Popular Bible Verses from Rukasi 12

Share

Tãwĩvo ve ikõ peiko nẽ. Tetã jarà vo temoa'u karuaru jẽ pekupa, poroapy'atà tè avãe rewarà mõ, e'i Jesu.

Ajawyi Janejare'e rè ywesõ tapeja'a peiko ky'y, penõvijã ywete rè ywesõ. “Emimota rupi katu taiko”, pejẽ peporegeta peiko. A'evo peiko remeve, oja'a katutà ãmẽ pene ipi, e'i Jesu.

Ãmẽ e'i jẽ Jesu poromogeta: – Pejapyaka katu ikõ eayvu rè nẽ, e'i. Nivoi moma'e kõ rè jajimo'eai ywete remẽ. “Aje ywe'e”, tapejẽ e'ã moma'e ywete moatya pè, e'i. Ãmõ kõ kee e'i tite ipi: “Mõa'ãrõwã moma'e tamoaty eupe. Ije ywesõ tareko moma'e ma'e”, e'i ipi. Nivoi aepo jaa ãmẽ. Ajaa maekwerà pè rõwã “aje ywete” eu kuwa ipi mijã. Ajawyi a'e rè ywesõ pejimo'eai ipi ne, e'i Jesu ijupe kõ.

Maty pemokatu pemoma'e e'ekwerà kõ, a'e rè ywesõ peja'atà ipi. Janejare'e pyri pemokatu mã'ẽ rè ywesõ peja'a katu kuwasi mijã, e'i Jesu poromo'e.

– Ãwĩvo ve tapejimopirai e'ã pemãnõa rã rè. A'evo ipe peiko remẽ pemãnõ jẽtà kãramõ. Manyvo napejẽ'ãi peiko puku rõmõ, e'i Jesu.

Ãmẽ aepo rè kee e'i Jesu wemimo'ekwerà kõ pè: – Tapejimopirai e'ã penekoa rã rè, penemi'õ rã rè, ãmõ, peyru rã rè. Ajawyi kee tapejẽ e'ã pejimopirai rõmõ: “Moma'e põ a'utà kãramõ? Moma'e põ apypytà”? tapejẽ e'ã pejimopirai rõmõ peiko ky'y. Janejare'e rupi tekoua rè ywesõ tapeja'a peiko. [Janejare'e tè oja'a katu janere ipi. Janerereko katua okuwa teãmã.] Ajawyi tapejimopirai e'ã, a'e pejẽ.

Tysi tõ pene. Oja'a katuay ve iko pene ipi. Pekuwa katuay ipi. Peapira mosã'ãga kõ ve tesõ okuwa. Omoirõ irõma katu oja'a ee. Ajawyi tapekyje e'ã [poromomorijau mãe kõ wyi] ipi, Janejare'e okãte'ã pene rewarà mõ. Aje ywete oja'a katu pene iko ipi, e'i ijupe kõ.

E'i jẽ Jesu: – Eremimo'ekwerà kõ, kejõgà teipe pejẽ. Pekyje ajamã'ẽ ne, e'i. Janejare'e penauvay Penõvijã ywete rõmõ penereko. “Ajawyi jõvijã kõ rõmõ poroinõtà erena pè”, e'ipa peupewarà mõ, e'i Jesu.

Pemã'ẽ gatu rã'ĩ wyra kõ reko rè. Nipy'a pirai epe wemi'õ rã rè kupa ipi. Nikooi teve ipe kupa ipi. Wemi'õ rã mõ nomoatyi amãtejẽ ipi. Ajamã'ẽ Janejare'e oja'a katu ee kõ ipi. Omoigooka emi'õ rã kõ ijupe kõ ipi. A'e kõ rè oja'a katu remẽ, tysi tõ pene oja'atà tè iko. Pene ywesõ okãte'ã wyra kõ wyi iko ipi, e'i.

– Ajaa rewarà mõ tapejipy'amopirai e'ã moma'e ma'ekwerà rè peiko ipi nẽ, a'e pejẽ. Ãmõ, penemi'õ rã rè tapejimo'eai e'ã teve.

– Aje ywe'e nija'ei ka'a kykyrerà kõ pè ipi. Jamopapai tepe'yte tosinĩ tokai ipi. Ajamã'ẽ Janejare'e ikatuay omoigooka kõ. Oja'a katu ee kõ ipi. A'e rè oja'a katu remẽ, tysi tõ oja'atà tè pene. Ajawyi penemipypy rã rè tapejimo'eai e'ã peiko. Janejare'e rè kuwasi penako'i peiko, a'e pejẽ, e'i Jesu.

Ivo rã'ãga mãe kõ kee e'i epe kuwa: “Tokuwa e'ã ãmõ kõ epy'a pewarà kõ ne”, e'i epe. Ajamã'ẽ ojikuwapa jẽtà jane kõ pè. Pirujẽ janereko kõ ojikuwatà kãramõ. Ãmõ, janeayvu kõ teve.