Jesu koty rewarà kõ 22

Pauru oporegeta Juteu kõ pè remẽwarà

1E'i ãmẽ Pauru aty wasu pè:

– Papa kõ. Eretãrã kõ teve. Pejapyaka rã'ĩ si aporegeta pejẽ remẽ. Ajireko katutà peayvu teitetea wyi, e'i.

2Ãmẽ Juteu kõ wenu wayvu rupi tè Pauru oporegeta ijupe kõ remẽ. Epereu ayvu rupi tè remẽ. Ãmẽ ywesõ manyvo ne'i kupa ky'y. Pauru e'i jẽ:

3– Ije tè Juteu tè, pevo! Taasu taa pè esaky maekwerà tè ije, a'e Sirisi yvy pewarà. Ajamã'ẽ aã Jerusarẽ taa rupi tè ajimovijapa aiko. Kamarieu remimo'ekwerà tè ije, a'e jamomojy ipi mã'ẽ tè. Tãmõ Moisesi remikusiwarerà rè emotekokuwavay. Ajawyi upi katu aiko ipi. Ajimokasiay, ije ywesõ Janejare'e remimota rupi taiko ipi. Ãwitõ pejẽ age'e, ãwĩvo aiko, e'i. 4Ajawyi kõ ije ywesõ naesa tari Jesu koty rewarà kõ karamoe remẽ mijã, [“Janejare'e remimotarà rõwã ajamã'ẽ kupa”, a'e tite ijupewarà kõ mõ rewarà mõ.] Ajawyi amomorijau kõ ipi mijã. Ijukaarerà kõ po pè ame'ẽ kõ ipi mijã. Apyy kõ teve imopã'ãoka kõ ipi mijã. Wãivĩgwerà wyi ve a'evo areko mijã, e'i.

5– Janejare'e pè oporegeta mãe kõ rõvijã wasu okuwa aje ywete a'evo aiko maekwerà. Ãmõ, jõvijãgwerà kõ ve okuwa. Ijayvu kõ rupi si a'evo aiko ipi mijã! Tamasiku taa pè aa Jesu koty rewarà kõ mopã'ãtà remẽ, jõvijã kõ tè kareta kõ okusiwa taraa janeretãrãgwerà kõ pè. Ijayvu kõ rupi tè Jesu koty rewarà kõ tapokwa eru ike, Jerusarẽ taa pè, imopã'ã kõ ipi. A'evo 'evo aiko maekwerà tè ije, e'i Pauru.#J.K.R. 8.3; 26.9-11

Ojimoteea rewarà omojenu remẽwarà

(Jesu koty rewarà kõ 9.1-19; 26.12-18)

6E'i jẽ Pauru:

– Ajamã'ẽ Janejare'e emotee, Tamasiku taa pijarà rupi aa aiko remẽ. Jane 'aryvo katu kwaray remẽ a'evo aiko remẽ. Py'awarà mõ kwaray vo 'ejẽ tesõ mã'ẽ yvate kyty wyi ereayape ereakwaso rõmõ eãrimã. 7A'evo remẽ a'a yvyu. Ãmẽ ayvu ojenu ije. “Sauru! Epy'amopirai sõ erereko rejupa!” e'i ije ãmẽ. 8“Ava põ ene?” a'e ãmẽ. “Jesu tè ije!” e'i. “Nasare taa wãnerà. Ene itõkõ epy'amopirai tè erereko rejupa!” e'i ije. 9Erupi oo mãe kõ ve omã'ẽ ereayape mã'ẽ rè. Ajamã'ẽ noenui oporegeta ije mã'ẽ kupa. 10Ãmẽ a'e: “Jõvijã, manyvo põ nepota aiko?” a'e. Ãmẽ Erõvijã ywete e'i ije: “Epõ'ã jẽsi ekwa Tamasiku taa kyty”, e'i ije. “A'e pè jane mõ e'ità neupe manyvotà neiko Janejare'e pè”, e'i ije. 11Ajamã'ẽ nereapyoi 'ete ky'y, enykwerà ereakwaso tite rewarà mõ. Naa'ãi evote ky'y. Ajawyi erupi oo mãe kõgà tè epopyy tè ereraa Tamasiku taa kyty ky'y.

12– Ãmẽ jakatu oiko kwaima'e mõ a'e pè, Anania eu erà pè mã'ẽ. Janejare'e werovija katu mã'ẽ tè a'e. Tãmõ Moisesi remikusiwarerà rupi katu ekoi ipi mã'ẽ teve a'e. Ajawyi pirujẽ Juteu kõ Tamasiku pewarà kõ remimoe'e tè a'e. 13A'e uu eresa. Uu epyri'ĩje'ẽ javo ije: “Sauru, eretãrã. Emã'ẽ mijẽ. Tanereapyo mijẽ ikenẽ!” e'i eupewarà mõ. Aekwery vo ereapyo mijẽ ky'y! Amã'ẽ Anania rè.

14– Kee e'i Anania ije: “Sauru. Aje ywete Janejare'e janerãmõi kõ Rõvijã wasu nepyteporopa wemĩgwai rõmõ tereiko ky'y. Ajawyi wemimotarà omojikuwaoka ene. Ta'yry ivo katu ekoi mã'ẽ rè ywete nemã'ẽ neiko. Ijayvukwerà neenu teve, e'i. 15Age'e a'evoa mojenuarà rõmõtà tè ene neiko ky'y. Nemã'ẽ ee maekwerà nemojenutà neiko. Ãmõ, neenu maekwerà nemojenutà teve erokwa ky'y. Pirujẽ jane kõ pè teremojenu. 16Ajawyi moma'e nereãrõ'ãi neiko age'e ky'y! Terepõ'ã te'ĩte neporegeta Janejare'e pè. Terejimojãmorĩoka teve neiko ky'y. A'evopa ene remẽ, ‘awyjepa’ e'ità Janejare'e neaiwererà pè”, e'i Anania ije, e'i Pauru.

Pauru oposikoa rewarà omome'u remẽwarà

17E'i jẽ Pauru:

– Aja paire ajivy ajo Jerusarẽ taa kyty. Aa aike Janejare'e moe'ea retã wyry pè. A'e pè Janejare'e pè aporegeta ajupa remẽ, Erõvijã ywete ojimoikatu mijẽ eupe. 18E'i ije: “Kuise'ẽ ikõ ejisyry ekwa Jerusarẽ taa pe wyi nẽ. Jane ikewarà kõ naneresa tari erewarà nemojenu ijupe kõ remẽ. Nanererovija'ãi kupa”, e'i ije.

19– Ãmẽ a'e Jesu pè: “Erõvijã. Pirujẽ Juteu kõ erekokwerà okuwa katu. Nekoty rewarà kõ Janejare'e ayvu rè jimo'ea retã kõ wyry pè ojimoaty remẽ, aa aa eka imojaiwe kõ remẽwarà okuwa kupa. Apyy inõpã nõpãma kõ ipi remẽwarà okuwa kupa. 20Ãmõ, Esitevão nerekoawerà omojenu mã'ẽ ojuka kupa remẽ, ije ve a'e pè eeve kõ aju. ‘I'ete ojuka kupa’, a'e kõrijõ ojuka kupa remẽ. Ijukaarerà kõ yru poko kõ apyy rã'ĩ ojuka kupa remẽ. Pirujẽ a'evoa Juteu kõ okuwa katu”, a'e Jesu pè.#J.K.R. 7.58

21– Ajamã'ẽ kee e'i kõrijõ Jesu eupe: “Ekwa jẽsi. Ke'ĩrõwã oromonotà, Juteu rõwã mãe kõ pyterà rupi”, e'i kõrijõ ije, e'i Pauru.

22Ameve aepo e'i remẽ, aty wasu kõ omojikõ'õoka kõ tesõ ky'y. Ajawyi wapukai kupa.

– Pejuka ãwĩ kwaima'e mokope! Jajimoane'e jẽtà ijuka! Ni'ei uve jẽ remẽ! e'i kupa.

23Wapuka pukai jẽ tesõ kupa. Ojiyrumoviva viva teve tesõ kupa. Yvy omopepei tesõ ojikõ'õ iko kupa.

24Ajawyi sota rõvijã e'i wemĩgwai kõ pè:

– Peraa ãwĩ kwaima'e eroike tetã ikasi mã'ẽ pupe, sota rena pupe. Penõpã nõpã teve. Ãmẽ tè maevo e'ità manyvo rewarà mõ põ Juteu kõ wapuka pukai tesõ upa, e'i wemĩgwai kõ pè.

25Weroike ãmẽ kupa. Ajamã'ẽ opokwa inõpã nõpãtà kupa upa remẽ, Pauru e'i sota rõvijã miti pè, opyri tui mã'ẽ pè:

– Jõvijã, kee ere rã'ĩ jẽsi ije! Ava ayvu rupi wete põ enõpãtà pekupa, ãwisõ Romã wane'e rõmõ ije aiko remẽ? Nijanõpã amãtejẽi Romã wane'e kõ ipi. Tysi tõ nimanyvoi ekoi remẽ, nijanõpã'ãi 'ete! e'i Pauru sota rõvijã miti pè.

26Aepo e'i ijupe remeve, oo oõvijã gyty javo.

– Jõvijã! Ãwĩvo tereiko e'ã! Ãwĩ kwaima'e Romã wane'e rõmõ tè sikaepo ekoi! e'i oõvijã pè.

27Ameve sota rõvijã opõ'ã oo Pauru pè javo. E'i ijupe:

– Ere ije. Aje põ Romã wane'e tè ene? e'i.

– Õ'õ. A'e tè ije, e'i Pauru.

28Ãmẽ sota rõvijã e'i:

– Ije ve Romã wane'e teve. Ajamã'ẽ ajikarakurimoma tesõ a'e rõmõ aiko, e'i Pauru pè.

Ãmẽ Pauru e'i:

– Ajamã'ẽ ije Romã wane'e teãmã aiko, esaky remeve, [Papa amyry Romã wane'e tè rewarà mõ,] e'i.

29Ameve Pauru onõpãtà mijã mãe kõ ojisyry kõrijõ tè oo. Ãmẽ sota rõvijã ve ojimonyijay ky'y, a'e Romã wane'e tè sikaepo opokwa teywete rewarà mõ.

Pauru ojireko katu jõvijãgwerà kõ rovake remẽwarà

30Ajamã'ẽ sota rõvijã, “Takuwa manyvo rewarà mõ ywesõ põ Juteu kõ opota Pauru ojuka”, e'i oupe. Ajawyi kõ'ẽme ojoraoka Pauru. Ajaire omono pirujẽ Juteu rõvijãgwerà kõ tojimoaty, Janejare'e pè oporegeta mãe kõ rõvijã kõ reve. Ojimoatypa kupa remẽ, weroikeoka Pauru ovake kõ.

Currently Selected:

Jesu koty rewarà kõ 22: oymNT

Highlight

Copy