Jesu koty rewarà kõ 15

Jesu koty rewarà kõ rõvijã kõ ojimoaty remẽwarà

1Ãmẽ ajaire Jesu koty rewarà kõ mõ uu Juteja yvy pe wyi Ãtiokia taa kyty. Juteu kõ. A'e kõ uu Jesu koty rewarà kõ motekokuwa tãmõ Moisesi remikusiwarerà ivo tekoua rewarà rè. Kee e'i tite kupa:

– Janejare'e napenereko katu'ãi Jesu koty rewarà rõmõ, napejimojuteui sõ remẽ, e'i tite kupa. Ajawyi tapejiemosĩpire'ooka rã'ĩ tãmõ Moisesi remikusiwarerà rupi Janejare'e morya rõmõ. Ãmẽ tè ikatutà, e'i tite kupa.#J.K.R. 12.3

2Aepo e'i kupa remẽ, Pauru kõ,

– Ãnĩ! e'i. Nojimojuteui mãe kõ ve Jesu koty rewarà rõmõ ekoi! e'i Pauru, Panape reve.

Ajawyi aepo rè Juteu kõ Jesu koty rewarà kõ ojiayvuvaja vaja tesõ Pauru kõ reve. Ajawyi e'i Ãtiokia taa wãnà kõ:

– Pauru kõ simonookatà Jesu remimonokwerà kõ resa, Jerusarẽ taa pè. A'e kõ ywesõ okuwa, e'i kupa.

Ajare Peturu kõ resa ootà kupa, Jerusarẽ taa kyty. Ãmõ, Jesu koty rewarà rõvijã kõ resa ootà kupa. Ãtiokia taa wãnà kõ mõ ve ootà upi kõ.

3Oo ãmẽ kupa, Ãtiokia taa wãnà kõ Jesu koty rewarà atyry kõ remimono kõ rõmõ. Penisia yvy rupi rã'ĩ okwa kupa. Ajaire, Samaria yvy rupi. Maipe oo kupa remẽ, wekoawerà kõ omome'u Jesu koty rewarà kõ pè kupa. Kee e'i imojenu kupa:

– Juteu rõwã mãe kõ ipe tesõ “aje” e'i Janejare'e ayvu Jesu rewarà pè ky'y! e'i kupa. Ajawyi ijayvu rupi ekoi kupa ky'y, e'i imojenu kupa.

Ãmẽ pirujẽ aepo jaa wenu mãe kõ oryvay enu.

4Ãmẽ ajaire Pauru kõ ovãe Jerusarẽ taa pè remẽ, ovoarà kõ pyri tè ovãe kupa, Jesu koty rewarà kõ pyri. Jesu remimonokwerà kõ pyri. Ãmõ, jõvijãgwerà kõ pyri teve. A'e kõ pyri tè ovãe kupa. Oryvay ivãea kõ rè ãmẽ kupa. Ãmẽ Pauru kõ omome'u wekoawerà a'e wãnà kõ pè. Pirujẽ manyvo Janejare'e wereko okasia rupi, oo ijayvu mojenu Juteu rõwã mãe kõ pè kupa remẽwarà omome'u.

5Ajamã'ẽ jane kõ mõ naoryi ayvu omome'u mãe kõ rè kupa. Jesu koty rewarà kõ teipe a'e kõ mijã. Ajamã'ẽ Pariseu kõ rõmõ teve ekoi kupa. Ajawyi a'e kõ Pauru kõ ayvu wenu remẽ, opõ'ã wayvu rõmõ javo ijupe kõ kupa.

– Tojiemosĩpire'ooka ikawi tãmõ Moisesi remikusiwarerà rupi iko kupa nẽ! e'i kupa.

6– Ãnĩ! e'i ãmõ kõ. Manyvore põ ojiemosĩpire'ooka remẽ tẽ tesõ Jesu koty rewarà rõmõtà kupa? e'i kupa.

Ajawyi Jesu remimonokwerà kõ ojimoaty aepo jaa rè oporegeta kupa. Ãmõ, Jesu koty rewarà kõ rõvijãgwerà kõ ve ojimoaty eeve kõ.

7A'e rè oporegeta ywete kupa. A'evo remẽ Peturu opõ'ã oporegeta jane kõ toenu. Kee e'i ijupe kõ:

– Eretãrã kõ, pejapyaka eayvu rè aporegeta peupe remẽ. Karamoe remeve itõkõ Janejare'e epyteporopa pepytery pe wyi emono, Juteu rõwã mãe kõ tamotekokuwa ijayvu e'eay Jesu rewarà rè. Wenu kupa remẽ, “aje ywete” e'i ijupe kupa. Pekuwa a'evoa, e'i.#J.K.R. 10.1-43 8-9Janejare'e pirujẽ jane kõ py'a pewarà okuwa ipi. Juteu rõwã mãe kõ py'a pewarà teve okuwa. Ajawyi Jesu rè eako'i kupa remẽ, o'Ãg ome'ẽ ijupe kõ. Ãwitõ janeupe ome'ẽ, ãwĩvo ve ome'ẽ ijupe kõ. Ajawyi sikuwa a'evo ve Janejare'e wereko kõ. Ãwĩvo ve ipy'a aiwererà kõ oky'a'opa ve iwyi kõ, Jesu rè eako'i kupa remẽ, e'i.#J.K.R. 2.4; 10.44

10– Ajawyi ka'e pejẽ. Janerãmõi kõ itõkõ noerovijai sire'e tãmõ Moisesi remikusiwarerà ivo tekoua rewarà. Jane a'evo ve jaiko. Jajavy javy, ãwisõ Juteu kõ teipe jane remẽ. Tysi tõ Juteu rõwã mãe kõ ky'y! Ajawyi nisimowasu'ãi tekoua ijupe kõ mijã, Janejare'e werekopa kõ okoty rewarà kõ rõmõ wyi. Ajawyi simowasu sõ ijupe kõ remẽ, simõarõokatà Janejare'e ãmẽ! 11Nikatu kuwa'ãi a'evo remẽ. Kee rewarà mõ. Jõvijã Jesu katuaya rupi tè Janejare'e janerereko katu. Ãwĩvo ve okatuaya rupi teve Juteu rõwã mãe kõ wereko katu. Sikuwa a'evoa! e'i Peturu ijupe kõ.

[– Õ'õ aje, e'i ãmẽ kupa ky'y.]

12Ajaire a'e pè tui mãe kõ ojapyaka katu, Pauru kõ wekoawerà kõ omovyvy remẽ. Pirujẽ Janejare'e okasia rupi werekooka ijupe kõ maekwerà omovyvy kupa. Mãrãnà jikuwa e'ã kõ. Jane kõ mokatua teve. Pirujẽ Juteu rõwã mãe kõ pyterà rupi ekoi kupa remẽwarà omovyvy kupa. 13Awyjepa oporegeta kupa remẽ, Jesu koty rewarà rõvijã Jerusarẽ taa wãnà oporegeta, Tiaku eu ijupe mã'ẽ. A'e e'i:

– Eretãrã kõ, tapejapyaka katu teve ikõ eayvu rè nẽ! 14Age'e sienu Simão ayvu ky'y, “Janejare'e wereko katu ãmõ kõ oupewarà rõmõ”, e'i remẽ. “A'e rupi kee omojikuwaoka janeupe. Ãwitõ janere oja'a, ãwĩvo ve Juteu rõwã mãe kõ rè oja'a”, e'i remẽ. 15Janejare'e ayvu mojenuarà kõ ayvukwerà rupi katu a'evo ekoi. Kee ojikusiwapa amãtejẽ Janejare'e ayvu rõmõ:

16“Ajo mijẽ remẽ, Jõvijã wasu rõmõtà tè ajotà ky'y. Ãwitõ Tavi jõvijã wasu rõmõ, ãwĩvotà aiko.

A'evo remẽ Juteu kõ arojivy tarà mijẽ eremĩgwai rõmõ, Tavi remĩgwai kõ jeapyrerà kõ.

Ãwisõ pe'ĩypyte tõvijã mã'ẽ rõmõ toiko kupa.

17A'evo remẽ ãmõ kõ ve uutà ekoty, pirujẽ yvy yvy wãnà kõ.

A'e kõ uutà ekoty rewarà kõ rõmõ, ere ojimory mãe kõ rõmõ”, e'i ojikusiwa maekwerà rupi katu.#Ams. 9.11-12

18Janerekoa rã pè tè aepo e'i amãtejẽ karamoe remẽ wayvu mojenuarà kõ rupi, e'i Tiaku.

19E'i jẽ Tiaku:

– Ije kee ikatu eupe. Juteu rõwã mãe kõ opota Janejare'e koty rewarà kõ rõmõ ekoi kupa remẽ, nisimowasu'ãi janeayvu ijupe kõ ãmẽ. Simokasi kõ kõrijõtà ãmẽ. 20Ãmõ, kareta sikusiwa imonooka ijupe kõ tomã'ẽ ee, tokuwa kupa. Kee ja'età: “Teima ro'okwerà jane kõ jarà rã'ãga pè temime'ẽgwerà pe'u tite ne”, jakusiwatà ijupe kõ ime'ẽ. Ãmõ, kee tevetà: “Pejimomy'a tite ne”, ja'età. Ãmõ, “Temiarypypokakwerà ro'okwerà pe'u tite ne”, ja'età. Ãmõ, “Moma'e ruwykwerà pe'u tite ne”, ja'età. Aepo kõrijõ tè sikusiwatà tomã'ẽ ee kupa. 21A'evoa ojikuwapa tãmõ Moisesi remikusiwarerà rupi. Ajawyi nisikusiwa ywe'e'ãi ee, pirujẽ taa taa kõ rupi ojenupa aepo rewarà mõ. Ãwitõ jypy remẽ, ãwĩvo ve age'e. Jimoava 'arà remẽ upi upi omogeta teãmã tãmõ Moisesi remikusiwarerà kupa ipi, Janejare'e ayvu rè jimo'ea retã kõ wyry pè ojimoaty kupa remẽ. Ajawyi janekareta rè nisikusiwa'ãi, e'i Tiaku ijupe kõ.

[– Hoõ, e'i ãmẽ kupa.]

Peturu kõ remikusiwarerà Juteu rõwã mãe kõ pewarà

22Ajaire Jesu koty rewarà kõ rõvijã kõ ojimoatypa, pirujẽ ikoty rewarà kõ reve. Ãmẽ opytery pewarà kõ mõ opyteporo imonooka Ãtiokia taa kyty, Pauru kõ rupi. Kejõ emipyteporo kõ. Juta Pasapa eu erà pè mã'ẽ. Ãmõ, Sirasi. Mokopejõ kõrijõ tè omonotà kupa. Temirovija kõ tè ãwĩ mõrijõ mãe kõ rõmõ ekoi, Jesu koty rewarà kõ pytery pewarà kõ. 23Ãmẽ kee e'i jõvijã kõ ikusiwa imonooka toeraa Ãtiokia taa wãnà kõ pè kupa:

Ãwĩ kareta oreremikusiwarerà. Ore Jesu remimonokwerà kõ tè. Penõvijã kõ tè ore. Penetãrã kõ teve ore. Janejare'e ayvu rè jane kõ oromotekokuwa mã'ẽ tè ore. Owate põ mokope rupi peiko ipi mijã? oro'e teve pejẽ, Jesu koty rewarà kõ pè. Juteu rõwã mãe kõ pè. Ãtiokia taa wãnà kõ pè. Ãmõ, Sirija yvy wãnà kõ pè. Ãmõ, Sirisi yvy wãnà kõ pè ve. Mokopejõ tè pejẽ, orokusiwa imono.

24Orokuwa ãmõ kwaima'ekwerà kõ, oreretãrã kõ, oo ike wyi mãe kõ pepy'amopirai mokope. [Kee ayvu oroenu, “Juteu rõwã mãe kõ tojiemosĩpire'ooka Jesu koty rewarà rõmõ tojikuwa kupa”, e'i mã'ẽ oroenu.] Aepo rè pepy'amopirai kupa. Ajawyi kee oro'e pejẽ. A'e kõ oreayvu rupi rõwã oo. Ore rõwã oromono kõ pekoty. Ovote oo kupa. 25-26Ajawyi orojimoaty toromono oreayvu mojenuarà mõ moko kyty. Oreretãrã ivo katu mãe kõ oromonotà. Kejõ oromonotà Pauru kõ rupi. Juta. Sirasi. Mokopejõ. Orejimorypa katu kõ tè Pauru kõ ipi. A'e kõ nojipiraui 'ete Janerõvijã Jesu Kiristu ayvu momewa iko ipi, Jesu ayvu rè ojikõ'õ iko mãe kõ omotekokuwa iko kupa remẽ.

27-29Janejare'e 'Ãg kasia rupi noropotai pemomorijaua. Ajawyi kee kõrijõ tè ikõ tapeiko nẽ. Teima ro'okwerà jane kõ jarà rã'ãga pè temime'ẽgwerà tape'u e'ã ikõ ipi nẽ, oro'e pejẽ. Ãmõ, temiarypypokakwerà ro'okwerà tape'u e'ã ikõ ipi nẽ, oro'e pejẽ. Ãmõ, moma'e ruwykwerà tape'u e'ã. Ãmõ, tapejimomy'a e'ã. Pejireko remẽ, penevewarà rè kõrijõ tè ikõ tapeiko ipi nẽ. Mokopejõ oro'e pejẽ. A'evo peiko remẽ, Janejare'e orytà ãmẽ pene ipi, ivo katu peiko rewarà mõ. Oromonotà Juta kõ, Sirasi reve, pekoty, “Aje ywete, aepo e'i kupa”, te'i pejẽ kupa, orekareta pemogeta remẽ. Awyjepa rã'ĩ oreremikusiwarerà ky'y.

A'evo Jerusarẽ taa wãnà kõ okusiwa imonooka Jesu koty rewarà kõ pè, Juteu rõwã mãe kõ pè.

30Ãmẽ Sirasi kõ omono Ãtiokia taa kyty, kareta jikusiwarerà toeraa kupa. A'e pè ovãema kupa remẽ, Jesu koty rewarà kõ reve ojimoaty kupa. Kareta kusiwarerà ome'ẽ ijupe kõ kupa, Jerusarẽ taa wãnà kõ remikusiwarerà, a'e jane kõ tomã'ẽ ee.

31Ãmẽ omogeta kareta kupa remẽ, ayvu poromo'ãgatu mã'ẽ tè omogeta enu kupa. Ajawyi oryvay ãmẽ kupa ky'y. 32Ãmẽ oporegeta ywete Juta kõ Jesu koty rewarà kõ reve. Janejare'e ayvu mojenuarà kõ tè Juta, Sirasi reve. A'e kõ omokasioka Jesu koty rewarà kõ ãmẽ. Omotekokuwa kõ teve kupa. 33Oiko puku sa'u rã'ĩ a'e rupi iko kupa. Ajaire:

– Orojivytà oroo ky'y, e'i kupa.

Ãmẽ a'e wãnà kõ e'i:

– Pejivytà si peo ky'y! Ikatu ikõ pejivy peo nẽ! e'i ijupe kõ imono kõ imuuarerà kõ gyty.

34Ajamã'ẽ Sirasi nooi. A'e pè opyta jẽ.#15.34 Kareta karamoe remẽwarà kõ pè jamã'ẽ remẽ, ãmõgwerà kõ pè vs. 34 uve. Ãmõgwerà kõ pè nuvei. 35Ãmẽ Pauru kõ, Panape reve, oiko puku sa'u jẽ a'e rupi iko, Ãtiokia taa pè. Omoatyoka Ãtiokia taa wãnà kõ imotekokuwa kõ jẽ kupa ipi, Janerõvijã ywete ayvu rè. Ãmẽ, mõa'ãrõwã tesõ Jesu koty rewarà kõ a'e pè ekoi, eeve kõ Janerõvijã ywete ayvu rè poromotekokuwa mãe kõ. Omojenu jenu ijayvukwerà erokwa ãmẽ kupa ipi.

PAURU OO MIJẼ JESU REKOA MOJENUA RÈ REMẼWARÀ

(15.36–18.22)

Pauru, Panape wyi ojimowaite oo remẽwarà

36Kãramõ sa'u ekoi a'e rupi paire, e'i Pauru Panape pè:

– Ja'e mijẽ Jesu koty rewarà kõ resa, Janerõvijã ywete ayvu simojenu ijupe maekwerà kõ resa. Owate põkõ ekoi kupa, e'i. Ãmõ taa taa rupi jaa tarà mijẽ, e'i.

37– Hoõ, e'i ãmẽ Panape. Juwão Maku ve siraa tarà mijẽ ãmẽ janerupi, e'i.

38Ajamã'ẽ Pauru:

– Ãnĩ, e'i. Jypy remẽ itõkõ Pãpiria yvy pe wyi jaa jaiko remẽ itõkõ Juwão Maku janereity ojivy oo. A'evo tarà mijẽ maevo janerereko siraa remẽ. Janereity tarà mijẽ ojivy uu, e'i Pauru.#J.K.R. 13.13

39Aepo rè ojiayvuvaja vaja kupa. Ajaire ojimowaite ojiwyi oo kupa ky'y. Ãmẽ Panape weraa Juwão Maku oupi. Sipiri ypõ'õgwerà kyty oo Janejare'e ayvu mojenu kupa. 40Pauru ãmẽ Sirasi opyteporo opãtavõarà rõmõ. Ãmẽ Jesu koty rewarà kõ oporegeta rã'ĩ Janerõvijã ywete pè toereko katu kõ oo kupa remẽ. 41Ãmẽ oo kupa remẽ, Sirija yvy rupi okwa kupa. Ãmõ, Sirisi yvy rupi. A'evo remẽ Jesu koty rewarà kõ omokasioka tesõ kupa, Janerõvijã ywete ayvu rè omotekokuwa kõ kupa remẽ.

Currently Selected:

Jesu koty rewarà kõ 15: oymNT

Highlight

Copy