MATIUS 27

Tong réh mihin Yésus tai saa' jumen Pilatus

(Mrk. 15:1, Luk. 23:1-2, Yoh. 18:28-32)

1La'ah bé' jak dau peka rema, kekat pengeja'au imam ngan irah pengeja'au kelunan Yahudi, biau-biau petipun ngan pakat tong jalan réh omok mematai Yésus. 2Pu'un réh ngejeret Yésus palaa' latai ngan mihin éh ke' réh mena' éh ngan Pilatus éh pengeja'au réh tong tana' inah.

Tong pematai Yudas

(Peng. 1:18-19)

3La'ah Yudas, kelunan éh memalo Yésus nah, hun néh jam irah pu'un ngukum Yésus matai, pekawaa' kenin néh, inah iah mihin rigit pirek éh teleu' poloo' nah éh nena' irah pengeja'au imam ngan pengeja'au kelunan Yahudi. 4Ka' ha' néh, Ja'au mu'un sala' ké' uban ké' memalo kelunan inah ke' néh kenukum keh matai, bé' iah pu'un maneu' ineu'-ineu' kesa'at, ha' néh.

Ha' réh mipa éh, inah Sala' koo' ke', bé' améé' seruh tong inah, ha' réh.

5Boh Yudas bet kekat rigit inah tong jalan réh modoo' rigit tong Umaa' Allah ke' néh tai ngelabak batok néh ke' néh mematai usah néh tengéé'.

6Boh irah pengeja'au imam alaa' rigit inah ngan bara', ka' ha' réh, Rigit iteu' belih dahaa' jah kelunan, Surat Musa éh kenivu lu' bé' éh kejeraa' lu' alaa' éh tong Umaa' Allah, ha' réh. 7La'o réh pané seruh kineu' jalan réh pakai rigit inah, tai réh melih tana' palaa' rigit inah, tana' ngaran néh, Tana' Kuren tana', irah melih tana' inah dokoo' réh nanem patai kelunan éh tengéé' pohoo' jin pohoo' Yahudi. 8#Peng. 1:18-19 Avéé' dau iteu' kelunan mateng ngaran tana' inah, Tana' Dahaa'.

9Neu' réh maneu' kenat inah éh pesukup ha' éh benara' nabi Yéremia, ka' ha' néh, Pu'un réh alaa' rigit pirek teleu' poloo' éh rigit palaa' irah Israel melih Yésus, 10#Sak. 11:12-13 ngan pu'un réh pakai rigit inah melih tana' kelunan éh suai kuren tana', pekua' éh sohoo' Tuhan ngan ké', ha' Yéremia.

Tong Pilatus petuneng Yésus

(Mrk. 15:2-5, Luk. 23:3-5, Yoh. 18:33-38)

11La'ah hun Yésus nekedéng tong jumen Pilatus nah, ka' ha' néh neteng Yésus, Kineu' ke', ka'au' Raja' pohoo' Yahudi, ha' néh.

Ha' Yésus mipa éh, Kenat néh' éh, ha' néh. 12Bang bé' Yésus pané bara' ineu'-ineu' mipa ha' irah pengeja'au imam, kenat péh tong ha' irah pengeja'au kelunan Yahudi éh pesala' éh nah.

13Boh Pilatus bara' ngan néh, ha' néh, Kineu' ke', bé' ke' menéng kekat ha' réh pané maneu' ke' nah, ha' néh.

14Bang bé' Yésus pané bara' ineu'-ineu' péh, béé kenin Pilatus.

Tong réh ngukum Yésus matai

(Mrk. 15:6-15, Luk. 23:13-25, Yoh. 18:39—19:16)

15La'ah siget-siget ta'un tovoo' irah Yahudi maneu' Dau Ja'au Paska, malai pengeja'au peritah ngelepu jah kelunan jin lamin tutup, séé'-séé' awah éh keneloo' réh. 16La'ah pu'un jah kelunan tong lamin tutup ngaran néh Barabas, kekat kelunan jam kelunan inah sa'at mu'un. 17Hun kelunan pinaa' petipun, boh Pilatus neteng réh, séé' éh ké' ngelepu kunah ka'ah? Kineu', Barabas nah, kineu', Yésus Kristus, séé' éh keneloo' keh, ha' néh. 18Kejam néh irah mena' Yésus ngan néh uban réh sakit kenin.

19La'ah tovoo' Pilatus mokoo' tong lamin besara', pu'un redo néh maneu' surat bara' ngan néh, Mai ke' maneu' ineu'-ineu' tong kelunan inah, bé' pu'un sala' néh, malem rai keta mu'un-mu'un ku' neu' nyupin ké' tong néh, ha' néh.

20Bang irah pengeja'au imam ngan irah pengeja'au kelunan Yahudi, petena' irah pinaa' nah nyohoo' Pilatus ngelepu Barabas ngan mematai Yésus nah. 21Bang ha' lakei' ja'au Pilatus nah neteng réh, séé' jin belah rawah éh keneloo' keh pelepu, ha' néh.

Barabas, ha' réh.

22Ha' Pilatus kepéh, Hun ké' ngelepu Barabas, kineu' penganeu' ké' Yésus éh nateng réh Kristus nah, ha' néh.

Ha' irah pinaa' mipa éh, Nyalib éh tong kayeu' salib, ha' réh.

23Ha' Pilatus kepéh, Bang ineu' kesa'at néh, ha' néh.

Irah tioo ngeradau, ja'au ha', Nyalib éh tong salib, ha' réh.

24 # Ula. 21:6-9 Hun Pilatus jam kenin réh kenat, medai éh pané kepéh dai réh betéé' kenin ngan pekayau. Laa' néh baa' ke' néh pohéé' ojoo' néh tong jumen réh béé, ka' ha' néh, Bé' éh akeu' tagong ukum néh iteu', ka'ah éh tagong éh, ha' néh.

25Ha' irah pinaa' nah mipa ha' néh, Hun mé' sala' ngukum éh, jian ukum inah teneng tong améé' ngan tong anak mé', ha' réh.

26Boh Pilatus ngelepu Barabas ngan nyohoo' kelunan mipok Yésus ngan mena' éh ngan réh ke' réh nyalib éh tong kayeu' salib.

Tong irah seradu peja' Yésus

(Mrk. 15:16-20, Yoh. 19:2-3)

27La'ah irah seradu mihin Yésus tai tong lamin Pilatus, ngan kelunan pinaa' tai tutuh néh. 28Irah seradu mega' pakai Yésus ngan pekerayung éh palaa' kerayung éh bala rep-rep. 29La'ah irah ngeleleng inan suha' ke' réh pepekah éh tong ulun néh, ngan irah mena' sekot tong ojoo' néh saa' na'au', boh réh ngejekuu' lep réh tong jumen néh ke' réh peja' éh, Tabi' raja' kelunan Yahudi, ha' réh peja' éh. 30Boh réh nyula' éh, ngan alaa' sekot nah ke' réh mipok éh tong ulun néh. 31La'o réh peja' éh, irah mega' kerayung néh bala rep-rep nah ke' réh mena' pakai nah ke' ngan néh, ngan irah mihin éh musit tai retek réh nyalib éh tong kayeu' salib.

Tong réh mematai Yésus tong kayeu' salib

(Mrk. 15:21-32, Luk. 23:26-43, Yoh. 19:17-27)

32Tovoo' réh lakau nah, inah irah selalang ngan jah Lakei' jin tana' Kirene, ngaran néh Simon, inah irah nyohoo' éh nyu'un kayeu' salib Yésus nah. 33Avéé' réh tong retek tana' éh ngaran néh Golgota, éh sin néh, Retek Tulang Ulun. 34#Msm. 69:22 La'ah irah mena' baa' agun éh pekulup ngan tawan éh petuh ngan néh, bang hun Yésus mesep éh si'ik awah, bé' Iah keloo' mesep éh kepéh.

35 # Msm. 22:19 La'ah irah seradu Rum nyalib éh tong kayeu' salib, ngan irah petulat pakai Yésus belah irah ke', inah irah nyunga' lubun ke' réh omok jam séé' omok alaa' éh. 36La'o inah mokoo' réh mavaa' Yésus nah. 37Tong saa' bau ulun Yésus, irah memaku' surat ha' réh pesala' Yésus nah, ka' ha' surat inah, Iteu' néh Yésus, Raja' kelunan Yahudi, ha' surat inah. 38Boh réh alaa' duah usah kelunan éh maneu' sa'at ke' réh memaku' roh tong salib pemung ngan Yésus, jah saa' kabéng néh, jah saa' na'au' néh.

39 # Msm. 22:8 Kelunan pinaa' éh lapah sinah gilei' réh na'at éh barei' réh pika éh, bang bé' réh pika éh, bang réh peja' éh, 40#Mat. 26:61, Yoh. 2:19 ka' ha' réh, Pu'un ke' bara' ke' juk mikah Umaa' Allah rai ngan petekedéng éh kepéh lem teleu' dau awah. Hun ko' Anak Tuhan mu'un, jian ke' purip usah ko' ngan tuhun jin kayeu' salib nah, ha' réh.

41Barei' inah kepéh ha' irah pengeja'au imam ngan ha' irah guru éh nebaraa' tong sohoo' lem Surat Musa, ngan irah pengeja'au kelunan Yahudi peja' éh. 42Ka' ha' réh, Pu'un iah purip irah éh jah rai de' bang bé' iah omok purip usah néh tengéé'. Kineu', iah éh raja' pohoo' Israel kei? Hun néh tuhun jin kayeu' salib nah boh mé' omok ngelan éh. 43#Msm. 22:9 Pu'un iah bara' iah ngelan tong Allah ngan iah éh Anak Allah, hun néh kenat mu'un, jian tam mena na'at Allah purip éh, ha' réh.

44Avéé' rawah éh senalib réh pemung ngan Yésus nah pané kenat peja' éh.

Tong pematai Yésus

(Mrk. 15:33-41, Luk. 23:44-49, Yoh. 19:28-30)

45La'ah tovoo' dau pejek pelapah merem barei' lepok merem rai pah tipo tana', bé' pu'un ada maten dau avéé' dau kuba'. 46#Msm. 22:2 Hun dau kuba' nah, Yésus pané ngan ja'au ha', ka' ha' néh, Eli, Eli, lama sabakhtani, ha' néh. Sin tong ha' néh kenat, O Allah Ké', Allah Ké', kineu' Ke' bet Akeu', ha' néh.

47Jelua' irah kelunan éh pu'un sinah éh menéng ha' néh kenat boh réh bara', Eii, inah iah tebai Elia, ha' réh. 48#Msm. 69:22 Pelapah jah usah alaa' lamut ke' néh maneu' éh lem baa' agun ngan maneu' éh tong tapak kayeu' ke' néh nyohoo' Yésus météé' éh.

49Bang ha' irah éh jah nah pané ngan néh, Mokoo' jak tam, barang Elia juk tuai alaa' éh jin salib da', ha' réh.

50La'ah ngeradau Yésus kepéh, ja'au ha' néh, tioo laset néh béé.

51 # Kel. 26:31-33 Livah éh neu' réh tapé tong Umaa' Allah, pelapah pejéé' kua' ke ja'au, jin bau pah avéé' ra'. La'ah pu'un tegen tana' avéé' bateu' ja'au bila', 52pinaa' tanem kelunan matai pu'un pukap, ngan pinaa' kelunan éh anah Tuhan éh lepah matai, pu'un betéé' murip kepéh. 53Betéé' réh jin patai réh, ngan la'o Yésus betéé' murip kepéh, irah éh lepah murip nah lakau tai leboo' Yérusalem, sinah réh ta'an kelunan pinaa'.

54La'ah pengeja'au seradu ngan irah seradu éh mavaa' Yésus, hun réh jam tegen tana' ngan bateu' ja'au bila' ngan kekat éh jah nah, medai mu'un-mu'un réh. Ka' ha' réh, Adang néh Anak Allah mu'un, ha' réh.

55La'ah pu'un kuraa' redo sinah éh na'at éh jin juu' si'ik, inah éh irah redo éh kivu Yésus jin Galilia ngan éh nolong éh lepah nah. 56#Luk. 8:2-3 Pemung ngan irah redo inah pu'un Meriam Magdalena, ngan Meriam éh tinen Yakub ngan Yusup, ngan tinen rawah lakei' éh anak Sabedeus.

Tong réh modoo' patai Yésus

(Mrk. 15:42-47, Luk. 23:50-56, Yoh. 19:38-42)

57La'ah avéé' dau tahup tuai jah kelunan éh kaya' jin leboo' Arimatia, ngaran néh Yusup. Iah péh jah bakéh Yésus nah. 58Tai éh tavin Pilatus ke' néh menyat éh kejeraa' éh alaa' patai Yésus. Boh Pilatus nyohoo' irah seradu mena' patai Yésus ngan néh. 59La'o Yusup alaa' patai nah iah mutup éh lem livah kapan éh maréng, 60ngan iah modoo' éh lem luvang tanem bateu', éh luvang tanem inah neu' néh ke' réh juk modoo' patai nah ke' lem néh. La'o inah iah ngeluvit jah bateu' ja'au matep ubaa' luvang inah boh éh lakau. 61La'ah Meriam Magdalena ngan Meriam éh jah nah mokoo' sinah na'at tanem inah.

Tong Kelunan éh mavaa' tanem jalan réh modoo' Yésus

62Jah dau la'o inah, éh tong dau posot, irah pengeja'au imam ngan irah Parisi tavin Pilatus ke' réh bara' ngan néh, 63#Mat. 16:21, 17:23, 20:19, Mrk. 8:31, 9:31, 10:33-34, Luk. 9:22, 18:31-33 ka' ha' réh, O lakei' ja'au, tesen mé' tong ha' lakei' éh kenyo nah hun néh murip keto rai de', ka' ha' néh, La'o teleu' dau Allah juk purip ku' kepéh, ha' néh, ha' réh ngan Pilatus. 64Ha' réh kepéh, Uban néh kenat jian ke' nyohoo' kelunan mavaa' tanem nah jian-jian avéé' teleu' dau, dai irah bakéh néh tai alaa' patai néh ngan bara' ngan irah pinaa', Allah éh pebetéé' éh jin patai néh. Hun réh pané kenat kenyo, pelapah sa'at éh jin kesa'at néh éh bu'un nah, ha' réh.

65Ha' Pilatus mipa ha' réh, Hun keh juk alaa' seradu mavaa' éh, keh alaa' éh ngan maneu' éh reken mu'un ke' kelunan bé' omok alaa' patai néh, ha' néh.

66Tai réh maneu' tada' tong bateu' éh palaa' réh nutup ubaa' luvang nah ngan nyohoo' irah seradu nah mavaa' éh mu'un-mu'un.

Currently Selected:

MATIUS 27: PNT

Highlight

Copy