Mateo 10

Jesupa kꞌõpꞌãyoorã jɨrɨtꞌerada mimiadamerã ichi ome

(Marcos 3.13-19; Lucas 6.12-16)

1Jesupa chi kꞌõpꞌãyoorã doce tꞌɨ̃ pꞌeji mãikꞌaapa ãchi ichi jua ekꞌari bɨji netuaraarã uchiapidamerã mãikꞌaapa kꞌayaa kꞌĩra tꞌãdoo jɨpadamerã.

2Nãgɨ́ ɨmɨkꞌĩraarã doce jɨrɨtꞌeraji pëiitꞌee ichi ũraa jarateede. Naapɨara jɨrɨtꞌeraji Simón, ichiaba tꞌɨ̃jarapatapꞌedaa Pedro, chi ɨ̃pema Andrés ome. Ma tꞌẽepai jɨrɨtꞌeraji Santiago chi ɨ̃pema Juan ome. Mãɨrã Zebedeo warrarã paji. 3Ichiaba jɨrɨtꞌeraji Felipe; Bartolomé; Tomás; mɨ, Mateo, chi impuesto pꞌepari bada Roma pidaarã–itꞌee; Alfeo warra, Santiago; Tadeo; 4Simón Celote apatapꞌedaa#10.4 Roma jua ekꞌariipa uchia kꞌinia pꞌanadapꞌedaarã tꞌɨ̃jarapachida Celote eerepemaarã. mãikꞌaapa Judas Iscariote, ma tꞌẽepai Jesús traicionaada.

Jesupa chi kꞌõpꞌãyoorã pëida Akꞌõre Ũraa jarateenadamerã

(Marcos 6.7-13; Lucas 9.1-6)

5Jesupa ma kꞌõpꞌãyoorã doce pëiji eperãarã paraamaa. Pëi naaweda jaraji:

—Wãnáatɨ judio–eerã pꞌanapatamaa. Ichiaba wãnáatɨ Samaria eujãdepema pꞌuurudee. 6Ma kꞌãyaara wã́tɨ Israel eujãdepema ovejaarã atua pɨkꞌa beerãmaa. 7Jaratéetɨ taarã–e Tachi Akꞌõrepa eperãarã ichi jua ekꞌari bɨitꞌee ichideerã pꞌaneedamerã. 8Kꞌayaa beerã jɨpátɨ; piudapꞌedaarã chokꞌai pꞌirabaipítɨ; leprapa kꞌayaa beerã jɨpátɨ mãikꞌaapa netuara kꞌapꞌɨade merãtɨa bee jɨpátɨ. Mɨa parã mɨchi jua ekꞌari bɨkꞌãri mãga oodamerã, pꞌaratꞌa maarepida iidi–e paji. Mapa pꞌaratꞌa iidináatɨ ma pari.

9ʼAteenáatɨ nẽe, pꞌaratꞌa, cobre, pãchi kꞌɨrrɨde jɨ̃pata. 10Ichiaba ateenáatɨ muchila, awaraa chancla mãikꞌaapa pꞌaru jɨ̃daitꞌee, pakꞌuru jida tꞌɨdɨkꞌadaitꞌee, parã mimia pari ma ne–inaa teedaipia pꞌanadairã.

11ʼPꞌuurude maa–e pɨrã te chokꞌara–ee beemãi panadakꞌãri, eperã tꞌãri piata jɨrɨ́tɨ arii pꞌaneedaitꞌee mamãikꞌaapa wãruta misa. 12Teeda tꞌĩudakꞌãri, arii pꞌanɨɨrãmaa pedee pia jarátɨ. 13Aɨ tede pꞌanɨɨrãpa parã auteebairuta pɨrã, ma pedee pia jaradakꞌa ãramaa uchiaitꞌee. Mamĩda auteebaida–e pɨrã, ma pedee pia jaradakꞌa ãramaa uchia–e paitꞌee. 14Parã auteebaida–e pɨrã mãikꞌaapa parãpa jarateepata ũridaamaa pꞌanɨ pɨrã, uchíatɨ ma tedeepa maa–e pɨrã ma pꞌuurudeepa mãikꞌaapa bɨɨrɨdepema yooro pꞌora nẽepꞌétɨ akꞌɨpidaitꞌee Tachi Akꞌõrepa ãra kꞌaripa–e paitꞌee. 15Mɨa wãarata jararu. Tachi Akꞌõre ewari waibɨa ewate irua ma pꞌuurudepemaarã audupɨara kꞌachia ooitꞌeeda aji, Sodoma pꞌuurudepemaarã, Gomorra pꞌuurudepemaarã kꞌachia ooda kꞌãyaara.

Jesupa jarada ichi kꞌaurepa ijãapataarã miadaitꞌee

(Lucas 12.11-12; 21.12-17)

16—¡Ũrítɨ! Mɨa parã pëiru eperãarãmaa jarateede. Pëiru ovejaarã pëikꞌajikꞌa ne–animalaarã kꞌachia beerã tꞌãide. Mapa kꞌĩra kꞌawaa nipapatáatɨ, taama kꞌĩra kꞌawaa nipaparikꞌa. Ichiaba kꞌãiwee nipapatáatɨ paloma nipaparikꞌa. 17Taukꞌa nipapatáatɨ eperãarãpa parã ateedaitꞌee perã ãchi charraarãmaa miapidamerã, maa–e pɨrã parã pꞌua oodaitꞌee Tachi Akꞌõre Ũraa jarateepata tede. 18Ma awara mɨde ijãapata kꞌaurepa ateedaitꞌee ãchi poro waibɨarãmaa mãikꞌaapa ãchi reyrãmaa. Mãgá parãpa mɨ ũraa jaradai mãɨrã kꞌĩrapite mãikꞌaapa awaraa ijãadakꞌaa beerã kꞌĩrapite. 19Mamĩda mãɨrã kꞌĩrapite pꞌanadakꞌãri, kꞌĩsianáatɨ sãga pedeedaitꞌee, maa–e pɨrã kꞌãata jaradaitꞌee, pedeedaitꞌee pakꞌãri, Tachi Akꞌõrépata pedeepiitꞌee perã. 20Parã pedeeda–e paitꞌee pãchi kꞌĩradoopa. Tachi Akꞌõre Jaurepata pedeeitꞌee parã kꞌapꞌɨa.

21ʼMaapai eperãarãpa ãchi ɨ̃pemaarã paara teedaitꞌee miapidamerã piurutamaa. Ma awara chi akꞌõreerãpa ãchi warrarã paara mãgá peepidaitꞌee; maa–e pɨrã warrarãpa ãchi akꞌõreerã peepidaitꞌee. 22Jõmaarãpa parã kꞌĩra unuamaa iru pꞌanapataadaitꞌee mɨde ijãapata kꞌaurepa. Mamĩda tꞌãridepai chooruta pɨrã, Tachi Akꞌõrepa parã kꞌaripaitꞌee atuanaadamerã na pꞌekꞌau eujã jõrumaa. 23Pꞌuuru abaade parã jɨrɨ pꞌaneedakꞌãri, mirútɨ awaraa pꞌuurude. Mɨa wãarata jararu. Parã Israel pꞌuuru jõmaade jaratee nipadai naaweda, mɨ, chi Eperã Akꞌõre Truadepema, cheitꞌee.

24ʼKꞌirãpátɨ eperã apida ichi jarateepari kꞌãyaara waibɨara bɨ–e. Ichiaba mimiapari apida chipari kꞌãyaara waibɨara bɨ–e. 25Chi ne–inaa kꞌawaa kꞌinia bɨ o–ĩa baipia bɨ chi jarateepari jĩakꞌa paitꞌee. Ichiaba mimiapari o–ĩa baipia bɨ chipari jĩakꞌa paitꞌee. Chi te chipari tꞌɨ̃jarapata pɨrã Beelzebú, Netuara Poro Waibɨa, audupɨara irudeerãmaa mãgɨ́ tꞌɨ̃ bɨdaitꞌee.

Jesupa jarateeda kꞌaita waaweedaipia bɨ

(Lucas 12.2-7)

26—Mãga jara pꞌanɨ mĩda, eperãarã waaweenáatɨ. Ɨ̃rá Tachi Akꞌõre netꞌaa mera pɨkꞌa bɨ mĩda, tꞌẽepai parãpa jõmaarãmaa jaradaitꞌee. 27Mɨa ũraa jarada pꞌãriu pɨkꞌa baji. Mamĩda jõmaarãmaa mãga jĩpꞌa jaradaipia bɨ. Ma awara mɨa ũraa mera pɨkꞌa jarada, golpe jaradaipia bɨ terraza ɨ̃rɨɨpa biarukꞌa. 28Waaweenáatɨ parã jɨrɨ pꞌanɨɨrã peedaitꞌee, ãrapa parã pꞌoyaa atuapida–e perã tokꞌarradee. Ma kꞌãyaara Tachi Akꞌõre waawéetɨ. Iruata tachi piupii mãikꞌaapa atuapii.

29ʼ¿Netopata–ekꞌã ipana chakꞌe omé pꞌaratꞌa tau abaa pari? Eperãarãpa mãga oopata, ipana chakꞌe makꞌɨara vale–e bɨ jĩakꞌaapa. Mamĩda ipana chakꞌe apida eujãde baaidakꞌaa, parã Akꞌõre Waibɨapa mãga jara–emãi. 30-31Parã puda paara irua juasia iru bɨ. Mapa waaweenáatɨ, Tachi Akꞌõrepa parã kꞌiniara iru bapari perã ipanaarã kꞌãyaara.

Jesucristode ijãapatada apataarã awaraarã kꞌĩrapite

(Lucas 12.8-9)

32—Eperãpa tau taawa jararu pɨrã ichi Jesucristode ijãapari, mɨa pida jarai: “Mãgɨ́ mëré” mɨ Akꞌõre kꞌĩrapite ɨtꞌari. 33Mamĩda eperãpa meraru pɨrã mɨde ijãapari, mãgara mɨa pida meraitꞌee. “Mãgɨ́ mëre–eda” aitꞌee mɨ Akꞌõre kꞌĩrapite ɨtꞌari.

Jesús kꞌaurepa ëreerã tꞌãri aukꞌa pꞌanada–e

(Lucas 12.51-53; 14.26-27)

34—Kꞌĩsianáatɨ mɨ cheji na pꞌekꞌau eujãdee eperãarã kꞌãiwee pꞌanapide. Jĩpꞌa cheji chõopide. 35Mɨ cheji

‘warra tꞌãri aukꞌa banaamerã chi akꞌõre ome, wẽra kꞌau tꞌãri aukꞌa banaamerã chi nawe ome mãikꞌaapa ãigu tꞌãri aukꞌa banaamerã chi pꞌãkꞌõre ome. 36Ma kꞌaurepa eperãarã tꞌãri aukꞌa para ba–e paitꞌee ãchi ëreerã ome.’ (Miqueas 7.6)

37ʼEperãpa ichi akꞌõre wa chi nawe kꞌiniara iru bɨ pɨrã mɨ kꞌinia iru bai kꞌãyaara, mëré pa–e pai. Ichiaba eperãpa chi warra wa chi kꞌau kꞌiniara iru bɨ pɨrã mɨ kꞌinia iru bai kꞌãyaara, mãgɨ́ mëré pa–e pai. 38Ma awara mɨde ijãapari kꞌaurepa eperã piuamaa bɨ pɨrã kurusode piu wãkꞌa, mãgɨ́ mëré pa–e paitꞌee. 39Eperã piuamaa bɨ pɨrã mɨde ijãapari kꞌaurepa, mãgɨ́ piukꞌãri, atuaitꞌee. Mamĩda eperã piuru pɨrã mɨde ijãapari kꞌaurepa, mãgɨ́ eperã piukꞌãri ɨtꞌaa wãitꞌee.

Jesupa jarada ijãapataarãpa ne–inaa pia atadaitꞌee

(Marcos 9.41)

40—Eperãpa parã auteebaikꞌãri, mɨ jida auteebai bɨ mãikꞌaapa mɨ Akꞌõre, mɨ pëida, aukꞌa auteebai bɨ. 41Ma awara eperãpa auteebaikꞌãri Tachi Akꞌõre pedee jarapari, Tachi Akꞌõrepa pëida perã, ne–inaa pia ataitꞌee Tachi Akꞌõre pedee jarapataarãpa atapatakꞌa. Ichiaba auteebaikꞌãri eperã tꞌãri pia, mãgɨ́ tꞌãri pia bairã, ne–inaa pia ataitꞌee eperã tꞌãri pia beerãpa atapatakꞌa. 42Ma awara eperãpa teekꞌãri pania vaso aba mɨ ome nipaparimaa mãgɨ́ mëré perã, Tachi Akꞌõrepa ne–inaa pia ichiaba teeitꞌee ma pania teedamaa.

Currently Selected:

Mateo 10: sjaB

Highlight

Copy