Jesu koty rewarà kõ 17

Tesaronika taa pè ekoi kupa remẽwarà

1Ajaire Pauru kõ oo Tesaronika taa kyty. Ãpipori taa rupi rã'ĩ okwa kupa. Ajaire Aporonia taa rupi okwa kupa. Ajaire tè Tesaronika taa pè ovãe kupa. A'e pè oiko Juteu kõ jimoatya retã, Janejare'e ayvu rè jimo'ea retã. 2A'e kyty Pauru oo jimoava 'arà mẽ ipi. Wekoa rupi tè a'evo ekoi. A'e pè oo remẽ, omotekokuwa jane kõ Janejare'e ayvukwerà rè. Moapy jimoava 'arà rõmõ a'evo ekoi. 3Kee e'i imotekokuwa kõ:

– Janejare'e okusiwaokapa amãtejẽ Wemimuurerà Janerõvijã ywete rõmõ mã'ẽ rè: “Ojimomorijau mãe rã teãmã Janejare'e omuroka. Omãnõ mãe rã teãmã teve. Ãmõ, opoera mãe rã teve”, e'i amãtejẽ. Aekwerà rupi katu tè Jesu ekoi. Janejare'e Remimuurerà tè a'e. A'e rè tè poromotekokuwa ajupa, e'i ijupe kõ.

4A'evo Pauru ekoi, Sirasi reve, ãwisõ jane kõ “aje” te'i Jesu pè weako'i rõmõ kupa. Ajawyi Jesu koty rewarà kõ rõmõ tè ekoi kupa ky'y, Pauru kõ vo. Oiko teve Juteu rõwã mãe kõ a'e pè, Janejare'e omoe'e mãe kõ. A'e kõ ve mõa'ãrõwã Jesu koty rewarà kõ rõmõ ojinõ. Ãmõ, jõvijã kõ rerekwarà kõ ve, ijatyray ekoi.

5Ajamã'ẽ Juteu kõ mõ a'evo remẽ, ojimõarõ ikoty kõ. Ajawyi pee rupi oo ojikõ'õ mãe kõ moaty eru opãtavõarà kõ rõmõ kupa, Pauru kõ rè tojikõ'õ kupa. A'e kõ marama omoai tesõ a'e taa rupi. Poromojikõ'õoka Pauru kõ gyty kupa. Kee e'i kupa:

– Ja'e Pauru kõ sipyy Jasão retã mè wyi! A'e pè tui! e'i kupa.

Oo ãmẽ Jasão retã gyty kupa. Ovãe kupa remẽ, tetã rovapyka ooka oka oike oo kupa. Opyy tarepe atyry pytery pe wyi eraa kõ kupa mijã. 6Ajamã'ẽ oike kupa remẽ, soõ, noesa kõi kupa. Ajawyi tetã jarà jẽ opyy eraa kupa. Jasão. Ãmõ, Jesu koty rewarà kõ mõ ve opyy eraa. A'e tena pewarà jõvijã kõ po pè weraa imome'u katu rã'ãga kupa. Wapukai tesõ kupa. Kee e'i rã'ãga wapukai rõmõ kupa:

– Aã kwaima'e kõ, poromojimõarõoka iko ipi! Pirujẽ taa taa rupi a'evo ekoi kupa ipi. Age'e ovãema ike kupa. A'evo tarà mijẽ ike ekoi kupa! e'i kupa. 7Emã'ẽ, Romã pewarà rõvijã wasu Sesa ayvu noerovijai mãe kõ tè ãwĩ kõ! Kee e'i mãe kõ tè: “Ãmõ tè jõvijã wasu rõmõ ekoi ky'y. Jesu tè”, e'i mãe kõ tè. Manyvore põ aepo e'i kupa remẽ, Jasão sõ weru kõ wetã wyry pè topyta? e'i rã'ãga kupa.

Ajamã'ẽ iwari wari tè kupa.

8Ajawyi aepo jaa wenu mãe kõ ipy'a pirai tesõ. Aty wasu a'evo ekoi. Tõvijã kõ ve a'evo ekoi. Ojevo jẽ ijayvu teitete kupa ky'y. 9Ãmẽ Jasão kõ tõvijã kõ pè ojiepyme'ẽ. Aja paire omojivy kõ imono kupa.

Mereja taa pè ekoi kupa remẽwarà

10Ãmẽ pãtõma remeve Jesu koty rewarà kõ omono Pauru kõ tojisyry a'e taa pe wyi, [Tesaronika taa pe wyi.] Sirasi reve. Ojikõ'õ ee mãe kõ wyi. Pereja taa kyty omono kõ kupa. A'e taa pè ovãe kupa remẽ, Juteu kõ Janejare'e ayvu rè jimo'ea retã gyty oo mijẽ kupa. 11A'e wãnà kõ, mire'eay jome kupa. A'e kõ pè Pauru omojenu Jesu rekoa remẽ, opota katu wenu kupa, Tesaronika wãnà kõ vo rõwã kupa. Ajawyi wenu katu Pauru remimojenuwerà Jesu rekoa kupa. Ajaire omogeta jẽ Janejare'e ayvu jikusiwarerà esa kupa. Ajaire kee e'i ojiupe kupa:

– Aje ywete Pauru ivo katu omome'u jane, e'i ojiupe kupa.

Kõ'ẽ jawe jawe a'evo kupa. 12A'evo mõa'ãrõwã tesõ “aje” e'i mãe kõ. A'e kõ Jesu koty rewarà rõmõ ekoi ãmẽ ky'y. Juteu kõ a'evo ekoi. Juteu rõwã mãe kõ teve a'evo ekoi. Ijatyray kupa. Kwaima'e kõ. Wãivĩgwerà jo'arà kyty tesõ mãe kõ. Mokopejõ kupa. 13Ajamã'ẽ ajaire, “Pauru omojenu Janejare'e ayvu Pereja taa pè upa”, e'i mã'ẽ ojenu ajaire Tesaronika taa pè. Juteu kõ Jesu noerovija tari mãe kõ pè ojenu. Ajawyi a'e kõ oo Pereja taa kyty, imojaiwe kõ mijẽ. Atyry kõ omojikõ'õoka Pauru kõ rè. 14A'e kõ ovãe remeve, Jesu koty rewarà kõ omono Pauru too pãranã reme kyty, [nawiu rupi tojisyry oo iwyi kõ]. Ajamã'ẽ Sirasi opyta jẽ Pereja taa pè, Timoteu reve. 15Ãmẽ Pauru rereko katuarà kõ weevejẽ weraa, ajaate Atena taa pè ovãe kupa. Ajaire ojivy mijẽ wena kyty oo kupa. Ojivytà oo kupa remẽ, Pauru kee e'i imono upi kõ:

– “Ike ve aju remeve ikõ kuise'ẽ totuu Sirasi nẽ”, e'i imono.

Pauru Atena taa pè ekoi remẽwarà

16Ãmẽ Pauru wãrõ jẽ Sirasi kõ upa, Atena taa pè. A'e taa rupi okwa remẽ, moma'e jimoãtãgwerà kõ rè omã'ẽ okwa, ijarà rã'ãga kõ rè. Ijatyray tui. Ajawyi ojipy'amopirai tesõ ee kõ omãjã. 17Maipe rupi oo remẽ, Jesu ayvu omojenu ipi. Janejare'e ayvu rè jimo'ea retã gyty oo poromo'e ipi. Juteu kõ. Ãmõ, Juteu rõwã mãe kõ, Janejare'e omoe'e mãe kõ. Moma'e japyy mã'ẽ rena rupi teve Jesu rekoa omojenu jane kõ pè erokwa. Kõ'ẽ jawe jawe a'evo Pauru ekoi. 18Janejare'e ayvu e'eay Jesu rewarà omovyvy ipi. Ãmõ, Jesu poeraawerà omovyvy ipi. A'evo remẽ poromo'e mãe kõ mõ ve oo ikoty ojimogetaoka, Juteu rõwã mãe kõ. Kereku kõ tè. A'e kõ pè Epikureu kõ eu. Ãmõ kõ pè Sitoiku kõ eu. A'e kõ kee e'i:

– Manyvo e'i si pãwĩ notekokuwai mã'ẽ oporegeta upa? e'i tite Pauru pewarà mõ kupa.

Kyty wyi ãmõ kõ kee e'i teve:

– Ãmõ kõ jarà rewarà rè tè rõwã ipõ oporegeta upa rõnõ! e'i kupa.

Aepo e'i kupa, Jesu rekoa Pauru omojenu upa remẽ. Ãmõ, jamãnõ paire janemomoeraa rã rewarà omojenu teve upa. 19Ajawyi Pauru weraa oõvijã kõ jimoatya kyty kupa. A'e jimoatya rena pè Areopaku eu. A'e pè jane kõ ojimoaty moregetaa renu ipi. Kee e'i Pauru pè ãmẽ kupa:

– Oropota oreremikuwa e'ã rè oremo'e rejupa, e'i kupa. 20Kee rewarà mõ. Ãmõ rupi tè maevo sõ tite poromo'e neiko. Noroenui aepo rapijarà ipi mijã, e'i. Ajawyi oropota oroenu, e'i Pauru pè kupa.

21A'evo Atena taa wãnà kõ ekoi ipi. Opota ojimogeta ywete kupa ipi. Wemikuwa age'ewarà omojenu kupa ipi. Weminu e'ã rè teve ojapyaka katu iko kupa ipi. Kõ'ẽ jawe jawe a'evo ekoi kupa ipi. Ãwitõ Atena taa wane'e kõ, ãwĩvo ve ãmõ taa wãnerà kõ ekoi, a'e pè ojimoenapa mãe kõ. A'e rè ywesõ oja'a kupa ipi.

22-23Ãmẽ Pauru opõ'ã jimoatya pè ovake kõ. Kee e'i ijupe kõ:

– Atena wãnà kõ! Penena rupi akwa remẽ, mõa'ãrõwã moma'e jimoãtãgwerà kõ rè amã'ẽ, pejarà rã'ãga kõ rè. Imoe'ea rena kõ rè ve amã'ẽ. Peja'a ywete maevo ee kõ ipi. Penemikuwa rõwã rè tẽ tesõ peja'a. Imoe'ea rena rè amã'ẽ rewarà mõ aepo a'e pejẽ. Kee jaa ojikusiwa mã'ẽ rè amã'ẽ: “Janejarà temikuwa e'ã moe'ea”, jaa ojikusiwa ee mã'ẽ rè. Ije si penemikuwa e'ã amojenutà pejẽ, tapeenu. 24Janejare'e tè a'e. Yvy reinõgarerà tè a'e. Pirujẽ i'arà rupiwarà kõ reinõgarerà tè. Janereinõgarerà teve. Ajawyi a'e yva jarà tè, yvy jarà teve. Janereminõgwerà wyry pè rõwã ekoi ipi. Omoe'ea retã wyry pè rõwã ekoi ipi. 25Ãmõ, janema'e rè ekoi mã'ẽ rõwã teve. Moma'e jẽ rõwã kuwa jainõ ijupe. A'e tè janeji'ãgekyia oinõ janeupe. Joe eako'i mã'ẽ rõwã a'e. Pirujẽ uvepa katu moma'e kõ ijupe. Ãwĩ tè pirujẽ janeremireko kõ ome'ẽ joupe ipi.#1To. 8.27; Isa. 42.5; J.K.R. 7.48 26Janejare'e teve, pe'ĩ kwaima'e pe wyi poromojikwaoka, jane kõ rõmõ ike tijaiko yvy rupi ky'y. Iteetejẽ ãmõ ate'y te'y rõmõ tijaiko ky'y. A'e tè janerena oinõ. Nijanereinõi remeve e'ipa amãtejẽ mape rupi jaikotà. Janesakya 'arà e'ipa amãtejẽ. Janemãnõa 'arà e'ipa amãtejẽ teve. 27A'evo ojirekooka ojikuwaoka janeupe. Ajamã'ẽ kuipe'e rõwã ekoi janewyi. Janepyrive ekoi, janejãvijõ vijõ jẽ ekoi janere. 28Ajawyi tè kee eu: “Janejare'e kasia rupi tè jaiko”, eu. Ãmõ, kee pejẽ teve itõkõ pejĩgarà rupi: “Janejare'e ãkarãgwerà kõ teve jane, [a'e tè janereinõgarerà rewarà mõ,]” pejẽ.

29– Aje, Janejare'e ãkarãgwerà kõ tè jane. Ajawyi kee tija'e e'ã ijupewarà mõ: “Teminõgwerà vo Janejare'e. Ãmõ, karakuri jimoãtãgwerà vo. Ãmõ, takuru jimoãtãgwerà vo”, tija'e e'ã ijupe. 30Aepo e'i tite karamoe remẽwarà kõ, Janejare'e rekoa nokuwai kupa rewarà mõ. Wãrõ jane kõ tojirova ikoty mijã. Ajamã'ẽ age'e remẽ kee e'i: “Pirujẽ jane kõ, pirujẽ taa wãnà kõ, tojimosĩoka waiwererà kõ rè itypypyipaoka eupe ky'y”, e'i. “Tojiporijauesaoka eupe ky'y”, e'i. 31Kãramõ Janejare'e poromoe'yiokatà ky'y. E'ipa amãtejẽ poromoe'yia 'arà. A'evo remẽ omoe'yiokatà pirujẽ nivoi mãe kõ ivo mãe kõ wyi. Emipyteporokwerà tè poromoe'yità. Jesu tè a'e. A'e ivo katu poromoe'yità. Nojavy'ãi poromoe'yia rè. Janejare'e omomoera imojikuwa maekwerà tè a'e, e'i Pauru Atena wãnà kõ motekokuwa.

32Aepo jaa rè Pauru poromotekokuwa remẽ, ãmõ kõ oojai kõrijõ.

– Ava mõ ve noporomomoerai ipi! e'i kõrijõ kupa.

Ajamã'ẽ ãmõ kõ kee e'i:

– Ãmõ 'ary pè emovy mijẽ aepo toroenu, e'i kupa.

33Ãmẽ a'e pe wyi Pauru ojisyry oo, jimoatya pe wyi. 34Ãmẽ kwaima'ekwerà kõ mõ wenu ijayvu remẽ, “aje” e'i enu kupa. Jesu koty rewarà kõ rõmõ ojinõ kupa ky'y, Pauru vo. Jõvijã mõ a'evo ekoi, Jõnisu eu erà pè mã'ẽ. Ãmõ, wãivĩ mõ ve a'evo ekoi, Tamarisi eu erà pè mã'ẽ. Ãmõ kõ ve a'evo ekoi.

Currently Selected:

Jesu koty rewarà kõ 17: oymNT

Highlight

Copy