Amarkɩ 9

1La a le yele ba yetɩ: «Mam yetɩ ya la sɩra, tɩ yãma nẽr-sɛba n boe kalam wã, basɛba kãn ki, sãn dagna tɩ ba wa yẽ la Nawẽnnɛ so'olʋm n sẽm na pãŋa.»

Azezi nẽŋa teere

(Amatie 17:1-13, Aluki 9:28-36)

2Tɩ dabsa ayoobɩ daan tole, tɩ Azezi botɩ Apɩyɛɛrɩ, la Azakɩ, la Azã mã'a doose ẽ tɩ ba sẽŋɛ kẽnkɛrŋa ka zom tãn-kãtɛ zuo. Tɩ a nẽŋa teege ba nẽŋam. 3Tɩ a futo pelge yɩlɩ yɩlɩ yẽgra halɩ, tɩ nẽra ka bɔna dũnia wã zuo tãna wʋn peege tɩ ba pelge bɛla. 4Tɩ A'eli, la Amoyisi puke ba zẽ'am tɔgra la Azezi. 5Tɩ Apɩyɛɛrɩ yele Azezi yetɩ: «Karẽnsãama, tõma n boe kalam wã, la ãn sõŋa mɛ. Basɛ tɩ tɩ tĩ põnsɩ batã, bɔ fõn ayɩla, bɔ Amoyisi ayɩla, bɔ A'eli ayɩla.» 6A daan ka mi ẽŋa n tɔgɛ se'em, se'ere n soe la, dabeem n daan kẽ ba. 7Tɩ sawatɛ wa'am wa lile ba la a mã'asʋm. Tɩ kõa ze'ele sawatɛ la pʋam yetɩ: «Ẽna de la mam Dayʋa tɩ mam nõŋɛ. Selse-ya a yetɔga.» 8Bilam mẽŋa tɩ ba bɩsɛ kaagɛ ka le yẽ nẽra, sãn dagna Azezi mã'a n boe ba zẽ'am.

9Tɩ ba ze'ele tãŋa la zuo sigra, tɩ Azezi kã'an ba yetɩ: «Da tɔgɛ-ya pa'alɛ nẽra nẽra yãma n yẽ sɛla la, sãn dagna tɩ Nẽrsaala Dayʋa la wa ki mɛ, dee vo'oge.» 10Tɩ ba to'oge ẽn yele se'em na, dee sɔkra taaba yetɩ: «Kũm vo'ore võorɛ de la bẽm?» 11Tɩ ba soke Azezi yetɩ: «Bẽm tɩ lɔɔ karẽnsãandõma yetɩ, dẽnɩ tɩ A'eli dẽŋɛ wa'am, tɩ Krisi yãŋa wa'am poorʋm?» 12Tɩ a lerge ba yetɩ: «Asɩra, A'eli n wʋn dẽŋɛ wa'am wa malgɛ sɛla woo. La bẽm tɩ la gʋlsɛ Nẽrsaala Dayʋa la yelle yetɩ, a wʋn nãmsɛ mɛ zozo'e dee yẽ pɔ'ɔrɛ? 13La mam yetɩ ya mɛ tɩ A'eli põn wa'am mɛ, tɩ nẽrba ẽŋɛ ẽ ban boorɩ se'em, wʋ lan gʋlsɛ a yelle Nawẽnnɛ gõŋɔ pʋam se'em na.»

Kʋlkã'arga n dolɩ bia, tɩ Azezi dige ẽ tɩ a yese

(Amatie 17:14-21, Aluki 9:37-43)

14Ban lebe ka lɛm karẽnbiisi basɛba la zẽ'am na, ba yẽ la nẽr-kʋʋŋɔ zozo'e n kaagɛ ba, tɩ lɔɔ karẽnsãandõma basɛba wẽ'era nõkɛ'ɛma la ba. 15La nẽrba la n daan yẽ Azezi la, la di'ige ba mɛ, tɩ ba zoe ka pʋ'ʋsɛ ẽ. 16Tɩ Azezi soke ba yetɩ: «Bẽm yelle tɩ yãma wẽ'era nõke'ene la ba?»

17Tɩ nẽra ayɩla ze'ele nẽr-kʋʋŋɔ la tẽŋasʋka yele yetɩ: «Karẽnsãama, mam tarɩ la m dayʋa wa'am fõn zẽ'am, kʋlkã'arga n dolɩ ẽ botɩ a dɛna muko. 18La kʋlkã'arga la sãn ẽn girge ẽ, a lʋbrɩ ẽ mɛ tɩ nõtõn-fulunfuka yɛsra, tɩ a ɔbra yẽna dee gorŋe. Bɛla tɩ mam tarɩ ẽ wa'am wa sose fʋ karẽnbiisi la yetɩ ba dige kʋlkã'arga la tɩ a yese, tɩ ba ka yãŋɛ.»

19Tɩ Azezi yele ba yetɩ: «Zamãan-ẽna nẽrba, ya ka bɔ'ɔrɩ mam sɩra, mam wʋn bɔna la yãma mã'agɛ m mẽŋa halɩ ka paagɛ la wakat-kãna? Tarɩ-ya bia la wa'am.» 20Tɩ ba tarɩ ẽ wa'am a zẽ'am. La kʋlkã'arga la n yẽ Azezi la, bilam mẽŋa a dãan bia la mɛ, tɩ a lui tẽŋa bilna, tɩ nõtõn-fulunfuka yɛsra a nõorʋm. 21Tɩ Azezi soke bia la sɔ yetɩ: «Wakat-kãna tɩ bõn-ẽna ẽŋɛ ẽ?» Tɩ a lerge yetɩ: «A bõnbɩ'ɩlʋm. 22La kʋlkã'arga la ẽn lʋbɛ ẽ na bugum, bɩɩ ko'om pʋam, bɔɔra tɩ a kʋ ẽ. Fʋ sãn tãna wʋn ẽŋɛ sɛla, zoe tɩ ninbãalga sõŋɛ tɔ.» 23Tɩ Azezi lerge ẽ yetɩ: «Bẽm tɩ fʋ yetɩ, fõn sãn tãna? Nẽr-sɛka woo n bɔ Nawẽnnɛ sɩra, a tã wʋn ẽŋɛ sɛla woo bɔ ẽ mɛ.» 24Bilam mẽŋa tɩ bia la sɔ tɔgɛ ke'enke'em yetɩ: «Mam bɔ sɩra, la sõŋɛ mam tɩ m bɔ sɩra pa'asɛ.»

25La Azezi daan yẽ tɩ nẽr-kʋʋŋɔ n zotɩ sẽna a zẽ'am, tɩ a tãsɛ kʋlkã'arga la yetɩ: «Kʋlkã'arga n botɩ nẽra dɛna muko la waŋa, mam yetɩ fʋ yese dee basɛ ẽ, da le doose ẽ.» 26Tɩ kʋlkã'arga la kaasɛ tagurga, dee bigse bia la ke'enke'em, dee yese. Tɩ bia la ãna wʋ kũm na. Tɩ nẽrba zozo'e yetɩ a ki mɛ. 27Tɩ Azezi gʋrɛ a nu'ugo zẽkɛ ẽ, tɩ a isge ze'ele saazuo.

28La Azezi daan kẽ la deem, ẽŋa la a karẽnbiisi la mã'a, tɩ ba soke ẽ yetɩ: «Bẽm tɩ tõma ka tã'agɛ dige kʋlkã'ar-ẽna?» 29Tɩ a lerge ba yetɩ: «Sãn dagna pʋ'ʋsgɔ, sɛla sɛla ka boe n tã wʋn dige kʋlkã'ar-ẽna buuri.»

Azezi le tɔgɛ a kũm, la a vo'ore yelle

(Amatie 17:22-23, Aluki 9:43-45)

30La ba daan yese bilam doose la Galile tẽŋa tole. La Azezi daan ka boorɩ tɩ nẽra bãŋɛ ẽŋa n boe zẽ'a. 31A daan zãsʋm a karẽnbiisi la yetɩ: «Ba wʋn dɩkɛ Nẽrsaala Dayʋa la ẽŋɛ la nẽrba nu'usum, tɩ ba kʋ ẽ. La ba sãn kʋ ẽ, dabsa atã daarɛ a wʋn vo'oge mɛ.» 32Tɩ ba daan ka bãŋɛ yetɔga la võorɛ, dee zɔta ka soke ẽ.

Ãne n wʋn dɛna nẽr-kãtɛ?

(Amatie 18:1-9, Aluki 9:46-50;17:1-2)

33Tɩ ba sẽŋɛ ka paagɛ Kapɛrnaʋm kẽ deem. Tɩ Azezi soke a karẽnbiisi la yetɩ: «Bẽm yelle tɩ yãma wẽ'erɩ nɩ nõke'ene sore zuo la?» 34Tɩ ba sĩna, se'ere n soe la, ba wẽ'erɩ la nõke'ene la taaba bɔɔra tɩ ba bãŋɛ sɛka n de nẽr-kãtɛ gãnna. 35Tɩ Azezi zĩ'ire, wi a karẽnbiisi pia la ayi la yele ba yetɩ: «Nẽra sãn bɔɔra tɩ a dɛna nẽŋadãana, dẽnɩ tɩ a dɛna poorʋm dãana, la nẽrba wuu tõntõnna.» 36Azezi yele bɛla dee tarɩ la bi-pɩka wa ze'ele ba tẽŋasʋka, dɩkɛ a nu'usi kɔkɛ bia la, dee yele ba yetɩ: 37«Nẽra sãn to'oge bi-pɩka ẽna tadãana mam yʋ'ʋrɛ ĩyã, a to'oge la mam mẽŋa, la nẽra sãn to'oge mam mẽŋa, la dagɩ mam tɩ a to'oge, a to'oge la sɛka n tõm mam na.»

38Tɩ Azã yele ẽ yetɩ: «Karẽnsãama, tõma daan yẽ la bʋraa n tarɩ fõn yʋ'ʋrɛ digra kʋlkã'arsɩ, la ẽŋa n ka po dɛna tõma nẽra la ĩyã tɩ tõma gu ẽ.» 39Tɩ Azezi yele ba yetɩ: «Da gu-ya ẽ, se'ere n soe la, nẽra ka boe wʋn tõm tõon-yãlma la mam yʋ'ʋrɛ, dee tɩ la ẽŋɛ fẽe tɩ a le tã'agɛ tɔgɛ mam be'em. 40Nẽr-sɛka n ka sisri tõma, a de la tõma nẽra. 41Mam yetɩ ya la asɩra, tɩ nẽra sãn bɔ ya ko'om tɩ ya yũ, yãma n de mam n de Krisi nẽrba la ĩyã, ẽŋa dãana kãn koŋe a yɔɔrɔ.

42La nẽra sãn botɩ kɔm-pɩgsɩ bãna wã n bɔ mam sɩra la ayɩla basɛ Nawẽnnɛ sore, sɩbgrɛ sɛka tɩ a wʋn yẽ la, ba sãn dɩkɛ nẽerɛ kug-kãtɛ lʋ yulse a yugla lobe ẽ basɛ ko-kãtɛ pʋam n sõɩ. 43La fʋ nu'ugo sãn yetɩ a botɩ fʋ basɛ Nawẽnnɛ sore, fʋ wike ẽ basɛ, se'ere n soe la, fʋ sãn tara nu'u-yẽŋɔ dee kẽ Nawẽnnɛ yire vɔa, n sõɩ fõn wʋn tara nu'usi bayi dee kẽ bug-tẽŋa, [ 44zẽ'e-ẽŋa tɩ zũnzũa boe mĩ dita nẽrba ĩyã ka kiira, dee tɩ bugum na ka kĩŋra.] 45La fʋ nã'arɛ sãn yetɩ a botɩ fʋ basɛ Nawẽnnɛ sore, fʋ wike ẽ basɛ, se'ere n soe la, fʋ sãn tara nã'a-yẽŋɔ dee kẽ Nawẽnnɛ yire vɔa, n sõɩ fõn wʋn tara nãma bayi dee tɩ ba dɩkɛ fʋ lobe basɛ bug-tẽŋa, [ 46zẽ'e-ẽŋa tɩ zũnzũa boe mĩ dita nẽrba ĩyã ka kiira, dee tɩ bugum na ka kĩŋra.] 47La fʋ nifo sãn yetɩ a botɩ fʋ basɛ Nawẽnnɛ sore, fʋ kɩrgɛ ẽ basɛ, se'ere n soe la, fʋ sãn tara nin-yẽŋɔ dee kẽ Nawẽnnɛ so'olʋm, n sõɩ fõn wʋn tara nini bayi dee tɩ ba lobe fʋ basɛ bug-tẽŋa, 48zẽ'e-ẽŋa tɩ zũnzũa boe mĩ dita nẽrba ĩyã ka kiira, dee tɩ bugum na ka kĩŋra.

49Ba wʋn dɩkɛ la bugum makɛ nẽrba wuu wʋ ban dɩkɛ yaarʋm yugse sɛla. 50Yaarʋm ãn sõŋa mɛ, la yaarʋm sãn sabgɛ, ba wʋn ẽŋɛ la wãne botɩ a le ãna yẽlʋm?

Ãna-ya wʋ yaarʋm n tarɩ yẽlʋm se'em na, dee tara sũ-mã'asʋm la taaba.»

Currently Selected:

Amarkɩ 9: gurDBL

Highlight

Copy