Rukasi 12

“Ipojy tè Pariseu kõ rekoa”, e'i mã'ẽ

(Mateusi 10.26-27)

1Ãmẽ a'e remẽ mõa'ãrõwã jane kõ ojatykapa Jesu kõ pyri ijayvu renu. Ojimokyrytyty ojee kupa, aty wasu kõ rewarà mõ. Ãmẽ Jesu poromo'e upa. Wemimo'ekwerà kõ ywesõ omo'e upa ajamã'ẽ. Kee e'i ijupe kõ:

– Mokoi, ipojy tè Pariseu kõ rekoa. Ivo katuay rã'ãga kupa ipi. Ajawyi, “Eruparà kõ rõmõ taiko”, tapejẽ ywe'e tite e'ã ijupe kõ, e'i.#Mat. 16.6; Mak. 8.15 2Ivo rã'ãga mãe kõ kee e'i epe kuwa: “Tokuwa e'ã ãmõ kõ epy'a pewarà kõ ne”, e'i epe. Ajamã'ẽ ojikuwapa jẽtà jane kõ pè. Pirujẽ janereko kõ ojikuwatà kãramõ. Ãmõ, janeayvu kõ teve.#Mak. 4.22; Ruk. 8.17 3Ajawyi iteetejẽ neporegeta vija maekwerà ojenu katutà ãmõ kõ rovakeve kãramõ. Ãmõ, pirujẽ nejimoevovo neporegeta ava mõ pè oka wyry pè remẽ, ojenu jẽtà. Wayvo ojenutà kãramõ, toenu pirujẽ. Ajawyi tè ikatu ikenẽ, a'e pejẽ, e'i Jesu ijupe kõ.

“Tapekyje e'ã poromoai mãe kõ wyi peiko”, e'i Jesu mã'ẽ

(Mateusi 10.28-31)

4E'i jẽ Jesu:

– Ejimorypa kõ, kee a'e pejẽ age'e. Tapekyje e'ã ikõ poromoai mãe kõ wyi nẽ, a'e pejẽ. “Ejukatà maevo kupa”, tapejẽ e'ã pejimopirai rõmõ. Janejuka sõ kupa remẽ, janepirà tè ojukatà kupa. Pejuka paire manyvo ne'i'ãi penereko ai kupa ky'y. Ajawyi ipojy sa'u tè janepirà jukaa. 5Janejare'e kõrijõ tè jane'ãg ojuka kuwa imonooka jimomorijau wasua rena kyty, janepirà revejẽ, e'i. Ajawyi Janejare'e kõrijõ tè tapemomojy, e'i ijupe kõ.

“Janejare'e oja'a katu janere ipi”, e'i Jesu mã'ẽ

(Mateusi 10.29-31)

6Kee e'i jẽ Jesu:

– [A'evo ipe ekoi. Ajamã'ẽ oja'a katu jẽ janere ipi.] Nijaja'ai kãpĩnà rè ipi. Temimota katu ywe'e rõwã. Epy rõmõ jame'ẽtà remẽ naepyi ipi. Ajamã'ẽ a'evo ipe remẽ Janejare'e oja'a katu jẽ ee kõ ipi. Naearai'ãi iwyi kõ ipi. Noaparity kõ'ãi ipi. 7Tysi tõ pene. Oja'a katuay ve iko pene ipi. Pekuwa katuay ipi. Peapira mosã'ãga kõ ve tesõ okuwa. Omoirõ irõma katu oja'a ee. Ajawyi tapekyje e'ã [poromomorijau mãe kõ wyi] ipi, Janejare'e okãte'ã pene rewarà mõ. Aje ywete oja'a katu pene iko ipi, e'i ijupe kõ.

“Tapejinõsĩ e'ã ekoty rewarà rõmõ peiko”, e'i Jesu mã'ẽ

(Mateusi 10.32-33; 12.31-32; 10.19-20)

8E'i jẽ Jesu:

– Kee a'e jẽ peupe: Tapejinõsĩ e'ã ewyi peiko! Ava mõ emoẽoka o'arà kyty remẽ, kee e'i ipi: “Jesu tè erõvijã ywete rõmõ ekoi”, e'i imomewa ãmõ kõ pè. Ãmẽ a'e rè aja'a jẽtà Janejare'e pyri aẽ aa remẽ, yvapewarà kõ rovake. “Ekoty rewarà tè ãwĩ”, a'età ãmẽ ijupewarà mõ. 9Ãwĩvo ve ava mõ, “Erõvijã rõwã Jesu”, e'i jane kõ rovake remẽ, “Eremĩgwai rõwã ãwĩ”, a'e tary ve Janejare'e remĩgwai yvapewarà kõ rovake yva pè, e'i.

10E'i jẽ Jesu:

– Kee a'e teve. Ava mõ Janejare'e Remimuurerà ojimojane mã'ẽ rè oporegeta ai remẽ, “awyjepa” e'i jẽ kuwa ijupe. Ajamã'ẽ “ãjãg” pejẽ Janejare'e 'Ãg pè remẽ, “awyjepa” ne'i'ãi peupe. Aepo omo'y jẽtà pene, e'i.#Mak. 3.29

11E'i jẽ Jesu:

– Kee a'e teve. Kãramõ ererovija pekupa rewarà mõ ãmõ kõ ojimo'eaità pene iko. Ojimõarõ teywetetà pekoty iko kupa. Peneraatà jõvijãgwerà rovake, Janejare'e ayvu rè jimo'ea retã kõ pè. Kovenatu kõ rovake peneraatà teve kupa. Ãmõ ijayvukasi mãe kõ rovake teve. Nivoi mã'ẽ omo'y mo'y teywetetà pene kupa. Ajamã'ẽ tapejimopirai e'ã peayvu rã rè peiko ipi nẽ. Ma'e. “Manyvo a'età põkõ a'evo remẽ?” tapejẽ e'ã ikõ ãmẽ peiko ne, e'i Jesu. 12Ameve, a'e peve Janejare'e 'Ãg peneve ekoità. A'e tè omojikuwaokatà pejẽ manyvo tapejẽ oporanu peupe mãe kõ pè, e'i ijupe kõ.#Mak. 13.11; Ruk. 21.14-15

Oma'e kõ rè eako'i mã'ẽ rè tè Jesu poromosã'ãga remẽwarà

13A'evo remẽ kwaima'e mõ atyry põ'õ mè wyi oporegeta Jesu pè upa. Kee e'i epe ijupe:

– Oremo'earà, papa okãjã maire papa ma'ekwerà rè kãkãe opyypa oupe. Nome'ẽi ãmõ ije. Kee ere kãkãe pè: “Eme'ẽ ãmõ nemõmirĩ pè”, ere, e'i epe Jesu pè.

14Ãmẽ kee e'i Jesu kwaima'e pè:

– Ava jẽ rõwã, “Ivoa tekoua kuwaparà mõ tereiko”, ne'i'ãi ije. Ajawyi ava ayvu rupi põ moko a'e kuwasi mijã, e'i Jesu ijupe.

15Ãmẽ e'i jẽ Jesu poromogeta:

– Pejapyaka katu ikõ eayvu rè nẽ, e'i. Nivoi moma'e kõ rè jajimo'eai ywete remẽ. “Aje ywe'e”, tapejẽ e'ã moma'e ywete moatya pè, e'i. Ãmõ kõ kee e'i tite ipi: “Mõa'ãrõwã moma'e tamoaty eupe. Ije ywesõ tareko moma'e ma'e”, e'i ipi. Nivoi aepo jaa ãmẽ. Ajaa maekwerà pè rõwã “aje ywete” eu kuwa ipi mijã. Ajawyi a'e rè ywesõ pejimo'eai ipi ne, e'i Jesu ijupe kõ.

16Ajaire koo jarà rè tè poromosã'ãga. Kee e'i:

– Oiko kwaima'e mõ imoma'e ywete mã'ẽ mijã. Moma'e rã'ãi oõtã mã'ẽ tè a'e. Ajaire ãmõ 'ary pè ojimitã okoo rupi. Mitirõwã ikoo. Mãmĩ gyty 'ete ikoo popy. Ajaire i'a ywete ikoo pewarà. Oryvay ijarà omãjã ee ãmẽ. 17Ãmẽ, “Manotà põkõ moma'e rã'ãigwerà areko imokatu awi?” e'i. “Nuvei ena, mõa'ãrõwã rewarà mõ”, e'i oupe ojipy'amogeta. 18E'i jẽ ajaire oupe: “Haa! Age'e akuwa katu ky'y”, e'i. “Moma'e rã'ãigwerà rena kõ amotaraità rã'ĩ. Ajaire mititirõwã mã'ẽ jẽsi tainõ mijẽ ekovijarà rõmõ. Ãmẽ si oytà moma'e rã'ãigwerà rena tamoaty imokatu ky'y. Emoma'e kõ ve pirujẽ amokatutà a'e pupe teve ky'y”, e'i. 19“Aja paire si kee a'età eupe: ‘Moma'e rè jẽ rõwã ajimo'eaità ãwijã mẽ. Emã'ẽ! Mõa'ãrõwã moma'e arekopa ky'y’, a'età ãmẽ. Ajawyi naposiko'ãi ky'y. Aporai kõrijõtà tè aiko ky'y. Ajimory kõrijõtà tè aiko ky'y. Ajimi'u wasu kõrijõtà tè aiko ky'y”, e'i tite kwaima'e iko mijã. 20Ajamã'ẽ aepo e'i oupe remeve, kee e'i sikaepo Janejare'e ijupe: “Kõi sõ tekokuwa e'ã ne. Age'e pya remẽ nekãjãtà ky'y. Ava pè põ nema'ekwerà kõ opytatà ãmẽ ky'y?” e'i Janejare'e ijupe.

21E'i jẽ Jesu:

– Ajawyi a'evo tesõ imoma'e ywete mã'ẽ. Oma'e kõ règà oja'a ywe'e tite iko mijã. Noja'ari ãmẽ Janejare'e rè iko. Nojimo'eai ee. Nivoi ãwijã mẽ Janejare'e rovake ekoi, e'i Jesu poromo'e.

Wyra kõ rè tè Jesu poromosã'ãga remẽwarà

(Mateusi 6.25-34)

22-23Ãmẽ aepo rè kee e'i Jesu wemimo'ekwerà kõ pè:

– Tapejimopirai e'ã penekoa rã rè, penemi'õ rã rè, ãmõ, peyru rã rè. Ajawyi kee tapejẽ e'ã pejimopirai rõmõ: “Moma'e põ a'utà kãramõ? Moma'e põ apypytà”? tapejẽ e'ã pejimopirai rõmõ peiko ky'y. Janejare'e rupi tekoua rè ywesõ tapeja'a peiko. [Janejare'e tè oja'a katu janere ipi. Janerereko katua okuwa teãmã.] Ajawyi tapejimopirai e'ã, a'e pejẽ. 24Pemã'ẽ gatu rã'ĩ wyra kõ reko rè. Nipy'a pirai epe wemi'õ rã rè kupa ipi. Nikooi teve ipe kupa ipi. Wemi'õ rã mõ nomoatyi amãtejẽ ipi. Ajamã'ẽ Janejare'e oja'a katu ee kõ ipi. Omoigooka emi'õ rã kõ ijupe kõ ipi. A'e kõ rè oja'a katu remẽ, tysi tõ pene oja'atà tè iko. Pene ywesõ okãte'ã wyra kõ wyi iko ipi, e'i.

25– Ãwĩvo ve tapejimopirai e'ã pemãnõa rã rè. A'evo ipe peiko remẽ pemãnõ jẽtà kãramõ. Manyvo napejẽ'ãi peiko puku rõmõ, e'i Jesu. 26Ajaa pè aepo a'e pejẽ. Emã'ẽ. Napemopukui peneko remẽ, moma'e rã põ pejimo'eaità moma'e kõ rè ãmẽ peiko? a'e pejẽ, e'i.

27E'i jẽ Jesu:

– Ãmõ rè pemã'ẽ gatu kuwa teve peiko, ka'a potyry kõ rè. Ikatuay mã'ẽõ ee remẽ ipi. Noposikoi epe oupe ipi. Nomõjãi epe oyru mõ ipi. Karamoe remẽ itõkõ jõvijã Saromão tyru e'eay mõ opypy ipe ipi. Owaray ipe. Ajamã'ẽ ka'a potyry kõ ywesõ ikatuay jome jõvijã Saromão ryru e'eay wyi ipi, e'i Jesu.#1To. 10.4-7

28– Aje ywe'e nija'ei ka'a kykyrerà kõ pè ipi. Jamopapai tepe'yte tosinĩ tokai ipi. Ajamã'ẽ Janejare'e ikatuay omoigooka kõ. Oja'a katu ee kõ ipi. A'e rè oja'a katu remẽ, tysi tõ oja'atà tè pene. Ajawyi penemipypy rã rè tapejimo'eai e'ã peiko. Janejare'e rè kuwasi penako'i peiko, a'e pejẽ, e'i Jesu.

29– Ajaa rewarà mõ tapejipy'amopirai e'ã moma'e ma'ekwerà rè peiko ipi nẽ, a'e pejẽ. Ãmõ, penemi'õ rã rè tapejimo'eai e'ã teve. 30Janejare'e nokuwai mãe kõ tè ojimo'eai karuaru apijarà kõ rè iko ipi. Ajamã'ẽ Papa yvapewarà okuwapa teãmã ãwijã peiko. Peporijau ee mãe rã kõ omouvetà tè kõ'ẽ jawe jawe pejẽ ãmẽ ipi. 31Ajawyi Janejare'e rè ywesõ tapeja'a peiko ky'y, penõvijã ywete rè ywesõ. “Emimota rupi katu taiko”, pejẽ peporegeta peiko. A'evo peiko remeve, oja'a katutà ãmẽ pene ipi, e'i Jesu.

“Pema'e kõ rè tapenako'i e'ã ipi”, e'i Jesu mã'ẽ

(Mateusi 6.19-21)

32E'i jẽ Jesu:

– Eremimo'ekwerà kõ, kejõgà teipe pejẽ. Pekyje ajamã'ẽ ne, e'i. Janejare'e penauvay Penõvijã ywete rõmõ penereko. “Ajawyi jõvijã kõ rõmõ poroinõtà erena pè”, e'ipa peupewarà mõ, e'i Jesu.

33E'i jẽ Jesu:

– Ajawyi kee tapeiko. Tapenako'i e'ã pema'e kõ rè ipi. Pema'e peme'ẽ rã'ĩ karakuri repy rõmõ. Ajaire epykwerà pemosãi nimoma'ei mãe kõ pè. Yva pupe jẽsi pemoaty kuwa pema'e kõ ãmẽ. A'e pewarà imona mã'ẽ noeraa'ãi ipi. Ãmõ, kupi'ĩ nomopupupa'ãi imoai ipi.#1Pe. 1.4 34Maty pemokatu pemoma'e e'ekwerà kõ, a'e rè ywesõ peja'atà ipi. Janejare'e pyri pemokatu mã'ẽ rè ywesõ peja'a katu kuwasi mijã, e'i Jesu poromo'e.

“Tapemoa'u jẽ ikõ evãea nẽ”, e'i mã'ẽ

(Mateusi 25.1-13; Maku 13.33-37)

35Ãmẽ e'i jẽ Jesu:

– Kãramõ ajo tarà mijẽ Jõvijã wasu rõmõ ajikuwa. Evãea rã tapemoa'u katu. Ãwitõ ava mõ oõvijã omoa'u kõ'ẽ, ãwĩvo 'ejẽ tapeiko.#Mat. 25.1-13 36Aepo jaa rè kee a'e pejẽ. Tõvijã mõ oo ojimorypa rena kyty torya rè. Ajaire ojivy uu remẽ, apy'awarà mõ temĩgwai kõ oovapyjavo ijupe, omoa'u katu kupa ãrõ rewarà mõ.#Mak. 13.34-36 37Ajawyi ory ee kõ tõvijã ovãe. “Ikatuay eremĩgwai kõ ekoi”, e'ità tõvijã imoe'e kõ ãmẽ. Ãmẽ kee e'ità tõvijã ijupe kõ: “Pejẽ jẽsi peapy toporoapoi”, e'ità ijupe kõ. 38Temĩgwai e'eay mõ karumẽ oõvijã ovãe remẽ, a'e omoa'u tè upa. Pyaikatu tè ovãe remẽ, omoa'u jẽ emĩgwai upa. Kõ'ẽ tarà mẽ tè ovãe remẽ, omoa'u jẽtà emĩgwai upa. A'evo mã'ẽ pè kee eutà emĩgwai pè: “Taory katuay iko ãwĩ”, eutà, e'i Jesu. A'evo ve pejẽ, evãea rã renone ikõ temoa'u katu pekupa nẽ, a'e pejẽ. 39Ajamã'ẽ kee jaa rè tapeja'a. Ja'ave rõwã tapeiko e'ã erakypyre kyty. Tetã jarà mõ sõ okuwa ovãetà imona mã'ẽ mõ remẽ, omoa'u kuwa mijã, imona mã'ẽ toike e'ã etã wyry pè. Omoisyry kuwa imono ãmẽ ipi. Na'evoi põ? Õ'õ! A'evo!#Mat. 24.43-44; 1Tes. 5.2; 2Pe. 3.10; J.Jim. 3.3; 16.15-16 40Tãwĩvo ve ikõ peiko nẽ. Tetã jarà vo temoa'u karuaru jẽ pekupa, poroapy'atà tè avãe rewarà mõ, e'i Jesu.

“Eremĩgwai e'eay rõmõ tapeiko erapykyre kyty”, e'i Jesu mã'ẽ

(Mateusi 24.45-51)

41Aepo jaa Jesu omome'u paire, Peturu e'i ijupe:

– Jõvijã, kõi, “Tapemoa'u jẽ ikõ evãea rã nẽ”, ere maekwerà. Ava upewarà mõ põ aepo ere? Oreupe põ aepo ere? Pirujẽ atyry kõ pè põ ma'e remẽ aepo ere? e'i.

42Kee e'i Janerõvijã:

– [Eremĩgwai otekokuwavay mã'ẽ rõmõ tapeiko. Tapetekokuwavay ikõ erapykyre kyty nẽ.] Temĩgwai e'eay rè tè poromosã'ãgatà tapekuwa, e'i. Ava põ otekokuwavay iko oõvijã pãtavõarà rõmõ ekoi ipi? Tõvijã ojisyrytà rã'ĩ remẽ, ava põ oity kuwa wemĩgwai kõ rõvijã miti rõmõ toiko? Ijayvu rupi katu ekoi mã'ẽ tè. Oõvijã reã'ã rupi werovija katu jẽ mã'ẽ tè. A'e pè kee e'ità: “Ene tè eja'a ema'e kõ rè. Ja'umã'ẽ teremosãi eremĩgwai kõ pè i'arà mẽ gatu”, e'ità tõvijã ijupe oity oo remẽ. Ijayvu rupi katu werekotà oõvijã rapykyrerà kyty ãmẽ ipi. 43Ajawyi tõvijã ovãe remẽ, oryvaytà wemĩgwai rè. Emĩgwai ory tevetà ee. Nojimosĩoka'ãi oõvijã wyi, ijayvu rupi katu ekoi teãmã rewarà mõ. 44Oryvaytà tõvijã iposikoa rè. Ajawyi a'e tè opyteporotà ijayvumokasi pirujẽ wemirekokwerà jarà rõmõ toiko ky'y. Aje ywete aepo a'e pejẽ, e'i Jesu.

45-46– Kee e'i ojipy'amogeta mã'ẽ nopyteporo'ãi tõvijã. “Oiko puku jẽtà erõvijã”, e'i ywe'e tite oupe mã'ẽ. A'e ãmẽ oõvijã remĩgwai kõ wereko ai sõ tite oõvijã rapykyrerà kyty. Onõpã nõpã kõ tesõ. Ojimi'u kõrijõ tè iko. Ãmõ, oka'u ka'u tè iko. Ja'ave rõwã ekoi. Ãmẽ si nojikuwai amãtejẽ uu sikaepo tõvijã remẽ, nikatu miti'ãi ãmẽ ijupe. Manyvo ne'i'ãi emĩgwai opokou remẽ ky'y. Tõvijã ope'atà imono jimomorijaua rena kyty. Nivoi mãe kõ pyri omonotà imomorijauoka ky'y, e'i. 47A'evo temĩgwai mõ oõvijã ayvukwerà okuwa ywe'e ipe mã'ẽ, ajamã'ẽ nojimokatui oõvijã ayvukwerà rupi toiko. A'e ojimomorijauoka tesõtà ajaire oõvijã pè. 48Ajamã'ẽ oõvijã ayvukwerà nokuwai mã'ẽ pè ovo rupi teve ekoi ãmẽ. Nokuwai wyi noerovijai oõvijã ayvukwerà mã'ẽ. Ajawyi nivoi sikaepo ekoi tite remẽ, tõvijã omomorijauoka sa'utà tè ãmẽ ipi. Ava mõ pè jakuwaoka katu manyvo kuwa tekoua mã'ẽ, ajaire kee eu kuwa ijupe: “Nerovija põ neremikuwawerà?” eu kuwa. Waiteve ãmẽ ãmõ pè manyvo kuwa tekoua nijakuwaokari ywe'ei ijupe mã'ẽ pè. A'e pè ajaire, “Nerovija põ?” nija'e'ãi ãmẽ ijupe ipi, ji'ite nijakuwaokari ijupe rewarà mõ, e'i Jesu poromogeta.#12.48 “Pejẽ ywesõ eayvu rupi katu peiko kuwa”, jaa tè aepo e'i mã'ẽ.

Nijajimo'ãgatui remẽwarà

(Mateusi 10.34-36)

49E'i jẽ Jesu:

– Aã ike pepõ'õ mè ajo aiko remẽ, tata vo sõ mã'ẽ mõ aerutà. Apota mijã a'e eny tè upa age'e, a'e eupe aiko, e'i. Tata vo 'ejẽ emomorijaua rã, e'i. 50Ajimomorijautà amãnõ jane kõ aiwererà repykarà mõ. A'evoa rõmõ tè ajo. Ajamã'ẽ a'e rè epy'a jikõtevẽ ai tè aiko, kuise'ẽ tokwapa ewyi a'evoa, a'e ãmẽ. Awyjepa remẽ, najimopirai'ãi ky'y. Erorytà tè ãmẽ, e'i.#Mak. 10.38 51Maevo kee pejẽ tite eupe: “Jesu si poromojimoryokatà, ãwisõ pirujẽ ãmõ e'y e'yiwarà kõ tojimory ojee ky'y”, pejẽ tite põ ije? Ãnĩ. Na'evo'ãi ajamã'ẽ. Poromojipe'a pe'a ojiwyi mã'ẽ rõmõ tè ajo, e'i Jesu. 52Age'e rire jane kõ reko iteetà ky'y. Ojetãrã kõ ve ojimojipe'atà ojiwyi erewarà mõ ky'y. Nererovija tari mãe kõ ojimojipe'atà ererovija takatu mãe kõ wyi. Ojimoãpãtà ee kõ kupa. “Temipotare'ã” e'ità erekoa rupiwarà kõ pè kupa. Ma'e remẽ etã mõ pè 5 mirà ipupewarà ojimojipe'atà ojiwyi kupa. Moapy ekoty rewarà kõ. Ãmõ kõ ãmẽ kwere'ĩ gytywarà rõmõ ekoità ewyi. Tetãrã kõ ve ipe kupa mijã. Ajamã'ẽ kee e'ità ojiupe: “Epy'a rupi katuwarà rõmõ rõwã ene ky'y”, e'ità ojiupe kupa. 53Ãmõ, tõvijãgwerà mõ wa'yry revejẽ kee ne'i'ãi ojiupe ky'y: “Epy'a rupi katuwarà”, ne'i'ãi. Ãmõ, mãmã kõ omemyry kõjatãi revejẽ, “Erory nere”, ne'i'ãi ojiupe kupa ky'y. Ãmõ, jotija okõjatãi revejẽ, “Ejo jajimory”, ne'i'ãi ojiupe ky'y. Pe'ĩ ekoty rewarà tè. Ãmõ ãmẽ ekoty rewarà rõwã. Ajawyi a'evo ekoità kupa, e'i Jesu wemimo'ekwerà kõ pè.

“Ekuwa kuwasi pekupa mijã”, e'i Jesu mã'ẽ

(Mateusi 16.1-4)

54Ãmẽ e'i jẽ Jesu. Aty wasu kõ pè tè e'i ky'y. Kee e'i ijupe kõ:

– Ekuwa kuwasi pekupa mijã, emojikuwapa rè pemã'ẽ ipi rewarà mõ. Pemã'ẽ. Kee jaa ipe pekuwa. Ãmõ remẽ kwaray 'apa kyty wyi ãmãnà ryru kõ oẽ okwa remẽ, “Emã'ẽ, okytà tè ãmãnà”, pejẽ ojiupe ipi.#12.54 Juteu kõ yvy pè kwaray 'apa kyty wyi ãmãnà oẽ okwa ipi. Jane rena pè ãmẽ kwaray ẽma kyty wyi oẽ okwa ipi. Upi katu pekuwa. 55Waiteve ãmẽ kwaray ẽma kyty wyi ijyvytu okwa remẽ. Kee pejẽ ãmẽ: “Emã'ẽ yvytu rè. Kwaraytà tè ky'y”, pejẽ ikuwa ipi. Upi katu teve aepo pekuwa. 56Kõi sõ ivo rã'ãga mã'ẽ tè pejẽ peiko! Õ'õ põ, 'arà kõ pekuwa katu ipi. Ãwĩvo ve ekuwa kuwasi pekupa emojikuwapa rè pemã'ẽ remẽ mijã. Ajamã'ẽ nekuwai pekupa, e'i.#12.56 “Ekuwa kuwasi Janejare'e Remimuurerà rõmõ pekupa mijã”, jaa tè aepo e'i mã'ẽ.

“Tapejimory amãtejẽ pene ojikõ'õ mãe kõ rè”, e'i Jesu mã'ẽ

(Mateusi 5.25-26)

57E'i jẽ Jesu:

– Pevote kuwasi penekoawerà pemosã'ãga peiko mijã. 58Ajare ene, ma'e remẽ ava mõ neraatà nivoia kuwaparà kõ rovake mijã. Nivoi mã'ẽ omo'ytà nere. A'evo remẽ, kee ere amãtejẽ ijupe: “Ene, ejo jajimogeta rã'ĩ. Ma'e remẽ ‘hoõ’ ja'età ojiupe ky'y”, ere ikõ ijupe rã'ĩ esa nẽ. Ãmẽ “õ'õ” pejẽ ojiupe remẽ, pejimory mijẽ ojee remẽ, ikatu tè ãmẽ. Ajamã'ẽ “hoõ” napejẽi ojiupe remẽ, waypetetà ãmẽ ky'y. Nivoia kuwaparà rovake nereraatà ãmẽ ky'y. A'e ajaire sota kõ po pè nemonooka kuwa. Ajaate jimopã'ãga pupe nereraa kuwa nereity ky'y. 59Nerejisyry'ãi a'e pupe wyi, ajaate awyjepa nemoepypa katu nivoi neiko maekwerà. Aje ywete a'evotà, e'i. [Ãwijã mẽ kuise'ẽ jẽ tapejimory Janejare'e revejẽ, poromoe'yia 'arà renoneve, e'i Jesu ijupe kõ.]

Currently Selected:

Rukasi 12: oymNT

Highlight

Copy