MATIUS 23

Tong Yésus nyohoo' réh mavaa' dai irah guru éh nebaraa' tong Surat Musa ngan irah Parisi péh ngelavo' réh

(Mrk. 12:38-39, Luk. 11:43-46, 20:45-46)

1La'ah Yésus pané kepéh ngan irah pinaa' ngan irah bakéh néh, ka' ha' néh ngan réh, 2Irah guru éh nebaraa' tong sohoo' lem Surat Musa ngan irah Parisi péh, jam réh bara' tong kekat sohoo' Tuhan lem Surat Musa. 3Uban néh kenat jian keh mihau ngan kivu kekat ha' tebaraa' réh, bang mai keh kivu barék réh uban bé' irah maneu' pekua' éh sohoo' réh ngan irah éh jah. 4Uban kekat sohoo' réh tong Dau Posot éh bara', mai maneu' barei' iteu' ngan barei' inah, neu' ha' réh kenat inah irah seleket pebii' irah éh jah tong livah éh bahat, bang bé' irah nolong réh bii' éh. 5#Mat. 6:1, Bil. 15:38, Ula. 6:8 Kekat penganeu' réh pu'un éh neu' réh dokoo' kelunan omok na'at réh ngan mejing réh awah. Pekah ngan jong éh penakai réh jalan ayat surat Tuhan, pu'un réh maneu' éh ja'au. Inah kepéh, pu'un réh maneu' tapak seput réh pepurai kebit mu'un. Irah maneu' éh kenat dokoo' irah éh jah ngajung réh. 6La'ah hun réh tai penguman ja'au ngan tong lamin sebayang Yahudi, keloo' réh menyun retek réh poléng ta'an kelunan pinaa'. 7Hun réh tai lamin pebelih keloo' mu'un réh menéng ha' kelunan ngajung réh ngan mateng réh, Guru. 8Bang mai éh ka'ah ke' keloo' kelunan ngajung keh ngan mateng keh, Guru, uban ka'ah béé pepadéé' dalem Tuhan ngan jah awah Guru keh. 9Mai keh bara' kelunan tong tana' éh Tamen keh, uban jah awah Tamen keh, inah éh Iah éh tong seruga. 10Kenat péh mai keh kejeraa' réh bara' keh Pengajak, uban jah awah Pengajak keh, inah éh Kristus. 11#Mat. 20:26-27, Mrk. 9:35, 10:43-44, Luk. 22:26 Séé'-séé' éh ja'au belah ka'ah, tekep iah ngerera' kivu sohoo' keh awah. 12#Luk. 14:11, 18:14 Séé'-séé' éh ngajung usah néh tengéé', Tuhan ngera' éh kepéh, séé'-séé' éh ngediva' kenin néh, Tuhan ngajung iah kepéh, ha' Yésus ngan réh.

Yésus maneu' irah Parisi ngan irah Saduki

(Mrk. 12:40, Luk. 11:39-42,44,52)

13La'ah ha' Yésus maneu' irah Parisi, ka' ha' néh, Pika ka'ah guru éh nebaraa' tong sohoo' lem Surat Musa, kenat péh ngan ka'ah éh kivu adet Parisi, adang keh pu'un tusah mu'un uban keh ngelayoo' awah sebayang. Inah kepéh, hun kelunan éh jah pitah jalan juk alaa' Allah Pengeja'au réh, ka'ah pu'un mapat jalan réh. Usah keh tengéé' bé' keloo' tai lem nihau Allah, hun irah éh jah juk tai, pu'un keh meta' réh, ha' néh.

14Ha' néh kepéh, Pika ka'ah guru éh nebaraa' tong sohoo' lem Surat Musa, kenat péh ngan ka'ah éh kivu adet Parisi, adang keh pu'un tusah mu'un uban keh ngelayoo' awah sebayang. Inah kepéh, pu'un keh ngebuyuk irah redo baleu' ngan alaa' kekat livah réh awah, boh keh sebayang ngan kebit ha', bang ngelayoo' awah keh sebayang. Uban keh maneu' kenat ukum keh vam pelapah bahat jin ukum irah éh jah, ha' Yésus.

15Ha' néh kepéh, Pika ka'ah guru éh nebaraa' tong sohoo' lem Surat Musa, kenat péh ngan ka'ah éh kivu adet Parisi, adang keh pu'un tusah mu'un uban keh ngelayoo' awah sebayang. Inah kepéh, pu'un keh lakau juu' jalan baa' banget, kenat péh jalan tana', dokoo' keh tai kuraa'-kuraa' tana' bara' ha' tebaraa' keh ngan irah éh jah. Ngan hun réh masek tong adet keh, mekat mu'un-mu'un réh kivu éh. Neu' keh maneu' kenat, inah keh maneu' lem kenin réh pelapah merem ngan sa'at mu'un, inah jalan keh mihin réh tai tong luten meraka, ha' néh.

16Ha' Yésus kepéh, Pika ka'ah éh peseu' éh majak kelunan éh jah. Pu'un keh nebaraa' réh, ka', Hun kelunan maneu' jajii' ineu'-ineu' ngan pesupa tong Umaa' Allah, hun néh keloo' bet jajii' inah omok éh bet éh awah, bang hun néh pesupa tong kekat mas éh tong Umaa' Allah nah, bé' éh omok bet jajii' néh inah, adang néh kivu éh, kenat ha' keh nebaraa' réh. 17O kelunan palui, peseu' maten keh, éh mah éh pelapah jian, mas éh tong Umaa' Allah nah, kineu', Umaa' Allah éh jalan kelunan modoo' kekat mas nah? 18Inah kepéh, pu'un keh nebaraa' réh ka', Hun kelunan maneu' jajii' ngan pesupa tong jalan réh motong ka'an ngan Tuhan, omok éh bet éh awah, bang hun néh pesupa tong ka'an éh penatai réh tong jalan inah, bé' éh omok bet jajii' néh inah, kenat ha' keh. 19Peseu' mu'un ka'ah. Éh mah éh pelapah jian, ka'an éh penatai réh nah, kineu', jalan néh notong réh nah? 20Hun pu'un kelunan éh pesupa tong jalan réh motong ka'an inah, bé' éh pesupa tong jalan inah awah, bang avéé' tong ka'an éh notong réh nah ke' éh. 21Kenat péh hun pu'un kelunan pesupa tong Umaa' Allah, inah éh seleket réh pesupa tong jumen Allah mu'un ke' éh. 22#Yes. 66:1, Mat. 5:34 Ngan hun pu'un kelunan pesupa tong seruga, seleket réh pesupa tong retek Allah pu'un kenat péh avéé' tong usah Allah ke' éh, ha' néh.

23 # Ima. 27:30 Tusah mu'un ngan ka'ah guru éh nebaraa' tong Sohoo' lem Surat Musa ngan ka'ah kelunan Parisi. Uban keh ngelayoo' awah sebayang. Ka'ah Mena' tulat poloo' pah avéé' kekat arong éh kenelet keh ngan ba'an barei. Selasih ngan kekat éh siik kenat ngan Allah. Bang bé' ka'ah kivu ha' Sohoo' lem Surat Musa éh pu'un gunah mu'un inah éh Pengeteneng Penika ngan pengetigéh kekat inah tekep keh maneu' éh ngan Mai ngelepan kekat tebaraa' éh jah kepéh. 24O kekat pengeja'au éh peseu' maten, langau lem baa' nesep keh, ka'ah bet éh, bang unta lem baa' nesep keh, ka'ah nyeloo' éh.

25Ha' Yésus kepéh, Pika ka'ah guru éh nebaraa' tong sohoo' lem Surat Musa, kenat péh ngan ka'ah éh kivu adet Parisi, adang keh pu'un tusah mu'un uban keh ngelayoo' awah sebayang. Inah kepéh, pinaa' adet keh pohéé' likot sawan ngan pigan, bang lem néh pu'un kekat arong éh nalaa' keh jin keh ngebuyuk kelunan ngan nyelepéé' kenin péh. 26O kelunan Parisi éh peseu' maten, jian keh pohéé' lem sawan keh tenah, boh likot néh péh mebéng kepéh, ha' néh.

27 # Peng. 23:3 Ha' Yésus kepéh, Pika ka'ah guru éh nebaraa' tong sohoo' lem Surat Musa, kenat péh ngan ka'ah éh kivu adet Parisi, adang keh pu'un tusah mu'un uban keh ngelayoo' awah sebayang. Ka'ah barei' jalan réh modoo' patai awah, pu'un réh ngemebéng éh ke' néh jian layan, bang lem néh tulang kelunan matai ngan kekat éh borok awah. 28Kenat keh ne', hun kelunan na'at keh, pu'un réh seruh keh kelunan éh maneu' pengeloo' Allah, bang lem kenin keh mu'un penoo' neu' kekat éh ngelavo' réh awah ngan kekat arong kesa'at, ha' néh.

Tong Yésus bara' tong ukum éh juk teneng tong irah Guru éh nebaraa' tong Surat Musa ngan irah Parisi

(Luk. 11:47-51)

29La'ah ha' Yésus kepéh, Pika ka'ah guru éh nebaraa' tong sohoo' lem Surat Musa, kenat péh ngan ka'ah éh kivu adet Parisi, adang keh pu'un tusah mu'un uban keh ngelayoo' awah sebayang. Ka'ah ngebeték liang kelunan nabi ngan kelunan éh kivu pengeloo' Allah, pu'un keh maneu' seperut tong liang réh. 30Pu'un keh bara' ka', Hun néh améé' murip sahau, bé' mu'un mé' mematai irah iteu' barei' tepun mé' mematai réh nah, ha' keh. 31Neu' ha' keh pané kenat, inah keh ngakun ka'ah péh anak-ayam irah éh mematai réh nah. 32Pohoo' kenin keh pekua' kenin tepun keh rai, uban néh kenat jian keh pesukup penganeu' tepun keh nah kepéh. 33#Mat. 3:7, 12:34, Luk. 3:7 Ka'ah pohoo' anak torok awah. Kineu' keh seruh keh omok kelap jin ukum Tuhan hun néh bet keh tong luten meraka. 34Inah Akeu' bara' ngan keh, Akeu' juk nyohoo' kuraa' nabi, ngan kuraa' kelunan éh jam seruh péh, ngan irah guru péh, tai nebaraa' ka'ah. Tong jelua' réh adang keh pu'un mematai réh, jelua' réh kepéh, pu'un keh mematai réh tong salib, ngan jelua réh kepéh, pu'un keh mipok réh tong lamin sebayang keh, ngan pekelap réh jin jah leboo' tai jah leboo' kepéh. 35#Kej. 4:8, 2 Taw. 24:20-21 Neu' keh maneu' kenat, inah ukum éh tekep teneng tong kekat kelunan éh mematai kelunan éh bé' pu'un maneu' ineu'-ineu' kesa'at, ukum inah pu'un teneng tong ka'ah. Inah éh ukum éh tekep teneng tong kelunan éh mematai Habel kelunan éh bé' pu'un sala' Zakharia anak Berekia, éh penatai keh tong Umaa' Allah belah retek réh motong ka'an ngan retek éh ni'ai. 36Akeu' bara' ngan keh, Ukum éh tekep teneng tong kekat irah éh mematai réh inah, ukum inah juk teneng tong kekat ka'ah éh murip hun iteu' kepéh, ha' Yésus ngan réh.

Tong Yésus pika Yérusalem

(Luk. 13:34-35)

37La'ah ha' Yésus, Yérusalem, Yérusalem, pu'un keh mematai irah nabi Tuhan, ngan memateu' irah lawah Tuhan. Kuraa' koléé' Akeu' juk alaa' ka'ah barei' iap alaa' anak néh ra' pawit néh, bang bé' ka'ah keloo' laa' Ké'. 38#Yer. 22:5 Uban keh bé' keloo' laa' ké' kenat, hun iteu' nebet Ké' Umaa' Allah iteu'. 39#Msm. 118:26 Bé' Akeu' mokoo' ngan keh la'ah, bé' ka'ah omok na'at Akeu' kepéh la' pah avéé' dau ké' tuai kepéh ngan ka'ah pu'un bara', Mejing ngaran Tuhan, jian mu'un Iah éh tuai dalem ngaran Tuhan, ha' Yésus ngan réh.

Currently Selected:

MATIUS 23: PNT

Highlight

Copy