Rukasi 14

Jesu ojimi'u Pariseu mõ retã wyry pè remẽwarà

1Ajaire ãmõ jimoava 'arà mẽ Jesu oẽ Pariseu kõ rõvijã mõ retã wyry pè ojimiwa. Ãmẽ ãmõ kõ Jesu omoa'u upa. 2Ãmẽ a'e pè Jesu rovakeve kwaima'e itekorã mã'ẽ mõ ekoi teve. A'e irurupa mã'ẽ. 3Ãmẽ kee e'i Jesu Pariseu kõ pè. Ãmõ, tãmõ Moisesi remikusiwarerà rè poromo'e mãe kõ pè e'i:

– I'ete põ jimoava 'arà mẽ jamokatu itekorã mã'ẽ mõ ipi? Manyvo pejẽ põ? e'i ijupe kõ.

4Nipui ãmẽ enu kupa. Ãmẽ Jesu opopyy itekorã mã'ẽ imokatupa. Omokatu paire, kee e'i ijupe:

– I'ete nejivy nerena kyty neo ky'y, e'i ijupe.

5Ajaire kee e'i jẽ Jesu oporanu Pariseu kõ pè:

– Ma'e remẽ nera'yry mõ o'a sõ yy je'ẽ typy mã'ẽ pupe oo remẽ, jimoava 'arà teipe sõ remẽ, aje sipõ nereekyi'ãi kuise'ẽ tomãnõ e'ã? Õ'õ, neekyità! Ivo jẽ nerima mõ sõ o'a remẽ, a'evo ve nereekyi'ãi kuwa põ a'evo remẽ? Õ'õ, neekyi kuwa. Na'evoi sipõ pereko ipi? e'i ijupe kõ.#Mat. 12.11

6Aepo e'i remẽ ava jẽ rõwã iputà. Manyvo ne'i'ãi Jesu rovaja kupa.

7Ãmẽ a'e pè tui jẽ remẽ, Jesu omã'ẽ mõropãrà kõ rè erokwa. Okuwa kee e'i oupe kupa ipi mã'ẽ: “Ije ywesõ aã ike jõvijã rena ypy pè taapy ajupa, temoe'e ãmẽ kupa”, e'i e'i oupe kupa ipi mã'ẽ. Ajare kee e'i Jesu poromogeta mõ:

8-9– Ma'e. Neretãrã mõ ojirekotà remẽ, torya mõ oinõtà. Ãmẽ a'e 'ary pè kee e'ità ene: “Ene ve ejo tijajimory jajimiwa”, e'ità. Neo remẽ, kee tere e'ã nepy'a pè: “Jõvijã kõ rena ypy pè aapytà ajimoena”, tere e'ã ãmẽ neiko. A'e sõ ere tite remẽ, kee e'i kuwa neupe: “Ejisyry typopy kyty eo eapy. Joe'e rena tè ike eu. Ene ãmẽ a'e rõwã”, e'i kuwa torya jarà nemosĩoka. 10Ajawyi kee ere amãtejẽ. Ikupe kyty tè eẽ eapy rã'ĩ, a'e pejẽ. Ajaire uu kuwa torya jarà nekoty. Kee e'i kuwa neupe: “Haa! Joe'e tè ene. Ejo enone kyty joe'e rena pè tereapy ãmẽ”, e'i kuwa neupe. A'evo remẽ nemoe'età tè ãmõ kõ rovake ãmẽ. Ãmẽ tè ikatutà tè neupe, e'i ijupe kõ. #P.Teko. 25.6-7 11A'evo tè ipi. Ojimoe'e teywete mã'ẽ ajaire jowyry kyty tè ekoità. Ajamã'ẽ nojimoe'eoka tari mã'ẽ ãmẽ jo'arà kyty joe'e rõmõ ekoità, e'i ijupe kõ.#Mat. 23.12; Ruk. 18.14

12E'i jẽ Jesu tetã jarà pè, “Ejo epyri ejimiwa” e'i ijupe mã'ẽ pè:

– Jimi'u wasu sõ neinõ ipi remẽ, mõropãrà kõ neokwai imuu ipi. Kejõgà nemuu ipi. Nejimorypa kõ. Ãmõ, imoma'e ywete mãe kõ. Ãmõ, nepyriwarà kõ. Wãi wãisõ nemuu ipi. Kee ere teãmã: “Moko tary ve terereko kupa ajaire”, ere teãmã. Ajawyi a'e a'e kõ kõrijõ tè neokwai totuu nerena pè ipi. Ajamã'ẽ jiovajarĩa règà tè neja'a remẽ, nikatu'ãi ãmẽ. 13Ajawyi jimi'u wasua neinõtà remẽ, kejõ gatu eokwai imuu: Nimoma'ei 'ete mãe kõ. Ãmõ, itekorã mãe kõ. Noatai mãe kõ. Naeapyoi mãe kõ. A'e a'e kõ jẽsi eokwai totuu nepyri, e'i. 14Ãmẽ tè Janejare'e nemoe'età nere omãjã, jiovajarĩa rè nereja'ai neiko rewarà mõ. Ikatu tè, “Terereko ve kupa”, nerei remẽ. Ãmẽ kãramõ Janejare'e poromomoera mijẽ remẽ tè ikatu tè nererekotà ãmẽ ky'y. A'e rè jẽsi eja'a awi eiko, e'i Jesu ijupe.

Jimi'u wasua rè tè Jesu poromosã'ãga remẽwarà

(Mateusi 22.1-14)

15Ajaire aepo renu mẽ namesa pyri wapy mã'ẽ mõ oporegeta Jesu pè. Kee e'i ijupe:

– Oremo'earà, kãramõ Janejare'e ojikuwa Jõvijã wasu rõmõ remẽ, jimi'u wasua oinõtà. Janeroryvaytà ãmẽ, jajimi'u ipyri remẽ, e'i.

16Aepo renu mẽ jimi'u wasua rè tè Jesu poromosã'ãga. Kee e'i:

– Kwaima'e mõ jimi'u wasua oinõtà. Ãmẽ ojimorypa kõ pè, “Ejo epyri ejimiwa”, e'i amãtejẽ. Jane kõ mõa'ãrõwã ookwai amãtejẽ imuu jimi'u wasua rã pè. Ãmẽ “hoõ” e'i amãtejẽ kupa. 17Ajaire, jimi'u wasua 'arà mẽ, kee e'i wemĩgwai pè: “Age'e si ekwa emõropãrà kõ pè javo”, e'i. “Hoõ” e'i. Oo ajaire javo. Kee e'i emĩgwai: “Erõvijã emuu nepijarà mõ. Ojinõma jimi'u wasua upa. Ajawyi, ‘Age'eve ejo jajimi'u’, e'i erõvijã ene”, e'i epe uutà mãe kõ pè. 18Soõ, nonuri kupa. Ojipijarĩ kupa. Kee e'i ãmõ: “Aa kuwasi mijã. Ajamã'ẽ age'eve apyy erena mõ. Ajawyi a'e resa aatà. Naa'ãi sikaepo awi. Nejimõarõ tite eupe ne”, e'i ojipijarĩ. 19Ãwĩvo ve jẽ ãmõ kee e'i: “Age'eve pui kõ apyy. 10 rõmõ apyy kahu omõtã eraa mãe kõ. Ajawyi a'e rè aatà age'e. Apoã'ã kõtà esa. Ajawyi naa'ãi sikaepo”, e'i ojipijarĩ. 20Ivo jẽ ãmõ. Kee e'i ve: “Aa kuwasi mijã. Ajamã'ẽ age'eve amenapa. Ajawyi naa'ãi sikaepo ky'y”, e'i. A'evo “ejo” e'i epe ijupe kõ. Nijeweri uu kupa ajamã'ẽ. 21Ajaire ojivyrĩ emĩgwai oo oõvijã gyty. Ãmẽ, “Nonu'ãi sikaepo nejimorypa kõ”, e'i ijupe. Ãmẽ a'evoa rè ojikõ'õ tesõ jõvijã aepo renu ãmẽ. E'i mijẽ wemĩgwai pè: “Ãmõ kõ gyty ekwa, taa rupi, pee pee kõ rupi”, e'i. “Ma'e kõ pijarà mõ ekwa ky'y”, e'i. “Nimoma'ei mãe kõ. Ãmõ, noatai mãe kõ. Ãmõ, naeapyoi mãe kõ. Ãmõ, okunu kunu 'ejẽ wata mã'ẽ kõ ve. Wãi wãisõ pijarà mõ ekwa ky'y”, e'i. “A'e kõ eatykapa erena pè”, e'i. 22Oo ãmẽ emĩgwai oõvijã ayvukwerà rupi. Ãmẽ emimuurerà kõ ovãe vãe ojimoena. Wapy apypa apyka 'aryvo okwa kupa. Ajamã'ẽ noporakapaive tena kõ kupa. Ajawyi oo oõvijã gyty kee javo: “Erõvijã. Neremikwaiwerà kõ arovãema. Ajamã'ẽ noporakapaive tena kupa”, e'i. 23Ãmẽ tõvijã: “Hoõ, akuwa”, e'i. “Eeru jẽsi ikõ ãmẽ nẽ. Pee wasu rupi ekwa ãmẽ. Ãmõ, pee miti kõ rupi ekwa ãmẽ. Pirujẽ neesa mãe kõ pè kee ere: ‘Age'eve ikõ ja'e erõvijã retã gyty jimi'u wasua pè nẽ’, ere. ‘Ejo ikenẽ’, ere. Pirujẽ neesa mãe kõ pè aepo ere erojivy kõ, toporakapa 'ejẽ erena ky'y”, e'i. Ãmẽ “hoõ” e'i emĩgwai oo. 24Ajaire kee e'i jẽ tõvijã: “Aje ywete aporegetatà. Ejimorypa kõ aokwai imuu ypy mãe kõ nojimi'u'ãi epyri kupa. A'e kõ ava jẽ rõwã amojimi'uokatà epyri ky'y”, e'i tõvijã, e'i Jesu poromogeta.

“Mã rapijarà kuwa põ oo eremĩgwai rõmõ”, e'i Jesu mã'ẽ

(Mateusi 10.37-38)

25A'evo remẽ aty wasu ootà Jesu rupi kupa. Ãmẽ ojirova Jesu ikoty kõ omãjã. Kee e'i ijupe kõ:

26– Ava mõ ootà erupi remẽ, ije ywesõ terau katu ãmõ kõ wyi ãmẽ. Ajawyi uu rè noja'a'ãi. Ãmõ, oy rè. Ãmõ, werekwarà rè. Ãmõ, wãkarãgwerà kõ rè. Ãmõ, weke'yry kõ rè. Ãmõ, okõjã kõ rè noja'a'ãi ve rõnõ. Wee noja'a'ãi teve. Ajawyi wee ywesõ oja'a mãe kõ noo kuwa'ãi eremimo'earà rõmõ. Ava mõ, “Awyje aatà Jesu rupi emimo'earà rõmõ”, e'i remẽ, kee te'i ãmẽ oupe: “Awyje tè Jesu e'arà kytywarà rõmõtà ekoi. Ijayvu pè ywesõ ‘aje ywete’ a'età ipi. Ãmõ, emimota ywesõtà eremimota wyi ipi. Ãmõ kõ emomorijauvay ipe Jesu rewarà mõ remẽ, aa jẽtà ãmẽ upi”, te'i. Kõ'ẽ jawe jawe aepo te'i oupe ãmẽ, e'i Jesu.

27Ãmẽ e'i jẽ Jesu:

– Ãmõ, ava mõ, “Jesu erõvijã ywete rõmõ ekoi”, ne'i ije remẽ, nemoẽokari o'arà kytywarà rõmõ remẽ, a'e noo'ãi eremimo'earà rõmõ. Ãmõ, “Jesu remimota rupi katu taiko”, ne'i oupe remẽ, ajamã'ẽ wemimota pè tè “aje ywete” e'i ipi. A'e noo'ãi teve eremimo'earà rõmõ, e'i.#Mat. 16.24; Mak. 8.34; Ruk. 9.23

28– Ãmõ, tetã reinõgarà rè tè poromosã'ãgatà poromotekokuwa rã rõmõ. Ava mõ sõ, “Tetã yvate'e mã'ẽ mõ ainõtà”, e'i oupe remẽ, a'evoa rè ojipy'amogeta rã'ĩ. Kee te'i rã'ĩ oupe esa: “Aje ainõma kuwa põkõ tetã? Oytà põ ekarakuri inõa rè? Amoepy kuwa jẽtà i'aryvo tetã reinõgarà kõ pè?” te'i rã'ĩ esa. A'evo rõwã sipõkõ ipi? 29Kãramõ mytery pè oinõ remeve opa sikaepo karakuri remẽ, ojimosĩokatà ãmẽ. Werõarõtà ãmõ kõ ee omãjã ãmẽ. 30Kee e'ità ãmẽ kupa: “Ãwĩ kwaima'e oinõ ypy kõrijõ tè tetã. Ajamã'ẽ nomoawyjepai sire'e. Nikasi inõ”, e'i e'ità ãmõ kõ tojimosĩoka ky'y, e'i. Ajawyi ãwitõ tetã jarà omosã'ãga ypy rã'ĩ inõtà, tãwĩvo ve eremimo'earà rõmõ ootà mã'ẽ mõ ajaa jaa rupive te'i ipi, e'i ijupe kõ.

31E'i jẽ Jesu:

– Ãmõ rupi jamosã'ãgatà teve. Ãmõ 'ary pè jõvijã mõ, “Araatà eremĩgwai sota kõ ãmõ jõvijã gyty, a'e kõ reve torojiapisi”, e'i oupe remẽ, ameve ypy rã'ĩ oja'atà, e'i. Ma'e kee e'ità rã'ĩ: “Mapejõ põ eremĩgwai sota kõ? Mapejõ põ eãpã remĩgwai sota kõ? Ajimokasi kuwa põ ijupe aa ikoty kõ remẽ? Kãramõ aa ajimokupeioka tite eãpã pè ne”, e'ità rã'ĩ oupe ãmẽ. 32Ajaire, “Nekasi'ãi eãpã pè”, e'i sõ remẽ, ãmẽ kuipe'e ijãpã tui remeve omonotà ayvu morãkwẽarà mõ kee te'i wãpã pè: “Erõvijã emuu kee javo ene: ‘Teene, nijajiapisi'ãi. Jajimorytà tè ojee ky'y’, e'i imuu erõvijã ene”, te'i emĩgwai wãpã pè. “Õ'õ, aje, nisimovyvy'ãi jiapisia awi jaiko ky'y”, e'ità ojiupe ãmẽ kupa ky'y. Ãmẽ tè ikatutà ijupe kõ, kãramõwarà rã rè oja'a amãtejẽ rewarà mõ. 33A'evo ve pejẽ, e'i. Ava pepõ'õmorà mõ sõ wee ywesõ oja'a remẽ, noo'ãi kuwa eremimo'earà rõmõ. Pirujẽ oitypypyipaoka uu erupi remẽ tè oo kuwa eremimo'earà rõmõ, e'i Jesu.

Sautu nikatui mã'ẽ rè tè Jesu poromosã'ãga remẽwarà

(Mateusi 5.13; Maku 9.50)

34E'i jẽ Jesu:

– Sautu rè tè poromosã'ãgatà tapekuwa sa'u. Ãwitõ sautu eekatu ja'umã'ẽ pupe jainõ ipi remẽ. Ãwĩvo ve jane kõ pè ikatuay wete tijaiko ipi. Ajamã'ẽ sautu nomoeei sõ janeremi'õ ky'y remẽ, manyvoa rã rõmõ rõwã kuwa sautu ãmẽ. 35Nijaporu'ãi temitã morya rõmõ. Ãmõ, yvy rõmõ nijaporu'ãi teve rõnõ. Ajawyi jamopopo tepe'yte. Ajare kee a'e pejẽ. Tapeenu katu ikõ eayvu nẽ rõnõ, e'i Jesu.

Currently Selected:

Rukasi 14: oymNT

Highlight

Copy