MATIUS 25

Ha' tapan tong jah poloo' redo lemanai

1 # Luk. 12:35 La'ah tong jaka' Tuhan Allah Pengeja'au, pu'un éh barei' ha' tapan iteu'. Pu'un jah poloo' redo lemanai éh alaa' pelita' réh, ke' réh juk tai temeu' ngan lakei' éh juk kawin. 2Pu'un lemah usah éh, bé' jam seruh, pu'un lemah usah kepéh éh jam seruh. 3Irah éh bé' jam seruh nah, laa' réh pelita' réh, bang bé' réh mihin nyak lem jalan éh jah kepéh. 4La'ah irah éh jam seruh nah, nihin réh pelita' réh ngan nihin réh nyak kepéh lem jalan éh jah. 5La'ah lakei' éh juk kawin nah, lieu' avéé', ngan irah redo nah nuro' réh, pegen réh mena éh tuai.

6Tovoo' lepok merem ka' ha' jui kelunan, Inah savéé' lakei' éh juk kawin. Tuai tam tai temeu' ngan néh, ha' néh. 7Boh irah redo éh jah poloo' usah nah petenup pelita' réh. 8Boh irah éh bé' jam seruh pané ngan irah éh jam seruh, ka' ha' réh, Jian keh mena' nyak ngan améé' uban pelita' mé' juk pata', ha' réh. 9Ha' irah éh jam seruh mipa réh, Bé' mé' omok mena' nyak ngan keh, bé' pu'un sukup. Jian keh tai jalan pebelih alaa' nyak sukup ngan ka'ah, ha' réh. 10La'ah tai réh, kelebéé' réh tai nah, inah savéé' lakei' éh juk kawin nah. La'ah irah redo éh lemah usah éh lepah petenup nah, pu'un réh kivu éh tai tong penguman ja'au, boh réh tutup usit lamin inah.

11La'o inah kepéh tuai irah redo éh jah nah. Ka' ha' réh, O lakei' ja'au, O lakei' ja'au, Jian ke' mukap tapé ngan améé' ha' réh. 12#Luk. 13:25 La'ah ha' néh mipa réh, bé' akeu' jam ka'ah, ha' néh.

13La'ah ha' Yésus, Mavaa' keh jian-jian uban bé' keh jam dau ngan jaka' hun mah Akeu' juk tuai kepéh ha' néh.

Ha' tapan tong teleu' usah kelunan sohoo'

(Luk. 19:11-27)

14Ha' Yésus kepéh, Tong savéé' Ké' tuai kepéh, pu'un éh barei' ha' tapan tong kelunan éh lakau juu'. Bé' jak éh peleka lakau, iah tebai kekat kelunan sohoo' néh ngan nyohoo' réh mihau lamin néh. 15Iah mena' kereja' ngan réh pekua' éh omok neu' réh. Iah mena' lemah ibu rigit mas ngan jah usah, tong éh jah kepéh iah mena' duah ibu rigit mas, ngan tong éh jah kepéh iah mena' jah ibu rigit mas. Boh éh lakau. 16La'ah kelunan sohoo' éh alaa' lemah ibu rigit mas nah, tioo tai éh mena' rigit inah ngan irah éh jah éh omok pakai éh ke' réh omok mena' éh kekat rigit inah kepéh, ngan mena' éh lemah ibu rigit mas kepéh bau inah uban réh pakai rigit néh inah. 17Kenat péh éh neu' kelunan éh alaa' duah ibu rigit mas, iah mena' rigit inah ngan irah éh jah ke' néh omok alaa' duah ibu rigit mas bau inah kepéh. 18Bang kelunan sohoo' éh alaa' jah ibu rigit mas nah, bé' iah pakai rigit inah, iah nyakun tana' ke' néh melim rigit nah lem néh, ha' néh.

19Ha' Yésus kepéh, Lebéé' mu'un pengeja'au réh lakau boh éh moléé' tai lamin néh kepéh tebai réh teleu' kelunan sohoo' nah. 20Kelunan éh lepah alaa' lemah ibu rigit mas nah, tuai éh tavin pengeja'au néh ke' néh mena' lemah ibu rigit mas nah ngan néh. Ka' ha' néh ngan pengeja'au néh, Inah lemah ibu rigit mas éh nena' ko' ngan ké' lepah rai, ngan inah lemah ibu rigit mas kepéh éh bau néh, ha' néh. 21Ha' pengeja'au néh mipa éh, Jian mu'un éh kenat, tigéh mu'un ke' lem kekat kereja' ko' éh ni'an nah, inah akeu' juk mena' kereja' kepéh ngan ko'. Tuai ke' alaa' kemurung pemung ngan ké', ha' néh.

22La'o inah masek kepéh kelunan sohoo' éh alaa' duah ibu rigit mas nah. Ka' ha' néh, Inah duah ibu rigit mas éh nena' ko' ngan ké' lepah rai, inah duah ibu rigit mas kepéh éh bau néh, ha' néh. 23Ha' pengeja'au néh mipa éh, Jian mu'un éh kenat, tigéh mu'un ke' lem kekat kereja' ko'. Uban ko' tigéh lem kekat kereja' ko' éh ni'an nah, inah akeu' juk mena' kereja' kepéh ngan ko'. Tuai ke' alaa' kemurung pemung ngan ké', ha' néh.

24Masek kepéh kelunan sohoo' éh alaa' jah ibu rigit mas nah. Ka' ha' néh, O lakei' ja'au, akeu' jam ka'au' kelunan éh bé' jam pika, pu'un ke' alaa' buaa' jin térék éh bé' tenérék ko', ngan éh bé' nulah ko'. 25Medai akeu' pakai rigit éh nena' ko' nah, inah akeu' modoo' éh ngan melim éh dai néh metat awah, siteu' kekat néh nodoo' ké', ha' néh.

26Ka' ha' pengeja'au néh mipa éh, Sa'at ka'au', leko ke' kereja'. Pu'un ke' seruh akeu' alaa' buaa' jin térék éh bé' tenérék ké' ngan éh bé' nulah ké', 27hun ko' jam éh kenat, kineu' ke' bé' modoo' rigit ké' inah ngan kelunan éh jam pakai éh ke' néh omok vat ngan pinaa' kepéh, ha' néh. 28Boh lakei' ja'au nah nyohoo' irah alaa' rigit mas inah jin iah ngan mena' éh ngan kelunan éh pu'un alaa' jah poloo' ibu rigit mas nah. 29#Mat. 13:12, Mrk. 4:25, Luk. 8:18 Uban siget kelunan éh pu'un, omok éh alaa' éh kepéh avéé' néh pu'un mutaa', bang kelunan éh bé' pu'un anah nah, ke ja'au éh pu'un tong iah, inah ke' éh juk nalaa' réh jin iah kepéh. 30#Luk. 19:11-27 #Mat. 8:12, 22:13, Luk. 13:28 Bang tong kelunan sohoo' ké' iteu', bé' iah jam maneu' ineu'-ineu', jian keh bet éh tong merem, sinah retek iah pu'un mangaa' ngan keta mu'un-mu'un, ha' néh.

Tong jalan Tuhan ngukum kelunan tovoo' ga' tana'

31 # Mat. 16:27, 19:28 Ha' Yésus kepéh, Hun Anak Kelunan tuai Raja' pemung ngan meliket Allah, boh Iah menyun tong nyun raja' dokoo' néh ngukum kekat kelunan. 32Kekat kelunan pah tipo tana' pu'un petipun tong jumen Néh, boh Iah petengéé' réh barei' kelunan éh mihau domba petengéé' domba jin mék. 33Kekat domba Néh omok éh tai saa' na'au' néh, kekat mék tai saa' kabéng néh. 34La'ah Raja' juk pané ngan irah éh saa' na'au' néh, ka' ha' néh da', Ka'ah éh pu'un alaa' urip pelinguh jin Tamen Ké', tuai keh. Tuai ka'ah éh kevéléé' Tamen Ké' dokoo' keh alaa' pengejian néh. Tuai keh, hun iteu' Iah juk maneu' keh pengeja'au tong kuraa' tana' éh petenup néh ngan keh jin bu'un néh suai tana' iteu' sahau. 35Uban hun Ké' pu'un la'au', pu'un keh mena' ka'an ngan Ké'. Hun Ké' mapeu' batok, pu'un keh mena' baa' ngan Ké'. Hun Ké' mujah kenin mokoo' tengéé', pu'un keh alaa' Ku' tong lamin keh. 36Hun Ké' bé' pu'un pakai sukup, pu'un keh mena' pakai Ké'. Hun Ké' pu'un sakit, pu'un keh mihau ku'. Hun Ké' pu'un tong lamin tutup, pu'un keh tuai nepah Ku'. Kenat ha' ké' ngan réh da'. 37La'ah tovoo' ké' pané kenat, boh kelunan éh teneng kenin juk mipa ha' Ké' kepéh, ka', O Tuhan, hun mah mé' na'at Ke' la'au' ke' mé' pakan Ke', ngan na'at Ke' mapeu' batok ke' mé' mena' baa' ngan Ko'? 38Hun mah mé' na'at Ke' mujah kenin mokoo' tengéé' ke' mé' alaa' ke' tong lamin mé'? Hun mah mé' na'at ke' bé' pu'un pakai ke' mé' mena' pakai Ko'. 39Hun mah mé' na'at ke' sakit, ngan na'at ke' tong lamin tutup ke' mé' tai nepah ke'? Kenat ha' réh juk mipa ha' ké' da'. 40Boh Raja' juk mipa ha' réh kepéh, ka', Akeu' bara' ngan keh, siget-siget koléé' hun keh nolong irah éh padéé' ké' iteu', na' péh réh si'ik mu'un, inah seleket keh nolong usah ké' mu'un. Kenat ha' ké' ngan réh, ha' Yésus nah.

41Ha' Yésus kepéh, La'o Raja' pané kenat ngan irah éh saa' na'au' néh nah, boh éh juk pané ngan irah éh saa' kabéng néh kepéh. Ka' ha' néh ngan réh da', Kelap keh jin akeu' ka'ah éh kenukum Allah. Tai keh tong luten meraka éh petenup neu' Tuhan ngan Sitan ngan kekat meliket néh. 42Uban hun ké' pu'un la'au', bé' keh pakan ku', hun ké' mapeu' batok, bé' keh mena' baa' ngan ké'. 43Hun ké' mujah kenin mokoo' tengéé', bé' keh alaa' akeu' tong lamin keh. Hun ké' bé' pu'un pakai, bé' keh mena' pakai ké'. Hun ké' pu'un sakit ngan pu'un tong lamin tutup, bé' keh tuai mihau akeu'. Kenat ha' ké' ngan réh da'. 44Boh irah juk mipa ha' ké' ka', O Tuhan, hun mah mé' na'at ke' la'au' ngan mapeu' batok, ngan mujah kenin mokoo' tengéé', ngan na'at ke' bé' pu'un pakai, ngan na'at ke' sakit ngan tong lamin tutup ke' mé' bé' nolong ke'? 45Boh ku' juk mipa ha' réh kepéh, Akeu' bara' ngan keh, siget koléé' keh bé' nolong irah éh padéé' ké' iteu', na' péh réh si'ik mu'un, inah seleket keh bé' nolong usah ké'. 46La'ah irah éh bé' nolong nah, teneng ukum pelinguh, ngan irah éh kivu pengeloo' Allah, pu'un réh alaa' urip éh pelinguh, ha' néh.

Currently Selected:

MATIUS 25: PNT

Highlight

Copy