Jesu koty rewarà kõ 3

Peturu kõ noatai mã'ẽ omokatu Jesu ayvu rupi remẽwarà

1Ãmõ 'ary pè Peturu oo Juwão reve Janejare'e moe'ea retã gyty oporegeta Janejare'e pè. Kwaray ijãpẽma remẽ tè oo kupa. 2Pari rovapyka rupi oiketà kupa, ovapyka ikatuay mã'ẽ rupi. Ãmẽ jakatu a'e pari rovapyka ypy pè kwaima'e mõ tui, isaky remeve noatai mã'ẽ. Etãmã kone kone mã'ẽ a'e. Karakuri wãrõ a'e pè ipi. Kõ'ẽ jawe jawe a'e pari rovapyka ypy pè tui upa ipi. Oiketà mãe kõ pè ojiporijauesaoka ipi. 3Ajawyi Peturu kõ rè omã'ẽ, ovãe oiketà kupa remẽ.

– Emuu karakuri mõ ije! e'i ijupe kõ.

4Aepo e'i ijupe kõ remẽ, uu ipyri omã'ẽ gatu tesõ ee kupa.

– Emã'ẽ gatu orere, e'i Peturu ijupe.

5Omã'ẽ gatu noatai mã'ẽ ee kõ ãmẽ.

– Karakuri teipõ ome'ẽtà ije, e'i tite oupe.

6Ajamã'ẽ Peturu e'i:

– Moma'e noroerekoi! Norekarakuri oroiko! e'i. Norekarakuri sĩ teve oroiko! Ajamã'ẽ orokuwa manyvotà oroereko age'e, e'i. Jesu Kiristu Nasare wãnà ayvu rupi tanekatupa! a'e. Epõ'ã awi eata! e'i.

7Aepo e'i remẽ opopyy imopõ'ã. Ameve iperẽnã kasi ky'y. Ipy kasipa katu teve. 8Opo opõ'ã ory iko ky'y. Wata ky'y. Ajaire oike Janejare'e moe'ea retã ypy pè Peturu kõ rupi. Opo opo ory iko. Wata ojivy jivy. A'evoa rè omoe'e ywete Janejare'e iko. 9Ãmẽ jane kõ omã'ẽ ee wata remẽ, Janejare'e omoe'e ywete iko remẽ. 10Ajare e'i kupa:

– Haa, emã'ẽ! Noatai rõwã si kãwĩ mijã! e'i kupa.

Okuwa pari rovapyka ypy pè wapy karakuri rãrõ upa mã'ẽ tè mijã. Ajawyi ojimonyi ee omãjã kupa, nomã'ẽi ãwĩ rapijarà rè kupa ipi mijã rewarà mõ.

– Haa! Emã'ẽ! Manyvo põ ãwĩ wata ky'y? e'i kupa.

Peturu poromotekokuwa mijẽ remẽwarà

11Ãmẽ noatai maekwerà oike Janejare'e moe'ea retã ypy pè, Peturu kõ rupi. Ãmẽ pirujẽ omã'ẽ ee mãe kõ ovaiteay uu uu ikoty kõ, ojimonyi kupa rewarà mõ. Saromão rena eu erà pè mã'ẽ pè uu uu kupa.

[– Haa! Emã'ẽ rã'ĩ si! Manyvo pãwĩ wata ky'y? e'i kupa.]

12Ãmẽ Peturu omã'ẽ aty wasu rè remẽ, kee e'i ijupe kõ:

– Eretãrã Isaeu kõ. Manyvore põ pejimonyi tesõ pemãjã ee! Orere pemã'ẽ tesõ teve! e'i. Orekasia rupi rõwã oromoataoka ãwĩ kwaima'e, e'i. Orevote rõwã teve! 13-14Janejare'e tè omokatupaoka! Tãmõ kõ Rõvijã wasu tè! Aparão Rõvijã ywete. Isaki Rõvijã ywete. Jako Rõvijã ywete. Janejare'e tè omuroka Wemĩgwai Jesu, ãwisõ tijamoe'e. Ajamã'ẽ “aje ywete” napejẽi ijupe peiko! “Sijukaoka!” pejẽ kõrijõ tè ijupewarà mõ! Ajawyi peme'ẽ kovenatu Piratu po pè! e'i. “Orerõvijã rõwã Jesu!” pejẽ ywe'e tite Piratu pè peiko, e'i. “Amoẽokatà”, e'i Piratu remẽ itõkõ, kee pejẽ kõrijõ itõkõ: “Ãnĩ! A'e rõwã! Porojuka mã'ẽ tè emoẽoka! Jesu ãmẽ eraaoka ijukaoka!” pejẽ kõrijõ itõkõ, e'i. A'evo itõkõ perekooka Jesu ijukaoka.#Jisyry. 3.15; Mat. 27.15-23; Mak. 15.6-14; Ruk. 23.13-23; Juw. 19.12-15 15Janereinõgarerà teipe ãwĩ mijã! Jane'ãg oinõ janeupe janemoigooka mã'ẽ teipe mijã. Ajamã'ẽ pejukaoka jẽ tesõ! e'i. Ajamã'ẽ Janejare'e omomoera ajaire omãnõ mãe kõ pytery pè toiko e'ã ky'y. Aje ywete, ore ywete oromã'ẽ ee! e'i. 16Jesu tè wetãmãmokasioka aã kwaima'e toata ky'y! e'i. “Aje ywete Jesu ikasi emokatua rè”, e'i rewarà mõ tè Jesu omokatu. Ajawyi aã kwaima'e pemã'ẽ ee mã'ẽ ikatupa ky'y, e'i. Pemã'ẽma ee. Ajawyi pekuwa noatai maekwerà ikatupa, e'i. Age'e wata ky'y! e'i Peturu Juteu kõ pè.

17E'i jẽ:

– Eretãrã kõ, akuwa napetekokuwai rewarà mõ pejukaoka Jesu, penõvijãgwerà kõ reve, e'i. 18Ajamã'ẽ Janejare'e ayvu mojenuarerà kõ ayvu rupi katu tè a'evo pereko. “Janejare'e Remimuu rã omomorijautà ijuka kupa”, e'i kupa maekwerà rupi katu tè, e'i. Pirujẽ a'evoa omojenu amãtejẽ karamoe remẽ. 19Ajawyi kee a'e pejẽ: Tapejipy'amogeta ikõ peneko rè age'e nẽ. Tapejimosĩoka peaiwererà rè. Tapejimome'u Janejare'e pè peaiwererà reitypypyipaoka. Janejare'e kyty tapejirova ky'y! e'i. Peaiwererà omoje'otà ãmẽ, e'i. 20A'evo peiko remẽ, Janejare'e pemo'ãgatutà ãmẽ ky'y, e'i. Penõvijã ywete omuutà pekoty ky'y, wemiekyi e'e, a'e Jesu eu erà pè mã'ẽ, e'i. 21A'e Janejare'e rena pè opytatà, ajaate uu mijẽtà, e'i. Karamoe remẽ Janejare'e kee e'i imojenuoka wayvu mojenuarà mõ pè a'e rè: “Kãramõ amomyautà pirujẽ ereminõgwerà kõ”, e'i maekwerà. Ijayvukwerà rupi katu tè a'evotà. Ãmẽ teve Jesu uu tarà mijẽ ky'y, e'i.#J.Jim. 21.1-5 22Karamoe remẽ itõkõ tãmõ Moisesi kee e'i amãtejẽ ijupewarà mõ:

“Janerõvijã Janejare'e wayvu mojenuarà tè wekyità peupe, evo mãe rã.

Pepytery pe wyi wekyità ijayvumokasi.

A'e omojenu ijayvu remẽ, tapejapyaka katu ikõ pirujẽ e'i mã'ẽ rè nẽ.

23Ava mõ nojapyaka katui sõ ee remẽ, Janejare'e ope'atà okoty rewarà kõ pytery pe wyi”, e'i amãtejẽ tãmõ Moisesi maekwerà.#T.M. 18.15,18-19

Aekwerà rupi katu tè a'evo age'e. 24[Tãmõ Moisesi kõrijõ tè rõwã age'ewarà rã omojenu.] Pirujẽ Janejare'e ayvu mojenuarerà kõ omojenu teve. [Jesu vãea rè oporegeta amãtejẽ kupa.] Tãmõ Samueu a'evo e'i Janejare'e ayvu mojenuarà rõmõ. Ekovijarerà omojenu teve. A'e rekovijarerà kõ ve omojenu. Pirujẽ a'evoa rã omojenu janerãmõi kõ pè kupa mijã. [Age'e remẽ tẽ tesõ aepo e'i kupa maekwerà kõ rè jamã'ẽ ky'y.] 25Karamoe remẽ itõkõ Janejare'e kee e'i tãmõ Aparão pè: “Pirujẽ yvy wãnà kõ amoryokatà nejeapyry rã pè ereko katu”, e'i.#Jinõ. 12.3; 22.18; 26.4; 28.14 Mãerã tè aepo e'i. Ãwĩvo ve wayvu mojenuarà kõ pè e'i imojenuoka ipi. Janerãmõi kõ pè aepo e'i. Janeupewarà mõ teve e'i, ijeapyrerà kõ rõmõ. [Ãwitõ Janejare'e ojikuwapa janerãmõi kõ pè, ãwĩvo ve janeupe ijeapyrerà kõ rõmõ.] 26A'evo Janejare'e omuu [Jesu] wemiekyi rõmõ remẽ, janeupe ypy omuu, Juteu kõ tè jane rewarà mõ. Uu janerereko katuarà rõmõ, ãwisõ janeaiwererà toitypypyioka janewyi, e'i.

Aepo e'i Peturu ijupe kõ.

Currently Selected:

Jesu koty rewarà kõ 3: oymNT

Highlight

Copy