Jesu koty rewarà kõ 21
21
Jerusarẽ taa kyty oo ky'y remẽwarà
1Ãmẽ a'e kõ pè kee oro'e:
– Orojivytà rã'ĩ maevo oroo ky'y, oro'e.
Aepo oro'e paire oroo ky'y, nawiu rupi. Kosi ypõ'õ wasu kyty ypy rã'ĩ oroo. Kõ'ẽme Rotisi jãemijarà pè oropyta rã'ĩ. A'e pe wyi oroo jẽ Patara taa kyty. A'e pe wyi orowyjy, ãmõ nawiu rupi orootà ky'y rewarà mõ.
2Ãmẽ awyje katu sikaepo nawiu mõ Penisia yvy kyty ootà mã'ẽ a'e pè tui. A'e rupi ãmẽ oroo, Penisia yvy kyty. 3Oroo jẽ, ajaate Sipiri ypõ'õgwerà ojisa upa. Orejau kytyre a'e ypõ'õgwerà oroity oroo. A'e pe wyi ore'ekatu kytyre jẽ orova oroo Sirija yvy kyty. Oroo orovãe Tiru taa pè. A'e pè nawiu jarà kõ oporo rã'ĩ moma'e kõ ity ipi. Ajawyi orowyjy rã'ĩ nawiu pe wyi.
4A'e taa pè Jesu koty rewarà kõ mõ oroesa. A'e kõ pyri oropyta rã'ĩ. Pe'ĩ semana oropyta rã'ĩ ipyri kõ. A'e kõ kee e'i epe Pauru pè Janejare'e 'Ãg ayvu rupi:
– Neo Jerusarẽ taa kyty ne, e'i epe kupa.
5Ajamã'ẽ oroo jẽ. Orojisyrytà remẽ, Jesu koty rewarà kõ oo jẽ orerupi taa kupei kyty sa'u, werekwarà kõ reve, wãkarã kõ reve. Pirujẽ oo orereve. Ãmẽ pãranã reme pè orovãe remẽ, orojimoenãpa'ã rã'ĩ ysĩ 'aryvo oroporegeta Janejare'e pè. 6Ajaire, “Orootà ky'y”, oro'e ijupe kõ. Ajaire oropo mijẽ nawiu pupe ky'y. A'e kõ ojivy oo ãmẽ wena kyty kupa.
7Oroo jẽ ãmẽ Tiru taa pe wyi, Toremaita taa kyty. A'e pè Jesu koty rewarà kõ mõ oroesa mijẽ. Pe'ĩ ke tè oroerokwapa ipyri kõ. 8Kõ'ẽme oroo jẽ Sesareja taa kyty, nawiu rupi. A'e pè Piripi retã mè oroke rã'ĩ. Janejare'e ayvu e'eay Jesu rewarà omojenu mã'ẽ tè Piripi. Kõitokõ kwee remẽ Jerusarẽ taa pè Peturu kõ opyteporo 7 rõmõ iporijau mãe kõ pãtavõarà kõ rõmõ toiko kupa. A'e mõ tè Piripi.#J.K.R. 6.1-6 9A'e rajyry kõ irõte rõmõ, nimẽive mãe kõ. Janejare'e ayvu mojenuarà kõ teve a'e kõ.
10Ãmẽ ijatypa sa'u 'arà a'e rupi oroiko paire, Janejare'e ayvu mojenuarà mõ uu Juteja yvy pe wyi, Akapu eu erà pè mã'ẽ.#J.K.R. 11.28 11A'e uu orepyri'ĩje'ẽ. Uu Pauru kõ'ã pyy. A'e pupe ojipokwa toromã'ẽ ee. Ojipykwa teve. Kee e'i oreupe:
– Janejare'e 'Ãg kee e'i: “Aã kõ'ã jarà Juteu kõ opokwatà, Jerusarẽ taa pè ovãe remẽ. Juteu rõwã mãe kõ pè weraatà kupa. A'e kõ po pè ome'ẽtà kupa.” Aepo Janejare'e 'Ãg e'i mã'ẽ. Ajawyi agyvo areko, e'i Akapu ore.
12Aepo e'i ore remẽ,
– Tereo e'ã ajawyi! oro'e ipe Pauru pè ãmẽ.
Jesu koty rewarà kõ Sesareja wãnà kõ ve aepo e'i epe. Oroja'o aepo javo ijupe. 13Ajamã'ẽ Pauru kee e'i jẽ:
– Peja'o sõ ere! e'i. Erãpirõ sõ emoãgyo pekupa! Akuwapa a'evotà erereko kupa! Ajawyi epokwaa renone'ĩ rõwã ajimokasi. Ejukaa renone teve. Nakyjei mãnõa wyi. Ajawyi aa jẽtà moko terereko Jerusarẽ taa pè kupa. Janerõvijã ywete Jesu rewarà mõ tè mokotà erereko kupa, e'i.
14A'evo oreayvukasi epe Pauru pè. Ajamã'ẽ oo jẽ Pauru. Ajawyi kee oro'e kõrijõ tè ky'y:
– Too nẽ ajawyi. Janejare'e remimota rupi tè ikõ ta'evo wereko nẽ. A'e tè ikõ toja'a ee nẽ, oro'e ky'y.
15Ãmẽ ãmõ 'ary pè orojimokatu orootà. Jerusarẽ taa kyty orojiupi oroo. 16Jesu koty rewarà kõ mõ oo rã'ĩ orerupi, Sesareja taa pe wyi. Orovãe Jerusarẽ taa pè remẽ, a'e kõ orereraa Minasõ retã gyty toroke. Sipiri ypõ'õgwerà wãnerà tè Minasõ. Karamoeve ipõ ekoi Jesu koty rewarà rõmõ. A'e tè a'e.
Tiaku resa Pauru oo remẽwarà
17Ãmẽ orovãe Jerusarẽ taa pè remẽ, Jesu koty rewarà kõ oryvay orevãea rè. 18Kõ'ẽme Pauru oroeraa Tiaku resa.#21.18 Jesu koty rewarà kõ rõvijã tè Tiaku. J.K.R. 15.13 A'e pè Jesu koty rewarà kõ rõvijã kõ ojimoaty upa, Jerusarẽ taa wãnà kõ. 19Ãmẽ Pauru “age'e tè” e'i ijupe kõ. Ajaire omome'u oposikoawerà ijupe kõ, Juteu rõwã mãe kõ pyterà rupi oposiko maekwerà. Pirujẽ Janejare'e manyvo wereko ipyterà kõ rupi ekoi remẽ maekwerà omome'u ijupe.
20Ãmẽ Pauru ayvu wenupa kupa ire, omoe'e ywete Janejare'e kupa. Kee e'i Pauru pè kupa:
– Kee oro'età ene, oreretãrã. Juteu kõ mõa'ãrõwã Jesu koty rewarà kõ rõmõ ekoi ky'y. Tãmõ Moisesi remikusiwarerà rupi katu ekoi jẽ kupa, pirujẽ. 21Ajamã'ẽ ayvu ai nerewarà ojenupa ijupe kõ. Kee e'i tite mã'ẽ ojenupa ijupe kõ: “Pauru omomoioka Juteu kõ tãmõ Moisesi remikusiwarerà wyi, Juteu rõwã mãe kõ yvy pè ekoi mãe kõ. Kee e'i sõ Pauru: ‘Peãkarã kõ isaky remẽ, tapeemosĩpire'ooka e'ã’, e'i tite. Ãmõ, ‘Tapepoi tãmõ Moisesi remikusiwarerà rupi tekoua wyi’, e'i Pauru mã'ẽ”, e'i tite mã'ẽ ojenupa ijupe kõ. 22Ajawyi manyvo noro'e'ãi ijupe kõ ojimoaty uu janekoty remẽ! Okuwa nevãea ike kupa. [“Manyvore põ aepo ere sõ?” e'i titetà neupe kupa ãmẽ. “Manyvore põ tãmõ kõ ayvu neityoka sõ?” e'i tevetà neupe kupa, e'i kupa.]
23– Ajawyi kee tere amãtejẽ ãmẽ, Moisesi remikusiwarerà rupi neikoa rè tomã'ẽ kupa. Ike uve irõte rõmõ kwaima'ekwerà kõ, [Jesu koty rewarà kõ.] Janejare'e pè wayvu omome'u mãe kõ. [A'e kõ ojipiky'a'otà Janejare'e moe'ea rõmõ. Ajaire wemime'ẽ rã kõ weraatà imoe'ea retã wyry pè ojiapiraetaoka kupa.] 24Ajawyi a'e kõ rupi tereo. Terejipiky'a'o eeve kõ. Emime'ẽ rã kõ ve tereepyme'ẽ, pirujẽ. A'e rupi nejikuwatà ijupe kõ ãmẽ. Ãmẽ tè ãmõ kõ omã'ẽ nere remẽ, kee e'ità kupa: “Haa! Iwari warite sikõ Pauru rè kupa!” e'ità kupa ãmẽ. “Emã'ẽ! Tãmõ Moisesi remikusiwarerà rupi ekoi jẽ!” e'ità nemoe'e kupa, e'i Tiaku kõ Pauru pè.#P.Moirõ. 6.13-21
– Hoõ, e'i ãmẽ Pauru. Ta'evo ajawyi! e'i.
25E'i jẽ Tiaku kõ ijupe:
– [Juteu teãmã ene rewarà mõ aepo oro'e neupe.] Juteu rõwã mãe kõ pè aepo noro'e'ãi ajamã'ẽ. “Tapejimojuteu” noro'ei ijupe kõ. Kõitokõ oromono oreremikusiwarerà ijupe kõ maekwerà vo jẽ oro'e. Kee oro'e maekwerà vo jẽ: “Jane kõ jarà rã'ãga pè temime'ẽgwerà tape'u e'ã ikõ ipi nẽ. Ãmõ, moma'e ruwykwerà. Ãmõ, moma'e temiarypypokakwerà ro'okwerà tape'u e'ã”, oro'e. Ãmõ, “Tapejimomy'a e'ã ikõ ipi nẽ”, oro'e maekwerà. Aepo oro'e jẽ age'e ijupe kõ, e'i Tiaku ijupe.#J.K.R. 15.29
“Hoõ” e'i Pauru ãmẽ. 26Aepo e'i paire ojikuwapa a'e irõte mãe kõ pè. Kõ'ẽme oo upi kõ ojipiky'a'oa mojikuwaparà rõmõ. A'evo ekoi paire, oo Janejare'e moe'ea retã gyty, wemime'ẽ rã mojikuwaparà rõmõ.
– 7 oke paire Janejare'e pè oreremime'ẽ rã kõ orome'ẽtà, e'i imojikuwa mã'ẽ.
Pauru opyy kupa remẽwarà
277 rõmõ oke werokwa paire, Pauru oo mijẽ Janejare'e moe'ea retã gyty wemime'ẽ rã reraa ky'y. Ãmẽ Juteu kõ mõ omã'ẽ Pauru rè, Janejare'e moe'ea retã ypy pè tui remẽ. A'e Asia yvy wãnà kõ tè. A'e kõ ijayvukasi jane kõ atyry mogeta katu Pauru rè. Ãmẽ Pauru opyy kupa. 28Wapuka pukai tesõ kee javo kupa:
– Isaeu kõ! Pejo orepãtavõ pekupa! e'i kupa. Aã kwaima'e nivoi tesõ ekoi mã'ẽ! Jane kõ omotekokuwa rã'ãga iko mã'ẽ! Janere Juteu kõ rõmõ oporegeta ai tesõ iko. “Nikatui Juteu kõ”, e'i. Ãmõ, “Nikatui tãmõ Moisesi remikusiwarerà”, e'i. “Nikatui Janejare'e moe'ea retã!” e'i teve iko. Taa taa kõ rupi oo remẽ aepo e'i iko! e'i tite kupa. Age'e Juteu rõwã mãe kõ tesõ weru Janejare'e moe'ea retã ypy pè eroike. [Juteu kõ kõrijõ tè toike a'e pè mã'ẽ pè tẽ tesõ weroike kõ!] A'evo remẽ Janejare'e moe'ea retã tè wereko ai! e'i tite kupa.
29Kee rewarà mõ aepo e'i tite kupa. Ji'ite Juteu rõwã mã'ẽ mõ rè omã'ẽ Pauru reve kupa, taa pè ekoi kupa remẽ. Toropimu eu erà pè mã'ẽ rè omã'ẽ kupa. A'e Epesu taa wãnerà tè. Ajawyi, “A'e teipõ Pauru weru Janejare'e moe'ea retã ypy pè eroike”, e'i tite kupa.#J.K.R. 20.4 Ajawyi tè nivoi mã'ẽ omo'y Pauru pè kupa ky'y.
30Aepo jaa ojenu jenupa katu tesõ Jerusarẽ taa rupi. Ajawyi a'e taa wãnà kõ ojimopirai enu tesõ ky'y. Ojimoaty ojã uu uu Janejare'e moe'ea retã ypy kyty kupa. Ãmẽ Pauru opyy kupa. Ikatu kyty omotyryry enõe eraa kupa. A'evo paire Janejare'e moe'ea retã ypy oovapy kupa. 31Onõpã nõpã e'ete Pauru kupa. Ojuka taray kupa mijã. Ajamã'ẽ a'evoa kuise'ẽ ojenu Romã taa pewarà sota rõvijã pè. Kee jaa ojenu ijupe:
– Jerusarẽ taa wãnà kõ imirai tesõ ojee kupa! Opota ojiapisi kupa! jaa ojenu ijupe.
32Ãmẽ aepo wenu remeve, kuise'ẽ sota rõvijã omoaty wemĩgwai kõ. Sota rõvijã miti kõ. Ãmõ, sota kõ teve. A'e kõ ovaiteay oo atyry kõ pytery pè. Ãmẽ aty wasu omã'ẽ ee kõ remeve, opoi Pauru wyi kupa. Nonõpãi kupa ky'y. 33Oo Pauru pyri'ĩje'ẽ sota rõvijã. Kee e'i wemĩgwai kõ pè:
– Pepyy awi ipokwa, e'i.
A'evo ãmẽ wereko kupa. E'i sota rõvijã aty wasu pè:
– Mã rapijarà pã'ã kwaima'e peeru? e'i. Manyvo e'i põ peupe, ãwisõ tapejikõ'õ ee? e'i aty wasu pè.
34Aepo e'i epe. Ajamã'ẽ manyvo noereko'ãi ikuwa, atyry wapuka pukai tesõ rewarà mõ. Ãmõ ãmõ rupi tè wapuka pukai kupa. Sota rõvijã manyvo noereko'ãi enu ãmẽ. Ajawyi kee e'i kõrijõ tè wemĩgwai kõ pè:
– Peraa ãwĩ imokatu sota kõ rena wyry pè aty wasu wyi, e'i.
35-36Ãmẽ weraa Pauru kupa. Ajamã'ẽ aty wasu kõ oo jẽ akypy rupi. Wapuka pukai jẽ oo kupa.
– Pejuka ãwĩ! e'i tite sota kõ pè kupa.
Ãmẽ wetã jura ypy pè werovãetà kupa remẽ, sota kõ omovy tè Pauru eraa ky'y, aty wasu kõ wyi, ipojy ai tè aty wasu kõ rewarà mõ.
Pauru ojireko katu remẽwarà
37Ãmẽ sota kõ rena pupe Pauru weroiketà kupa remẽ, e'i rã'ĩ Pauru sota rõvijã pè:
– Jõvijã, apota rã'ĩ si aporegeta ene, e'i.
Kereku kõ ayvu rupi tè aepo e'i ajamã'ẽ. Ajawyi sota rõvijã e'i ijupe:
– Haa! Ere katuay wete si Kereku kõ ayvu rupi neporegeta! e'i. 38Ajawyi Ejitu yvy wãnerà tè sipõ ene? e'i. Kõitokõ jypy remẽ wemĩgwai kõ omojikõ'õ ai tesõ maekwerà tè sipõ ene? e'i. Kõitokõ 4.000 rõmõ oo tekoe'ãma kyty kupa, irapa rapa tesõ oo kupa maekwerà kõ rõvijã põ ene? e'i ãmẽ Pauru pè.
39– Ãnĩ, e'i Pauru. A'e rõwã ije, e'i. Juteu tè ije, Taasu taa pè esaky maekwerà tè. A'e ywesõ taa wasu Sirisi yvy pè. Taporegeta rã'ĩ jane kõ pè ãmẽ, e'i ijupe.
40Ãmẽ sota rõvijã “hoõ” e'i. Ãmẽ Pauru opõ'ã jura ku'ai oporegeta. Ojipomomojai rã'ĩ jane kõ gyty. “Tapejapyaka rã'ĩ si eayvu rè”, jaa tè aepo e'i.
Opi rã'ĩ ãmẽ kupa. Ãmẽ Pauru oporegeta ijupe kõ. Wayvu rupi tè oporegeta Pauru, Juteu kõ ayvu rupi tè. Epereu eu teve a'e ayvu pè.
Currently Selected:
Jesu koty rewarà kõ 21: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
