Jesu koty rewarà kõ 14

Ikoniu taa pè ekoi kupa remẽwarà

1Ãwitõ Ãtiokia taa pè Pauru kõ ekoi, ãwĩvo ve Ikoniu taa pè ekoi kupa. Janejare'e ayvu rè jimo'ea retã wyry pè oo rã'ĩ kupa. Ekoa tè a'evo Pauru ekoi, Panape reve. A'e pè poromotekokuwavay Jesu rekoa rè kupa ipi. Ajawyi mõa'ãrõwã Juteu kõ “aje” e'i Jesu rè imojõvijã. Juteu rõwã mãe kõ teve a'evo ekoi. 2Ajamã'ẽ Juteu kõ noerovija tari mãe kõ ojikõ'õ Pauru kõ rè. Ajawyi omogeta katu Juteu rõwã mãe kõ kupa, tojikõ'õ ve Jesu koty rewarà kõ rè kupa.

3A'evo ekoi kupa remẽ, Pauru kõ oiko puku sa'u Ikoniu taa pè. Ojimokasi Janerõvijã ayvu tekoua rè poromotekokuwa rõmõ kupa. A'evo remẽ Janerõvijã omokasiay okoty rewarà kõ, marama tè toiko, ãwisõ ijayvu wenu mãe kõ, “Aje ywete, Janerõvijã janerereko katu ipi”, te'i. 4Ajawyi a'evo kupa rewarà mõ, a'e taa wãnà kõ ojimosãsãi ojimoe'yi waite kupa ky'y. Juteu rõwã mãe kõ. Ãmõgwerà “aje ipõ” e'i Jesu remimuu kõ ayvu renu kupa. Ãmõgwerà “aje ipõ” ne'i. Noerovija tari Jesu rekoa kupa, Juteu kõ vo.

5Ãmẽ Jesu noerovija tari mãe kõ ojimoaty oõvijãgwerà kõ reve. Juteu kõ. Juteu rõwã mãe kõ teve. Pauru kõ moaia rã rè oporegeta kupa. A'e kõ:

– Sijuka Pauru kõ! e'i kupa. Sijapi japità takuru pupe! e'i kupa.

6Ajamã'ẽ Pauru, Panape reve, okuwapa moko wereko kõtà. Ajawyi ojava oo Ikoniu taa pe wyi kupa. Risara taa kyty ojava oo kupa ky'y. Ãmõ, Teepi taa kyty ve. Rikonia yvy pè tè a'e taa kõ. A'e rupi ekoi ãmẽ kupa ky'y. 7A'e rupi ve Janejare'e ayvu e'eay Jesu rewarà omojenu kupa ipi.

Risara taa pè ekoità kupa remẽwarà

8Ãmẽ oiko kwaima'e mõ Risara taa pè. A'e wapy karuaru iko ipi mã'ẽ. Ipy ai tè mã'ẽ a'e. Noatai mã'ẽ. Isakyrĩ remeve ipõ a'evo ekoi. 9Ãmẽ a'e sikaepo wenu Pauru oporegeta remẽ,

– Janejare'e emokatu kuwa! e'i oupe ãmẽ.

Ãmẽ Pauru omã'ẽ ywete ee remẽ,

– “Aje” e'i Janejare'e kasia pè mã'ẽ tè ãwĩ! e'i oupe.

10Ameve ijayvukasi noatai mã'ẽ pè.

– Terepõ'ã ikenẽ! e'i.

Ameve kwaima'e opo tesõ opõ'ã wata ky'y. 11Ãmẽ jane atyry kõ omã'ẽ ee, Pauru omokatupa ky'y remẽ. Ameve wapukai kupa. Kee e'i kupa:

– Janejarà kõ teipõ ãwĩ kõ. Ojimojane owyjy uu janepyri kupa! e'i tite kupa.

Wayvu kõ rupi aepo e'i tite Pauru kõ pewarà mõ kupa, Rikonia wãnà kõ ayvu rupi. Jupite eu a'e wãnà kõ jarà rã'ãga mõ pè. Eremesi eu ãmõ pè, ijarà rã'ãga mõ pè. Ajawyi:

12– Janeremimoe'e kõ teipõ ãwĩ kõ! e'i tite kupa.

Panape pewarà mõ, “Jupite teipõ ãwĩ”, e'i tite kupa. Pauru pewarà mõ, “Eremesi teipõ”, e'i tite teve, a'e tè oporegeta kasi rewarà mõ.

13Jupite moe'ea retã a'e tena rova reikatu kyty tui. Ajawyi Panape kõ omoe'e titetà a'e pè kupa. Omuroka tite pui kõ wemime'ẽ rã Pauru kõ pè imoe'ea kõ rõmõ kupa mijã. Ojuka titetà wemime'ẽ rã kõ ijapy imorya kõ rõmõ kupa. Ka'a potyry kõ ve omõjã ipe Pauru kõ ãkãnytarà rã'ãga rõmõ kupa. A'evo omoe'e titetà kupa mijã. Tena rovapyka ypy pè a'evotà kupa.

14Ajamã'ẽ Pauru kõ okuwapa a'evoa remẽ, ojipy'amopirai tesõ kupa. Ajawyi ojiyruãvasĩsĩma iko kupa. Aty wasu kõ pyterà rupi ojã oo kupa. Kee e'i wapukai rõmõ ijupe kõ kupa:

15– Jane kõ! Moko pejẽ sõ! Pui kõ sõ peapytà ime'ẽ oreupe! “Janejarà” pejẽ tite oreupe! Penapijarà kõ teve ore. Janejare'e ayvu e'eay mojenu tè orojo ike pepyri. Ajawyi pejarà rã'ãga kõ ikõ tapeitypypyipa ky'y nẽ! oro'e pejẽ. Janejare'e oiko jẽ iko mã'ẽ ayvu rupi rõmõ'ĩte tapeiko ky'y. A'e tè yva oinõ. Ãmõ, yvy. Ãmõ, pãranã. Ipupewarà kõ teve eminõgwerà kõ, ãwisõ pirujẽ, e'i Pauru.#Jisyry. 20.11; Jĩg. 146.6

16– Karamoe remẽ jane kõ noja'a tari Janejare'e rè ipi mijã. Pirujẽ waite e'yiwarà kõ a'evo ekoi kupa. Ajawyi Janejare'e e'i ijupe kõ, “Toiko nẽ ovote rã'ĩ iko kupa”, e'i ijupewarà kõ rõmõ mijã. 17Ajamã'ẽ Janejare'e ojikuwaoka jẽ jane kõ pè okasia rupi. Pirujẽ weminõgwerà katua rupi ojikuwa teve. Ãmãnà omuu yva pe wyi ipi, temitã morypa rõmõ. Ãmõ, janeremi'õ oinõ teve. Janepy'amoryvay teve, tijaja'a ee, e'i Pauru Risara wãnà kõ pè wayvukasi rõmõ.

18Aepo e'i epe remẽ, wenu mãe kõ opota ipe pui wapy ijupewarà kõ mõ mijã. Ajamã'ẽ Pauru kõ ijayvukasi jẽ iko ijupe kõ, toapy e'ã tite kupa. Ãpẽi nojimoe'eokari ijupe kõ kupa, “Janejarà kõ teipõ!” e'i tite jẽ kupa rewarà mõ. A'evo a'e wãnà kõ opota katu Pauru kõ. 19Ajaate Juteu kõ ojikõ'õ Pauru rè mãe kõ uu Ãtiokia taa pe wyi ky'y.#14.19 A'e Ãtiokia taa Pisitia yvy pewarà. Ikoniu taa pè wyive uu kupa. A'e kõ atyry kõ omogeta katu Pauru jukaa rã rè. Werywete Pauru ojuka ãmẽ kupa ky'y. Takuru pupe ojapi japità ijuka kupa mijã. Ajaire ijapijukaarerà kõ omotyryry eraa taa kupe kyty ity kupa.

– Omãnõma ipõ, e'i tite kupa.

Ajawyi oity tepe'yte ojivy oo kupa. 20Ajamã'ẽ Jesu koty rewarà kõ ovãe ijãrimã. Ameve Pauru opõ'ã. Oo mijẽ oke a'e tena pè upa. Ãmẽ kõ'ẽme ojisyry mijẽ oo, Panape reve, Teepi taa kyty.

Pauru Ãtiokia taa kyty ojivy oo remẽwarà

21Pauru kõ Janejare'e ayvu e'eay omojenu jenu ywete iko Teepi wãnà kõ pè. Ãmẽ omotekokuwa kõ remẽ, mõa'ãrõwã jane kõ Jesu koty rewarà kõ rõmõ ekoipa ky'y. Aja paire Pauru kõ ojivy oo Risara taa kyty ky'y. A'e pe wyi oo Ikoniu taa kyty kupa. Ajaire Ãtiokia taa kyty oo kupa, a'e Pisija yvy pewarà. 22A'e pè ovãe kupa remẽ, Jesu koty rewarà kõ omotekokuwa imokasi kõ kupa. Omokasi kõ ywete kupa, awyje Jesu rè tojipykãtã jẽ iko kupa. Kee e'i imotekokuwa kõ kupa:

– Ike yvy pè jajimomorijau 'atà tè Jesu koty rewarà kõ rõmõ jaiko. Ajaate jaa Janejare'e rena kyty jaiko karuaru ky'y, e'i Pauru kõ.

23A'e pè ekoi kupa remẽ, opyteporo Jesu koty rewarà kõ rõvijã kõ kupa. A'e kõ pewarà mõ Janerõvijã ywete pè oporegeta kupa.

– Ãwĩ neremipyteporokwerà kõ. Nere eako'i mãe kõ tè. Emokasi kõ, Papa, e'i kupa.

Nojimi'ui rã'ĩ tesõ iko kupa, Janerõvijã ywete pè oporegeta kupa remẽ. A'evo opyteporo Jesu koty rewarà kõ rõvijã kõ kupa remẽ. Taa taa rupi oo remẽ upi upi opyteporo kõ kupa.

24Ajaire Pauru kõ Pisija yvy rupi ve okwa. Pãpiria yvy pè oo ovãe kupa. A'e yvy rupi rã'ĩ omojenu Jesu rekoa kupa. 25Peji eu tena mõ pè, Pãpiria yvy pewarà pè. A'e taa pè Jesu rekoa omojenu jenu rã'ĩ kupa. Aja paire Atarija taa kyty oo kupa. Jãemijarà tè a'e. 26Awyjepa rã'ĩ Janejare'e ayvu omojenu ãmẽ kupa. Ojivytà oo kupa ky'y, Ãtiokia taa kyty, Sirija yvy pè. Kõitokõ a'e pe wyi jypy remẽ Jesu koty rewarà kõ ome'ẽ Pauru kõ Janejare'e po pè imono kõ, ãwisõ tomojenu jenu erokwa ijayvu kupa mijã. A'e kyty ojivytà oo kupa, nawiu rupi. 27Ovãema a'e pè kupa remẽ, Pauru kõ Jesu koty rewarà kõ omoaty tojapyaka. Pirujẽ wekoawerà omome'u ijupe kõ kupa. Kee e'i kupa:

– Janejare'e oremokasi toromojenu ywete Jesu rekoa, e'i kupa. Ãmõ, itekorã mãe kõ oromokatu ikasia rupi teve. A'e rupi mõa'ãrõwã Juteu rõwã mãe kõ werovija katu Jesu oõvijã ywete rõmõ ky'y, e'i kupa.

28A'evo paire oiko puku jẽ rã'ĩ a'e rupi iko kupa, Jesu koty rewarà kõ pyri.

Currently Selected:

Jesu koty rewarà kõ 14: oymNT

Highlight

Copy