Mateo 3

Juan Bautistapa jarateeda

(Marcos 1.1-8; Lucas 3.1-9, 15-17; Juan 1.19-28)

1Ma tꞌẽepai eperã tꞌɨ̃jarapatapꞌedaa Juan Bautista#3.1 Griego pedeede: Juan, chi eperãarã poro choopari. Tachi Akꞌõrepa jara pëida jara cheji Judea eujãde, eujã pania wẽe bɨmãi. 2Mãgaji:

—¡Pꞌekꞌau kꞌachia oo amáatɨ mãikꞌaapa Tachi Akꞌõrede ijãapatáatɨ! Taarã–e nɨde Tachi Akꞌõrepa eperãarã pꞌe bɨitꞌeeda aji, ichi jua ekꞌari, ichideerã pꞌaneedamerã.

3Chonaarãweda Tachi Akꞌõre pedee jarapari Isaíapa jaraji:

‘Eujã pania wẽe bɨde eperã bia bɨ: “O pi–ia oopatakꞌa poro waibɨa chei naaweda, mãga pɨkꞌa pꞌekꞌau kꞌachia oo amáatɨ Tachi Waibɨa chei naaweda.” ’ (Isaías 40.3)

4Mãgɨ́ eperã Juan paji. Pꞌaru camello kꞌaradee kꞌada jɨ̃pachi. Chi kꞌɨrrɨde jɨ̃pari ne–edee ooda paji. Kꞌopachi sisi mãikꞌaapa topachi jɨrrɨ miéle. 5Eperãarã Jerusalén pꞌuurude pꞌanadapꞌedaarã awaraa Judea eujãdepemaarã ome mãikꞌaapa Jordán to kꞌaitꞌa pꞌanadapꞌedaarã ome chejida Juan pedee ũride. 6Tachi Akꞌõremaa chupɨria iidi chejida ãchia pꞌekꞌau kꞌachia oopatapꞌedaa kꞌaurepa. Mãpai Juanpa ãchi poro choo wãpachi Jordán to jãde.

7Fariseorã saduceorã ome chokꞌara ichiaba chejida Juanmaa poro choopide. Mamĩda Juanpa mãgaji:

—¡Parã kꞌachia–idaa beerãdeepa uchiadapꞌedaarã! ¡Taamákꞌapɨ pꞌanɨ! ¿Poro choopi chejida–ekꞌã Tachi Akꞌõre juapa mia kꞌiniada–e pꞌanadairã? 8Mãga pɨrã, pꞌekꞌau kꞌachia oo amáatɨ mãikꞌaapa pꞌanapatáatɨ Tachi Akꞌõrepa kꞌinia bɨkꞌa. 9Kꞌĩsianáatɨ Tachi Akꞌõrepa parãta miapi–e paitꞌee Abrahamdeepa uchiadapꞌedaa perã. Mɨa jara bɨ: Na mãudeepa Tachi Akꞌõrepa Abrahamdeepa uchiadapꞌedaarã oo atai. 10Ara chaarapa nejõ bɨɨrɨ chaukꞌaa bɨ tꞌu peetꞌaapatakꞌa tꞌɨpɨtaude batꞌatꞌaadaitꞌee paa jõmerã, mãga pɨkꞌa taarã–e Tachi Akꞌõrepa jõpiitꞌee parã, chi oodaamaa pꞌanapataarã irua kꞌinia bɨkꞌa. 11Mɨa parã poro choopari paniapa, akꞌɨpidamerã pãchia pꞌekꞌau kꞌachia oopata oodaamaa pꞌanɨ mãikꞌaapa wãara Tachi Akꞌõrede ijãa pꞌanɨ. Mamĩda eperã mɨ tꞌẽe cheru mɨ kꞌãyaara waibɨara bɨ. Mɨa iru chancla ateeikꞌaraa bɨ, mɨ iru kꞌãyaara ekꞌariara bairã. Irua eperãarã nãgá poro chooitꞌee. Tachi Akꞌõre Jaure ba chepiitꞌee parã kꞌapꞌɨade. Mamĩda ichide ijãadakꞌaa beerã tꞌɨpɨtaude jõpiitꞌee. 12Ooitꞌee trigo ewaparipa ooparikꞌa. Mãgɨpa pala aneekꞌãri, trigo ewada ɨtꞌaa jira batꞌapari chi tau uchiamerã mãikꞌaapa nãupa chi e ãyaa ateemerã. Maapꞌeda ma trigo tau ɨa bɨpari chi ɨapatamãi. Mamĩda chi e beeda tꞌɨpɨtaude batꞌatꞌaapari. Mãgɨ́ tꞌɨpɨtau kꞌĩikꞌaada aji.

Jesús poro chooda

(Marcos 1.9-11; Lucas 3.21-22)

13Maapai Jesús wãji Galilea eujãdeepa Jordán todee, Juan badamaa poro choopide. 14Ewaa weda Juanpa iru poro choo–e paitꞌee paji. Mapa mãgaji:

—Pɨata mɨ poro chooipia bɨ. ¿Sãapꞌeda mɨmaa cheruma aji, pɨ poro choopide?

15Mamĩda Jesupa pꞌanauji:

—Mɨ poro choopáde aji, Tachi Akꞌõrepa jara bɨkꞌa uchiamerã.

Mãpai Juanpa poro chooji. 16Poro choopꞌeda, Jesús toiduupa uchiakꞌãri, pajã ewadachi mãikꞌaapa irua unuji Tachi Akꞌõre Jaure ichi ɨ̃rɨ palomakꞌa baai cheru. 17Mãpai ũriji ɨtꞌariipa nãga pedeeru:

—Nata mɨ Warra kꞌinia. Irua mɨ tꞌãri o–ĩapipari.

Currently Selected:

Mateo 3: sjaB

Highlight

Copy