Genesis 8
8
Nan Sinmaldengan Nan Layos
8:1-22
1Ngem egay kalingkingan Apo Dios da Noe ya nan am-in ay naikawit ken daida isnan bapol isonga inbilina en mendagem dat logyan nan danom ay gomwab 2tay inpasaldengna nan odan ya nan bomalbala ay danom isnan batawa. 3Naegew dat omat-at-atik nan danom isnan nakwasan san sin-gasot ya limampoo ay agew. 4Issan maikasimpoo ya pito ay agew issan maikapito ay bowan dat pomatong nan bapol isnan bilig ay Ararat. 5Dat omat-at-atik nan danom et issan damo ay agew issan maikasimpoo ay bowan dat maila et nan odon di bilbilig.
6Nallos pay nan epatpoo ay agew dat tokaban Noe nan esay tawan san bapol 7et patayawena nan esay gayang. Dat adi mensagong ay aped mentaytaytayaw engganay natdok nan danom. 8Dat kasin patayawen Noe nan kalapati ta ilaena no inmat-atik nan danom 9ngem gapo tay nalilimon kayet nan lota isnan danom et maid datngan san kalapati is ompaana dat somagong kasin issan bapol dat pasgepen Noe. 10Sin-edna is pito ay agew pay danat kasin patayawen san kalapati. 11Dat somagong issan labi et wada nan tinotopkayana ay tobon di kaiw ay olibo isonga gintek Noe ay inmatiatik nan danom tay tinmobo kasin nan kaiw. 12Danat sed-en kasin is pito ay agew danat patayawen kasin. Dat egay ninsagong.
13Issan damo ay agew di damo ay bowan isdin kaenem gasot ya esa ay tew-en Noe, nan natdokan san danom. Dat kaanen Noe nan atep nan bapol et ilaena ay naango et nan lota. 14Et issan maikadowampoo ya pito ay agew issan maikadwa ay bowan et namagaan et nan lota. 15Dat kanan Apo Dios ken Noe, 16“Bomala kayo ay sin-asawa, nan an-akyo ya nan as-awada. 17Pabalaenyo gedan daida am-in ay wada isnan bapol tasiyay omad-adoda et maiwakatda isnan batawa.” 18Dat bomala da Noe ay sin-asawa, nan an-akda ya nan as-awada. 19Am-in san wada isdi ay mendad-aan, menkodkodong ya mentaytayaw et nabob-owegda ay nasin-as-awa ay binmala gedan.
20Idi binmalada dat men-ala si Noe is bato et itopingna is mangpop-oowana isnan igasingda ken Apo Dios dat omala is tonggal esa isnan am-in ay animal ya koyat ay mabalin ay maisda ya maigasing ken Apo Dios danat paltiyen et poowana enggana ay dinmapo. 21Nan songsong nan mapoowan ay maigasing ken Apo Dios et laylaydena danat kanan isnan nemnemna, “Adiyak kasin eng-engewen nan batawa gapo isnan ik-ikkan nan ipogaw tay getkek ay ngawi ay sigod nan nemnemda. Adiyak gedan eng-engewen nan am-in ay matmatago ay kaneg nan inikkak. 22Basta mawawada nan batawa et wada nan timpo ay pinag-esek ya pinag-apit. Mawawada gedan nan tedek ya poos, tiyagew ya pinag-odan ya kag-aw ya labi.”
Currently Selected:
Genesis 8: xnn
Highlight
Share
Copy
Want to have your highlights saved across all your devices? Sign up or sign in
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.
