Amarkɩ 15

Ba tarɩ Azezi sẽŋɛ gɔmna Apilatɩ zẽ'am

(Amatie 27:1-2,11-14, Aluki 23:1-5, Azã 18:28-38)

1Beere n daan wiige bulika, tɩ kãabgɔ kẽma nẽŋadõma, la tẽŋa la kẽma, la lɔɔ karẽnsãandõma, bãma wuu n de sarɩyaditba la daan lagsɛ mɛ tɔgɛ kʋ, botɩ ba lʋ Azezi tarɩ ẽ sẽŋɛ Apilatɩ zẽ'am. 2Tɩ Apilatɩ soke Azezi yetɩ: «Fõn de la Zifdõma naba?» Tɩ a lerge yetɩ: «La de la fõn yele se'em na.» 3Tɩ kãabgɔ kẽma nẽŋadõma la dõrɛ ẽ yɛla zozo'e. 4Tɩ Apilatɩ le soke Azezi yetɩ: «Fõn wõm yetɔg-sɛba wuu tɩ ba tɔgɛ bɔ fʋ wã, fõn kãn lerge se'ere?» 5Tɩ Azezi ka le lerge se'ere, tɩ la di'ige Apilatɩ.

Ba tɔgɛ tɩ ba kʋ Azezi

(Amatie 27:15-26, Aluki 23:13-25, Azã 18:39—19:16)

6Zɔɔg-basɛ kibsa woo Apilatɩ daan ẽn botɩ ba yese la nẽr-sɛka tɩ nẽrba la boorɩ la yʋ'a deem basɛ. 7La bʋraa ayɩla yʋ'ʋrɛ n de Abarabasɩ, ẽŋa la nẽrba basɛba n daan dãmɛ tẽŋa, kʋ nẽra tɩ ba yõgɛ ba yʋ. 8Tɩ nẽr-kʋʋŋɔ la sẽŋɛ Apilatɩ zẽ'am ka sose ẽ yetɩ, a ẽŋɛ ẽŋa n ɩtɩ se'em na bɔ ba. 9Tɩ a soke ba yetɩ: «Ya boorɩ tɩ m yese la Zifdõma naba la basɛ bɔ ya?» 10Se'ere n soe la, a bãŋɛ tɩ kãabgɔ kẽma nẽŋadõma la ẽŋɛ la sũure botɩ ba yõkɛ Azezi wa bɔ ẽ. 11La kãabgɔ kẽma nẽŋadõma la daan sa'asɛ nẽr-kʋʋŋɔ la mɛ, tɩ ba sẽŋɛ ka sose Apilatɩ tɩ a yese Abarabasɩ basɛ bɔ ba. 12Tɩ Apilatɩ le soke ba yetɩ: «Bɛla, sɛka tɩ ya wi'iri tɩ Zifdõma naba la, yãma boorɩ tɩ m ẽŋɛ ẽ na wãne?» 13Tɩ ba tɔgra ke'enke'em yetɩ: «Ka ẽ dɔ-puurŋa zuo.» 14Tɩ Apilatɩ soke ba yetɩ: «A ẽŋɛ la bẽm n de be'em?» Tɩ ba malɩn tɔgra ke'enke'em yetɩ: «Ka ẽ dɔ-puurŋa zuo.» 15La Apilatɩ daan boorɩ tɩ a ẽŋɛ tɩ nẽrba la sũure n ẽŋɛ yẽlʋm, tɩ a yese Abarabasɩ basɛ bɔ ba. Dee botɩ ba wẽ Azezi la ka'asa, dee dɩkɛ ẽ bɔ tɩ ba ka ẽ dɔ-puurŋa zuo.

Sʋdaasɩ yaalɛ Azezi

(Amatie 27:27-31, Azã 19:2-3)

16Tɩ sʋdaasɩ tarɩ Azezi kẽ gɔmna la yire zẽnzakam, dee wi sʋdaasɩ la wuu, tɩ ba lagsɛ. 17Tɩ ba dɩkɛ fuugo n de gomusga yɛ Azezi, dee dɩkɛ gõ'osɩ wʋgɛ mũŋa vuge ẽ. 18Dee yãŋa pʋ'ʋsra ẽ yetɩ: «Zifdõma naba, naa!» 19Dee dɩkɛ dasaarɛ wẽ a zuugo, tʋbsɛ nõtõorʋm mĩ ẽ, dee ka dũma tẽŋa a nẽŋam nã'asra ẽ. 20Ban yaalɛ ẽ kɩ'ɩlɩm na, ba yɛɛgɛ gomusga fuugo la mɛ, dee le yɛ ẽ a futo, tarɩ ẽ yese tɩ ba sẽŋɛ ka ka dɔ-puurŋa zuo kʋ.

Ba ka Azezi dɔ-puurŋa zuo

(Amatie 27:32-44, Aluki 23:26-43, Azã 19:17-27)

21Ban daan tarɩ Azezi wɛ'ɛsa la, ba daan tʋ'ʋsɛ la bʋraaga ayɩla yʋ'ʋrɛ n de Asimõ n ze'ele Sirɛnɩ, a de la Alɛgsãndrɩ la Arufusi sɔ. A daan ze'ele la va'am lɛmna. Tɩ sʋdaasɩ la pẽrgɛ ẽ, tɩ a to'oge Azezi kũm dɔ-puurŋa la buke. 22Ba daan tarɩ Azezi sẽŋɛ la zẽ'a tɩ ba wi'iri tɩ Golgota, a võorɛ de la zuwaŋrɛ zẽ'a. 23Ba daan dɩkɛ la dãam n gaam na tɩɩm yʋ'ʋrɛ n de miiri bɔ ẽ tɩ a yũ, tɩ a zagsɛ ka yũ. 24Tɩ ba daan ka ẽ dɔ-puurŋa zuo, dee dɩkɛ a futo tɩ ba pʋɩ taaba, pɔsɛ tɩ ba bãŋɛ nẽra woo n wʋn to'oge se'em. 25La daan de la bulika karf-awɛɩ wakatɛ tɩ ba ka ẽ dɔ-puurŋa zuo. 26Ba daan gʋlsɛ la gʋlsgɔ pa'alɛ bõn-sɛka n botɩ ba ka ẽ lablɛ dɔ-puurŋa la zuo. Ba daan gʋlsɛ yetɩ: «Zifdõma naba.» 27Ba daan tarɩ la fãarba bayi wa po ka dɔ-puursi zuto, ayɩla a zʋʋgɔ bɔba, ayẽma a gɔbga bɔba. [ 28La de la bɛla, tɩ Nawẽnnɛ gõŋɔ n gʋlsɛ se'em na ẽŋɛ. La gʋlsɛ yetɩ: «Ba geele ẽ pa'asɛ la tõon-be'ero dõma pʋam.»]

29Tɩ nẽr-sɛba n dolɩ bilam tɔlla la lɔbra ba zuto, dee tʋʋra ẽ yetɩ: «Ẽhẽe, faa! Dagɩ fõn yetɩ fõn wʋn wõrgɛ Wẽnde-kãtɛ la dee le mẽ ẽ dabsa atã pʋam? 30Fãagɛ fʋ mẽŋa dɔ-puurŋa la zuo sige.» 31Tɩ kãabgɔ kẽma nẽŋadõma, la lɔɔ karẽnsãandõma la mẽ la'ara ẽ yɛta taaba yetɩ: «A daan fãagrɩ nẽrba basɛba mɛ, dee ka tãna wʋn fãagɛ a mẽŋa. 32A sãn dɛna Krisi, Ɩsrayɛlɩ dõma naba la, a ze'ele dɔ-puurŋa la zuo sige nãnannɛ wã tɩ tɩ yẽ dee sakɛ.» Tɩ nẽr-sɛba tɩ ba ka dɔ-puursi zuto lɛm ẽ na mẽ tɔgɛ ẽ be'em.

Azezi kũm

(Amatie 27:45-56, Aluki 23:44-49, Azã 19:28-30)

33Wʋntɛɛŋa zuu-tẽŋasʋka n daan paagɛ, tɩ tẽŋa la wuu lebge lika halɩ ka paagɛ zaanõorɛ karf-atã. 34Karf-atã la wakatɛ tɩ Azezi tɔgɛ ke'enke'em yetɩ: «Eloi, Eloi, lama sabaktani.» La võorɛ de la: «Mam Wẽnnaam, mam Wẽnnaam, bẽm n soe tɩ fõn basɛ mam?» 35Tɩ sɛba n ze bilam na basɛba wõm bɛla, yetɩ: «Selse-ya, a wi'iri la A'eli.» 36Tɩ nẽra ayẽma zoe ka dɩkɛ nẽtɩŋa lʋsɛ dã-mĩ'isgo pʋam zẽkɛ la dɔɔgɔ bɔ ẽ tɩ a yũ, dee yetɩ: «Basɛ-ya tɩ tɩ gu bɩsɛ A'eli la sãn wʋn wa sike ẽ dɔ-puurŋa la zuo.» 37Tɩ Azezi le kaasɛ ke'enke'em dee yãŋa ki.

38Wakat-ẽŋa, tɩ fuugo la n yuli Wẽnde-kãtɛ la pʋam beŋe zẽ'e-sõŋɔ la ãagɛ pʋsʋka saazuum ka paagɛ tẽŋa.

39Tɩ Rom sʋdaasɩ kɛ'ɛma daan zɛ Azezi nẽŋam yẽ ẽn ki se'em, tɩ a yetɩ: «Bʋra-ẽna wã sɩrɩ de la Nawẽnnɛ Dayʋa.» 40La pɔgsɩ basɛba n mẽ daan boe mĩ zɛ kẽnkɛrŋa bɩsra. Amaari n ze'ele Magdala, la Amaari n de Azakɩ pɩka la Azoze ma, la Asalome n daan boe ba pʋam. 41Azezi n daan boe Galile la, ba daan dolɩ ẽ mɛ dee sõŋra ẽ. La pɔgsɩ basɛba zozo'e n daan lagɩm doose ẽ wa'am Zerizalɛm n boe mĩ.

Azezi laarɛ

(Amatie 27:57-61, Aluki 23:50-56, Azã 19:38-42)

42Tɩ wẽnnɛ daan bɔna mĩ kẽ'era, la daan de la beere n wʋn wiige Zifdõma vo'osgo daarɛ, tɩ ba daan bɔna mĩ mãasna. 43Tɩ bʋraa ayɩla yʋ'ʋrɛ n de Azozɛfʋ, a ze'ele la Arimate, a de la sarɩyaditba la nẽra ayɩla tɩ ba nannɩ. A mẽ daan gu'uri la Nawẽnnɛ n wʋn wa'am wa di na'am nẽrba tẽŋasʋka. Lan daan de beere n wʋn wiige vo'osgo daarɛ la ĩyã, tɩ a kɛ'ɛm sũure sẽŋɛ Apilatɩ zẽ'am ka sose Azezi kũm na. 44La Apilatɩ n wõm tɩ Azezi darɛ ki mɛ na, la di'ige ẽ mɛ. Tɩ a botɩ ba wi sʋda-kɛ'ɛma la, tɩ a soke bãŋɛ Azezi ki yuuge mɛ? 45La Apilatɩ n wõm sʋda-kɛ'ɛma la lergre la, tɩ a bɔ Azozɛfʋ sore tɩ a sike kũm na. 46Tɩ Azozɛfʋ da tãnnɛ sike kũm na dɔ-puurŋa la zuo, dɩkɛ tãnnɛ la vile ẽ, tarɩ ẽ sẽŋɛ ka laagɛ yɔɔgɔ tɩ ba daan tũ tãmpĩa ĩyã, yãŋa bilge kug-kãtɛ lige yɔɔgɔ la nõorɛ. 47Amaari n ze'ele Magdala, la Azoze ma Amaari daan ze mɛ bɩsra zẽ'e-sɛka tɩ ba bĩŋe ẽ na.

Currently Selected:

Amarkɩ 15: gurDBL

Highlight

Copy