Mateo 9

Jesupa chiwa bada jɨpada

(Marcos 2.1-12; Lucas 5.17-26)

1Ma tꞌẽepai, Jesús barcode bataupꞌeda, wãji lago kꞌĩraikꞌa eeree. Mãgá ichi pꞌuurude pacheji. 2Mama bɨde eperãarãpa jira aneejida eperã chiwa bɨ pꞌarude. Jesupa kꞌawaakꞌãri ãchia wãara ichide ijãa pꞌanɨ, ma chiwa bɨmaa mãgaji:

—Warra, tꞌãri o–ĩa báji pɨa pꞌekꞌau kꞌachia oopata jõmaweda wẽpada perã.

3Ũkꞌuru arii pꞌanadapꞌedaa Moisepa pꞌãda jarateepataarãpa mãga ũridakꞌãri, kꞌĩsiajida: “Jãgɨpa ikꞌachia pedeemaa bɨ Tachi Akꞌõre ãpɨte. Tachi Akꞌõrepapai pꞌekꞌau kꞌachia wẽpapiyada” ajida. 4Mamĩda Jesupa kꞌawaji ãchia kꞌĩsia pꞌanɨ. Mapa iidiji:

—¿Sãapꞌeda parãpa kꞌĩsia kꞌachia kꞌĩsia pꞌanɨma? aji. 5Mɨa irumaa jarai: “Pɨa pꞌekꞌau kꞌachia oopata wẽpajipɨ” maa–e pɨrã jarai: “Pꞌirabáiji mãikꞌaapa wã́ji”. Mamĩda irua maarepida oo–e pai, Tachi Akꞌõrepa oopi–e pɨrã. 6Mɨa akꞌɨpiitꞌee na pꞌekꞌau eujãde mɨ, chi Eperã Akꞌõre Truadepema kꞌapꞌɨa pari, Tachi Akꞌõre Waibɨapa wẽpapipari eperãarãpa pꞌekꞌau kꞌachia oopata.

Mãpai mãgaji ma eperã chiwa bɨmaa:

—¡Pꞌirabáiji! Pɨchi pꞌaru atáji mãikꞌaapa wã́ji pɨchi temaa.

7Aramãgá ma chiwa bada pꞌirabaidachi mãikꞌaapa wãji ichi temaa. 8Mãga unudakꞌãri, eperãarã pꞌera pɨkꞌa para beeji mãikꞌaapa Tachi Akꞌõremaa o–ĩa ɨtꞌaa tꞌɨ̃jida, irua ma eperãmaa mãga ooda perã.

Jesupa Mateo jɨrɨtꞌerada ichi ome nipapariimerã

(Marcos 2.13-17; Lucas 5.27-32)

9Mamãikꞌaapa Jesús wãji. Ma wãrude eperã tꞌɨ̃jarapatapꞌedaa Mateo#9.9 Mateo ichiaba tꞌɨ̃jarapachida Leví. Mateopa na pedee pia pꞌãji. unuji. Su–akꞌɨ baji Cesar–itꞌee impuesto pꞌaapatamãi. Jesupa mãgaji irumaa:

—Mɨ ome nipaparíiji.

Aramãgá bainɨ̃ beepꞌeda, Jesús ome wãji.

10Tꞌẽepai Jesús chi kꞌõpꞌãyoorã ome teeda nekꞌomaa bakꞌãri, impuesto pꞌepataarã Roma pidaarã rey–itꞌee pachejida awaraa eperãarã kꞌachia–idaa beerã apatapꞌedaarã ome. Mãɨrã aɨ mesade su–akꞌɨ pꞌaneejida Jesús ome. 11Fariseorãpa mãga unudakꞌãri, Jesús kꞌõpꞌãyoorãmaa iidijida:

—¿Sãapꞌeda parã jarateepari nekꞌomaa bɨma ajida, impuesto pꞌepataarã ome mãikꞌaapa awaraa pꞌekꞌau kꞌachia oopataarã ome?

12Mãɨrãpa iididapꞌedaa ũrikꞌãri, Jesupa mãgaji:

—Médico pëidakꞌaa kꞌapꞌɨa pia beerãmaa. Jĩpꞌa pëipata kꞌayaa beerãmaa. 13Parã wãdakꞌãri, kꞌĩsiadapáde aji, nãgɨ́ Akꞌõre Ũraa jara kꞌinia bɨ:

‘Mɨa kꞌiniara bɨ awaraarã chupɨria kꞌawaadamerã, ne–animalaarã peedapꞌeda, paadai kꞌãyaara mɨ–itꞌee.’ (Oseas 6.6)

Mãpai Jesupa mãgaji:

—Tachi Akꞌõrepa mɨ pëi–e paji tꞌãri pia beerã jɨrɨde. Ma kꞌãyaara pꞌekꞌau kꞌachia oopataarã jɨrɨdeta pëiji.

Sãapai nekꞌoda–ee pꞌanadaipia bɨ

(Marcos 2.18-20; Lucas 5.33-35)

14Mãpai Juan Bautista kꞌõpꞌãyoorã Jesumaa chejida mãikꞌaapa iidijida:

—Edaare tai, fariseorã ome nekꞌoda–ee pꞌaneepata jĩpꞌa Tachi Akꞌõre netꞌaade kꞌĩsiadaitꞌee. ¿Sãapꞌeda pɨ kꞌõpꞌãyoorãpa mãga oodakꞌaama? ajida.

15Jesupa pꞌanauji:

—Miakꞌãipata fiestade tꞌɨ̃ pëidapꞌedaarã kꞌĩra pia–ee pꞌanadakꞌaa chi miakꞌãiitꞌee bɨ ãchi ome bɨ misa. Mamĩda ewari cherude iru ata chedakꞌãripɨ, tꞌãri pꞌuapa nekꞌoda–ee pꞌaneedaitꞌeeda aji.

Ũraa chiwidi mãikꞌaapa chonaarãweda pꞌãdapꞌedaa

(Marcos 2.21-22; Lucas 5.36-39)

16—Eperã apidaapa pꞌaru chiwididepema pite aba tꞌɨɨikꞌaraa bɨda aji, pꞌaru sorede parchaaitꞌee. Mãga ooru pɨrã, chi pꞌaru chiwidi ãridariitꞌee mãikꞌaapa ma pite aukꞌa bee–e paitꞌee chi pꞌaru sore ome. 17Ichiaba vino ewaa juda tꞌɨdakꞌaa ne–e#9.17 Maapai vino ɨapachida ne–animal edee oodade. sorede, ma vino baakꞌakꞌãri, ma ne–e sore jĩadarii perã mãikꞌaapa chi vino atuadarii perã. Maperã vino ewaa juda tꞌɨdaipia bɨ ne–e chiwidide, ma ne–e chi vino ome atuapiamaapa.

Jairo kꞌau mãikꞌaapa wẽrapa Jesús pꞌaru ide tꞌõbaida

(Marcos 5.21-43; Lucas 8.40-56)

18Jesús atꞌãri pedeemaa bɨde, judiorã poro waibɨa tꞌɨ̃jarapatapꞌedaa Jairo Jesús kꞌĩrapite bedabai nɨ̃ba cheji mãikꞌaapa mãgaji:

—Etꞌewapai mɨ kꞌau jai–idaajida aji. Mamĩda mɨa kꞌawa bɨ pɨ cheru pɨrã mɨ ome mãikꞌaapa pɨ jua bɨru pɨrã iru ɨ̃rɨ, waya chokꞌai beeyada aji.

19Mãpai Jesús wãji chi kꞌõpꞌãyoorã ome ma eperã temaa. 20Ma wãdade wẽra doce años bi kꞌayaa bɨ waamiapa Jesús ãpɨteikꞌaapa kꞌaitꞌa wãpꞌeda, iru ɨ̃rɨpema pꞌaru i tꞌõbaitꞌaaji. 21Mãga ooji kꞌĩsia bada perã iru pꞌaru i tꞌõbairupapai jɨpa beei. 22Mamĩda mãgá tꞌõbaikꞌãri, Jesupa ãpɨtee akꞌɨji mãikꞌaapa mãgaji ma wẽramaa:

—Wẽra, tꞌãri o–ĩa béeji. Pɨa mɨde ijãa bairã, jɨpa beejida aji.

Aramata ma wẽra jɨpa beeji.

23Maapꞌeda Jesús ma judiorã poro waibɨa temaa panakꞌãri, unuji siru chaapataarã mãikꞌaapa eperãarã jẽepi ororoo nɨ̃bɨ. 24Mãpai Jesupa mãgaji:

—Taawaa uchíatɨ. Na wẽra kꞌau jai–idaa–e bɨ. Jĩpꞌa kꞌãita bɨda aji.

Mãga ũridakꞌãri, arii pꞌanadapꞌedaarã ëikꞌoodachida, Jesús kꞌĩra kꞌawa–ee bɨ jĩakꞌaapa. 25Mamĩda Jesupa eperãarã uchiapikꞌooji mãikꞌaapa jai–idaada badamãi tꞌĩupꞌeda, iru jua jita atanaji. Mãpai ma wẽra kꞌau pꞌirabaidachi. 26Maapꞌeda ma eujãdepemaarã jõmaarãpa kꞌawaa wãjida Jesupa mãga ooda.

Jesupa tau pꞌãriu beerã omé jɨpada

27Mamãikꞌaapa uchia wãdade, Jesús tꞌẽe tau pꞌãriu bee omé bia che wãpachida:

—¡Rey David Warra,#9.27 Jesucristo David Warra tꞌɨ̃jarapachida, iru chonaarãwedapema Rey Daviddeepa uchiada perã mãikꞌaapa Mesías pada perã. tai chupɨria kꞌawaapáde! ajida.

28Jesús teeda tꞌĩunakꞌãri, ma tau pꞌãriu beerã aukꞌa tꞌĩujida. Mãpai Jesupa iidiji:

—¿Parãpa ijãa pꞌanɨkꞌã aji, mɨa jɨpai?

Pꞌanaujida:

—Tachi Waibɨa, ijãa pꞌanɨda ajida.

29Mãpai Jesupa taumãi tꞌõbaipꞌeda, mãgaji:

—Parãpa ijãa pꞌanɨkꞌa, mãgá pꞌaneedapáde aji.

30Aweda tau eratɨkꞌoodachida. Mãpai Jesupa jĩpꞌa mãgaji:

—Mɨa ooda chĩaramaa nepɨrɨnaadapáde aji.

31Mãga jaraji mĩda, mamãikꞌaapa uchiarutata Jesupa ooda nepɨrɨ wãpachida ma eujãdepemaarãmaa.

Jesupa pedee atua bada jɨpada

32Ma tau pꞌãriu pꞌanadapꞌedaarã uchiarutade, eperãarãpa aneejida eperã pedee atua bɨ Jesumaa. Mãga baji netuara ichi kꞌapꞌɨade merãtɨa bada perã. 33Jesupa ma netuara uchiapitꞌaakꞌãri, ma eperã pedee beeji. Mãga unudakꞌãri, arii pꞌanadapꞌedaarãpa akꞌɨtrua para beeji mãikꞌaapa mãgajida:

—¡Israelde waide nãga unudakꞌaada! ajida.

34Mamĩda fariseorãpa mãgajida:

—Netuara Poro Waibɨa juapata jãgá netuaraarã uchiapiparida ajida.

Jesupa eperãarã chupɨria kꞌawaada

35Jesús nipapachi pꞌuuru beede mãikꞌaapa aɨ ikꞌaawa pꞌuuru kꞌaipee beede. Tachi Akꞌõre Ũraa jarateepata te chaa pedee pia jarateepachi kꞌawaadamerã taarã–e Tachi Akꞌõrepa eperãarã pꞌe bɨitꞌee ichi jua ekꞌari, ichideerã pꞌaneedamerã. Ma awara kꞌayaa kꞌĩra tꞌãdoo jɨpapachi. 36Eperãarã chokꞌara see nɨ̃bɨ unukꞌãri, chupɨria kꞌawaaji, ãra chupɨria, kꞌĩra pia–ee para bada perã, oveja chakꞌeerã akꞌɨpari wẽe chitoonɨkꞌa. 37Mãpai chi kꞌõpꞌãyoorãmaa mãgaji:

—Eperãarã chokꞌara mɨde waide ijãada–e pꞌanɨ. Ne–uu audú chau bɨ́kꞌapɨ pꞌanɨ. Mamĩda mimiapataarã chokꞌara–ee pꞌanɨ. 38Mapa ɨtꞌaa iididapáde aji, ma ne–uu chiparimaa, irua awaraa mimiapataarã pëimerã chi chau bɨ pꞌede.

Currently Selected:

Mateo 9: sjaB

Highlight

Copy