Jesu koty rewarà kõ 20
20
Pauru Masetonia yvy rupi oo mijẽ remẽwarà
1Ãmẽ jane kõ ojimosãsãi oo ky'y remẽ, Pauru Jesu koty rewarà kõ omuu okoty imokasi kõ. Ajaire e'i:
– Ajivytà aa ky'y, e'i ijupe kõ.
Oo ãmẽ Masetonia yvy kyty ky'y. 2A'e yvy rupi okwa remẽ, Jesu koty rewarà kõ omokasiay ereko. Omotekokuwa kõ teve, imokasi kõ. Ajaire a'e pe wyi Akaja yvy kyty oo ky'y. 3A'e pè moapy jay rõmõ werokwapa. A'e pe wyi opota oo Sirija yvy kyty mijã, nawiu rupi. Ajamã'ẽ nooive remeve Juteu kõ ayvukwerà ojenu ijupe: “Sipyytà Pauru ijuka ovãe remẽ”, e'i mã'ẽ ojenu. Ajawyi Masetonia yvy rupi kõrijõ tè ojivy oo ky'y. 4Kejõ oo upi mãe kõ. Sopaturu eu mã'ẽ. A'e Piu ra'yry tè. Pereja taa wãnerà a'e. Ãmõ, Aritaku. Ãmõ, Sekõtu. Tesaronika taa wãnerà kõ tè a'e kõ. Ãmõ, Kaiju. Teepi taa wãnerà tè Kaiju. Ãmõ, Timoteu. Tikiku. Toropimu. Asia yvy wãnà kõ tè a'e kõ ãmẽ. Mokopejõ oo upi mãe kõ. 5A'e kõ oo amãtejẽ orerenone rupi, Toraji taa kyty. A'e pè orerãrõ kupa.
6Ãmẽ meju vororo e'ãgwerà 'u paire, oroo Piripu taa pe wyi ky'y. 5 kerà rõmõ oroke oroo Toraji taa kyty nawiu rupi. Orovãema remẽ, orerenone rupi oo maekwerà kõ oroesa a'e pè. A'e pè pe'ĩ semana oroiko.
Pauru Toraji taa pè ekoi remẽwarà
7Ãmẽ jimoava 'arà okwa paire, pãtõma remẽ, orojimoaty Jesu koty rewarà kõ reve orojimiwa. Ãmẽ Pauru oporegeta puku ijupe kõ. Pyaikatu remẽ oporegeta jẽ upa, kõ'ẽme ootà rewarà mõ. 8Omojisapa raparina tena orojimoaty mã'ẽ pè oroku. A'e tetã yvate'e sa'u mã'ẽ pè. Moapy tesõ jura yvate'ewarà. A'e pè orojimoatypa.
9Ãmẽ kõnomĩokyry mõ pari rovapyka kwarà pyri'ĩje'ẽ wapy upa. Ojapyaka Pauru oporegeta remẽ upa. Eutiku eu erà pè. A'e Pauru oporegeta puku remẽ oke taray wete sikaepo ky'y. Ajawyi wapy upa remẽ, apy'a oke o'a oo yvy kyty, yvate wyi. O'a omãnõ yvy pè. Ãmẽ jane kõ mõ owyjy oo esa. “'Aha! Omãnõma!” e'i kupa. 10Ãmẽ Pauru owyjy oo eãgwerà resa. Ojimoenãpa'ã ojayvy i'aryvo ijajuvy. Kee e'i jane kõ pè:
– Pejimonyi tite ne! Uve jẽ ajamã'ẽ! e'i.
11Ajaire Pauru ojiupi mijẽ oo jura pè. Ãmẽ Jesu mãnõawerà rè oroja'a. Ajaire oporegeta jẽ jane kõ reminu mõ. Oporegeta kõ'ẽ tesõ. Kõ'ẽma mẽ oo ky'y.
12Ãmẽ jane kõ oryvay opy'a katu rõmõ, kõnomĩokyry uve jẽ rewarà mõ. Aja paire jane kõ weraa etã gyty.
Miretu taa kyty oroo remẽwarà
13Ajaire oroo jẽ nawiu rupi. Asõsi jãemijarà kyty oroo. A'e pè oroãrõ Pauru,
– Pee rupi aatà, e'i rewarà mõ.
14Ãmẽ orojiõvaisĩ Pauru reve Asõsi taa pè remẽ, “age'e tè” oro'e ojiupe. Ãmẽ opo nawiu pupe orereve. A'e pe wyi Mitireni taa kyty oroo.
15Orojisyry a'e pe wyi ãmẽ. Kõ'ẽmeve Kiu ypõ'õgwerà pyryvo orokwa. Ajaire kõ'ẽme orovãe Samosi ypõ'õgwerà pè. Ajaire kõ'ẽme a'e pe wyi oroo orovãe Miretu jãemijarà pè. A'e pè oropyta rã'ĩ. [Epesu taa pyri'ĩje'ẽ Miretu taa jãemijarà.] 16Ajamã'ẽ Pauru nopotai mijẽ okwa Epesu taa rupi, ojikõtevẽ jẽ rewarà mõ. Nopotai oiko puku ywete Asia yvy rupi. Opota kuise'ẽ jẽ ovãe Jerusarẽ taa pè Janejare'e moetea 'arà renone ve. Pẽtekosi eu 'arà pè mã'ẽ renone.
Pauru omogeta Epesu taa wãnà kõ remẽwarà
17Ãmẽ Miretu taa pè Pauru tui remẽ, omuroka rã'ĩ Epesu taa wãnà kõ imogeta, Jesu koty rewarà kõ rõvijãgwerà. 18Ovãema kupa remẽ, Pauru omogeta kõ. Kee e'i ijupe kõ:
– Pekuwa aiko puku pepyri maekwerà. Asia yvy pè avãe ypy Jesu rekoa mojenu remẽwarà, ajaate a'e rupi aiko remẽ. Ajawyi pekuwa manyvo aiko mã'ẽ, e'i. 19Janerõvijã ywete remĩgwai rõmõ aposiko remẽ itõkõ, najimoe'ei aiko. Aja'o tesõ itõkõ ijayvukwerà momewa pejẽ, aje ywete amojenu takatu rewarà mõ. Juteu kõ itõkõ epyy tarepe ejuka. Ajamã'ẽ naityi jẽ imojenua. Ãmẽ ywesõ itõkõ ajimokasiay jẽ imojenu jẽ aiko. Pekuwapa a'evo aiko remẽ ipi, e'i ijupe kõ.
20– Pekuwa katu teve ajimokasiay aiko poropãtavõ remẽ ipi. Janejare'e ayvu e'eay amojenu peupe remẽ. Ajawyi tè peiko ijayvu rupi peiko. Jane kõ rovake teve itõkõ poromotekokuwa ipi. Ãmõ, joetã kõ wyry rupi itõkõ aa aa poromo'e aiko ipi. 21Juteu kõ pè itõkõ aporegeta ipi. Ãmõ, Juteu rõwã mãe kõ pè teve. “[Pejipy'amogeta ikõ peneko rè age'e nẽ.] Pejimosĩoka ikõ peaiwererà rè nẽ. Pejimome'u ikõ Janejare'e pè peaiwererà reitypypyipaoka nẽ. Janejare'e pè jẽsi tapejivy”, a'e itõkõ ijupe kõ. Ãmõ, “Janerõvijã Jesu rè tapejirovija penako'i rõmõ”, a'e teve itõkõ ijupe kõ.
22– Age'e Jerusarẽ taa kyty aatà ky'y, Janejare'e 'Ãg emonookatà rewarà mõ. Ajamã'ẽ nakuwai manyvotà aiko avãe a'e pè remẽ. 23Ajamã'ẽ akuwa emomorijautà kupa, evãema mẽ. Emopã'ãokatà kupa. A'evoa rã rè Janejare'e 'Ãg e'ipa ije. Pirujẽ taa taa rupi aa aiko remẽ, aepo e'i amãtejẽ ije kupa. Ajawyi akuwa. 24Ajamã'ẽ najimonyi aepo 'arà mẽ. Najirokyjei teve aiko. Ajawyi aa jẽtà ãmẽ. Erõvijã Jesu eposikoa ome'ẽma mã'ẽ, apota amoawyjepa. “Ekwa eayvu e'eay mojenu eiko”, e'ipa ije. “Janejare'e wereko katutà jane kõ emãnõa rupi”, e'ipa ije. “Aepo emojenu”, e'ipa ije mã'ẽ. Ajawyi a'e rewarà mõ aa jẽtà.#2Tim. 4.7
25E'i jẽ Pauru:
– Pepyterà rupi aiko remẽ itõkõ manyvo Janejare'e janerereko Janerõvijã wasu rõmõ mã'ẽ amome'u pejẽ. Akuwa age'e paire napemã'ẽ'ãi mijẽ ere ky'y. 26Ajawyi kee a'e pejẽ. Pepytery pewarà mõ sõ “aje” ne'i Jesu pè remẽ, erewarà mõ rõwã a'evotà ekoi ãmẽ. Poromotekokuwavaypa rewarà mõ aepo a'e. 27Pirujẽ Janejare'e e'i tamojenu pejẽ mã'ẽ, pirujẽ amojenupa pejẽ. Nopyta pe'ĩ namovyi mã'ẽ mõ. 28Ajawyi pevote tapejireko katu ky'y. Jesu koty rewarà kõ rè tapeja'a, Janejare'e 'Ãg tè ome'ẽma kõ pepo pè rewarà mõ. Ãwitõ kaneiru jarà oja'a katu weima kõ rè ipi, tãwĩvo peiko ãmẽ. Kee rewarà mõ. Janejare'e opyypa kõ Wa'yry mãnõawerà repy rõmõ. Epy kõ rõmõ omãnõma. Ajawyi tè tapeja'a jẽ ee kõ, a'e pejẽ.
29– Akuwa napeporijauesa'ãi mãe kõ uutà pepytery pè erakypyre kyty. A'e kõ napenau'ãi. Uutà pemoripe kupa. Uutà pemomoioka ywe'e tite Jesu ayvu wyi kupa. Ajawyi tè, “Tapeja'a katu jẽ Janejare'e remipyykwerà kõ rè ipi”, a'e pejẽ. 30Kãramõ pepyriwarà kõ mõ iwari warità pejẽ. Ãmõ rupi teipe omotekokuwatà Jesu koty rewarà kõ kupa mijã. Opotatà peneraa okoty rewarà kõ rõmõ rewarà mõ a'evotà penereko kupa. 31Ajawyi tapeja'a jẽ peiko. Ãmẽ tè napejimoripeoka'ãi ijupe kõ. Eayvukwerà poromotekokuwapa ee maekwerà rè tapeja'a jẽ peiko ipi. Moapy kwaray rõmõ tesõ itõkõ poromotekokuwa penereko. Kõ'ẽ jawe jawe tesõ itõkõ poromotekokuwa penereko. Pya rupi, aryvo rupi itõkõ a'evo aiko. Eja'oa rupi tesõ itõkõ a'evo aiko. Ajawyi a'evo 'evo tesõ maekwerà rè tapeja'a jẽ peiko, a'e pejẽ.
32– Age'e poroitytà aa ky'y, Janejare'e teipõ pemokatutà penereko ky'y. Wayvu pè “aje” pejẽ mãe kõ rõmõ teve penerekotà ãmẽ. A'e tè pemokasità penereko katu okatuaya rupi. Ãwitõ pirujẽ okoty rewarà kõ wereko katu, ãwĩvotà penereko katu. Kãramõ Janerõvijã uu mijẽ remẽ, ãmẽ si peotà upi ky'y.
33– Pepytery pè aposiko aiko remẽ itõkõ, “Erepyme'ẽ pekupa”, na'ei pejẽ ipi. Nerako'i itõkõ pemoma'e rè aiko, karakuri kõ rè, tyru kõ rè. 34Ije tè itõkõ aposiko emoma'e kõ repy rã rè, epãtavõarà kõ moma'e kõ repy rã rè ve. A'evo aiko remẽ itõkõ pemã'ẽ ere ipi. 35“Ãmẽ ereruparà mõ toiko kupa”, a'e pejẽ. Ajawyi a'evo aiko penovake ipi. A'evo remẽ tè pejẽ ve poroporijauesa mã'ẽ rõmõtà. Tapeja'a jẽ kee e'i Jesu maekwerà rè: “Temiporijauesa rõmõ jaiko remẽ janerory ipi. Tysi tõ poroporijauesa mã'ẽ rõmõ jaiko remẽ. Ãmẽ ywesõ janeroryvay jaiko ipi”, e'i maekwerà rè. Aekwerà rè tapeja'a jẽ peiko, e'i Pauru Epesu taa wãnà kõ mogeta.
Awyjepa oporegeta Pauru ky'y.
36Ãmẽ oporegeta paire, Jesu koty rewarà kõ reve ojimoenãpa'ã oporegeta Janejare'e pè kupa. 37Ãmẽ oja'o ywete kupa. Wajuvy teve Pauru etoapemosu kupa. Ojivytà oo ky'y rewarà mõ a'evo ekoi kupa. 38Ijãgyoay kupa. Kee e'i Pauru rewarà mõ ywesõ ijãgyo kupa:
– Awyje napemã'ẽ'ãi mijẽ ike yvy pè ere ky'y, e'i rewarà mõ.
Ajawyi oupisi jẽ Pauru kupa. Weraatà imono nawiu rupi kupa.
Currently Selected:
Jesu koty rewarà kõ 20: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
