Genesis 6
6
Si Noe
6:5—7:10
5Idi inilan nan apo ay nginmawi am-in nan ik-ikkan nan ipogaw isnan batawa ya ngawi et kedeng nan nenemnemenda 6dat ninbabawi isnan nangsapowana ken daida. Dadama nan sakit di nemnemna 7isonga danat kanan, “Awnitak engewen am-in nan ipogaw ay binoliwko, nan animalis ya nan koykoyat gedan tay menbabawiyak ay nangboliw ken daida.”
8Ngem wada nan esay ipogaw ay laylayden nan apo et siya si Noe. 9Gawis nan ogalina et kedkedeng siya is gawis ay ipogaw issan timpona tay tongtongpalena si Apo Dios. 10Tolo nan an-ak Noe ay lalalaki ay da Sem, Ham ya si Jafet.
11-12Ngem am-in ay ipogaw isnan kailiili et ngawida isnan pangiilaan Apo Dios tay ngawi am-in nan ogalida et maiwed olay esa is gawis di ik-ikkana nodi kedeng si Noe. 13Isonga kinwanin Apo Dios ken siya, “Ninemnemko ay engewek am-in ay ipogaw isnan batawa. Owen, engewek am-in ay wada tay napno nan batawa isnan ngawi ay ik-ikkanda. 14Ngem sik-a Noe et mensapoka is dakedake ay bapol ay kaiw ay kaneg kahon tasiyay adi kayo malimon ay sinbaey. Nan bapol ay awnitmo sapowen et masapol ay pakpakam is niket nan leemna ya nan deyana tasiyay adi makasgep nan danom. 15Nan lokodna et siyampoo ay depa nan kaan-andona, simpoo ya limay depa nan kaan-annawana ya siyam ay depa nan kaat-atakdagna. 16Mensapoka is atepna ngem taynam nan doway dangan is menbaetan nan atepna ya nan awakna. Sapowem is tolo ay galado dakat kok-owaltowen dakat isapowan is segpana.
17Masapol ay mensapoka is bapol tay awnitak posongen nan batawa ta malimon am-in ay matatago. Matey am-in ay wada isnan batawa 18ngem isapatak ken sik-a en isalakanko dakayo. Isonga awnit kayo songgep isnan bapol, dakayo ay sin-asawa, nan an-akmo ya nan as-awada. 19Omisgepka is sin-as-awa isnan am-in ay matmatago tasiyay adida matey. 20Tay awnit omey ken sik-a nan sagdodwa isnan am-in ay menkiwkiwi isnan batawa ay nan mendaan, nan mentayaw ya nan menkodong ta adida matey. 21Omisgepka gedan is am-in ay makan ay masapolyo.” 22Dat tongpalen Noe nan am-in ay inbilin Apo Dios.
Currently Selected:
Genesis 6: xnn
Highlight
Share
Copy
Want to have your highlights saved across all your devices? Sign up or sign in
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.