Amarkɩ 14

Zifdõma nẽŋadõma eerɩ sore tɩ ba kʋ Azezi

(Amatie 26:1-5, Aluki 22:1-2, Azã 11:45-53)

1La daan deege la dabsa ayi tɩ Zɔɔg-basɛ kibsa tɩ ba obrɩ borborɩ n ka tarɩ dãbɩllɛ dabsa paagɛ. Tɩ kãabgɔ kẽma nẽŋadõma, la lɔɔ karẽnsãandõma ɛɛra sore tɩ ba sʋgɛ yõkɛ Azezi kʋ. 2Tɩ ba yele taaba yetɩ: «Tɩ da kãn ẽŋɛ-ya bɛla kibsa wã pʋam, tɩ nẽrba la wʋn gire mɛ.»

Pɔka n ka'agɛ kaam ẽŋɛ Azezi zuo

(Amatie 26:6-13, Azã 12:1-8)

3Azezi daan boe la Betani, Asimõ n wa dɛna kõnkonne yire, tɩ ba daan bɔna mĩ dita. Tɩ pɔka tarɩ albatrɩ dugla n pɩrɛ la tɩdarɛ ka-sõma ligri n zo'oge tɩ ba wi'iri tɩ naarɩ, wa'am wa vuke dugla la, ka'agɛ kaam na ẽŋɛ Azezi zuugo. 4Tɩ nẽrba basɛba n boe bilam na sũure sã'am, tɩ ba yele taaba yetɩ: «Bẽm tɩ pɔka la sã'am ka-sõma la wãna? 5Ba tã nɩ wʋn koose ba gãŋɛ lig-kõba kɔbstã mɛ, dɩkɛ ligri la bɔ nasdõma.» Tɩ ba zɛrgɛ pɔka la.

6Tɩ Azezi yele ba yetɩ: «Basɛ-ya pɔka la bãalam, bẽm tɩ ya tɔgra ẽ tɩ a sũure sã'am? Ẽn ẽŋɛ sɛla bɔ mam na de la tõon-sõŋɔ. 7Nasdõma boe la ya lɛ mɛ wakatɛ wuu, ya tã wʋn ẽŋɛ ba sõŋa mɛ yan boorɩ wakat-sɛka, la mam kãn bɔna la ya lɛ wakatɛ wuu. 8Ẽŋa n tarɩ sɛla la, tɩ a ẽŋɛ. Ẽn ka'agɛ ka-sõma la ẽŋɛ mam ĩyã la, a dẽŋɛ ẽŋɛ la ban wʋn ẽŋɛ mam se'em mam laarɛ daarɛ. 9Mam yetɩ ya la asɩra, tɩ dũnia wã zẽ'e-sɛka wuu tɩ ba wʋn wa mõolɛ Nawẽnnɛ kõ-yẽlga la, ba mẽ wʋn tɔgɛ pɔka wã n ẽŋɛ mam se'em wã, tɩ ba tẽra a yelle.»

Azudaasɩ eerɩ sore tɩ a pa'alɛ tɩ ba yõkɛ Azezi

(Amatie 26:14-16, Aluki 22:3-6)

10Tɩ Azudaasɩ Iskariyo n de Azezi karẽnbiisi pia la ayi la nẽra ayɩla sẽŋɛ kãabgɔ kẽma nẽŋadõma zẽ'am, ka yele ba tɩ ẽŋa wʋn pa'alɛ tɩ ba yõkɛ Azezi. 11La ban daan wõm ẽn yele se'em na, tɩ ba sũure ẽŋɛ yẽlʋm, tɩ ba yetɩ bãma wʋn bɔ ẽ ligri. Tɩ Azudaasɩ yãŋa ɛɛra so-sɛka tɩ a wʋn pa'alɛ tɩ ba yãŋɛ yõkɛ ẽ na.

Azezi diti Zɔɔg-basɛ kibsa la a karẽnbiisi

(Amatie 26:17-30, Aluki 22:7-23, Azã 13:21-30, 1 Korẽntɩ 11:23-25)

12Borborɩ n ka tarɩ dãbɩllɛ kibsa la pɔspɔsɩ daarɛ tɩ ba kʋʋrɩ pebilsi dita Zɔɔg-basɛ kibsa la n daan paagɛ. Tɩ Azezi karẽnbiisi la soke ẽ yetɩ: «Fõn boorɩ tɩ tɩ sẽŋɛ la bɛ ka mãasʋm Zɔɔg-basɛ kibsa la tɩ fʋ di?» 13Tɩ Azezi tõm a karẽnbiisi bayi yele ba yetɩ: «Sẽŋɛ-ya tẽŋa la pʋam, tɩ ya wʋn tʋ'ʋsɛ bʋraaga n tʋ yoore la ko'om, ya doose ẽ 14sẽŋɛ yi-sɛka tɩ a wʋn kẽ la, ka yele yidãana la yetɩ: ‹Karẽnsãama la yetɩ, deego boe la bɛ, tɩ ẽŋa la a karẽnbiisi wʋn di Zɔɔg-basɛ kibsa la?› 15A wʋn pa'alɛ ya de-kãtɛ n boe ayẽma zuo, tɩ sɛla woo mãasʋm bɔna mĩ. Bilam tɩ ya wʋn mãasʋm tɩ tɩ di kibsa la.» 16Tɩ a karẽnbiisi la yese sẽŋɛ tẽŋa la pʋam ka yẽ sɛla woo wʋ Azezi n yele ba se'em na. Tɩ ba mãasʋm Zɔɔg-basɛ kibsa la bilam.

17Tɩ wẽnnɛ daan mã'agɛ, tɩ Azezi la a karẽnbiisi pia la ayi la wa'am, 18wa zẽa dita, tɩ Azezi yele ba yetɩ: «Mam yetɩ ya la asɩra, tɩ ya nẽra ayɩla n diti la mam kalam n wʋn pa'alɛ tɩ ba yõkɛ mam.» 19Tɩ la daan sã'am ba sũure. Tɩ ba sɔkra ẽ ayɩla ayɩla yetɩ: «La de la mam?» 20Tɩ a lerge ba yetɩ: «La de la ya nẽrba pia la ayi la nẽr-sɛka n wʋn yɛglɛ la mam tũm a nu'ugo laaga pʋam na. 21Nẽrsaala Dayʋa la wʋn ki wʋ lan põn gʋlsɛ a yelle Nawẽnnɛ gõŋɔ pʋam se'em na. La sɛka n yetɩ a pa'alɛ tɩ ba yõkɛ Nẽrsaala Dayʋa la wʋn yẽ toogo. Nẽr-ẽŋa ma sãn ka dɔgɛ nɩ ẽ n sõɩ.»

22La ban daan diti la, tɩ Azezi dɩkɛ borborɩ pʋ'ʋsɛ Nawẽnnɛ, dee fiise bɔ a karẽnbiisi la yetɩ: «To'oge-ya di, ẽna wã de la mam ĩyã.» 23Dee dɩkɛ bõn-yũula pʋ'ʋsɛ Nawẽnnɛ, dee bɔ ba, tɩ ba wuu yũ. 24Dee yele ba yetɩ: «Bãna wã de la mam zɩɩm n wʋn yese saagɛ nẽrba zozo'e ĩyã, pa'alɛ tɩ Nawẽnnɛ bĩŋe nõorɛ la ba. 25Mam yetɩ ya la asɩra, tɩ mam kãn le yũ viinye biɛ bõn-yũula wã, halɩ tɩ la ka paagɛ daar-sɛka tɩ mam wʋn le yũ ba Nawẽnnɛ so'olʋm pʋam.» 26Tɩ ba yõom yõoma pẽgɛ Nawẽnnɛ, dee yese wɛ'ɛsa Oliivi tãŋam.

Azezi yetɩ Apɩyɛɛrɩ wʋn sɩ'ɩsɛ ẽŋa

(Amatie 26:31-35, Aluki 22:31-34, Azã 13:36-38)

27Tɩ Azezi yele a karẽnbiisi la yetɩ: «Yãma wuu wʋn lebe la poorʋm dee basɛ mam, se'ere n soe la, la gʋlsɛ Nawẽnnɛ gõŋɔ pʋam yetɩ: ‹Mam wʋn kʋ dũnsĩina dee tɩ piisi la wɩrgɛ.› » 28La Azezi le yele ba yetɩ: «La mam sãn wa vo'oge, mam wʋn dẽŋɛ ya sẽŋɛ Galile.» 29Tɩ Apɩyɛɛrɩ yele ẽ yetɩ: «Baa ba wuu sãn lebe poorʋm dee basɛ fõn, mam kãn basɛ fõn.» 30Tɩ Azezi yele ẽ yetɩ: «Mam yetɩ fʋ la sɩra, tɩ zĩna, yʋ'ʋŋɔ ẽna wã, lan dẽŋɛ nõ-rɔɔgɔ n wʋn kaasɛ nõorɛ ayi, fʋ wʋn sɩ'ɩsɛ nõorɛ atã tɩ fõn ka mi mam.» 31Tɩ Apɩyɛɛrɩ le tɔgɛ ke'enke'em yetɩ: «Baa la sãn dɛna tɩ mam lagɩm na fõn ki, mam kãn malɩn sɩ'ɩsɛ fõn.» Tɩ karẽnbiisi la wuu lagɩm yele bɛla.

Azezi pʋ'ʋsɛ Nawẽnnɛ Getsemane

(Amatie 26:36-46, Aluki 22:39-46)

32Tɩ ba paagɛ zẽ'e-sɛka yʋ'ʋrɛ n de Getsemane la. Tɩ Azezi yele a karẽnbiisi la yetɩ: «Zĩ'ire-ya kalam dee tɩ m sẽŋɛ ka pʋ'ʋsɛ Nawẽnnɛ.» 33La a tarɩ la Apɩyɛɛrɩ, la Azakɩ, la Azã sẽŋɛ. Tɩ a sũure sã'am zozo'e, tɩ la dãan ẽ. 34Tɩ a yele ba yetɩ: «Sũ-sã'aŋɔ n tarɩ mam zozo'e tɩ mam ãna wʋ m yetɩ m ki mɛ na. Weege-ya kalam gu'ura, da gĩse-ya.» 35La a sẽŋɛ la nẽŋa fẽe, ka võglɛ tẽŋa pʋ'ʋsɛ Nawẽnnɛ yetɩ, la sãn tãna, toogo la fõrgɛ dee basɛ ẽ. 36Dee yetɩ: «M Sɔ, fõn tã sɛla woo ɩta, basɛ tɩ nãmsgɔ ẽna fõrgɛ dee basɛ ma. La, la da kãn dɛna mam n boorɩ se'em, la dɛna fõn boorɩ se'em.»

37La a leme a karẽnbiisi batã la zẽ'am wa yẽ tɩ ba gĩsri mɛ, tɩ a soke Apɩyɛɛrɩ yetɩ: «Asimõ, fõn gĩsri mɛ? Fõn ka tã wʋn gu karf-ayɩla ka gĩse?» 38Dee yele ba yetɩ: «Basɛ-ya gẽem dee pʋ'ʋsɛ Nawẽnnɛ tɩ yelle da paagɛ ya tɩ ya lui. Ya sɩa la boorɩ mɛ, la ya ĩyã ka tara pãŋa.»

39La a daan le lebe ka pʋ'ʋsɛ Nawẽnnɛ wʋ ẽn pʋ'ʋsɛ se'em na. 40Dee le leme wa yẽ tɩ ba gĩsri mɛ, se'ere n soe la, gẽem n ba tarɩ ba. Tɩ ba ka mina ban wʋn yele ẽ se'em.

41A daan le sẽŋɛ mɛ, dee leme wa'am nõorɛ atã pʋam wa soke ba yetɩ: «Ya ken vɔ'ɔsra mɛ dee gĩsra? La ẽŋɛ ba'asɛ mɛ, wakatɛ paagɛ mɛ tɩ ba wʋn dɩkɛ Nẽrsaala Dayʋa la ẽŋɛ tõon-be'ero dõma nu'usum. 42Isge-ya tɩ sẽŋɛ, tɩ sɛka n wʋn pa'alɛ tɩ ba yõkɛ mam na n wãna sẽm.»

Ba yõkɛ Azezi

(Amatie 26:47-56, Aluki 22:47-53, Azã 18:3-12)

43Azezi n daan ken tɔgra la, tɩ Azudaasɩ n de a karẽnbiisi pia la ayi la nẽra ayɩla, doose la nẽr-kʋʋŋɔ sẽŋɛ paam. La nẽr-kʋʋŋɔ la daan tarɩ la sʋkɔbrɔ, la dɔa dɔla ẽ. La de la kãabgɔ kẽma nẽŋadõma, la lɔɔ karẽnsãandõma, la tẽŋa la kẽma n tõm ba. 44La Azudaasɩ n wʋn pa'alɛ tɩ ba yõkɛ ẽ na, põn tɔgɛ mɛ pa'alɛ ba yetɩ: «Sɛka tɩ mam wʋn kɔkɛ ẽ na, ẽŋa n bɛla, yõkɛ-ya ẽ, tarɩ ẽ sõŋa fõrgɛ.»

45La Azudaasɩ n paam na, a sẽŋɛ lɛm na Azezi, yele ẽ yetɩ: «Karẽnsãama.» Dee kɔkɛ ẽ. 46Tɩ nẽrba la paagɛ yõkɛ ẽ. 47Tɩ nẽr-sɛba n daan boe mĩ na nẽra ayɩla fooge a sʋkɔbgɔ sɛ kãabgɔ kẽma nẽŋadãana tõntõnna tʋbrɛ fiige. 48Tɩ Azezi soke ba yetɩ: «Yãma tarɩ la sʋkɔbrɔ, la dɔa sẽna tɩ ya yõkɛ mam wʋ mam de la fãara la? 49Mam daan boe la yãma lɛ Wẽnde-kãtʋm na daarɛ woo zãsna nẽrba, tɩ ya ka yõkɛ mam. La, la de la tɩ bõn-sɛka n gʋlsɛ Nawẽnnɛ gõŋɔ pʋam na ẽŋɛ.» 50Tɩ a karẽnbiisi la wuu zoe dee basɛ ẽ.

51La budib-polle ayɩla n daan lobe fugɔbga mã'a dɔla Azezi. Tɩ ba daan zɛ ẽ tɩ ba yõkɛ, 52tɩ a basɛ a fugɔbga la dee zoe beele fõrgɛ.

Ba tarɩ Azezi sẽŋɛ Zifdõma sarɩyaditba zẽ'am

(Amatie 26:57-68, Aluki 22:54-55,63-71, Azã 18:13-14,19-24)

53Ba daan tarɩ Azezi sẽŋɛ la kãabgɔ kẽma nẽŋadãana la yire, bilam tɩ kãabgɔ kẽma nẽŋadõma, la tẽŋa la kẽma, la lɔɔ karẽnsãandõma la wuu tigse. 54Tɩ Apɩyɛɛrɩ daan bɔna poorʋm zãazãarɛ dɔla, ka paagɛ kẽ kãabgɔ kẽma nẽŋadãana la yire zẽnzakam, zẽa la tõntõnɩba ɔɔsra bugum.

55La kãabgɔ kẽma nẽŋadõma, la sarɩyaditba la wuu daan eerɩ la yelle tɩ ba dõrɛ Azezi botɩ ba kʋ ẽ, la ba ka yẽ. 56Tɩ nẽrba zozo'e daan parɩm bɔ Azezi, la ba yetɔga la ka doose taaba.

57Tɩ nẽrba basɛba daan isge parɩm bɔ ẽ yetɩ: 58«Tõma wõm tɩ a yetɩ: ‹Mam wʋn wõrgɛ Wẽnde-kãtɛ la tɩ nẽrsaalba mẽ la, dee le mẽ ayẽma dabsa atã pʋam n dagɩ nẽrsaalba mẽa.› » 59Baa bõn-ẽŋa pʋam ba yetɔga la ka doose taaba.

60Tɩ kãabgɔ kẽma nẽŋadãana la isge ze'ele ba wuu nẽŋam soke Azezi yetɩ: «Ban tɔgɛ fõn se'em na, fõn kãn lerge se'ere?» 61Tɩ Azezi daan sĩna ka lerge se'ere. Tɩ kãabgɔ kẽma nẽŋadãana la le soke ẽ yetɩ: «Fõn de la Krisi, Nawẽnnɛ tɩ tõma pẽgrɩ la Dayʋa la?» 62Tɩ Azezi lerge yetɩ: «Ẽe, mam de la ẽŋa. La ya wʋn yẽ Nẽrsaala Dayʋa la tɩ a zĩ Nawẽnnɛ n de pãŋa dãana la zʋʋgɔ bɔba, ya wʋn yẽ tɩ a boe sawara pʋam sẽna.» 63Tɩ kãabgɔ kẽma nẽŋadãana la ãasʋm a mẽŋa futo, dee yetɩ: «Tɩ le ɛɛra la bẽm kaset-dõma? 64Ya wõm ẽn sã'am Nawẽnnɛ yʋ'ʋrɛ. Yãma tẽ'esɛ la wãne?» Tɩ ba wuu yetɩ: «A masɛ la kũm.»

65Tɩ ba nẽrba basɛba daan sẽŋɛ tʋbsra nõtõorʋm ɩta Azezi, dɩkɛ tãnnɛ pĩ a nini, mũm kũnkũra wẽ ẽ, dee yɛta ẽ tɩ: «Bãŋɛ pa'alɛ tɔ nẽr-sɛka n wẽ fɔ?» Tɩ gu'urba la to'oge ẽ, wẽ a pɛgsɩ.

Apɩyɛɛrɩ sɩ'ɩsɛ tɩ ẽŋa ka mi Azezi

(Amatie 26:69-75, Aluki 22:56-62, Azã 18:15-18,25-27)

66La Apɩyɛɛrɩ daan ken bɔna la zẽnzakam na, tɩ kãabgɔ kẽma nẽŋadãana tõntõn-pɔka wa'am mĩ, 67wa yẽ Apɩyɛɛrɩ n ɔɔsrɩ bugum na, tɩ a bɩsra ẽ, dee yetɩ: «Fõn mẽ daan po bɔna la Nazarɛtɩ bʋraa Azezi lɛ.» 68Tɩ Apɩyɛɛrɩ sɩ'ɩsɛ yetɩ: «Mam ka mi, mam ka bãŋɛ fõn yele se'em na võorɛ.» Apɩyɛɛrɩ yele bɛla dee yese ka zɛ la zanõrʋm, tɩ nõ-rɔɔgɔ kaasɛ. 69Tɩ tõntõn-pɔka la le yẽ ẽ, yele sɛba n boe mĩ na yetɩ: «Bʋra-ẽna de la Azezi nẽra ayɩla.» 70Tɩ Apɩyɛɛrɩ le sɩ'ɩsɛ. Tɩ la ẽŋɛ fẽe, tɩ nẽr-sɛba n ze mĩ na le yele Apɩyɛɛrɩ yetɩ: «Asɩra, fõn de la ba nẽra ayɩla. Fõn de la Galile nẽra.» 71Tɩ Apɩyɛɛrɩ pɔɩ Nawẽnnɛ yetɩ: «Mam ka mi bʋra-sɛka tɩ ya tɔgrɩ a yelle wã.» 72Bilam mẽŋa tɩ nõ-rɔɔgɔ le kaasɛ nõorɛ ayi pʋam. Tɩ Apɩyɛɛrɩ tẽegɛ Azezi n daan yele ẽ yetɩ: «Lan dẽŋɛ nõ-rɔɔgɔ n wʋn kaasɛ nõorɛ ayi, fʋ wʋn sɩ'ɩsɛ nõorɛ atã tɩ fõn ka mi mam» na. Tɩ a sũure sã'am, tɩ a kɛlla.

Currently Selected:

Amarkɩ 14: gurDBL

Highlight

Copy