Mateo 8

Jesupa leprapa kꞌayaa bada jɨpada

(Marcos 1.40-45; Lucas 5.12-16)

1Jesús eedeepa edaa chekꞌãri, eperãarã chokꞌara iru tꞌẽe chejida. 2Mãgá che wãde iru kꞌaitꞌa cheji eperã leprapa kꞌayaa bɨ. Mãgɨ́ iru kꞌĩrapite bedabai nɨ̃ba cheji mãikꞌaapa mãgaji:

—Tachi Waibɨa, pɨa kꞌinia bɨ pɨrã, mɨ kꞌayaa wẽpapipáde aji, Akꞌõre kꞌĩrapite mɨ pia beemerã.

3Jesupa juapa tꞌõbaipꞌeda, mãgaji:

—¡Kꞌinia bɨda! aji. Jɨpa beepáde aji.

Aramata jɨpa beeji. 4Mãpai Jesupa mãgaji:

—¡Ũríji! Jaranáaji apidaamaa. Jĩpꞌa pꞌaaremaa akꞌɨpináji mãikꞌaapa Moisepa pꞌãdade jara bɨkꞌa ipana omé atéeji teeitꞌee Tachi Akꞌõremaa. Mãgá jõmaarãpa pɨ jɨpa beeda kꞌawadayada aji.

Jesupa Romadepema soldaorã poro mimiapari jɨpada

(Lucas 7.1-10; Juan 4.43-54)

5Tꞌẽepai Jesús Capernaum pꞌuurude panakꞌãri, Romadepema soldaorã poro waibɨapa irumaa chupɨria iidi cheji:

6—Jesús, mɨ mimiapari kꞌayaa bɨda aji. Pꞌoyaa mimikꞌa–e bɨ mãikꞌaapa chupɨria nɨ̃bɨda aji, pꞌuapa.

7Jesupa pꞌanauji:

—Wãitꞌeeda aji, jɨpade.

8Mamĩda ma soldaorã poro waibɨapa mãgaji:

—Tachi Waibɨa, mɨ pɨ kꞌãyaara ekꞌariara bɨ. Pɨ mɨ temaa wã–e pɨjida, namãikꞌaapa pedeeru pɨrã, mɨ mimiapari jɨpa beeitꞌee. 9Mɨ jida waibɨarã jua ekꞌari bɨ. Ma awara mɨa soldaorã iru bɨ mɨchi jua ekꞌari. Mɨa abaamaa wãpáde akꞌãri, wãpari; awaraamaa chepáde akꞌãri, chepari. Ichiaba mɨ mimiaparimaa ne–inaa oopáde akꞌãri, oonaparida aji.

10Jesupa mãga ũrikꞌãri, pꞌera pɨkꞌa beeji ma soldaorã poropa jara bada kꞌaurepa. Mapa ichi ome nipapataarãmaa mãgaji:

—Mɨa wãarata jararu. Israel pidaarã tꞌãide na eperãkꞌa apida waide unu–e bɨ, iru wãara ijãapari perã. 11Eperãarã chokꞌara chedaitꞌee akꞌõrejĩru uchiapari eereepa mãikꞌaapa akꞌõrejĩru baaipari eereepa. Mãɨrãta Tachi Akꞌõre truade su–akꞌɨ pꞌana chedaitꞌee nekꞌode Abraham ome, Isaac ome mãikꞌaapa Jacob ome. 12Mamĩda chi ɨtꞌari pꞌanadaipia bɨɨrã Akꞌõrepa jërekꞌooitꞌeeda aji, taawaa pꞌãriudee, atua beerã ome jẽedamerã mãikꞌaapa kꞌida kierrkierree para bamerã pꞌuapa.

13Mãga jarapꞌeda, Jesupa ma soldaorã poromaa mãgaji:

—Wãpáde aji, pɨchi temaa pɨa ijãadakꞌa uchiada perã.

Aramata chi kꞌayaa bada jɨpadachi.

Jesupa Pedro pꞌãkꞌõre jɨpada

(Marcos 1.29-31; Lucas 4.38-39)

14Mãpai Jesús wãji Pedro temaa. Mama ununaji Pedro pꞌãkꞌõre kꞌayaa bɨ kꞌɨamiapa. Pꞌarude baji kꞌayaa bada perã. 15Jesupa iru jua tꞌõbaikꞌãri, ma kꞌɨamia tuudachi. Mãpai ma wẽra pꞌirabaidaipꞌeda, nekꞌopiji Jesumaa.

Jesupa kꞌayaa beerã chokꞌara jɨpada

(Marcos 1.32-34; Lucas 4.40-41)

16Kꞌeudaikꞌãri, netuara kꞌapꞌɨade merãtɨa beerã chokꞌara aneejida Jesumaa. Pedee jarada abaapa netuaraarã jõmaweda uchiapikꞌooji. Ichiaba kꞌayaa beerã jõmaweda jɨpakꞌooji. 17Mãga ooji pꞌasamerã Tachi Akꞌõre pedee jarapari Isaíapa chonaarãweda jaradakꞌa:

‘Irua kꞌayaa tachimaa baridapꞌedaa awara ãyaa ataji mãikꞌaapa tachi kꞌayaa beerã jɨpaji.’ (Isaías 53.4)

Jesús ome nipa kꞌinia pꞌanadapꞌedaarã

(Lucas 9.57-62)

18Awaraa ewaride Jesupa unukꞌãri eperãarã chokꞌara ichi wapꞌɨra iru pꞌanɨ, chi kꞌõpꞌãyoorãmaa jaraji sĩadaitꞌee lago kꞌĩraikꞌa eeree. 19Mamĩda wãdai naaweda, Moisepa pꞌãda jarateepari kꞌaitꞌa cheji mãikꞌaapa mãgaji:

—Tachi Jarateepari, pɨ ome wã kꞌinia bɨda aji, chi wãrumaa.

20Jesupa pꞌanauji:

—Usapꞌã́ yooro te uria iru bee mãikꞌaapa ipanaarã te iru bee. Mamĩda mɨ, chi Eperã Akꞌõre Truadepema#8.20 Chi Eperã Akꞌõre Truadepema jara kꞌinia bɨ Tachi Akꞌõre mimiapari na pꞌekꞌau eujãdee cheda. Jesucristopa ichi nãga tꞌɨ̃jaraji akꞌɨpiitꞌee ichi Mesías. arajãgaa ni, kꞌãipari wẽe. Made kꞌĩsíaji jarai naaweda wãara mɨ ome nipa kꞌinia bɨ wa mãga–e.

21Awaraa Jesús ome nipadapa mãgaji:

—Tachi Waibɨa, mɨ jida pɨ ome nipaparii kꞌinia bɨ. Mamĩda aɨ naaweda, mɨ akꞌõre ɨapipáde aji, iru piukꞌãri.

22Jesupa pꞌanauji:

—Chepáde aji, mɨ ome mãikꞌaapa ichiakꞌau bɨpáde aji, atuadaitꞌeerãpa ãchi piudapꞌedaarã ɨadamerã.

Jesupa nãu pꞌusa ome tꞌumãtɨpida

(Marcos 4.35-41; Lucas 8.22-25)

23Ma tꞌẽepai Jesús wãji barcode chi kꞌõpꞌãyoorã ome. 24Mãga nɨde pꞌusara tꞌo nɨ̃beeji. Pꞌusapa barco pirubaai wã nipaji. Mãɨmisa Jesús kꞌãi baji. 25Mapa chi kꞌõpꞌãyoorãpa ɨ̃rɨmatꞌaajida mãikꞌaapa mãgajida:

—Tachi Waibɨa, ¡tai kꞌaripáji! ¡Tachi pirubaai wãdapɨ!

26Jesupa pꞌanauji:

—¿Sãapꞌeda pꞌera jõnɨma? aji. ¡Parã pia ijãada–e pꞌanɨda! aji.

Mãga jarapꞌeda, pꞌirabaidachi mãikꞌaapa pedeeji nãumaa mãikꞌaapa pꞌusamaa. Aweda jõma ipꞌii ũu beeji. 27Mãga unudakꞌãri, chi kꞌõpꞌãyoorã akꞌɨtrua para beeji mãikꞌaapa ãchi pitapai iidi para beeji:

—¿Kꞌaima ajida, nãgɨ́? Nãu, pꞌusa paara iru pedee ũripatada ajida.

Eperãarã kꞌapꞌɨade netuara merãtɨa bada

(Marcos 5.1-20; Lucas 8.26-39)

28Jesús chi kꞌõpꞌãyoorã ome panadakꞌãri lago kꞌĩraikꞌa eere Gadara eujãde, jãɨra mãu te uriade badadeepa uchiajida eperãarã omé netuara ãchi kꞌapꞌɨade merãtɨa bee. Ma eperãarã Jesús kꞌaitꞌa chejida. Ãchi audú tꞌãri kꞌachia–idaa pꞌanadapꞌedaa perã, eperãarã ma ode pꞌoyaa wãyaadakꞌaa paji. 29Jesumaa bia chejida:

—¡Jesús, Akꞌõre Waibɨa Warra, tai ome tꞌĩunáaji! ¿Atꞌãri–e weda tai miapide cheji–ekꞌã? ajida.

30Ma kꞌaitꞌa sinaarã chokꞌara nekꞌomaa pꞌanajida. 31Mapa netuaraarãpa Jesumaa chupɨria iidijida ma sinaarã kꞌapꞌɨade tꞌĩupimerã.

32Aramãgá Jesupa jaraji mamaa wãdamerã. Mãpai ma netuaraarã ma eperãarã kꞌapꞌɨadeepa uchiakꞌoodachida mãikꞌaapa sinaarã kꞌapꞌɨade tꞌĩudachida. Aramata sinaarã jõmaweda pꞌirakꞌoodachida ee kꞌõotꞌari jira bɨdee. Mata lagode baainajida mãikꞌaapa ɨ̃yapa jɨ̃akꞌoodachida.

33Ma sinaarã jɨ̃a pꞌanadapꞌedaarãpa mãga unudakꞌãri, pꞌirakꞌoodachida pꞌuurudee. Nepɨrɨnajida ãchia unudapꞌedaa ma netuara merãtɨa pꞌanadapꞌedaarã ome. 34Mãpai pꞌuuru pidaarã jõmaweda chejida mãikꞌaapa Jesumaa chupɨria iidijida ãchi eujãdeepa wãmerã.

Currently Selected:

Mateo 8: sjaB

Highlight

Copy