Genesis 7
7
1Nakwas di dat kanan nan apo ken Noe, “Id wani et songgep kayo ay sinbaey isnan bapol ta adi kayo katey tay getkek ay kedkedengka is mang-ik-ikkan is osto isnan batawa. 2Omisgepka is sin-as-awa isnan am-in ay matmatago ay inbagak en adi kaisda ngem sinpipto ay sin-as-awa isnan am-in ay mabalin ay maisda ya nan igasingyo ken sak-en 3ya nan am-in ay klasin di koyat. Ikkam na tasiyay am-in ay matmatago et adida katey nodi omad-adoda kasin isnan batawa. 4Adi pay isnan pito ay agew daket palayogen nan odan et men-od-od-odan is epatpoo ay agew ya labi tasiyay malimon am-in ay matmatago ay binoliwko.” 5Dat ikkan Noe nan am-in ay inbilin nan apo ken siya.
6Si Noe et enem gasot nan tew-ena isdin napsongan nan batawa. 7Si Noe ya nan asawana, nan an-akna ya nan as-awada et sinonggepda isnan bapol tasiyay adida malimon. 8Nan sin-as-awa isnan am-in ay matmatago 9et nakisgepda gedan ken Noe isnan bapol ay kaneg san inbagan Apo Dios. 10Nakwas pay nan pito ay agew dat domateng et nan layos.
Nan Napsongan Nan Batawa
7:11-24
11Isdin maikasimpoo ya pito ay agew isnan maikadwa ay bowan isdin kaenem gasot nan tew-en Noe et siya san ninlogyan nan layos. Binmala nan danom isnan kabalabalaan dapay beksen nan daya nan odana 12et nin-od-od-odan is epatpoo ay agew ya labi. 13Issan deey ay agew et nakasgep et isnan bapol da Noe ay sin-asawa ya nan an-akda ay lalaki ay da Sem, Ham yas Jafet ya nan as-awada. 14Nakisgep gedan ken daida nan am-in ay menkodkodong, mendad-aan ya mentaytayaw ay amo ya atap, dadake ya teteen. 15Nasin-as-awada am-in ay matmatago ay nakisgep ken Noe isnan bapol 16ay kaneg san inbagan Apo Dios. Dat emban nan apo nan bapol.
17-19Dat men-od-od-odan is epatpoo ay agew. Dat omad-adaem nan danom et mendaan san bapol. Inmadaadaem et linas-okana nan kaaatakdagan ay bilbilig 20dat kayet ngomatngatngato nan danom engganay limay depa nan nanglas-okana isnan bilbilig 21et nalimon am-in ay wada isnan batawa et nateyda. 22Owen, am-in ay men-ang-anges et nateyda 23tay naengew am-in ay matatago ay ipogaw, animal ya koykoyat et kedeng si Noe ya nan nakisgep ken siya isnan bapol is nabay-an. 24Nan danom et egay nakeskesayan engganay nakwas nan sin-gasot ya limampoo ay agew.
Currently Selected:
Genesis 7: xnn
Highlight
Share
Copy
Want to have your highlights saved across all your devices? Sign up or sign in
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.
