Amarkɩ 10

Pɔka lebsgo yelle

(Amatie 19:1-12, Aluki 16:18)

1La Azezi daan ze'ele zẽ'e-ẽŋa sẽŋɛ la Zude so'olʋm, Zʋrdẽ doone ke bɔba. Tɩ nẽrba zozo'e le lagsɛ a zẽ'am, tɩ a zãsna ba wʋ ẽŋa n ẽn ɩta se'em na.

2Tɩ Farisi dõma basɛba wa'am tɩ ba di a yɛm bɩsɛ, soke ẽ yetɩ: «Bʋraa tarɩ nõorɛ tɩ a lebse a pɔga mɛ bɩɩ?» 3Tɩ a lebe soke ba yetɩ: «Amoyisi yʋʋn bɔ ya nõorɛ yetɩ bẽm?» 4Tɩ ba lerge yetɩ: «Amoyisi yʋʋn sakɛ tɩ tɩ gʋlsɛ la pɔgdire lebsgo gõŋɔ, dee tarɩ ẽ ka lebse.» 5Tɩ Azezi yele ba yetɩ: «La de la ya sũure n kɛ tɩ ya ka sakɛ pa'algɔ la ĩyã tɩ Amoyisi yʋʋn gʋlsɛ nõor-ẽŋa bɔ ya. 6La halɩ dũnia pĩ'iluŋo, Nawẽnnɛ n yʋʋn nãam nẽrsaalba la, a nãam la bʋraa la pɔka. 7Bɛla ĩyã tɩ bʋraa wʋn basɛ a sɔ, la a ma, dee lagɩm na a pɔga. 8La ba ka le dɛna bayi, ba lebge la ayɩla. 9Bɛla, sɛla tɩ Nawẽnnɛ lagɩm na taaba, nẽrsaala da welge ba.»

10La Azezi la a karẽnbiisi la kẽ la deem, tɩ ba le soke ẽ yelle ẽŋa võorɛ. 11Tɩ a yele ba yetɩ: «Bʋraa sãn lebse a pɔga dee di pɔka ayẽma, a ẽŋɛ la be'em wʋ nẽra n gã'arɩ la a tadãana pɔga. 12La pɔka mẽ sãn basɛ a sɩra dee ele bʋraa ayẽma, a mẽ ẽŋɛ la be'em wʋ a gã'arɛ la bʋraa n dagɩ a sɩra.»

Azezi kã kã'a-sõma bɔ kɔma

(Amatie 19:13-15, Aluki 18:15-17)

13Tɩ nẽrba zozo'e tarɩ kɔm-pɩgsɩ wa'am Azezi zẽ'am tɩ a dɩkɛ a nu'usi paglɛ ba zuto. Tɩ a karẽnbiisi la zɛbɛ nẽrba la. 14La Azezi n yẽ bɛla la, la ka ẽŋɛ a sũure yẽlʋm, tɩ a yele ba yetɩ: «Basɛ-ya kɔm-pɩgsɩ la tɩ ba wa'am mam zẽ'am, da gu'ura-ya ba, se'ere n soe la, Nawẽnnɛ so'olʋm de la nẽr-sɛba n ãn wʋ kɔma wã bõnɔ. 15Mam yetɩ ya la sɩra, tɩ nẽr-sɛka n ka sakɛ tɩ Nawẽnnɛ sɔna ẽ wʋ bia la, a kãn kẽ Nawẽnnɛ so'olʋm pʋam.» 16A yele bɛla, dee to'ose kɔma la mɛ, dɩkɛ a nu'usi paglɛ ba zuto kã kã'a-sõma bɔ ba.

Bõntarsa yelle

(Amatie 19:16-30, Aluki 18:18-30)

17Azezi daan basɛ bilam dee le dɩkɛ la sore sẽnna. Tɩ bʋraa zoe wa'am a zẽ'am, wa ka dũma a nẽŋam soke ẽ yetɩ: «Karẽnsãama, fõn de la nẽr-sõŋɔ, mam wʋn ẽŋɛ la wãne yẽ vɔm n ka ba'asrɩ?» 18Tɩ Azezi yele ẽ yetɩ: «Bẽm tɩ fõn wi'ira mam tɩ nẽr-sõŋɔ? Nẽra ka boe n ãn sõŋa sãn dagna Nawẽnnɛ mã'a. 19Fõn mi Nawẽnnɛ n bɔ nõorɛ tɩ ba ɩta se'em: ‹Da kʋ nẽra, da gã'arɛ la fʋ tadãana pɔga, da zũ, da tɔgɛ põmpɔrŋɔ kaseto, da wẽgɛ nẽra, nanna fʋ sɔ, la fʋ ma.› » 20Tɩ bʋraa la lerge ẽ yetɩ: «Karẽnsãama, halɩ mam bõnbɩ'ɩlʋm tɩ mam põn sakra bõn-bãma wuu.» 21Tɩ Azezi bɩsɛ ẽ nõŋɛ ẽ, dee yele ẽ yetɩ: «Sɛla ayɩla n deege dɛna fʋ ẽŋɛ: Sẽŋɛ ka koose fõn tarɩ sɛla la wuu dɩkɛ ligri la bɔ nasdõma, tɩ fʋ wʋn yẽ bõntarsõm Nawẽnnɛ yire, dee wa'am wa dɔla mam.» 22La ẽn wõm wãna la, tɩ a nẽŋa zũŋe tɩ a fõrgɛ la sũ-sã'aŋɔ, se'ere n soe la, a tarɩ la bõntarsõm zo'oge.

23Tɩ Azezi bɩsɛ a karẽnbiisi la kaagɛ, dee yele ba yetɩ: «La tɔ mɛ bɔ bõntatba tɩ ba kẽ Nawẽnnɛ so'olʋm pʋam.» 24Tɩ a yetɔga la di'ige a karẽnbiisi la. Tɩ Azezi le yele ba yetɩ: «M kɔma, la tɔ mɛ tɩ nẽra kẽ Nawẽnnɛ so'olʋm pʋam. 25La de la nãana tɩ yʋgnɛ doose fupĩim yoko pʋam yese, gãnna bõntarsa n wʋn kẽ Nawẽnnɛ so'olʋm pʋam.»

26Tɩ la di'ige ba halɩ zozo'e, tɩ ba sɔkra taaba yetɩ: «La sãn dɛna bɛla, ãne n wʋn tã'agɛ yẽ fãarɛ?» 27Tɩ Azezi bɩsra ba dee yetɩ: «Nẽrsaala ka tã wʋn ẽŋɛ bõn-ẽna, la Nawẽnnɛ tã wʋn ẽŋɛ mɛ. Se'ere n soe la, Nawẽnnɛ tã sɛla woo ɩta mɛ.»

28Tɩ Apɩyɛɛrɩ yele ẽ yetɩ: «Tõma basɛ sɛla woo mɛ dee dɔla fõn.» 29Tɩ Azezi yele yetɩ: «Mam yetɩ ya la sɩra, tɩ nẽr-sɛka n basɛ a yire, bɩɩ a kẽendõma, la a yɩbsɩ, bɩɩ a ma, bɩɩ a sɔ, bɩɩ a kɔma, bɩɩ a vatɔ mam ĩyã, la Nawẽnnɛ kõ-yẽlga la ĩyã, 30dũnia wã zuo a wʋn to'oge yiɛ, la kẽendõma, la yɩbsɩ, la madõma, la kɔma, la vatɔ nõor-kɔbga, la a wʋn yẽ nãmsgɔ. La wakatɛ n sẽm, a wʋn yẽ vɔm n ka ba'asrɩ. 31La nẽŋam dõma zozo'e wʋn lebge poorʋm dõma, tɩ poorʋm dõma lebge nẽŋam dõma.»

Azezi le tɔgɛ a kũm, la a vo'ore yelle

(Amatie 20:17-19, Aluki 18:31-34)

32Ba daan boe la sore wɛ'ɛsa Zerizalɛm, tɩ Azezi bɔna ba nẽŋa. Tɩ a karẽnbiisi la palẽŋa ẽgra, dee tɩ dabeem tara nẽr-sɛba n daan dolɩ ba la. Tɩ Azezi le tarɩ a karẽnbiisi pia la ayi la sẽŋɛ ka tɔgra pa'ala ba bõn-sɛba n wʋn wa ẽŋɛ ẽŋa, 33yetɩ: «Ya yẽ ya, tɩ we'esɩ la Zerizalɛm, bilam tɩ ba wʋn dɩkɛ Nẽrsaala Dayʋa la ka ẽŋɛ Nawẽnnɛ kãabgɔ kẽma nẽŋadõma, la lɔɔ karẽnsãandõma nu'usum. Tɩ ba wʋn tɔgɛ a yelle kʋ yetɩ a masɛ la kũm, dɩkɛ ẽ ẽŋɛ bu-zãŋsɩ nu'usum, 34tɩ ba la ẽ, dee tʋbsɛ nõtõorʋm mĩ ẽ, wẽ ẽ na ka'asa dee kʋ ẽ. La a wʋn vo'oge dabsa atã daarɛ.»

Azakɩ la Azã sosgo

(Amatie 20:20-28)

35Tɩ Azebede kɔma Azakɩ la Azã sẽŋɛ lɛm Azezi yele ẽ yetɩ: «Karẽnsãama, tõma boorɩ la tõma n wʋn sose fõn bõn-sɛka la, fʋ ẽŋɛ bɔ tɔ.» 36Tɩ a soke ba yetɩ: «Yãma boorɩ tɩ m ẽŋɛ la bẽm bɔ ya?» 37Tɩ ba lerge ẽ yetɩ: «Fʋ sãn wa dita fʋ na'am na, botɩ tõma nẽra ayɩla zĩ'ire fʋ zʋʋgɔ, tɩ ayɩla zĩ'ire fʋ gɔbga.» 38Tɩ Azezi lerge ba yetɩ: «Ya ka mi yãma n sosrɩ sɛla. Ya wʋn tã'agɛ nãmsɛ nãmsgɔ sɛka tɩ mam nãmsrɩ wã, bɩɩ ya wʋn tã'agɛ nãmsɛ wʋ mam n sakɛ tɩ m nãmsɛ se'em na halɩ ka ki?» 39Tɩ ba yele ẽ yetɩ: «Tɩ wʋn tã'agɛ ẽŋɛ bɛla.» Tɩ Azezi lebe yele ba yetɩ: «Asɩra, ya wʋn nãmsɛ nãmsgɔ sɛka tɩ mam nãmsrɩ wã halɩ ka ki. 40La, la dagɩ mam n wʋn looge sɛka n wʋn zĩ'ire mam zʋʋgɔ bɩɩ mam gɔbga. Nawẽnnɛ mãasʋm zẽ'e-bãma tɩ a bɔ la nẽr-sɛba tɩ a yetɩ a bɔ la.»

41La karẽnbiisi pia la n wõm bɛla la, ba sũure n isge la Azakɩ la Azã. 42Tɩ Azezi wi ba wuu, yele ba yetɩ: «Ya mi tɩ dũnia wã na'adõma soe ba nẽrba la pãŋa, dee tɩ kɛ'ɛndõma pẽrgra nẽrba tɩ ba ɩta bãma n boorɩ se'em. 43La yãma pʋam, la kãn dɛna bɛla. Nẽr-sɛka n boe ya pʋam bɔɔra tɩ a lebge nẽr-keko, la masɛ mɛ tɩ a dɛna ya tõntõnna. 44La nẽr-sɛka n boorɩ tɩ a dɛna nẽŋadãana ya pʋam, la masɛ mɛ tɩ a dɛna ya wuu yamŋa. 45Se'ere n soe la, Nẽrsaala Dayʋa la ka wa'am tɩ nẽrba tõm bɔ ẽ, a wa'am tɩ a tõm mɛ bɔ, dee dɩkɛ a vɔm bɔ tɩ nẽrba zozo'e yẽ fãarɛ.»

Azezi botɩ Abartime nini yẽta

(Amatie 20:29-34, Aluki 18:35-43)

46Azezi la a karẽnbiisi la daan sẽŋɛ ka paagɛ dɔla la Zeriko tẽŋa pʋam tɔlla, la ban daan ze'ele tẽŋa la pʋam yɛsra la, nẽr-kʋʋŋɔ n dolɩ ba. Tɩ fʋa zẽa sore nõorʋm sɔsra, a yʋ'ʋrɛ de la Abartime, a de la Atime dayʋa. 47La ẽn wõm tɩ ba tɔgrɩ tɩ la de la Azezi n ze'ele Nazarɛtɩ la, tɩ a tĩi tɔgra yetɩ: «Azezi, Adavidi yɩɩŋa, zoe m ninbãalga.» 48Tɩ nẽrba zozo'e tãsɛ ẽ yetɩ: «Go'oge fʋ yetɔga la.» Tɩ a malɩn tĩi tɔgɛ yetɩ: «Adavidi yɩɩŋa, zoe m ninbãalga.» 49Tɩ Azezi ze'ele dee yetɩ: «Wi-ya ẽ tɩ a wa'am.» Tɩ ba wi ẽ yele ẽ yetɩ: «Keŋe fʋ sũure, isge tɩ a wi'iri fo.» 50Tɩ a lobe a fugɔbga basɛ, dee vaa isge sẽŋɛ Azezi zẽ'am. 51Tɩ Azezi soke ẽ yetɩ: «Fõn boorɩ tɩ m ẽŋɛ la bẽm bɔ fɔ?» Tɩ a yetɩ: «M Zuudãana, mam boorɩ tɩ m le yẽta mɛ.» 52Tɩ Azezi yele ẽ yetɩ: «Sẽŋɛ, fõn bɔ mam sɩra la ĩyã tɩ fʋ yẽ laafɛ.» Tɩ fʋa la yẽta bilam mẽŋa, dɔla Azezi sore la zuo.

Currently Selected:

Amarkɩ 10: gurDBL

Highlight

Copy