MATIUS 26

Tong kelunan ja'au pitah jalan ke' réh mematai Yésus

(Mrk. 14:1-2, Luk. 22:1-2, Yoh. 11:45-53)

1La'ah la'o Yésus nebaraa' réh Iah pané ngan irah bakéh néh, ka' ha' néh, 2Duah dau la'ah pu'un Dau Ja'au Paska, ngan tovoo' Dau Ja'au inah pu'un kelunan mena' Anak Kelunan ngan réh ke' réh mematai éh tong kayeu' salib, ha' néh.

3La'ah irah pengejau'au imam ngan irah pengeja'au kelunan Yahudi, petipun tong lamin Kayapas éh Imam éh pengeja'au kekat imam. 4Irah pakat ke' réh ngamit Yésus selem-selem ngan mematai éh. 5Ka' ha' irah ja'au nah, Mai lu' mematai éh sioo' Dau Ja'au inah dai kelunan pinaa' betéé' pekayau, ha' réh.

Tong redo éh mujek anyuu' éh jian ba'oo' tong Yésus

(Mrk. 14:3-9, Yoh. 12:1-8)

6La'ah hun Yésus pu'un tong leboo' Betania tong lamin Simon éh kelunan kapéé' rai, 7tuai jah redo mihin jah gutun anyuu' éh ma'an melih, ngan pu'un éh mujek anyuu' inah tong ulun Yésus lem néh mokoo' kuman sinah. 8La'ah irah bakéh Yésus nah na'at éh maneu' kenat, merek réh ngan néh. Ka' ha' réh, Kineu' éh maneu' kenat, darih awah éh neu' néh kenat nah ne'. 9Hun néh melih anyuu' inah, kuraa'-kuraa' kekat rigit nena' réh tong néh, hun néh melih éh, rigit éh nalaa' néh tong néh omok tam mena' éh ngan kelunan kari kepéh, ha' réh.

10Yésus jam kekat ha' réh pané kenat, boh éh bara' ngan réh, ka' ha' néh, Mai keh petusah redo inah, jian mu'un penganeu' néh ngan Ké'. 11Kelunan kari adang réh ngelayau pu'un ngan keh, omok keh nolong réh. Bang Akeu', bé' Ku' ngelayau pu'un ngan keh kenat. 12Redo inah pu'un éh pika Akeu', inah iah mujek anyuu' inah tong usah Ké' barei' petenup usah Ké' tong dau Ké' tenanem réh. 13Akeu' bara' mu'un ngan keh, semah-semah irah bara' rengah jian pah tipo tana', adang réh pu'un bara' tong penganeu' redo inah dokoo' petesen kenin réh tong penganeu' néh éh jian nah, ha' Yésus ngan réh.

Tong Yudas pitah jalan ke' néh memalo Yésus

(Mrk. 14:10-11, Luk. 22:3-6)

14La'o inah Yudas Iskariot, éh jah usah jin belah irah bakéh Yésus éh jah poloo' duah usah nah, tavin irah pengeja'au imam. 15Ka' ha' néh ngan réh, Hun ké' mena' Yésus ngan keh, ineu' nena' keh ngan ké' kepéh, ha' néh. Inah irah purung teleu' poloo' rigit pirek ke' réh mena' éh ngan néh. 16Jin la'o inah Yudas pitah jalan hun mah éh omok mena' Yésus ngan réh.

Tong Yésus kuman pemung ngan irah bakéh néh tong dau Paska

(Mrk. 14:12-21, Luk. 22:7-14, 21:23, Yoh. 13:21-30)

17Avéé' tong Dau Ja'au Roti éh bé' pu'un tawan pekevat, tuai irah bakéh Yésus neteng éh, ha' réh, Lamin mah éh jalan tam petenup ka'an kinan tam tong Dau Ja'au iteu', ha' réh.

18Ha' Yésus mipa réh, Jian keh tai leboo' inah ngan bara' ngan jah kelunan sinah, ka' ha' Guru, jaka' Ké' lepah avéé', améé'-teleu' bakéh ké' juk maneu' Dau Ja'au nah tong lamin ko', kenat ha' keh pané ngan néh, ha' Yésus nah.

19Boh irah bakéh néh tai ngan petenup ka'an kinan réh tong Dau Ja'au Paska.

20Hun dau tahup Yésus pemung ngan irah bakéh néh mokoo' kuman sinah. 21Tovoo' réh kuman ha' Yésus ngan réh, Akeu' bara' ngan ka'ah, pu'un jah usah jin belah ka'ah juk memalo Akeu', ha' néh.

22Mujah kenin irah bakéh néh, siget-siget usah réh neteng éh, ha' réh, séé' éh Tuhan, séé' juk maneu' kenat, kineu', akeu' éh, ha' réh mujah seruh.

23Ha' Yésus mipa ha' réh, éh petovoo' tilan roti lem pigan ngan Ké' iah néh éh memalo Akeu'. Ha' Néh. 24Adang Anak Kelunan pu'un penatai réh pekua' barei' ha' lem surat Allah bara' éh, bang tusah mu'un-mu'un ngan kelunan éh memalo Anak Kelunan ke' réh mematai éh. Pelapah jian hun kelunan inah pohoo' néh bé' pu'un tong tana', ha' néh.

25Boh Yudas éh memalo éh pané, ha' néh, O Guru, séé' éh, bé' éh akeu', ha' néh. Ha' Yésus ngan néh, Pekua' ha' ko' nah néh éh ha' éh.

Tong penguman sohoo' Tuhan

(Mrk. 14:22-26, Luk. 22:15-20, 1 Kor. 11:23-25)

26Tovoo' réh kuman Yésus alaa' roti ngan sebayang bara' jian kenin ngan Allah, boh éh mutip éh ke' néh mena' éh ngan irah bakéh néh. Ha' néh, Jian keh alaa' iteu' ngan kuman éh, iteu' néh seleket usah Ké', ha' néh.

27Boh éh alaa' sawan baa' buaa' agun ngan sebayang bara' jian kenin ngan Allah, boh éh mena' éh ngan réh kepéh. Ha' Yésus ngan réh, Jian kekat ka'ah béé mesep éh, ha' néh. 28Iteu' néh seleket dahaa' Ké', inah éh maneu' jajii' Allah pu'un petem, iteu' éh dahaa' Ké' éh pega' dokoo' Ké' bet penyala' kelunan pinaa'. 29Akeu' bara' ngan keh, jin la'o iteu' bé' ku' mesep baa' buaa' agun kepéh, pah avéé' ké' mesep éh maréng pemung ngan ka'ah tong tana' éh maréng éh lem nihau Tamen Ké', ha' néh.

30Boh réh nyanyi, la'o réh nyanyi tai réh tong tokong Saitun.

Tong Yésus bara' Péterus juk ngaken bara' bé' iah jam Yésus

(Mrk. 14:27-31, Luk. 22:31-34, Yoh. 13:36-38)

31Ha' Yésus ngan réh kepéh, Sioo' merem iteu' kekat ka'ah pu'un kelap ngan bet Akeu', barei' ha' lem surat Allah pu'un bara', ka' éh, Allah mematai Gembala domba, boh kekat domba nah purat awah. 32Bang la'o Ké' betéé' murip kepéh, pu'un Ku' tai Galilia saa' tenah jin ka'ah ha' néh.

33Boh Péterus mipa éh, Na' péh kekat irah éh jah bet ka'au' dat, bé' akeu' bet Ke', ha' néh.

34Ha' Yésus ngan Péterus, Akeu' bara' ngan ko', bé' jak iap sakui ngelangéé' merem da'ap da', pu'un ke' ngaken teleu' koléé' bara' ke' bé' jam Akeu', ha' néh.

35Ha' Péterus kepéh, matek bé' éh kenat, na' péh irah mematai ku', bé' mu'un ku' pu'un bara' bé' ku' jam ka'au', ha' néh. Kenat péh kekat ha' irah bakéh néh.

Tong Yésus sebayang tong pulah Getsemani

(Mrk. 14:32-42, Luk. 22:39-46)

36La'o inah tai Yésus pemung ngan irah bakéh néh tong pulah Getsemani, boh éh pané ngan réh. Ka' ha' néh, Jian keh mokoo' siteu' kelebéé' Ké' tai sebayang sinah da', ha' néh. 37Boh éh mihin Péterus, ngan Yakub ngan Yohanes éh anak Sabedeus pemung ngan néh. Besau kenin Néh, pua mu'un-mu'un kenin néh, 38ka' ha' néh ngan réh, Juk matai Ku' neu' kebesau kenin Ké', jian keteleu' mokoo' siteu' ngan mavaa', ha' néh ngan réh.

39Tai éh juu' si'ik jin irah, mohong éh tong tana' ngan sebayang, ka' ha' néh, O Amam, hun néh omok mai ke' buhaa' pengeketa iteu' teneng tong Akeu', bang jian Ke' kivu pengeloo' Ko', mai ke' kivu kenin ké' awah, ha' néh.

40La'o néh sebayang, tai éh tavin réh teleu' bakéh néh kepéh, pegen réh. Boh éh pané ngan Péterus, ha' néh, Kineu' keteleu' pegen kenat? Kineu', bé' keh omok ngeretep sapét jah jam kei, ha' néh. 41Nerepan keh ngan sebayang, dai keh teneng tong tenupat Sitan. Kenin keh keloo' keh maneu' jian, bang usah keh lemoo' awah, ha' néh.

42Tai Yésus kepéh sebayang tong keruwah koléé' néh, ka' ha' néh, O Amam, hun néh tekep pengeketa iteu' teneng tong Akeu', jian ke' kivu pengeloo' ko' awah, ha' néh. 43Boh éh tai tavin réh teleu' inah kepéh ngan na'at réh teleu' pegen kiri' ke' keto, bé' omok to'ot.

44Boh Yésus tai sebayang tong keteleu' koléé' néh, pekua' barei' ha' néh bu'un ri'. 45La'o inah Iah tavin réh teleu' bakéh néh kepéh, ka' ha' néh ngan réh, Kineu' keh, pegen keto keh kei? To'ot keh hun iteu', jaka' réh juk mena' Anak Kelunan lem kamit kelunan penyala' lepah avéé'. 46Betéé' keh, inah savéé' kelunan éh memalo Akeu', ha' néh ngan réh.

Tong réh ngamit Yésus

(Mrk. 14:43-50, Luk. 22:47-53, Yoh. 18:3-12)

47Lem Yésus to pané ngan irah éh bakéh néh, inah savéé' Yudas, éh jah usah jin belah irah bakéh néh éh jah poloo' duah usah nah. Pinaa' kelunan éh jah pemung ngan néh, ketem po'é ngan pipok, kelunan éh senohoo' irah pengeja'au imam ngan irah pengeja'au kelunan Yahudi. 48Kelunan éh memalo Yésus nah, pu'un éh lepah bara' ngan irah pinaa' nah ka', Kelunan éh narek ké' da', inah kelunan éh penitah keh nah. Jian keh ngamit éh ngan mihin éh ketai, ha' néh.

49La'ah tuai Yudas avéé' tong Yésus iah tioo bara' ka', Tabi' Guru, ha' néh. Boh Yudas marek éh.

50Ha' Yésus ngan néh, Rigah ke' bakéh, ha' néh.

Boh réh ngamit Yésus ngan mengen éh gahang. 51Pu'un jah usah ngan Yésus sinah, inah éh tioo menat po'é néh ke' néh mesap kelingen jah kelunan éh ripen Imam éh pengeja'au kekat imam. 52Boh Yésus bara' ngan néh, ha' néh, Jian ke' modoo' po'é ko' nah, séé'-séé' éh ngelawan palaa' po'é, palaa' po'é ke' réh mematai éh. 53Kineu', bé' keh jam hun Ké' keloo' omok Ku' nyohoo' Tamen Ké' nolong Akeu'. Hun Ké' nyohoo' éh kenat, adang Néh tioo nyohoo' kuraa'-kuraa' ibu meliket néh tuai mavaa' Ku'. 54Bang hun Ké' nyohoo' éh kenat, bé' Ku' omok pesukup ha' lem surat Allah éh bara' tong kekat penganeu' réh tong Akeu', ha' néh.

55 # Luk. 19:47, 21:37 Boh Yésus pané ngan irah pinaa' nah, ka' ha' néh, Kineu' ka'ah tuai ketem po'é ngan pipok, barei' keh juk ngamit kelunan éh maneu' sa'at mu'un? Siget dau Akeu' pu'un ngan keh tong Umaa' Allah ngan nebaraa' keh, bé' keh ngamit Akeu'. 56Bang kekat éh neu' keh teu' pu'un éh kenat dokoo' pepoléng kekat éh benara' irah nabi lem surat réh, pu'un éh teneng kenat mu'un, ha' néh. Boh kekat bakéh néh bet éh tengéé' ke' réh kelap.

Tong Yésus saa' tenah Komiti sebayang Yahudi

(Mrk. 14:53-65, Luk. 22:54-55,63-71, Yoh. 18:13-14,19-24)

57La'ah pu'un réh mihin Yésus tai lamin Kayapas éh Imam éh pengeja'au kekat imam. Kekat irah guru éh nebaraa' tong sohoo' lem Surat Musa ngan kekat irah éh pengeja'au kelunan Yahudi, petipun béé-béé sinah. 58La'ah Péterus kivu Yésus jin juu', tai éh masek saa' usit lamin Kayapas nah. Sinah Péterus tai pemung ngan kelunan éh mavaa' lamin mokoo' éh pemung ngan réh sinah ke' néh jam kineu' ayoo' penganeu' réh Yésus nah. 59Kekat pengeja'au imam ngan irah pengeja'au jin Komiti sebayang Yahudi, pitah aken ke' réh pesala' Yésus ngan ngukum éh matai, 60bang na' péh pu'un kelunan pané pesala' éh bang ha' réh kenyo awah, bé' pu'un ineu'-ineu' sala' néh ke' réh omok maneu' éh. La'o inah pu'un duah usah tuai 61#Yoh. 2:19 bara' ka', Pu'un mé' menéng ha' kelunan iteu' rai bara' iah juk mikah Umaa' Allah ngan petekedéng éh kepéh teleu' dau la'o inah, ha' roh.

62La'ah Imam éh pengeja'au kekat imam, nekedéng ke' néh pané ngan Yésus, ka' ha' néh, Kineu' ke', bé' ke' keloo' bara' ineu'-ineu' mipa ha' réh tong jalan réh maneu' ke' nah, ha' néh. 63Bang Yésus mokoo' kelem awah, bé' Iah pané ineu'-ineu' péh. Jah koléé' kepéh Imam éh pengeja'au kekat imam nah neteng éh, ha' néh, Dalem ngaran Allah éh murip, akeu' nyohoo' ke' bara' mu'un hun ko' Kristus, Anak Allah, ha' néh.

64 # Dan. 7:13 Ha' Yésus mipa éh, Kenat néh éh. Bang inah Akeu' bara' ngan kekat ka'ah béé, jin la'o iteu' ka'ah pu'un na'at Anak Kelunan mokoo' saa' na'au' Allah éh Ja'au Penyukat ngan na'at éh kepéh hun néh tuai lem avun jin seruga, ha' néh.

65Merek mu'un Imam éh pengeja'au kekat imam nah menéng ha' néh pané kenat, pelapah iah mejéé' pakai néh, ha' néh Iah, pu'un pesalut Allah, bé' tiken ke' lu' menéng ha' kelunan éh jah kepéh bara' tong kesa'at néh, uleu' tengéé' péh lepah menéng kekat ha' néh éh sa'at inah. 66#Ima. 24:16 Kineu' éh, sala' éh, kineu', teneng éh. Boh irah bara', Adang néh sala' mu'un, ngukum éh matai de' ke', ha' réh.

67 # Yes. 50:6 La'ah irah nyula' Yésus ngan mipok éh, irah éh tepap éh pané ka', 68O Kristus, jian ke' bara' séé' éh mipok ke' nah, ha' réh peja' éh.

Tong Péterus ngaken bara' bé' iah jam Yésus

(Mrk. 14:66-72, Luk. 22:56-62, Yoh. 18:15-18,25-27)

69La'ah Péterus pu'un mokoo' keto tong lamin réh. Tuai jah redo kelunan éh sohoo' Kayapas éh Imam éh pengeja'au kekat imam nah, ka' ha' redo inah ngan Péterus, ka'au' péh pu'un kivu Yésus éh kelunan jin Galilia rai de', ha' néh.

70Boh Péterus ngaken, ha' néh, Bé' akeu' nesen éh kunah ko' nah, ha' néh. 71Péterus tioo piso jin réh tai mokoo' tong awaa'. Tuai jah redo kepéh éh bara' Péterus nah ngan irah lakei' éh mokoo' sinah, ka' ha' néh, Adang lakei' inah pu'un pemung ngan Yésus éh jin Nasaret rai, ha' néh.

72Jah koléé' kepéh Péterus ngaken bara' bé' éh kenat. Ka' ha' néh kepéh, Akeu' bara' mu'un, bé' akeu' jam lakei' inah, ha' néh.

73Bé' lebéé' la'o inah irah lakei' éh nekedéng sinah bara' ngan Péterus, Adang ka'au' pu'un pemung ngan réh irai, ha' ané ko' pekua' ha' irah jin Galilia, inah améé' jam ka'au' pu'un pemung ngan néh, ha' réh.

74Boh Péterus pané ngan pesupa, ka' ha' néh, Hun ké' kenyo jian Allah ngukum ku', bé' mu'un akeu' jam kelunan inah, ha' néh.

Pelapah pu'un iap ngelangéé', 75boh Péterus seruh kepéh tong ha' Yésus ngan néh rai, Bé' jak iap sakui ngelangéé', pu'un ke' ngaken teleu' koléé' bara' ke' bé' jam Akeu', ha' néh. Pelapah Péterus musit jin sinah ngan mangaa' mu'un-mu'un.

Currently Selected:

MATIUS 26: PNT

Highlight

Copy