Jesu koty rewarà kõ 1

Jesu wemimo'ekwerà kõ omotekokuwa jẽtà oẽa renone kytyre remẽwarà

1[Rukasi remikusiwarerà.] Eremikusiwarerà tè aã kareta, ejimorypa Teopiru pewarà. Jypy remẽ itõkõ akusiwa imonooka Jesu rekoawerà neupe, terekuwa pirujẽ manyvo ekoi maekwerà. Eewarà akusiwapa neupe, “Aje sipõ?” tere ãmẽ ky'y. Ãmõ, ijayvukwerà poromotekokuwa ee maekwerà itõkõ akusiwapa teve. Pirujẽ oposiko ypy remẽwarà itõkõ akusiwapa neupe.#Ruk. 1.1-4 2Ajaate Janejare'e weraa Jesu yva pupe oo remẽwarà ve itõkõ akusiwa. Ãmẽ Jesu noẽive oo remẽ, wayvu omome'u rã'ĩ wemimono rã kõ pè. Janejare'e 'Ãg kasia rupi omotekokuwa kõ. A'evo wereko imokasi kõ. 3A'e kõ pè teve ojisaoka mijẽ, ojimomorijau omãnõ maire, opoera opõ'ã mijẽ paire. Nomãnõi mã'ẽ vo jẽ ojimoikatu ijupe kõ tomã'ẽ mijẽ wee. Ajaate 40 'arà rõmõ tesõ werokwapa ojimoikatu tè jẽ ijupe kõ ipi. [Mãrãnà jikuwa e'ã kõ oinõ tè jẽ ovake kõ, tomã'ẽ ee kupa.] Ajawyi, “Aje ywete nomãnõi ky'y”, e'i kupa. Omogeta kõ teve, tokuwa katu manyvo tekoua Janejare'e Janerõvijã ywete rõmõ janerereko remẽwarà. 4Ãmẽ ãmõ 'ary pè ojimoaty mijẽ eeve kõ ojimi'u upa. Ãmẽ kee e'i ipõ oporegeta ijupe kõ:

– [Poropyteporopa eremimono rã kõ rõmõ, eayvu mojenuarà kõ rõmõ.] Pepyta rã'ĩ ikõ ike Jerusarẽ taa pè nẽ, ajaate Papa o'Ãg omuutà rã'ĩ peupe ike. A'e tapeãrõ rã'ĩ, e'i. A'e rè poromotekokuwa amãnõ e'ãve peupe, e'i.#Ruk. 24.49 5[Ãwitõ Juwão erenone rupi uu, ãwĩvo ve Papa 'Ãg erakypy rupi ve uutà, e'i.] Aje Juwão poromojãmorĩ yy pupe tè, oitypypyipaoka waiwererà Janejare'e pè kupa remẽ. Ajamã'ẽ age'e sõsi Papa 'Ãg tẽ tesõ uutà oike pepy'a pupe penerekoarà rõmõ ky'y, e'i. Nipuku'ãi a'evotà, e'i.#Mat. 3.11; Mak. 1.8; Ruk. 3.16; Juw. 1.33

Jesu oẽ yva pupe oo ky'y remẽwarà

6Ãmẽ Jesu pyri ojimoaty mãe kõ e'i ijupe:

– Jõvijã, age'eve sipõ nejikuwatà Isaeu kõ rõvijã wasu rõmõ neiko ky'y? Ãwitõ tãmõ Tavi jõvijã wasu rõmõ ekoi karamoe remẽ, ãwĩvotà põ neiko? e'i kupa.#1.6 Juteu kõ nopotai Juteu rõwã mãe kõ oõvijã ai kõ rõmõ. Romã wãnà kõ. Ajawyi aepo e'i Jesu pè kupa, ojimoaty eeve kupa upa remẽ.

7E'i ãmẽ Jesu ijupe kõ:

– Aje aepo jaa napekuwai, napekuwa kuwa'ãi rewarà mõ, e'i. Papa kõrijõ tè okuwa manyvo remẽ a'evotà aiko, e'i. Wemikuwa rupi e'ipa a'evoa rã. Pejẽ napekuwa amãtejẽ'ãi ajamã'ẽ a'evo eikoa rã, e'i. Napekuwa'ãi mã jay rè avãetà mã'ẽ, manyvo 'arà remẽ avãetà mã'ẽ, e'i.#Mat. 24.42 8Ajamã'ẽ, aje o'Ãg omurokatà pejẽ. A'e sõsi pemokasiokatà ky'y. Ãmẽ si pirujẽ erekoawerà pemojenutà erokwa ikasia rupi ãmẽ ky'y, e'i. Pemojenu jenutà erokwa jane kõ pè, e'i. Jerusarẽ taa wãnà kõ pè ypy pemojenutà. Ãmõ, Juteja yvy rupiwarà kõ pè ve pemojenutà, e'i. Ãmõ, Samaria yvy rupiwarà kõ pè ve, e'i. Pirujẽ taa maipewarà kõ pè pemojenutà, e'i. A'e kõ ve tesõ pemotekokuwatà, e'i. Erekoawerà rè pemotekokuwa kõtà eremimonokwerà kõ rõmõ, e'i Jesu ijupe kõ.#Mat. 28.19; Mak. 16.15; Ruk. 24.47-48

[– Hoõ, a'evotà ãmẽ! e'i kupa.]

9Ãmẽ aepo e'i paire Jesu oẽ oo yva pupe ky'y. Wemimono kõ rovake oẽ oo. Yva rãtasĩ pupe oike oo. Ojõvãma yva rãtasĩ ãmẽ. Ajaate emĩgwai kõ nomã'ẽi tesõ ee imono ky'y.#Mak. 16.19; Ruk. 24.50-51

10Ãmẽ emimonokwerà kõ omã'ẽ jẽ ipe yvate kyty upa. Ameve Janejare'e remĩgwai yvapewarà kõ py'awarà mõ ojimoikatu ijupe kõ. Yva kyty wyi owyjy ojimoikatu ijupe kõ. Mõrijõ rõmõ ojimoikatu ovake kõ kupa. Ijyru sĩ gatu tesõ kupa. 11Kee e'i ijupe kõ kupa:

– Karireja yvy wãnà kõ! Peyvatesa jẽ sõ pemãjã pekupa! e'i. Awyjepa Jesu oẽma oo! Peneve ekoi mijã! Age'e ojivy oo ky'y. Kãramõ uu tarà mijẽ ajamã'ẽ, e'i. Ãwitõ oẽ oo, ãwĩvotà kãramõ owyjy tarà mijẽ uu, ike yvy pè, e'i ijupe kõ.

[– Haa! A'evotà si! e'i ãmẽ kupa.]

Jesu remimonokwerà kõ manyvo ekoi Jesu oo paire remẽwarà

12Ãmẽ ajaire Jesu remimonokwerà kõ ojivy oo ky'y. Oriveiraty yvytyry pe wyi ojivy oo kupa, Jerusarẽ taa kyty. Nikuipei Oriveiraty Jerusarẽ mè wyi. Jimoava 'arà remẽ nou a'e kyty remẽ, jajivy jẽ kuwa a'e kyty wyi aja 'ary peve ipi, nikuipei rewarà mõ. 13Ãmẽ ovãema kupa remẽ, tetã gea'ypa pè oike kupa, jura pè. Ma'e kõ ojiupi mãe kõ: Peturu. Juwão. Tiaku. Aãtere. Piripi. Tome. Patoromeu. Mateusi. Tiaku, a'e Aupeu ra'yrerà. Ãmõ, Simão. Juteu kõ yvy rè okãte'ã mã'ẽ a'e. Ãmõ, Juta, a'e Tiaku ra'yry. Mokopejõ ojiupi jura pè mãe kõ. A'e pè tui rã'ĩ kupa upa.#Mat. 10.2-4; Mak. 3.16-19; Ruk. 6.14-16

Jutasi rekovijarà rã opyteporo kupa remẽwarà

14Ãmẽ a'e kõ watyry revejẽ ojimoaty Janejare'e pè oporegeta ipi. Wãivĩgwerà kõ reve. Jesu y ve ipyri kõ tui, Maria. Imõmirĩ kõ ve ipyri kõ tui. A'e a'e kõ ojeeve ojimoaty Janejare'e pè oporegeta ipi. Kõ'ẽ jawe jawe a'evo ekoi kupa ipi.

15Ãmẽ ãmõ 'ary pè Jesu koty rewarà kõ pirujẽ ojimoaty mijẽ, Jesu remimonokwerà kõ pyri. Aty wasu tesõ ojimoaty ky'y. 120 rõmõ tesõ ojimoaty kupa upa. Ãmẽ Peturu opõ'ã imogeta kõ. [Jutasi rekovijarà rã rè oporegetatà ijupe kõ.] 16-17Kee e'i ijupe kõ:

– Eretãrã kõ, pejapyaka eayvu rè aporegeta peupe remẽ. Sipyteporo Jutasi amyry rekovijarà rã, orereve toposiko mãe rã. A'e itõkõ janerõvijã ome'ẽ ãpã kõ po pè tojuka kupa. A'e Jutasi mãnõawerà rewarerà Janejare'e 'Ãg e'ipa amãtejẽ tãmõ Tavi pè tokusiwa. Aekwerà rupi katu tè age'e, e'i.

18(Kee e'i itõkõ ojijuka omãnõ. Jesu ome'ẽtà ãpã kõ po pè rewarà mõ itõkõ, ãpã kõ karakuri ome'ẽ ijupe, mãrãnai rã repy rõmõ mijã. A'e karakurikwerà rè itõkõ ajaire kãramõ Juteu rõvijã kõ yvy opyy tetã rena rã mijã. A'e pè itõkõ ojimomarama omãnõ Jutasi ky'y. O'a ojeykwero omãnõ, wãgyoay rewarà mõ. Wyy opei tesõ okwa a'e pè. A'evo Jutasi ojijuka omãnõ. 19Ãmẽ ajaire itõkõ a'evoa ojenu jenupa Juteu kõ pè ky'y. Jerusarẽ taa rupi ojenu jenu okwa. Ajawyi “Tuwy peiawerà” omo'y a'e pè kupa. “Aseutãma” e'i a'e pè wayvu rupi kupa.)#Mat. 27.3-8

20E'i jẽ Peturu ijupe kõ:

– Kee ojikusiwa amãtejẽ Jutasi rewarà: “Oitytà oo wetã. Ava noike'ãi etãgwerà pupe ojimoena. Tapererà rõmõtà tè tui upa ky'y”, e'ipa tãmõ Tavi ojĩgarà rupi. Kee e'i teve: “Ava mõ toposiko mijẽ ekovijarerà rõmõ. Kõitokõ oposiko iko ipi. Aekwery vo”, e'i amãtejẽ teve tãmõ Tavi.#Jĩg. 69.25; 109.8

21-22E'i jẽ Peturu:

– Ajawyi ekovijarà rã oropyteporotà toposiko mijẽ orereve. [Kõitokõ Jutasi amyry oposiko orereve iko ipi mijã, ta'evo, e'i.] Kee e'i mã'ẽ tè ikõ toropyteporo nẽ. Pirujẽ Jesu rekoawerà wesa esapa iko maekwerà tè. Juwão amyry omojãmorĩ Jesu remẽ omã'ẽ ee maekwerà tè, e'i. Pirujẽ Jesu manyvo ekoia rè omã'ẽ maekwerà teve oroesatà, e'i. Okuwa Jesu rupi jaa jaa ipi remẽwarà, a'e kuwaparà teve, e'i. Ajaate opoera oẽ oo yva pè remẽ omã'ẽ maekwerà tè, e'i. A'evo mã'ẽ toposiko orereve. “Aje ywete Jesu opoera omãnõ maire”, te'i orereve iko, e'i Peturu jane kõ pè.#Mat. 3.16; Mak. 1.9; 16.19; Ruk. 3.21; 24.51

[– Õ'õ aje ywete. A'evo remẽ ikatu, e'i kupa.]

23Ajawyi mõkõi rõmõ rã'ĩ kwaima'ekwerà wesa kupa, aekwerà resakarerà kõ. Kejõ wesa kupa. Juse Jutu eu erà pè mã'ẽ. Pasapa eu teve ijupe. Ãmõ, Matia eu erà pè mã'ẽ. Mokopejõ wesa rã'ĩ kupa. [Ajamã'ẽ pe'ĩte wesatà kupa, Jutasi rekovijarerà rõmõ. Ajawyi mõkõi revejẽ rõwã wekyità kupa.] 24Ajawyi oporegeta rã'ĩ Janejare'e pè kupa, tomotekokuwa kõ. Kee e'i ijupe kupa:

– Janerõvijã! Norokuwai orepy'a ipi. Ene kõrijõ tè pirujẽ nekuwa orepy'a ipi, e'i kupa. Ajawyi ere oreupe mã põ nepyteporotà aã kwaima'e mõkõi wyi, e'i kupa. Mã põ nepota toposiko neupe neayvu rupi, poromotekokuwa mã'ẽ rõmõ? A'e emojikuwaoka oreupe torokuwa. 25Oposikotà neremimono rõmõ Jutasi amyry rekovijarerà rõmõ, e'i kupa. A'e oposikoa wyive itõkõ opoi oo, nivoi ekoi neupe rewarà mõ. Ajawyi ajaire jimomorijaua rena kyty tè ekoi ky'y. Ajawyi manyvo ne'i'ãi iko ky'y. Ajawyi ekovijarerà rã emojikuwaoka oreupe, e'i Janejare'e pè kupa.

26Aepo e'i kupa ire omomo momo rã'ĩ jimaraita mõ esa, tokuwa mã Janejare'e opyteporooka ijupe kõ, toposiko eeve kõ ky'y. A'e rupi mõkõi mãe kõ wyi Matia eu erà pè mã'ẽ opyteporo kupa. A'e toposiko, 11 rõmõ mãe kõ reve, Jesu remimonokwerà kõ reve ãmẽ. [A'evo 12 rõmõ oiko mijẽ kupa ky'y.]

Currently Selected:

Jesu koty rewarà kõ 1: oymNT

Highlight

Copy