MATIUS 22

Ha' tapan tong jah raja' maneu' penguman ja'au tong kawin

(Luk. 14:15-24)

1La'ah Yésus nebaraa' irah kepéh palaa' ha' tapan. 2Ka' ha' néh, Tovoo' Allah Raja', pu'un éh barei' jah raja' éh maneu' penguman ja'au tong kawin anak néh lakei'. 3Hun réh lepah petenup kekat ka'an, Raja' nah nyohoo' kelunan sohoo' tai tebai irah éh lepah tenebai néh tuai kuman, bang bé' irah keloo' tuai. 4Boh éh nyohoo' kelunan éh jah tai ngan nyohoo' réh bara' ka', Hun iteu' kekat ka'an lepah petenup ké' tenéh, kelubau éh lemek ngan anak néh péh, penatai ké' tenéh, tuai tam kuman ja'au tong kawin anak ké', ha néh. 5Bang irah éh lepah tenebai néh nah bé' irah tuai. Pu'un réh kivu pengeloo' réh tengéé', jah usah tai na'at térék néh, jah usah kepéh tai melih, 6ngan jelua' réh kepéh ngamit kelunan éh sohoo' néh nah ngan mipok réh ngan mematai réh. 7Merek mu'un raja' nah, inah iah nyohoo' seradu néh tai mematai ngan motong leboo' kelunan éh mematai kelunan sohoo' néh. 8Boh éh tebai kelunan sohoo' néh éh jah kepéh, ka' ha' néh ngan réh, Kekat ka'an nah lepah petenup réh tenéh, bang irah éh tenebai ké' nah, bé' réh keloo' tuai kuman éh. 9Uban néh kenat jian keh tai jalan totoo', séé'-séé' éh lakau sinah, jian keh tebai réh tuai, ha' néh. 10Tai irah sohoo' néh tebai kekat kelunan éh sinah, irah éh jian péh, irah éh sa'at péh, penoo' lamin jalan réh kuman nah neu' réh.

11Hun raja' nah masek tong lamin inah ke' néh na'at irah pinaa' nah, boh éh na'at jah kelunan éh bé' pu'un pakai éh tekep penakai néh tong penguman ja'au nah. 12Inah raja' nah pané ngan néh, ha' néh, O kéh, kineu' ke' tuai siteu' hun ko' bé' memakai pakai éh jian, ha' néh. Bang bé' iah mipa éh, 13#Mat. 8:12, 25:30, Luk. 13:28 La'ah raja' nah nyohoo' kelunan sohoo' ngejeret ojoo' ngan gem kelunan inah ngan bet éh jin lamin néh tong merem awah. Sinah éh mangaa' ngan keta mu'un-mu'un, ha' Yésus ngan réh.

14Ha' Yésus kepéh, Pinaa' kelunan éh tenebai Ké' bang kerat awah éh kevéléé' Ké', ha' néh.

Tong irah neteng tong sukai

(Mrk. 12:13-17, Luk. 20:20-26)

15La'ah irah éh kivu adet Parisi pakat pitah jalan ke' réh juk pesala' Yésus tong kuraa'-kuraa' ha' peneteng réh. 16Pu'un réh nyohoo' jelua' irah Parisi nah ngan pu'un kuraa' usah irah éh kivu Herodis, tavin Yésus ngan nyohoo' réh pané ka', O Guru, kejam mé' ka'au' kelunan éh ngelayau maneu' kekat éh jian ngan teneng, ka'au' nebaraa' kelunan tong kekat pengeloo' Allah ngan kelunan. Bé' ke' medai bara' éh, kelunan éh ja'au péh, irah éh si'ik péh, bé' ke' medai réh. 17Uban néh kenat inah améé' neteng ke', kineu' mé', tekep mé' mena' sukai mé' ngan raja' Rum? Kineu' da', bé' mé' ngelapah tong ukum lu' hun mé' mena' éh, ha' réh.

18Bang Yésus jam irah juk pesala' Iah ke' ke' réh neteng éh kenat, boh éh pané ngan réh, ha' néh, Ka'ah iteu' kelunan éh ngelayoo' awah juk maneu' jian. Uban ineu' keh tupat Akeu'. 19Tuai jah rigit pirek keh nah, ha' néh.

La'ah irah mena' rigit pirek nah ngan néh, 20boh éh neteng réh kepéh, Gaben ngan ngaran séé' iteu'? Ha' néh.

21Ha' réh mipa éh, Raja' Rum, ha' réh.

Ha' Yésus kepéh, Hun néh kenat kekat éh anah Raja' Rum mena' éh ngan irah ke', ngan kekat éh anah Allah, mena' éh ngan Allah, ha' néh.

22Béé kenin réh, bé' réh jam seruh. Boh réh piso jin néh tai lakau.

Tong kelunan Saduki neteng tong pengebetéé' kelunan matai

(Mrk. 12:18-27, Luk. 20:27-40)

23 # Peng. 23:8 La'ah tong dau inah péh jelua' irah éh kivu adet Saduki tai tavin Yésus. Irah Saduki nah bé' irah ngelan kelunan omok betéé' jin patai réh. 24#Ula. 25:5 Ka' ha' réh ngan Yésus, O Guru, pu'un ha' lem Surat Musa bara' ka', Hun néh pu'un kelunan matai ngan do néh murip keto bang rawah bé' pu'un anak, jian padéé' lakei' éh matai nah alaa' redo baleu' inah dokoo' rawah inah omok pu'un anak da', dokoo' anak inah seleket anak lakei' éh matai nah, kenat ha' lem Surat Musa, ha' réh. 25Ha' réh kepéh, Tong leboo' mé' iteu' sahau, pu'un tujuu' usah pepadéé'. Éh tuken jin irah alaa' redo, bé' lebéé' matai lakei' inah bé' mena rawah pu'un anak. Boh padéé' lakei' éh matai nah alaa' redo baleu' nah. 26Kenat péh tong padéé' néh éh keruwah nah, matai éh bé' mena rawah pu'un anak, kenat éh tong padéé' néh éh keteleu' nah, pah avéé' irah béé éh tujuu' usah nah matai, bé' mena réh pu'un anak ngan redo inah. 27La'o inah redo baleu' inah péh matai. 28Tong dau Tuhan pebetéé' kelunan jin patai réh, séé' jin belah irah tujuu' usah inah éh omok alaa' redo inah kepéh uban kekat irah tujuu' usah nah pu'un réh lepah pemung ngan redo inah, ha' réh.

29Ha' Yésus mipa réh, Sala' penyeruh keh, uban keh bé' jam Sin tong ha' lem surat Allah ngan bé' keh jam tong Penyukat Allah. 30Kelunan éh lepah matai, hun Tuhan pebetéé' réh kepéh irah barei' meliket tong seruga, bé' irah tiken ke' pemung ngan redo kepéh. 31Kineu', bé' keh purung ha' Allah tong pengebetéé' kelunan matai? Ka' ha' néh, 32#Kel. 3:6 Akeu' éh Allah éh kenelan Abraham ngan Ishak ngan Yakub, ha' néh. Lem ha' néh kenat, inah iah bara', Iah éh Allah kekat kelunan éh murip, kenat péh irah éh murip keto hun iteu', kenat péh tong kelunan éh lepah matai éh murip kepéh, ha' néh.

33Béé kenin irah pinaa' menéng ha' néh pané kenat.

Jah sohoo' Tuhan éh ja'au mu'un

(Mrk. 12:28-34, Luk. 10:25-28)

34Hun irah Parisi jam Yésus maneu' irah Saduki bé' omok pané, pu'un réh petipun béé. 35La'ah jah usah jin belah réh éh nebaraa' tong Surat Musa, tuai pané ngan Yésus ke' néh juk pesala' éh. 36Ha' néh ngan Yésus, O Guru, jin kekat éh sohoo' Tuhan, éh mah éh pelapah ja'au éh tekep mé' kivu, ha' néh.

37 # Ula. 6:5 Ha' Yésus mipa éh, Éh pelapah ja'au, inah éh, Tekep ke' murung Tuhan Allah ko' ngan kekat kenin ko' ngan kekat urip ko' ngan kekat penyeruh Ko'. 38Inah éh sohoo' néh éh pelapah ja'au éh tekep keh kivu. 39Jah sohoo' néh kepéh éh tekep keh kivu, ka' éh, Tekep ke' murung kelunan éh jah pekua' ko' Murung usah ko' tengéé'. 40#Luk. 10:25-28 Kekat ha' tebaraa' Surat Musa ngan ha' tebaraa' irah Nabi sahau pu'un éh lem duah Sohoo' Tuhan inah ha' néh.

Tong ha' peneteng, séé' éh Kristus, Anak séé' éh

(Mrk. 12:35-37, Luk. 20:41-44)

41Hun irah Parisi petipun Yésus neteng réh, 42ka' ha' néh, Kineu' éh seneruh keh tong Kristus, Anak séé' éh? Séé' éh tepun néh, ha' néh. Ha' réh mipa éh,

Jin pohoo' Daud, ha' réh.

43Ha Yésus kepéh, Hun néh kenat uban ineu' Sahéé' Allah ngusii' kenin Daud ke' néh mateng éh Tuhan. Uban ka' ha' Daud,

44 # Msm. 110:1 Tuhan pu'un bara' ngan Tuhan ké':

Jian ke' menyun saa' na'au' Ké' siteu',

avéé' Ké' maneu' kekat ayau Ko' inah barei' lun gem Ko' awah, ha' Daud.

45Hun Daud mateng éh Tuhan, kineu' okoo' kelunan éh pejajii' Allah nah omok tuai jin pohoo' Daud nah hun néh Daud tengéé' péh mateng iah Tuhan, ha' Yésus ngan réh.

46Bé' réh omok pané bara' ineu'-ineu' ngan Yésus kepéh. La'ah jin dau inah bé' pu'un séé' péh éh makang neteng éh tong ineu'-ineu' la'ah.

Currently Selected:

MATIUS 22: PNT

Highlight

Copy