Mateo 4

Netuara Poro Waibɨapa Jesús kꞌachiade baaipiitꞌee pada

(Marcos 1.12-13; Lucas 4.1-13)

1Maapꞌeda Tachi Akꞌõre Jaurepa Jesús wãpiji eujã pania wẽe bɨmaa, Netuara Poro Waibɨapa irumaa ne–inaa kꞌachia oopi kꞌinia bada perã.

2Mama kꞌãima cuarenta nekꞌo–ee baji. Mapa jarrapisia nɨ̃beeji. 3Mãga nɨde Netuara Poro Waibɨapa ne–inaa kꞌachia oopide cheji mãikꞌaapa mãgaji:

—Wãara pɨ Tachi Akꞌõre Warra pɨrã, na mãu pan papitꞌaapáde aji.

4Jesupa pꞌanauji:

—¡Oo–eda! aji. Tachi Akꞌõre Ũraa pꞌãdade jara bɨ:

‘Eperã chikꞌo kꞌo bɨpapai chokꞌai bakꞌaa. Tachi Akꞌõre pedee kꞌawa bɨpa ichita chokꞌai bapari.’ (Deuteronomio 8.3)

5Tꞌẽepai Netuara Poro Waibɨapa iru ateeji Jerusalendee, Tachi Akꞌõrepa jɨrɨtꞌerada pꞌuurudee. Mama Tachi Akꞌõre te waibɨa ekꞌarra ɨ̃rɨ ɨtꞌɨ́ ateeji 6mãikꞌaapa mãgaji:

—Wãara pɨ Tachi Akꞌõre Warra pɨrã, namãikꞌaapa jɨ̃tɨdaipáde aji, Tachi Akꞌõre Ũraa pꞌãdade jara bairã:

‘Akꞌõrepa ichi angeleerã pëiitꞌee pɨ kꞌaripadamerã. Ãchia pɨ jita atadaitꞌee mãikꞌaapa pɨ tꞌɨdɨkꞌadaitꞌee, pɨchi bɨɨrɨ pida mãumaa pꞌu oopiamaapa.’ (Salmos 91.11-12)

7Jesupa pꞌanauji:

—¡Jɨ̃tɨ–eda! aji. Ichiaba Tachi Akꞌõre Ũraa pꞌãdade jara bɨ:

‘Ne–inaa pariatua oonáaji kꞌawaaitꞌee wãara Tachi Akꞌõre Waibɨapa tachi akꞌɨpari wa mãga–e.’ (Deuteronomio 6.16)

8Maapꞌeda Netuara Poro Waibɨapa iru ee ɨtꞌɨara bɨ nokꞌode ateeji. Mama akꞌɨpiji jõmaweda na pꞌekꞌau eujãdepema pꞌuuru, netꞌaa pi–ia ome. 9Mãpai mãgaji:

—Pɨta mɨ kꞌĩrapite bedabaipꞌeda, mɨmaa ɨtꞌaa tꞌɨ̃rura, mãgara na jõmaweda përé payada aji.

10Jesupa pꞌanauji:

—¡Oo–eda! aji. Ãyaa wãpáde aji, Satanás.

Tachi Akꞌõre Ũraa pꞌãdade jara bɨ:

‘Tachi Akꞌõre Waibɨamaa aupai ɨtꞌaa tꞌɨ̃patáatɨ mãikꞌaapa jĩpꞌa oopatáatɨ irua jara bɨkꞌa.’ (Deuteronomio 6.13)

11Mãpai Netuara Poro Waibɨa ãyaa wãji. Mãga nɨde angeleerã chejida Jesús kꞌaripade.

Jesupa naapɨara jaratee beeda

(Marcos 1.14-15; Lucas 4.14-15)

12Jesupa ũrikꞌãri Juan Bautista carcelde tꞌɨ nɨ̃bɨdapꞌedaa, wãji Galilea eujãdee. 13Mamĩda Nazaret pꞌuurude bana–e paji. Ma kꞌãyaara banaji Capernaum pꞌuurude, lago ikꞌaawa bɨ Zabulón, Neftalí ëreerã eujãde. 14Mãgá uchiaji Tachi Akꞌõre pedee jarapari Isaíapa pꞌãdakꞌa:

15‘Zabulón ëreerã eujãde mãikꞌaapa Neftalí ëreerã eujãde, Jordán to kꞌĩraikꞌa eere pꞌusadee o wãparide, Galilea apata eujãde Israel pidaarã–eerã pꞌanapachida. 16Mãpemaarã pꞌãriu pɨkꞌa bɨde pꞌanapatapꞌedaa, ɨ̃daa pi–ia unudaitꞌee. Tachi Akꞌõrepa ma ɨ̃daa pëiitꞌee chi pꞌãriu pɨkꞌa bɨde pꞌanɨɨrãmaa atuanaadamerã.’ (Isaías 9.1-2)

17Maadakꞌãriipa Jesupa jarateemaa beeji:

—Pꞌekꞌau kꞌachia oo amáatɨ mãikꞌaapa Tachi Akꞌõrede ijãapatáatɨ. Taarã–e nɨde Tachi Akꞌõrepa eperãarã bɨ kꞌinia bɨ ichi jua ekꞌari, ichideerã pꞌaneedamerã.

Jesupa to–ɨapataarã kꞌĩmari jɨrɨtꞌerada

(Marcos 1.16-20; Lucas 5.1-11)

18Ewari aba Jesús Galilea Lago ide nipakꞌãri, unuji ɨ̃pemaarã omé: Simón; ichiaba tꞌɨ̃jarapatapꞌedaa Pedro mãikꞌaapa Andrés. To–ɨapataarã paji. Mapa tꞌɨrɨ tꞌaamaa pꞌanajida. 19Ãra unukꞌãri, Jesupa mãgaji:

—Mɨ ome nipapatáatɨ mãikꞌaapa óotɨ mɨa ooparikꞌa. Idideepa eperãarã jɨrɨdaitꞌee Tachi Akꞌõre–itꞌee, to–ɨapataarãpa chikꞌo jɨrɨpatakꞌa.

20Aramata ãchi tꞌɨrɨ atabëijida mãikꞌaapa wãjida iru ome.

21Ipu nokꞌode Jesupa awaraa ɨ̃pemaarã omé unuji: Santiago mãikꞌaapa Juan. Zebedeo warrarã paji. Barcode tꞌɨrɨ pi–ia pꞌe bɨmaa pꞌanajida chi akꞌõre ome. Mãga oomaa pꞌanɨde Jesupa ãchi tꞌɨ̃ji ichi ome wãdamerã. 22Aramata chi akꞌõre atabëijida barcode mãikꞌaapa wãjida Jesús ome.

Jesupa eperãarã chokꞌaraarãmaa jarateeda

(Lucas 6.17-19)

23Maapai Jesús Galilea eujã jõmaade nipaji. Tachi Akꞌõre pedee jaratee nipapachi judiorã Tachi Akꞌõre Ũraa jarateepata te bee chaa. Pedee pia jarateepachi kꞌawaadamerã taarã–e Tachi Akꞌõrepa eperãarã pꞌe bɨitꞌee ichi jua ekꞌari, ichideerã pꞌaneedamerã. Ma awara kꞌayaa jõmaweda jɨpa nipapachi. 24Siria eujãdepemaarãpa mãga ũridakꞌãri, irumaa aneejida kꞌayaa beerã kꞌĩra tꞌãdoo: kꞌapꞌɨa pꞌira–idaa beerã; netuara kꞌapꞌɨade merãtɨa beerã; wawa beerã; kꞌapꞌɨa chiwa beerã. Ma kꞌayaa jõmaweda Jesupa jɨpapachi.

25Eperãarã chokꞌara iru ome nipapachida: Galilea eujãdepemaarã; Decápolis eujãdepemaarã; Jerusalén pꞌuurudepemaarã, awaraa Judea eujãdepemaarã ome mãikꞌaapa Jordán to akꞌõrejĩru uchiapari eerepemaarã.

Currently Selected:

Mateo 4: sjaB

Highlight

Copy