Amarkɩ 8

Azezi le bɔ nẽr-kʋʋŋɔ dia

(Amatie 15:32-39)

1Dabs-bãma pʋam nẽr-kʋʋŋɔ n daan le lagsɛ, tɩ dia ka bɔna tɩ ba wʋn di. Tɩ Azezi wi a karẽnbiisi la yele ba yetɩ: 2«Nẽr-kʋʋŋɔ wã ninbãalga n tarɩ mam, se'ere n soe la, dabsa atã tɩ ba boe mam zẽ'am dee ka tara dia wʋn di. 3Mam sãn basɛ ba tɩ ba kule ba yiɛ la kɔm, ba wʋn ka vibe mɛ sore, se'ere n soe la, basɛba ze'ele la zẽ'a n zãagɛ wa'am.» 4Tɩ a karẽnbiisi la lerge ẽ yetɩ: «Tɩ wʋn ẽŋɛ la wãne tã'agɛ yẽ dia tɩ la seke nẽr-bãna wuu, zẽ'e-ẽna n de mõom wã?» 5Tɩ Azezi soke ba yetɩ: «Yãma tarɩ la borborɩ balɛ?» Tɩ ba lerge yetɩ: «Bayopɔɩ.»

6Tɩ a botɩ nẽrba la zĩ'ire tẽŋa. Dee dɩkɛ borborɩ bayopɔɩ la pʋ'ʋsɛ Nawẽnnɛ, dee fiise bɔ a karẽnbiisi la tɩ ba pʋɩ nẽrba la. Tɩ ba pʋɩ nẽr-kʋʋŋɔ la. 7La ba daan tarɩ la zũn-pɩgsɩ mẽ fẽe. Tɩ Azezi pʋ'ʋsɛ Nawẽnnɛ zũma la ĩyã, dee botɩ a karẽnbiisi la dɩkɛ pʋɩ nẽrba la. 8Tɩ nẽrba la daan di tɩgɛ. Dee tɩ a karẽnbiisi la vaagɛ dia n weege pɩrɛ pɩtɔ bayopɔɩ. 9Nẽrba la n daan di dia la, bʋraasɩ de wʋ tʋsanaasɩ. Tɩ Azezi daan botɩ ba kule, 10dee tɩ ẽŋa la a karẽnbiisi la kẽ õorŋɔ sẽŋɛ Dalmanuta so'olʋm.

Farisi dõma pʋlibsum yelle

(Amatie 16:1-12)

11Tɩ Farisi dõma daan wa'am wa wẽ'era nõke'ene la Azezi, yetɩ ba makɛ ẽ bɩsɛ, yele ẽ yetɩ, a botɩ bõn-yãlma ze'ele saazuo ẽŋɛ n pa'alɩ tɩ ẽŋa ze'ele la Nawẽnnɛ yire. 12Tɩ Azezi sĩ'im vo'ose fõo, dee soke yetɩ: «Bẽm tɩ zamãana ẽna nẽrba ɛɛra bõn-yãlma? Mam yetɩ ya la sɩra, tɩ mam kãn botɩ bõn-yãlma n pa'alɛ bɛla ẽŋɛ tɩ zamãana ẽna yẽ.»

13La Azezi basɛ ba mɛ dee le kẽ õorŋɔ dɔɔra mõgrɛ la doone ke bɔba. 14Tɩ a karẽnbiisi la daan yĩm ka dɩkɛ borborɩ, sãn dagna borborɩ ayɩla mã'a tɩ ba tarɩ õorŋɔ la pʋam. 15Tɩ Azezi kã'an ba yetɩ: «Guuse-ya ya mẽŋa la Farisi dõma, la naba A'erɔdɩ dãbɩllɛ la.» 16Tɩ karẽnbiisi la tɔgra la taaba yetɩ: «Tõma n ka tarɩ borborɩ la ĩyã tɩ a yele bɛla.» 17Tɩ Azezi daan bãŋɛ, soke ba yetɩ: «Bẽm tɩ ya tɔgra la taaba tɩ la de la yãma n ka tarɩ borborɩ la ĩyã? Yãma ka wõm a võorɛ? Yãma yɛm ka like? 18Yãma tarɩ la nini dee ka yẽta? Ya tarɩ la tʋba dee ka wõnna? Yãma ka tẽrɩ? 19Mam n daan fiise borborɩ banuu la bɔ bʋraasɩ tʋsanuu tɩ ba di la, borborɩ gito n deege la, pɩtɔ balɛ tɩ yãma daan vaagɛ?» Tɩ ba lerge ẽ yetɩ: «Pɩtɔ pia la ayi.» Tɩ a le soke ba yetɩ: 20«La mam n daan fiise borborɩ bayopɔɩ la pʋɩ bʋraasɩ tʋsanaasɩ la, yãma daan vaagɛ sɛba n deege la pɩtɔ balɛ?» Tɩ ba lerge yetɩ: «Pɩtɔ bayopɔɩ.» 21Tɩ a soke ba yetɩ: «Yãma nãn ka wõm a võorɛ?»

Azezi botɩ fʋa nini yẽta

22Azezi la a karẽnbiisi la daan sẽŋɛ la Betisayida. Tɩ ba tarɩ fʋa wa'am Azezi zẽ'am wa belem ẽ yetɩ a kalʋm ẽ. 23Tɩ Azezi gʋrɛ fʋa la nu'ugo ve'ege ẽ tẽŋa la pʋam yese kẽnkɛrŋa, ka tʋbsɛ nõtõorʋm ẽŋɛ a nini, dee dɩkɛ a nu'usi paglɛ a zuo, soke ẽ yetɩ: «Fõn yẽtɩ sɛla mɛ bɩɩ?» 24Tɩ bʋraa la dɔ'ɔgɛ zuugo bɩsɛ, yetɩ: «Mam yẽtɩ nẽrba tɩ ba ãna wʋ tɩɩsɩ la, la ba sẽnnɩ mɛ.» 25Tɩ Azezi le dɩkɛ a nu'usi kalʋm fʋa la nini. Tɩ a nini pike yɩlɩŋɛ, tɩ a yẽta sɛla woo sõŋa sõŋa. 26Tɩ Azezi basɛ ẽ yetɩ a kule, a da le kẽ tẽŋa la pʋam.

Apɩyɛɛrɩ pa'alɛ Azezi n de nẽr-sɛka

(Amatie 16:13-20, Aluki 9:18-21)

27La Azezi la a karẽnbiisi la daan we'esɩ la tẽnsɩ n lɛm tẽŋa yʋ'ʋrɛ n de Filipi Sezaare. La ban boe sore wɛ'ɛsa la, tɩ a soke ba yetɩ: «Nẽrba yetɩ mam de la ãne?» 28Tɩ ba lerge yetɩ: «Sɛba yetɩ fõn de la Azã n daan misri nẽrba ko'om pʋam na. Tɩ basɛba yetɩ fõn de la Nawẽnnɛ nõtɔ'ɔsa A'eli. Tɩ sɛba yetɩ fõn de la Nawẽnnɛ nõtɔ'ɔsrɩba n yʋʋn boe la nẽra ayɩla.» 29Tɩ a soke ba yetɩ: «La yãma yetɩ mam de la ãne?» Tɩ Apɩyɛɛrɩ lerge yetɩ: «Fõn de la Krisi tɩ Nawẽnnɛ tõm na.» 30Tɩ Azezi kã'an ba yetɩ, ba da tɔgɛ ẽŋa yelle bɔ nẽra nẽra.

Azezi dẽŋɛ tɔgɛ a nãmsgɔ, la a kũm yelle

(Amatie 16:21-28, Aluki 9:22-27)

31Tɩ Azezi yãŋa zãsna a karẽnbiisi la, yele ba yetɩ: «Dẽnɩ tɩ mam n de Nẽrsaala Dayʋa la nãmsɛ zozo'e. Tẽŋa wã kẽma, la kãabgɔ kẽma nẽŋadõma, la lɔɔ karẽnsãandõma nifo wʋn kẽ mam mɛ, tɩ ba kʋ mam, la dabsa atã daarɛ mam wʋn vo'oge mɛ.» 32A daan tɔgɛ ba la vẽelga vẽelga. Tɩ Apɩyɛɛrɩ wi ẽ yese kẽnkɛrŋa ka yele ẽ yetɩ, a da le tɔgɛ bɛla. 33Tɩ Azezi gelge bɩsɛ a karẽnbiisi la, dee tãsɛ Apɩyɛɛrɩ yetɩ: «Asũtãana, sẽŋɛ lebe mam poorʋm, se'ere n soe la, fʋ tẽ'esgɔ la dagɩ Nawẽnnɛ tẽ'esgɔ, la de la nẽrsaala tẽ'esgɔ.» 34Dee wi nẽr-kʋʋŋɔ la, la a karẽnbiisi la a zẽ'am, yele ba yetɩ: «Nẽra sãn bɔɔra tɩ a doose mam, dẽnɩ tɩ a basɛ a mẽŋa n boorɩ se'em, dee sakɛ nãmsgɔ daarɛ woo wʋ nẽra n buke a kũm dɔ-puurŋa dɔla mam. 35Nẽr-sɛka woo n boorɩ tɩ a gu a vɔm, a wʋn koŋe ẽ. La nẽr-sɛka woo n sakɛ tɩ a koŋe a vɔm mam ĩyã, la kõ-yẽlga la ĩyã, a wʋn yẽ vɔm. 36Nẽra sãn yẽ dũnia sɛla woo dee koŋe vɔm Nawẽnnɛ zẽ'am, a yõorɔ de la bẽm? 37Bẽm tɩ nẽrsaala wʋn dɩkɛ teege vɔm? Sɛla kaɩ. 38Nẽr-sɛka n zoe yãnnɛ mam ĩyã, la mam yetɔga la ĩyã, zamãana ẽna wã n ka dolɩ Nawẽnnɛ la sɩra, dee dɛna tõon-be'ero dõma wã tẽŋasʋka, Nẽrsaala Dayʋa la mẽ wʋn zoe yãnnɛ na ẽ, wakat-sɛka tɩ a wʋn leme wa'am la a Sɔ Nawẽnnɛ na'am pãŋa, la a malɛkadõma la.»

Currently Selected:

Amarkɩ 8: gurDBL

Highlight

Copy