'e.#Mat. 19.30; 20.16; Mak. 10.31

Jesu oporijauesa tarepe Jerusarẽ taa wãnà kõ remẽwarà

(Mateusi 23.37-39)

31Ameve Pariseu kõ mõ uu javo Jesu pè, Jerusarẽ taa kyty oo iko remẽ. Kee e'i ijupe kupa:

– Ejisyry ike wyi maipe kyty ekwa. Kovenatu Eroti nejukatà, e'i kupa.

Omoteeoka ipetà nou ijupe, too e'ã Jerusarẽ taa kyty. Ajawyi aepo e'i ijupe kupa. 32Ajamã'ẽ aepo rè kee e'i ãmẽ Jesu:

– Poromoripe mã'ẽ tè kovenatu Eroti. Pekwa kee a'e mã'ẽ tapemome'u ijupe: “[Ava nejukaoka'ãi kuwa, ajaate eposikoa amoawyjepa remẽ.] Age'e, aposiko jẽtà. Ãjãg kõ ape'a jẽtà ojimoemija ee mãe kõ wyi imomoi ipi aiko. Ãmõ, itekorã mãe kõ ve amokatu jẽtà aiko. Kovi a'evo jẽtà aiko. Ajaire moapy ke paire awyjepa avãetà ãmẽ ky'y”, pejẽ ikõ ijupe nẽ. 33Ajamã'ẽ age'e jõ aata jẽtà aiko. Ãmõ, kovi aata jẽtà aiko. Ãmõ, kõ'ẽme aata jẽ tary ve aiko. Aatà Jerusarẽ taa kyty. A'e pè tè aatà amãnõ, e'i. A'e pè tè Janejare'e ayvu mojenuarà kõ ojuka kupa ipi, e'i.

34Ãmẽ pee peve Jesu kee e'i:

– Mokoi Jerusarẽ taa wãnà kõ! Janejare'e wayvu mojenuarà kõ omuu muu ipe pekoty remẽ, napeenu tari ijayvu kõ ipi. Pemomijarĩ ijuka kõ ipi. Ãmõ, pejapi japi ijuka kõ takuru pupe ipi. Peenu kuwasi ijayvu kõ mijã! Mapejõ rõmõ tesõ apota ipe poropyy jẽ poroereko mijã! Ãwitõ masakara wa'yry kõ omoaty opepõkã wyry pè ereko katu kõ ipi, ãwĩvo ve ije aiko. Kee a'e peupewarà mõ. Poromoaty tarepe penereko katu mijã. Napepotai ajamã'ẽ. Ajawyi mokoi a'e pejẽ! 35Ajawyi naiko'ãi penena ky'y. Tapererà rõmõtà tè tui upa ky'y. Pemã'ẽ esa! Napemã'ẽ'ãi ere ky'y, ajaate Jõvijã wasu rõmõ ajikuwatà ajo mijẽ remẽ. Ãmẽ tè tite emoe'e ipetà pekupa ky'y, Janejare'e Remimuurerà rõmõ, e'i Jesu ijupe kõ.#Jĩg. 118.26

Currently Selected:

Rukasi 13: oymNT

Highlight

Copy