Jesu koty rewarà kõ 2

Janejare'e o'Ãg omuutà Jesu koty rewarà kõ pè remẽwarà

1Ãmẽ Juteu kõ ojimoaty Jerusarẽ mè Janejare'e moetea 'arà rerokwa. Pẽtekosi#2.1 Kõitokõ karamoe remẽ Janejare'e wayvu ivo tekoua rewarà ome'ẽ tãmõ Moisesi kõ pè. Aekwerà rè oja'atà kupa. eu a'e ja'aa 'arà pè. Ãmẽ Jesu koty rewarà kõ ve ojimoaty kupa upa, Jerusarẽ taa pè. Tetã wyry pè ojimoaty kupa upa, pirujẽ ojipyri. 2Ãmẽ py'awarà mõ tyapu ojenu ijupe kõ. Yvytu wasu ryapu vo maevo sõ tite ojenu ijupe kõ. Yva kyty wyi tè ojenu. Py'awarà mõ tesõ tyapu oporakapa oka wyry. 3Ameve tata reny vo mã'ẽ rè omã'ẽ kupa. Pirujẽ a'e tetã wyry pewarà kõ omã'ẽ ee. Pirujẽ jane kõ pè ojimosãi, ijãvijõ kõ jẽ. Ijapyte kõ 'aryvo opyta a'e tata vo mã'ẽ. 4Ãmẽ Janejare'e 'Ãg oike ipy'a kõ pupe. [A'evo remẽ oẽma tetã wyry pe wyi] Janejare'e ayvu mojenu jenu kupa. Ãmõ ãmõ ayvu rupi tẽ tesõ oporegeta imojenu kupa, [wemikuwa e'ã rupi tesõ. Janejare'e 'Ãg tè a'evo werekooka kõ, toporegeta iteetejẽ ayvu rupi kupa.]

5Ãmẽ jakatu jane kõ mõa'ãrõwã Jerusarẽ taa pè ekoi, Juteu kõ. Ãmõ yvy yvy pe wyi uu uu kupa maekwerà kõ. 6A'e kõ aepo jaa wenu remẽ, “haa!” e'i tesõ enu kupa. Ajawyi atyry ojimoaty omãjã ee, ãmõ ãmõ yvy wãnà kõ ayvu rupi tè Jesu koty rewarà kõ oporegeta remẽ. Ajawyi wayvu rupi tè wenu kupa, ojãvijõ kõ jẽ. Ojimonyi tesõ enu ãmẽ kupa. Ojapyaka sãtãmy tesõ ee kupa upa. 7Ajawyi e'i kupa:

– Haa! Manyvo sipõ janeayvu rupi tè e'i katu oporegeta kupa ky'y, ãwisõ Karireja yvy wãnà kõ teipe kupa mijã! e'i kupa. 8Ajamã'ẽ e'i katu janeayvu kõ rupi oporegeta tisienu katu, janejãvijõ jẽ! 9Ojevo jẽ rõwã jane kõ. Ãwĩvo ve iteetejẽ jane ayvu kõ. Kejõ tesõ rõwã ipe jane kõ mijã: Patia, Meja, Erã, Mesopotami, Juteja, Kapatosi, Põtu, Asia. 10Ãmõ, Pirija. Pãpiria. Ãmõ, Ejitu yvy wãnà kõ. Ãmõ, Sireni taa wasu pyri'ĩje'ẽ wãnà kõ. Ripia yvy pè Sireni taa wasu. A'e pyri'ĩje'ẽ wãnà kõ. Ãmõ, Romã taa wãnà kõ. 11Ãmõ, Kereta ypõ'õgwerà pe wyi uu maekwerà kõ. Ãmõ, Arapia yvy pe wyi uu maekwerà kõ. Ãwitõ Juteu kõ, ãwĩvo ve ojimojuteu mãe kõ tè, Juteu kõ vo Janejare'e omoe'e ipi mãe kõ tè. Mokopejõ tesõ jane kõ ike, iteetejẽ. Ãmõ ãmõ tè janeayvu kõ. Manyvo sipõ pirujẽ sienu janeayvu rupi oporegeta kupa remẽ? “Janejare'e okãte'ã janere”, e'i mã'ẽ rè oporegeta kupa remẽ, sienu katu! e'i kupa.

12Ãmẽ manyvo ne'i kupa. Ãmẽ e'i e'i ojiupe kupa:

– Haa! [Manyvo sipõ janeayvu kõ rupi py'awarà mõ oporegeta kupa, ãwisõ janeayvu nokuwai epe remẽ? Noenui epe kupa remẽ?] Manyvo jaa tè ãwĩvoa? e'i e'i ojiupe kupa.

13Ajamã'ẽ ãmõgwerà oojai kõrijõ.

– Oka'u teipõ ãwĩ kõ! e'i tite kupa, Jesu koty rewarà kõ pewarà mõ.

Peturu poromotekokuwa remẽwarà

14Ãmẽ Peturu opõ'ã oporegeta wayvukasi rõmõ aty wasu kõ pè. 12 rõmõ mãe kõ opõ'ã ojiuvuri kupa. Peturu kee e'i aty wasu kõ pè:

– Eretãrã Juteu kõ, pirujẽ Jerusarẽ taa wãnà kõ ve, tapejapyaka katu ikõ aporegeta pejẽ remẽ nẽ! e'i. Emã'ẽ! “Manyvo e'i põkõ oporegeta janeayvu kõ rupi?” pejẽ, e'i. Amome'utà peupe ky'y, e'i. 15“Oka'u mãe kõ teipõ ãwĩ kõ”, pejẽ tite põ ore? Ãnĩ! Oroka'u mã'ẽ rõwã ore, e'i. Ava jẽ rõwã kwaray oẽmokopa uu remẽ oka'u ipi! e'i.#2.15 Juteu kõ, karumẽ ojimi'u remẽ kõrijõ tè uvary aisiriri katu mã'ẽ o'u ipi.

16E'i jẽ Peturu:

– Janejare'e ayvukwerà rupi katu tè oroporegeta peayvu kõ rupi. Aã aje ywete mã'ẽ rè okusiwaokapa amãtejẽ karamoe remẽ, wayvu mojenuarà pè, Joeu eu ijupe mã'ẽ pè. Kee e'i Janejare'e ikusiwaokapa amãtejẽ maekwerà rupi tè:

17“Keetà arekotà mãrãnà jikuwa e'ã, Penõvijã ywete 'arà renone.

Amosãità e'Ãg jane kõ pè erokwa, pirujẽ [ere oja'a mãe kõ pè,] e'i.

A'evo remẽ pejeapyry rã kõ eayvu omojenu jenutà erokwa. Keetà ajikuwa ijupe kõ.

Kõnomĩokyrerà kõ pè ajimoikatutà tomã'ẽ ere kupa.

Ka'akuwarerà kõ pè ãmẽ ikery pè tè ajisaokatà teve.

Ikery pè tè aporegetatà ijupe kõ. A'evo opouvaità ere kupa.

18Eremĩgwai kõ pè tè amosãità e'Ãg a'evo remẽ.

Ãwitõ kwaima'e kõ pè e'Ãg ame'ẽtà, ãwĩvo vetà wãivĩgwerà pè.

A'evo remẽ sõsi eayvu omojenu jenutà erokwa kupa, e'Ãg kasia rupi ky'y.

19Ãmẽ amoteetà 'arà. Poromonyi mã'ẽ amojisaokatà.

Yvag pè amojisaokatà. Yvy pè ve ipojy mãe kõ ainõokatà.

Oikotà tuwy. Ãmõ, tata. Ãmõ, tata rãtasĩ wasu.

20Kwaray ijãpatõnusutà. Jay ipirãtà, tuwy vo.

Ãmẽ sõsi Penõvijã ywete 'arà okwatà ky'y. Ipojy wete mã'ẽ rõmõ okwatà.

Jõvijã wasu rõmõ ojikuwatà uu. Owaraytà ovãe remẽ. Ikatuaytà.

21Ãmẽ jane kõ ojiporijauesaokatà ijupe ky'y. ‘Erõvijã wasu, eporijauesa rejupa, taa e'ã jimomorijau wasua rena kyty aiko karuaru’, e'ità.

Pirujẽ aepo e'i mãe kõ oporijauesa kõtà ereko katu kõ ãmẽ”, e'i Janejare'e ikusiwaokapa amãtejẽ [Joeu pè] maekwerà.#Joeu 2.28-32

[Aepo e'i maekwerà rupi katu oroiko age'e, e'i Peturu.]

22– Isaeu kõ, pejapyaka katu ikõ Jesu rewarà amojenu peupe remẽ nẽ. Temirovija tè Jesu Nasare wãnà. Janejare'e tè omokasi mãrãnà jikuwa e'ã poromonyi mãe kõ toinõ penovake, itekorã mãe kõ tomokatu teve ipi. Ãwĩ rapijarà. A'evo itõkõ Janejare'e omojikuwaoka ipe Wemimuurerà peupe mijã. Pepytery pè itõkõ a'evo ekoi, Juteu kõ pytery pè. 23Ajamã'ẽ janerõvijã kõ ome'ẽ Jesu pepo pè, tapejẽ manyvotà pereko. “Pemoputuputuri yvyra jipokana rè ijuka!” pejẽ kõrijõ itõkõ. Nivoi mãe kõ pè pejukaoka. A'evoa Janejare'e okusiwaokapa amãtejẽ. Ajawyi ijayvu rupi tè sikaepo a'evo pereko.#Mat. 27.35; Mak. 15.24; Ruk. 23.33; Juw. 19.18 24Ajamã'ẽ pejuka paire Janejare'e omomoera imopõ'ã mijẽ, awyje mãerã rõmõ toiko mijẽ, nomãnõ'ãi mãerã rõmõ. Mãnõa kasia pupe wyi wenõe. Ajawyi mãnõa nikasi Jesu pè ky'y.#Mat. 28.5-6; Mak. 16.6; Ruk. 24.5 25A'evoa rã rè kee e'i amãtejẽ tãmõ Tavi ikusiwa karamoe remẽ, [Jesu ayvu rõmõ]:

“Kõ'ẽ jawe jawe amã'ẽ nere ipi, Erõvijã ywete rè.

Epyri neiko ipi, e'ekatu kytyre.

Nepy'a pirai aiko ipi, emokasi rejupa ipi rewarà mõ.

26Ajawyi eroryvay nere aiko ipi,

nekãte'ã ere rewarà mõ.

Erorya amojenu ipi.

Akuwa nereity'ãi rejupa amãnõ remẽ.

Nepyri aiko karuarutà.

Ajawyi epy'a katutà amãnõ.

27Nereity'ãi omãnõ mãe kõ rena pè rejupa.

Ereãgwerà neremonẽoka'ãi tyvy pè, neupewarà tè ije rewarà mõ.

28Nerekoa nemojikuwaoka ije, a'e rupi taiko.

Erorya neinõtà ije ãmẽ, terory mãerã tè aiko ky'y,

nepyri taiko karuaru mã'ẽ rõmõ taiko”, e'i Tavi ikusiwa maekwerà.#Jĩg. 16.8-11

Jesu ayvu rõmõ aepo e'i maekwerà, e'i Peturu. 29Tapejapyaka katu ikõ aepo jaa rè poromotekokuwa remẽ nẽ, eretãrãgwerà kõ. A'e Tavi itõkõ janerãmõi kõ rõvijã wasu rõmõ ekoi mijã. A'e itõkõ okãjã tè. [Ajaire itõkõ waty tè kupa.] A'e ryvy itõkõ ojikuwa jẽ upa age'e remẽ janerena pyri. 30Ajamã'ẽ tãmõ Tavi oiko jẽ remẽ itõkõ, Janejare'e ayvu mojenuarà rõmõ ekoi mijã. Kee e'i teve itõkõ Janejare'e ijupe:

“Ãwitõ oromojõvijã wasuoka, ãwĩvo vetà nejeapyry e'eay rã amuutà Jõvijã wasu rõmõ toiko kãramõ nevo iko”, e'i. “Aje ywete a'evo arekotà”, e'i.#2Sa. 7.12; Jĩg. 132.11

Aepo tãmõ Tavi amyry omojenu. Okuwa wyi omojenu. 31Okuwapa amãtejẽ manyvotà Janejare'e Remimuurerà Janerõvijã rõmõ ekoi remẽ. Janejare'e omomoera tarà mijẽ toiko omãnõ maire. Kee e'i imojenu maekwerà rupi katu: “Janejare'e noityi tyvy kõ rena pè. Eãgwerà nomonẽokari”, e'ipa amãtejẽ maekwerà.#Jĩg. 16.10 32Aepo e'i maekwerà rupi katu tè Janejare'e omomoera Jesu. Ore ywete oromã'ẽ ee, oiko mijẽ iko remẽ. Ajawyi aepo jaa rè poromotekokuwa orokupa tapeenu, e'i. 33Ajawyi age'e remẽ Jõvijã wasu rõmõ tè Jesu ekoi ky'y, jane kõ Rõvijã wasu rõmõ. Tuu Janejare'e tè omojõvijã wasuoka weevejẽ toiko. Karamoe remẽ Janejare'e kee e'ipa ijupe: “E'Ãg ame'ẽtà neupe”, e'ipa. Ajawyi age'e o'Ãg ome'ẽma Jesu pè, wayvu rupi katu. O'Ãg kasia rupi si oremomoregetaoka peayvu rupi, toroporegeta age'e ky'y, ijayvu tapeenu ky'y, e'i. 34Janejare'e omomoera paire, ekõve reve weraa wena kyty, yva pè. [Tãmõ Tavi rõwã weraa. Jesu tè weraa. Tãmõ Tavi amyry ãmẽ omãnõ e'e kõrijõ tè.] Kee e'i tãmõ Tavi amyry ikusiwa amãtejẽ Jesu rewarà rã rè:

“Janejare'e e'i Erõvijã ywete pè:

‘Ejo e'ekatu kytyre tereapy, erevejẽ, Jõvijã wasu tè ene rewarà mõ’, e'i.

35‘Neãpã kõ newyry kyty ainõtà.

I'arà kõ gyty ãmẽ oromoẽokatà’”, e'i tãmõ Tavi ikusiwa amãtejẽ Janejare'e ayvu rõmõ maekwerà.#Jĩg. 110.1

36Jesu pewarà mõ aepo e'i amãtejẽ. Janejare'e Remimuurerà tè ãwĩ, Janerõvijã ywete rõmõ. Isaeu kõ pejẽ. Ajawyi pekuwapa kuwasi aepo jaa mijã. Ajamã'ẽ “aje” napejẽi ijupe peiko. Pemoputuputurioka kõrijõ yvyra jipokana rè ijukaoka, e'i Peturu ijupe kõ. Opi rã'ĩ oporegeta upa.

37Ãmẽ aty wasu aepo jaa wenu remẽ, ojimopirai tesõ enu kupa. Ajawyi e'i e'i Peturu pè, ãmõ Jesu remimonokwerà kõ pè ve:

– Oreretãrã kõ, aje ywete aepo pejẽ! Manyvotà põkõ jaiko aepo e'i remẽ ajawyi? e'i kupa.

38Ãmẽ Peturu e'i ijupe kõ:

– “Manyvotà põkõ?” pejẽ peiko. Kee a'e pejẽ. Tapejipy'amogeta ikõ peneko rè nẽ. Tapejimosĩoka peaiwererà rè. Tapejimome'u Janejare'e pè peaiwererà reitypypyipaoka. Jesu Kiristu remĩgwai kõ rõmõ pejimojãmorĩoka, pejãvijõ jẽ. “Awyjepa” e'ità Janejare'e peaiwererà pè. O'Ãg omuutà pepy'a pupe toike ãmẽ, e'i. 39Karamoe remẽ itõkõ Janejare'e o'Ãg me'ẽa rã omome'u amãtejẽ. Opota o'Ãg ome'ẽ peupe, pejeapyrerà rã kõ pè ve. Janejare'e nokuwaive mãe kõ pè ve opota ome'ẽ. Pirujẽ opyteporo wemĩgwai kõ rõmõ mãe kõ pè opota ome'ẽ, e'i Peturu.

40Ãmẽ Peturu omogeta kõ remẽ, ijayvukasiay wete jẽ aty wasu pè iko:

– Janejare'e omomorijauoka kõ ywetetà age'ewarà kõ ijaiwererà kõ rewarà mõ, e'i. Ajawyi ikõ tapeitypypyipaoka peaiwererà Janejare'e pè ky'y nẽ! e'i imogeta kõ.

41Peturu aepo e'i remeve, mõa'ãrõwã werovija ijayvu mãe kõ kupa ky'y. Jesu koty rewarà kõ rõmõ ekoi kupa ky'y, aja 'arà peve. Ãmẽ Peturu kõ omojãmorĩ kõ imoaty kõ ãmẽ ky'y. Mõa'ãrõwã tesõ a'evo ekoi mãe kõ ãmẽ ky'y. 3.000 rõmõ tesõ a'evo mãe kõ, Jesu rè oja'a ypy mãe kõ.

Jesu koty rewarà kõ ojimoatytà tè jẽ ky'y remẽwarà

42A'evo paireve kõ'ẽ jawe jawe ojimoaty Jesu ayvu renu kupa ky'y. Ojapyaka katu jome emimonokwerà kõ ayvu rè kupa, poromotekokuwa ekoa rè kupa remẽ. Ojeeve ojimory kupa ky'y. Ojimi'u teve ojipyri kupa ipi. Oporegeta teve Janejare'e pè ojeeve kupa ipi. A'evo Jesu koty rewarà kõ rõmõ ekoi kupa ky'y.

43Janejare'e omomojy wete kupa ipi. Ikasia rupi Jesu remimonokwerà kõ mãrãnà jikuwa e'ã oinõ ywete iko. 44Ojee jeeve Jesu koty rewarà kõ rõmõ ekoi kupa ipi ky'y, pirujẽ. Nimoma'ei mãe kõ pè teve oovajaro oma'e kõ ime'ẽ kupa, ãmõ Jesu koty rewarà kõ pè.#J.K.R. 4.32-35 45Nokãte'ãi oma'e kõ rè kupa ipi. Oma'e kõ ome'ẽ teve karakuri repy rõmõ kupa ipi. Aekwerà karakuri oovajaro kupa ime'ẽ ipi, pirujẽ tiporijau e'ã moma'e repy rã rè kupa. 46Kõ'ẽ jawe jawe ojimoaty Janejare'e moe'ea retã ypy pè imoe'e kupa ipi. Ojipyri ojimi'u wetã wyry pè ve kupa ipi. Oryvay ojee ojimi'u kupa remẽ. Oiko tepe'yte iko kupa.

47Janejare'e omoe'e ywete kupa ipi. Oryvay kupa, pirujẽ a'e wãnà kõ opota katu kõ rewarà mõ. Ãmẽ ywesõ ijatyray Jesu rè oja'a ypy mãe kõ rõmõ ãmẽ ky'y. Janerõvijã ywete kasia rupi a'evo ekoi kupa.

Currently Selected:

Jesu koty rewarà kõ 2: oymNT

Highlight

Copy