Jesu koty rewarà kõ 16

Pauru kõ Risara taa kyty oo remẽwarà

1Oo Pauru kõ ovãe ajaire Teepi taa pè, Sirasi reve. Ajaire Risara taa kyty oo kupa. A'e pè ovãe kupa remẽ, wesa Jesu koty rewarà mõ kupa, Timoteu eu erà pè mã'ẽ. Juteu tè ijy. Jesu koty rewarà rõmõ ekoi mã'ẽ tè ijy.#2Tim. 1.5 Tuu ãmẽ Juteu rõwã. Kereku yvy wãnà tè. 2Jesu koty rewarà kõ remimoe'e Timoteu. Risara taa wãnà kõ remimoe'e. Ãmõ, Ikoniu taa wãnà kõ remimoe'e ve. 3Ajawyi Pauru opota weraa oupi. Ajamã'ẽ wemosĩpire'o rã'ĩ eraatà. Kee rewarà mõ. Juteu kõ pytery pè tè ekoità kupa. A'e kõ okuwapa Juteu rõwã Timoteu ruu. Ajawyi tè wemosĩpire'o rã'ĩ eraatà. 4Oo ãmẽ kupa. Taa taa rupi okwa kupa. A'evo ekoi kupa remẽ, Jesu remimonokwerà kõ ayvukwerà Pauru omojenu jenu ijupe kõ, Jesu koty rewarà rõvijã kõ reve okusiwa maekwerà. Jerusarẽ taa pewarà kõ.

5Ijayvukwerà wenu kupa remeve, Jesu koty rewarà kõ ojimokasi tesõ ky'y, [niwasui ijupe kõ a'e ayvu rerovija ky'y rewarà mõ.] Ãmẽ ywesõ jane kõ ijatyray Jesu koty rewarà kõ rõmõ ky'y.

Masetonia yvy wãnà ojimo'ã maevo sõ tite Pauru pè remẽwarà

6Ajaire Pauru kõ oo Karasia yvy rupi, pee rupi. Ãmõ, Pirija yvy rupi ve oo kupa. A'e wãnà kõ omotekokuwa Janejare'e ayvu rè, okwa kupa remẽ. Ajamã'ẽ Asia yvy kyty nooi kupa, Janejare'e 'Ãg nomonooka kõive a'e kyty rewarà mõ. Ajawyi nooi a'e kyty kupa. 7Ãmẽ Misia yvy pyri'ĩje'ẽ ekoi kupa remẽ, opota oo Pitijã yvy kyty kupa mijã. Ajamã'ẽ nooi kupa, a'e kyty teve Jesu 'Ãg nomonooka kõi rewarà mõ. 8Ajawyi wasa jẽ Misia yvy oo kupa. Oterẽ jẽ oo Toraji taa kyty kupa ky'y. [A'e pè aesa kõ ky'y. Rukasi tè ije.]

9Ãmẽ pya kwaima'e 'ãg maevo sõ tite ojimo'ã Pauru pè. Masetonia yvy wãnà 'ãg maevo sõ tite mijã. Opõ'ã maevo sõ tite ovake upa:

– Ejo jẽsi kyvo kyty, Masetonia yvy kyty! e'i ijupe. Ejo orepãtavõ rejupa! e'i maevo sõ tite Pauru pè.

10Ameve ajaire:

– Ja'e jẽsi ajawyi! oro'e.

Oroo ãmẽ Pauru rupi. [Kejõ. Ije. Sirasi. Timoteu. Mokopejõ.] Orokuwa Janejare'e tè oremonookatà a'e kyty, Janejare'e ayvu e'eay Jesu rewarà toromojenu.

Piripu taa pè oroiko remẽwarà

11Ajaire nawiu rupi orojisyry oroo Toraji taa pe wyi. Samotarasi ypõ'õgwerà kyty oroo rã'ĩ. Mitirõwã a'e ypõ'õgwerà. Ajaire kõ'ẽme oroo jẽ orovãe Neapori taa pè. 12A'e pe wyi [pee rupi tè] oroo ky'y, Piripu taa kyty. Masetonia yvy pewarà taa wasu tè a'e. Romã wane'e kõ rena a'e ajamã'ẽ. A'e pè oroiko puku sa'u rã'ĩ ky'y. 13Ãmõ 'ary pè, jimoava 'arà mẽ, oroo yy reme kyty oromãjã oroiko, a'e taa kupe kyty. Kee oro'e:

– Ma'e remẽ ipõ Juteu kõ Janejare'e omoe'e mãe kõ mõ yy reme pè siesatà, oro'e. Ma'e remẽ uve Janejare'e pè moregetaa retã a'e pè, oro'e teve orojimogeta.

Ajawyi oroo a'e kyty. Oroo remẽ, Juteu kõ mõ oroesa, a'e rupi ekoi kupa remẽ. Wãivĩgwerà kõ tè ajamã'ẽ kupa. A'e kõ ojimoaty oporegeta upa, Janejare'e pè mãe kõ. A'e kõ reve oroapy oroporegeta. 14A'e kõ mõ pè, Rijia eu. Tiatira taa wãnerà a'e. Kamisa katukwerà jarà tè a'e. Janejare'e omoe'e ipi mã'ẽ teve. A'e ojapyaka katu Pauru oporegeta remẽ, Janejare'e ayvu omovyvy remẽ. Ameve “aje” e'i weminuwerà pè, Janerõvijã ywete tè omotekokuwa rewarà mõ. 15A'e ajaire Pauru omojãmorĩ ky'y, awyje Jesu koty rewarà rõmõ toiko. Ipyriwarà kõ revejẽ a'evo wereko, pirujẽ. A'e ajaire e'i oreupe:

– “Aje ywete Janerõvijã koty rewarà tè ene”, pejẽ ije remẽ, pejo rã'ĩ tapepyta rã'ĩ epyri ãmẽ, [toremotekokuwavay rã'ĩ pekupa,] e'i oreupe.

Aepo e'i remẽ, oroo etã gyty oropyta rã'ĩ.

Pauru kõ jimopã'ãga pupe tui remẽwarà

16Ãmẽ ãmõ 'ary pè Janejare'e pè moregetaa retã gyty oroo mijẽ oroiko. Ãmẽ temĩgwai ai kõjãmuku mõ uu orerõvaisĩ. Ãjãg ojimoemija ee mã'ẽ tè sikaepo a'e. Ãjãg kõ kasia rupi omome'u kuwa manyvotà kãramõ jane kõ pè ipi. Ajawyi jane kõ uu oporanu ijupe ipi. Ãmẽ omoepy oporanu ijupe mãe kõ kõjãmuku rõvijã pè ipi. Ajawyi a'e rè tõvijã kõ opyy wete karakuri ipi. 17A'e kõjãmuku ojirova oo orerakypy rupi ky'y. Kee e'i wayvo wapuka pukai rõmõ:

– Janejare'e jo'arà kytywarà remĩgwai kõ tè ãwĩ kõ! e'i. Emã'ẽ ee kõ! Janejare'e ayvu rè poromotekokuwa iko kupa, ãwĩ tapenereko katu ky'y! e'i wapukai rõmõ.

Ajamã'ẽ ãjãg tè aepo omo'eoka. 18Kõ'ẽ jawe jawe a'evo ekoi. Ajawyi Pauru ojimopirai 'ete ky'y, nopotai ãjãg omojenu rewarà mõ. Ajaate ojirova ojimokasi ãjãg pè ky'y. Kee e'i ijupe:

– Age'eve terejisyry ãwĩ kõjãmuku py'a pe wyi! e'i. Jesu Kiristu ayvu rupi ejisyry eo! e'i ãjãg pè.

Ameve ãjãg oẽ oo ipy'a pe wyi.

19Ãmẽ tõvijã ai kõ a'evoa rè omã'ẽ remẽ, okuwa kõjãmuku nomome'u kuwa'ãi kãramõwarà rã ky'y. Manyvo karakuri nopyy'ãi ãmẽ kupa ky'y. Ajawyi ojikõ'õ Pauru kõ rè ãmẽ kupa ky'y. Opyy kõ ãmẽ imotyryry eraa jimoatya pè kupa. Pauru. Sirasi. A'e taa wãnà rõvijã kõ po pè weraa kõ ime'ẽ kupa. 20Romã wãnà kõ po pè ome'ẽ kõ kupa, ijayvukasiay mãe kõ po pè. E'i ijupe kupa:

– Aã Juteu kõ, nivoi 'eteay tesõ! Poromo'eai ike rupi iko kupa! e'i kupa. 21Ãmõ rupi tè poromotekokuwa iko kupa, e'i. Janerekoa rupi rõwã, e'i. Ajawyi nisirovija kõ'ãi, e'i kupa. Romã wãnà kõ rekoa rupi tè jaiko! e'i. A'evo remẽ nisijavy'ãi, e'i ijupe kupa.

22Ãmẽ aepo e'i kupa remẽ, omojikõ'õoka aty wasu kõ Pauru kõ rè, ãwisõ, “Ja'e awi sinõpã nõpã kõ!” te'i kupa.

Ãmẽ taa wãnà kõ rõvijã kõ aepo wenu remẽ, Pauru kõ oyruekyi ijãvasĩ vãsĩ kupa. Omono sota kõ tonõpã nõpã kõ. 23A'evo paire weraa kõ imopã'ã jimopã'ãga jarà pè. E'i kupa:

– Emãrãmoa'u katu ikenẽ, oro'e neupe, e'i jimopã'ãga jarà pè kupa.

“Hoõ” e'i ãmẽ jimopã'ãga jarà. 24Ãmẽ weraa Pauru kõ jimopã'ãga või gyty eja. Wetãmãmopã'ã kõ teve, yvyra ipowyi mã'ẽ pè. Ajaire ovapyka kõ teve omomãrãte ywe'e kõ ity oo. 25Ajaire, pyaikatu remẽ, Pauru, Sirasi reve, oporegeta Janejare'e pè upa. Ojĩga teve imoe'e kupa upa. A'evo remẽ temimopã'ãgwerà kõ ve wenu upa. 26Ameve py'awarà mõ yvy otyty. Jimopã'ãga kytaypy oku'e ku'e teve tesõ. Pari rovapyka kõ ve oovapyjavo oku'e ku'e remẽ. Jimopã'ãga pupewarà kõ ve jipokwa kõ otararaipa okui iwyi kõ. 27Ameve jimopã'ãga jarà omã'ẽ. Oke upa mijã. Jimopã'ãga rovapyka rè omã'ẽ remẽ, soõ, ikwarà 'ejẽ upa. Okyje ai tè a'evoa rè omãjã.

– Eeee! Temimopã'ãgwerà kõ ipõ oẽma ojava oo! e'i tite oupe mijã. [Erõvijã kõ ojikõ'õ ywetetà ere!] e'i oupe.

Ajawyi ojijukatà amãtejẽ marija poko pupe ovote mijã. 28Ajamã'ẽ Pauru sikaepo omã'ẽ ee ojijukatà mijã remẽ. Ajawyi wayvo wapukai ijupe.

– Ãnĩ! Nejijuka ne! Ike oroku jẽ orokupa, jimopã'ãga pupeve! e'i imuu ijupe.

Ameve nojijuka'ãi ky'y.

29– Oreryapea mõ eeru, e'i kõrijõ wemĩgwai kõ pè.

Ãmẽ weru ereko remeve, py'awarà mõ ojã oo oike jimopã'ãga pupe esa. Otytypa tesõ ipõ okyje rõmõ iko. Oo ojimoenãpa'ã Pauru kõ rovake. 30Wenõe kõ ajaire jimopã'ãga pe wyi eraa kõ ky'y. E'i ijupe kõ:

– Jõvijã kõ, e'i. Manyvo a'età põ Janejare'e terereko katu opyri taiko karuaru? e'i ijupe kõ.

31Ãmẽ Pauru kõ e'i ijupe:

– Jõvijã Jesu rè terejirovija ky'y, e'i. A'e tè neaiwererà oitypypyipaokatà newyi. Ãmẽ tè Janejare'e nerereko katutà nerereko, pirujẽ nepyriwarà kõ reve, e'i Pauru kõ ijupe.

32Ãmẽ omotekokuwavay Janejare'e ayvu rè kupa, pirujẽ ipyriwarà kõ revejẽ. 33Ameve okusu Pauru kõ nõpã nõpãawerà ipõanõ ky'y. Ajaire Pauru omojãmorĩ kõ ky'y, ipyriwarà kõ revejẽ. 34Aja paire jimopã'ãga jarà weraa kõ wetã gyty tojimi'u kupa. Oryvay, opyriwarà kõ revejẽ kupa, Janejare'e rè oja'a ypy kupa rewarà mõ. [A'e paire jimopã'ãga jarà werojivy kõ eraa jimopã'ãga kwarà pè pya eja.]

35Ji'iveay, taa pewarà jõvijã kõ omono sota kõ too jimopã'ãga jarà kyty. “Pauru kõ teremoẽ”, e'i imono kupa. 36Aepo wenu remẽ, e'i jimopã'ãga jarà Pauru kõ pè:

– Jõvijã kõ ayvu rupi poromoẽtà, e'i. Ikatu ikõ pekwa ãmẽ nẽ, e'i.

[Tyvija rupi tè omoẽtà kupa mijã.] 37Ajamã'ẽ Pauru kee e'i sota kõ pè:

– Ãnĩ! Noropotai tyvija rupi oremoẽ! Atyry rovake tẽ tesõ orenõpã nõpã teywete kwee kupa, ãwisõ Romã wane'e kõ teve teipe ore remẽ! e'i. Ajaire oremopã'ã teywete teve kupa. Ãwĩvo nikatu miti! Ajawyi age'e tyvija rupi rõwã ikõ toremoẽoka oremono nẽ! e'i. Wayvu rupi kõrijõ tè rõwã! e'i. Ãwitõ atyry rovake tè orenõpã nõpã kwee, tãwĩvo ve ikõ oremoẽ ajawyi nẽ! e'i Pauru ijupe kõ.

38Ameve sota kõ ojivy oo oõvijã kõ gyty Pauru ayvukwerà momewa ky'y.

– Haa! Romã wane'e kõ tè sikaepo a'e kõ! e'i ijupe kõ kupa.

Ameve jõvijã kõ ojimonyi aepo renu, [Romã wane'e kõ nijanõpãi teywete rewarà mõ]. 39Ameve tite oo jimopã'ãga kyty Pauru kõ moẽ kupa ky'y. Kee e'i ijupe kõ ojimomeme kupa:

[– Norokuwai Romã wãnà teve sikaepo pejẽ mijã! e'i kupa.]

Ajaire kee e'i ijupe kõ kupa:

– Pejisyry peo ike orerena pe wyi ky'y! e'i kupa.

40Ãmẽ Pauru, Sirasi reve, oẽma jimopã'ãga pupe wyi ky'y. Ajaire oo rã'ĩ Rijia retã gyty kupa. A'e pè ovãe kupa remẽ, Jesu koty rewarà kõ a'e pè tui. A'e kõ oryvay Pauru kõ rè omãjã. Aja paire Pauru kõ ojisyry a'e taa pe wyi oo ky'y.

Currently Selected:

Jesu koty rewarà kõ 16: oymNT

Highlight

Copy