MATIUS 24

Tong Yésus bara' tong pengebéé Umaa' Allah

(Mrk. 13:1-2, Luk. 21:5-6)

1Hun Yésus lakau jin Umaa' Allah nah, irah bakéh néh tavin éh ke' réh nojoo' kekat bateu' ngan kekat éh jah éh palaa' réh suai umaa' inah ke' néh pu'un jian. 2Ha' Yésus ngan réh, Jian keh na'at kekat inah, uban Akeu' bara' ngan keh, pu'un jah dau kepéh temurei' bé' pu'un jah-jah bateu' péh petevan sinah la'ah, adang kekat bateu' nah guram awah, ha' néh.

Tong penusah ngan pengeketa

(Mrk. 13:3-13, Luk. 21:7-19)

3La'ah hun Yésus mokoo' tengéé' tong tokong Saitun, pu'un irah bakéh néh neteng éh, Kineu' kelebéé' ke' néh pu'un kenat da'? Kineu' jalan mé' omok jam éh jaka' Guru juk tuai kepéh, kineu' jalan mé' omok jam pengega' tana' nah, ha' réh.

4Ha' Yésus mipa réh, Mavaa' keh jian-jian dai kelunan petawang keh. 5Pinaa' kelunan éh juk tuai lem ngaran Ké' éh bara' ka', Akeu' néh éh Kristus, ha' réh. Neu' ha' réh pané kenat inah réh ngelavo' kuraa'-kuraa' kelunan. 6Adang keh pu'un menéng rengah kelunan pekayau, pu'un éh kenat belah keh siteu', kenat péh tong irah tong tana' éh juu' péh. Bang menéng keh, hun néh pu'un kenat, mai keh pua kenin. Adang kekat éh inah juk avéé' tenah, bang bé' jak éh inah éh ga' néh. 7Adang jah arong kelunan juk tai ngayau jah arong kelunan kepéh, irah éh lem nihau jah peritah juk tai pekayau ngan irah éh lem nihau peritah éh jah. La'ah tong kuraa' tana' pu'un la'au' éh ja'au mu'un ngan tegen tana' péh. 8Kekat éh kenat inah éh barei' kesakit redo teka néh juk nganak, pu'un éh sakit juk nganak, bang bé' jak anak néh pelohoo', ha' néh.

9 # Mat. 10:22 Ha' Yésus kepéh, La'ah tovoo' inah péh pu'un kelunan ngamit keh ngan mena' keh ngan irah éh jah ke' réh ngukum keh, jelua' keh penatai réh. Kekat kelunan leko keh uban keh ngelan tong Akeu'. 10La'ah tovoo' inah pinaa' kelunan éh bé' petem pengelan réh. Pu'un réh penalo réh ngan ngeleko kelunan. 11Tovoo' inah pinaa' nabi éh kenyo juk tuai éh ngelavo' kelunan, éh bara' iah sohoo' Tuhan, bang bé' réh sohoo' Tuhan. Inah irah petawang kelunan pinaa'. 12Kekat kesa'at tai vat-vat pah avéé' penika lem kenin kelunan tai mabah awah ngan bé' pu'un pengelan. 13#Mat. 10:22 Bang séé'-séé' éh ngeretep pah avéé' ga' néh iah omok alaa' urip. 14La'ah Rengah Jian iteu' éh bara' tong jalan Allah juk tuai Pengeja'au ngan mihau kekat kelunan, pu'un éh benara' réh pah tipo tana' dokoo' kekat kelunan omok jam éh, boh éh pengega' tana', ha' néh.

Tong Yésus bara' tong pengebéé leboo' Yérusalem

(Mrk. 13:14-23, Luk. 21:20-24)

15 # Dan. 9:27, 11:31, 12:11 Ha' Yésus kepéh, Éh keleko keh mu'un éh benara' Daniel sahau, adang keh na'at éh nekedéng tong tana' keh éh ni'ai nah. Jian kelunan éh purung surat iteu' nesen tong ha' ké' inah. La'ah hun keh na'at iah éh keleko keh nah, 16jian kekat kelunan éh mokoo' tong tana' Yudea kelap tai tokong. 17La'ah kelunan éh pu'un mokoo' tong patah, mai éh masek tong lamin néh kepéh ke' néh alaa' livah néh, kelap awah ke'. 18#Luk. 17:31 Kelunan éh pu'un tong térék néh, mai éh moléé' tai lamin néh ke' néh alaa' pakai néh. 19Hun kekat penusah inah pu'un avéé', pika mu'un irah redo éh nemaléé' ngan irah éh pu'un anak si'ik. 20Jian keh sebayang menyat Tuhan pika keh dokoo' mai pu'un penusah inah teneng tong keh sioo' laséh éh genin ngan tong Dau keh Posot. 21#Dan. 12:1, Pol. 7:14 Uban kekat penusah inah adang néh pelapah ja'au jin kekat penusah éh pu'un tong tana' jin lepah, inah éh jin bu'un Tuhan suai tana' iteu' pah avéé' hun iteu', bé' éh pu'un kenat. Adang néh bé' pu'un kenat kepéh vam. 22Hun Allah bé' ngeti'eng penusah inah, bé' pu'un séé'-séé' éh omok murip. Bang uban Iah pika irah éh kevéléé' néh, bé' penusah inah pu'un avéé' lebéé' mu'un, ha' néh.

23Ha' Yésus kepéh, La'ah hun pu'un kelunan bara' ka' ngan keh, Iteu' savéé' Kristus, ngan Sinah Kristus pu'un. Hun réh pané kenat mai keh ngelan ha' réh. 24Uban pu'un kuraa'-kuraa' kelunan juk tuai éh bara' éh Kristus, bang bé' éh kenat. Kenat péh tong kelunan éh nabi, adang pu'un kuraa'-kuraa' usah réh éh bara' réh nabi Tuhan, bang bé' éh kenat. Kenat péh omok réh maneu' kuraa' telana' éh tejeu' éh ngebéé kenin kelunan ke' réh ngelavo' kelunan éh kevéléé' Allah. 25Menéng keh ngan mihau keh tong ha' Ké' inah, pu'un Ku' bara' éh ngan ka'ah hun néh to bé' jak pu'un, ha' néh.

26Ha' Yésus kepéh, La'ah hun pu'un kelunan bara' Pengaren pu'un tong ahang tana', mai keh tai ahang tana' dokoo' pitah éh sinah. La'ah hun réh bara' ka', Sinah iah kelim, mai keh ngelan ha' réh kenat. 27#Luk. 17:23-24 Uban barei' kelat kela'ap tioo poléng tong langit jin usit maten dau avéé' tai oléé' néh, kenat péh savéé' Anak Kelunan kepéh, ha' néh.

28 # Luk. 17:37 Ha' néh kepéh, Semah-semah buaa' nonok, sinah ke' juhit si'ik pah avéé' belengang péh, ha' Yésus ngan réh.

Tong savéé' Yésus kepéh

(Mrk. 13:24-27, Luk. 21:25-28)

29 # Yes. 13:10, 34:4, Yeh. 32:7, Yol. 2:10,31, 3:15, Pol. 6:12-13 Ha' Yésus kepéh, La'o kekat penusah inah, bé' pu'un ada maten dau, kenat péh laséh, kekat kenyuhai pu'un pelohoo' jin langit, ngan kekat-kekat éh jah tong langit pu'un piso jin retek néh bu'un. 30#Dan. 7:13, Sak. 12:10-14, Pol. 1:7 Boh telana' tong Anak Kelunan juk tuai nah, pu'un tong langit. Boh kekat pohoo' kelunan tong tana' pu'un mangaa' besau, pu'un réh na'at Anak Kelunan tuai lem avun dalem kekat penyukat ngan néh kepéh. 31Tovoo' inah ja'au ha' serupit, ngan pu'un Anak Kelunan nyohoo' meliket Néh tai avéé' tong kekat tana' ke' réh tipun kelunan éh anah Allah jin semah-semah pah tipo tana', ha' néh.

Ha' tapan tong jah inan buaa' ara

(Mrk. 13:28-31, Luk. 21:29-33)

32Ha' Yésus kepéh, Jian keh seruh tong ha' tapan tong inan buaa' ara. Hun keh na'at éh ngelerong adang keh jam bé' lebéé' la'ah da', adang néh bu'an. 33Barei' inah péh hun keh na'at kekat penusah inah, jian keh nesen jaka' Tuhan juk tuai kepéh lepah danii'. 34Akeu' bara' mu'un ngan keh, Kekat éh benara' ké' iteu', adang néh pu'un kenat sioo' urip kelunan Yahudi éh murip hun iteu'. 35Langit ngan tana' juk salai béé, bang kekat ha' tebaraa' ké' pu'un éh pelinguh, ha' néh.

Bé' pu'un séé' éh jam jaka' Tuhan juk tuai kepéh

(Mrk. 13:32-37, Luk. 17:26-30,34-36)

36Ha' Yésus kepéh, Tong dau Ké' tuai kepéh, bé' pu'un séé'-séé' péh éh jam éh, meliket tong seruga péh bé' jam éh, usah ké' tengéé' péh bé' jam éh, Tamen ké' awah éh jam éh. 37#Kej. 6:5-8 Tovoo' Anak Kelunan tuai kepéh pu'un éh barei' hun Noh murip tong tana' sahau. 38Tovoo' Noh maneu' kapen nah, irah pinaa' kuman ngan mesep, ngan kawin telalau awah, pah avéé' dau Noh masek lem kapen. 39Bé' irah nesen éh, bé' irah jam seruh, pah avéé' baa' pu'un ja'au ngan irah béé matai menyet neu' baa' inah. Barei' inah péh hun Anak Kelunan pu'un tuai, 40duah lakei' pata kereja' tong térék, jah usah nalaa' ké', jah usah nebet Ké'. 41Kenat péh duah redo muja' parai, jah usah nalaa' Ké' jah usah nebet Ké'. 42Mavaa' keh jian-jian uban bé' keh jam hun mah Tuhan keh pu'un tuai kepéh. 43Mihau keh, hun pengeja'au lamin jam jaka' kelunan nekau juk tuai tong lamin néh, bé' iah pegen, adang néh to'ot, dokoo' kelunan nekau nah bé' omok tai lem lamin néh. 44#Luk. 12:39-40 Uban néh kenat jian keh ngelayau petenup uban adang Anak Kelunan pu'un tuai tovoo' keh bé' seruh éh tuai, ha' néh.

Tong kelunan sohoo' éh tigéh, ngan jah kepéh éh bé' tigéh

(Luk. 12:41-48)

45Ha' Yésus kepéh, Belah kekat kelunan sohoo', séé' éh tigéh ngan jam seruh maneu' kekat kereja' néh. Inah éh kelunan sohoo' éh kevéléé' pengeja'au néh ke' néh omok mihau kelunan sohoo' éh jah, ngan mena' penguman ngan réh tong jaka' réh kuman. 46Murung kenin kelunan sohoo' nah uban hun pengeja'au néh moléé' ngan jam iah petem maneu' kekat kereja' éh sohoo' néh nah, 47pu'un pengeja'au néh sepah éh, ngan iah nyohoo' éh mihau kekat livah tong lamin néh kepéh. 48Bang hun kelunan sohoo' inah seruh pengeja'au néh lebéé' mu'un lakau ngan bé' laho moléé', 49bé' iah kivu sohoo' pengeja'au néh, tai éh mipok irah pata kelunan sohoo' nah, ngan kuman, ngan mesep pemung ngan irah éh mavuk, ngan telalau awah. 50La'ah lem néh to marut ngan telalau kenat pengeja'au néh pu'un moléé'. 51Boh pengeja'au néh ngukum éh matai, inah ukum néh pekua' ukum éh teneng tong irah éh ngelayoo' awah kivu sohoo' pengeja'au réh. Tong Sinah éh mangaa' ngan keta mu'un-mu'un ha' néh.

Currently Selected:

MATIUS 24: PNT

Highlight

Copy