Amarkɩ 13

Wẽnde-kãtɛ la sã'aŋɔ, la dũnia ba'asgɔ nãmsgɔ yelle

(Amatie 24:1-28, Aluki 21:5-24)

1Azezi daan ze'ele la Wẽnde-kãtʋm na yɛsra, tɩ a karẽnbia ayɩla yele ẽ yetɩ: «Karẽnsãama, bɩsɛ kuga n ba ãna sõŋa tɩ ba dɩkɛ mẽ de-kãra se'em.» 2Tɩ Azezi yele ẽ yetɩ: «Fõn yẽ de-kãra wã, ba wʋn lʋbɛ ba wuu mɛ saam saam tɩ kugre baa ayɩla kãn weege a tadãana zuo.»

3La Azezi daan sẽŋɛ ka zẽa la Oliivi tãŋa zuo tɩ a nẽŋa bɩsra Wẽnde-kãtɛ la. La Apɩyɛɛrɩ, la Azakɩ, la Azã, la A'ãndre mã'a n daan boe a zẽ'am, 4soke ẽ yetɩ: «Yele to, wakat-kãna tɩ bõn-ẽŋa wʋn ẽŋɛ, la bẽm n wʋn pa'alɛ tɩ wakatɛ la paagɛ mɛ tɩ bõn-bãma wuu wʋn ẽŋɛ?» 5Tɩ Azezi yele ba yetɩ: «Guuse-ya tɩ nẽra da pã'asɛ ya tɩ ya tuuge. 6Nẽrba zozo'e n wʋn dɩkɛ mam yʋ'ʋrɛ wa'am wa pã'asra ya, tɩ ba nẽra woo yetɩ: ‹Mam n de Krisi la.› La ba wʋn botɩ nẽrba zozo'e tuuge mɛ. 7Ya sãn wa wõm zɛbrɛ dãmnɛ, la zɛbrɛ yelle, da basɛ-ya tɩ dabeem kẽ ya, dẽnɩ tɩ bõn-bãma ẽŋɛ. La, la nãn ka de dũnia ba'asgɔ. 8Buuri ayɩla wʋn isge zɛbra la buuri ayẽma, tɩ so'olʋm ayɩla isge zɛbra la so'olʋm ayẽma. La tẽŋa wʋn tĩi mĩim mɛ zẽ'esɩ zozo'e, la kɔm wʋn bɔna. Bɛla wuu nãn de la toogo la sẽŋrɛ, la ãn wʋ pɔka virgre toogo n nãn sẽŋrɩ la.

9Guuse ya mẽŋa, tɩ nẽrba wʋn tarɩ ya mɛ sẽŋɛ ka sãm ba sarɩyadia zẽ'esʋm, tɩ ba wẽ ya ba wẽndeto pʋam. La ba wʋn tarɩ ya sẽŋɛ gɔmnadõma, la na'adõma nẽŋam mam ĩyã. La ya wʋn tɔgɛ mam yɛla pa'alɛ ba. 10La dẽnɩ tɩ Nawẽnnɛ kõ-yẽlga la dẽŋɛ mõolɛ bɔ buuri wuu, dee tɩ dũnia ba'asgɔ paagɛ. 11La ba sãn wa yõgɛ ya tarɩ sẽŋɛ ka sãm sarɩyadia zẽ'am, ya da fabla yãma n wʋn tɔgɛ se'em, wakatɛ sãn wa paagɛ, tɔgɛ-ya yetɔg-sɛba tɩ Nawẽnnɛ wʋn bɔ ya la, se'ere n soe la, la dagɩ ya mẽŋa n wʋn tɔgɛ, la de la Nawẽnnɛ Sɩa n wʋn sõŋɛ ya. 12Sɔbia wʋn botɩ ba yõkɛ sɔbia kʋ, tɩ sɔ mẽ wʋn ẽŋɛ a bia bɛla, la kɔma wʋn zɛbra la ba sɔdõma, la ba madõma botɩ ba kʋ ba. 13Nẽrba zozo'e wʋn sise ya mam yʋ'ʋrɛ ĩyã. La nẽr-sɛka n wʋn mõrgɛ ze'ele kãŋkãŋɛ ka paagɛ ba'asgɔ wʋn yẽ fãarɛ.

14Ya wʋn wa yẽ sɛka n de bõn-be'ego n sã'anɩ sɛla woo la, tɩ a boe zẽ'e-sɛka n ka masɛ tɩ a bɔna la.» (Sɛka n karẽŋrɩ la mõrgɛ wõm a võorɛ.) «Ya sãn yẽ bɛla, sɛba n boe Zude zoe zom tãnsɩ zuo. 15La nẽr-sɛka n boe gɔsgɔ da sige bɔɔra tɩ a kẽ deem dɩkɛ sɛla. 16La nẽr-sɛka n boe va'am da kãn lebe kule yire tɩ a dɩkɛ a fuugo. 17Dabs-bãma, la wʋn dɛna la toogo bɔ pɔg-sɛba n tarɩ pʋa la, la sɛba n tarɩ kɔma tɩ ba mõgra la. 18Sose-ya Nawẽnnɛ tɩ yel-bãma da wa dɛna ɔɔrɔ wakatɛ. 19Se'ere n soe la, dabs-bãma wʋn dɛna la toogo zozo'e, tɩ ba nãn ka yẽ halɩ pĩ'iluŋo tɩ Nawẽnnɛ nãam dũnia wa paam zĩna, la toog-ẽŋa buuri kãn le malɩn wa'am. 20Nawẽnnɛ sãn ka bo'oge nɩ dabs-bãma sõorɛ, nẽra ka boe nɩ n wʋn põsɛ. La Nawẽnnɛ mẽŋa nẽrba tɩ a looge la ĩyã, tɩ a bo'oge dabs-bãma sõorɛ.

21La nẽra sãn yele ya yetɩ: ‹Bɩsɛ-ya, Krisi boe la kalam›, bɩɩ ‹bɩsɛ-ya, a boe la ke›, ya da sakɛ. 22Nẽrba n wʋn wa'am wa parɩm tɩ bãma n de Krisi, la nẽrba n wʋn wa'am wa parɩm tɩ bãma n de Nawẽnnɛ nõtɔ'ɔsrɩba tõm tõon-yãlma, la yel-kɩrsɩ, bɔɔra tɩ ba sãn tã'agɛ, ba botɩ nẽr-sɛba tɩ Nawẽnnɛ looge la tuuge doose ba. 23Guuse ya mẽŋa, tɩ mam dẽŋɛ yele ya sɛla woo mɛ.»

Azezi n de Nẽrsaala Dayʋa la lemŋo

(Amatie 24:29-44, Aluki 21:25-36)

24Azezi le yele yetɩ: «Toogo la dabsa poorʋm, wẽntulle wʋn sobge mɛ, tɩ wõrga kãn le nẽera a peelem. 25La wõrbiɛ wʋn ze'ele saazuum lui. La bõn-sɛba n boe saazuum wʋn mĩim mɛ. 26La ba wʋn yẽ Nẽrsaala Dayʋa la n boe sawara pʋam sẽna la pãn-kãtɛ, tɩ a na'am pãŋa peelem nẽegɛ. 27La a wʋn tõm a malɛkadõma mɛ tɩ ba sẽŋɛ dũnia gɔbga la zʋʋgɔ, la dapoore la zanõrɛ, ka lagsɛ nẽr-sɛba tɩ a looge la halɩ ka paagɛ dũnia tɛka wuu.»

28Azezi le yele ba yetɩ: «Dɩkɛ-ya makrɛ la kẽnkãŋa bãŋɛ zãsŋɔ la võorɛ. Kẽnkãŋa wila sãn wa pusra võorɔ, ya mi tɩ sigre lɛm mɛ. 29Bɛla mẽ, ya sãn wa yẽ tɩ bõn-bãma wuu ɩtɩ, ya bãŋɛ tɩ Nẽrsaala Dayʋa la lɛm mɛ, a boe la zanõrʋm. 30Mam yetɩ ya la sɩra, tɩ bõn-bãna wʋn ɩta mɛ dee tɩ zamãan-ẽna yãŋa tole. 31Saazuum la tẽŋa wʋn tole mɛ, la mam yetɔga kãn malɩn tole.

32Nẽra nẽra ka mi daar-sɛka la wakat-sɛka tɩ Nẽrsaala Dayʋa la wʋn leme wa'am. Baa malɛkadõma n boe Nawẽnnɛ yire, bɩɩ Dayʋa la mẽŋa ka mi, sãn dagna Sɔ Nawẽnnɛ mã'a. 33Guuse ya mẽŋa sõŋa, la ya mãasʋm, se'ere n soe la, ya ka mi wakatɛ la. 34La wʋn ãna wʋ bʋraa n we'esɩ sore dee dɩkɛ a yire gu'ule a tõntõnɩba, bɔ tõntõnna woo a tõonɛ, dee yele zanõr-gu'ura tɩ a gu'ura. 35Bɛla ĩyã gu'ura-ya, se'ere n soe la, ya ka mi wakat-sɛka tɩ yidãana la wʋn leme wa'am. A tã wʋn leme wa'am zaanõorɛ mɛ, bɩɩ sõnsʋa, bɩɩ nõ-rɔɔgɔ kaasga wakatɛ, bɩɩ bulika. 36Guuse-ya tɩ yidãana la da wa'am wa di'ige ya, tɩ ya gĩsri mɛ. 37Mam n yetɩ ya se'em na, mam yetɩ nẽrba wuu la bɛla, gu'ura-ya.»

Currently Selected:

Amarkɩ 13: gurDBL

Highlight

Copy