Amarkɩ 7

Yaabdõma zãsŋɔ, la bõn-sɛba n botɩ nẽra dɛna dẽgrɔ

(Amatie 15:1-20)

1Farisi dõma, la lɔɔ karẽnsãandõma basɛba n ze'ele Zerizalɛm daan wa'am wa lagsɛ Azezi zẽ'am, 2yẽ tɩ a karẽnbiisi la basɛba diti la nu'usi n ka ãn sõŋa, la boorɩ tɩ la yetɩ ba ka peege nu'usi wʋ Zifdõma sisgo n yetɩ ba ɩta se'em na.

3Farisi dõma, la Zifdõma wuu sãn ka wobse nu'usi wʋ ba yaabdõma malŋɔ la, ba ka diti. 4Ba sãn ze'ele da'am wa'am, ba wʋn peege ba mẽŋa mɛ dee di. La malŋɔ basɛba zozo'e tɩ ba ɩtɩ, la de la wama, la yɔa, la kuto laasɩ peere.

5Tɩ Farisi dõma, la lɔɔ karẽnsãandõma la soke Azezi yetɩ: «Bẽm tɩ fõn karẽnbiisi la ka sakra tɩ yaabdõma malŋɔ la, dita dia la nu'usi n ka ãn sõŋa?» 6Tɩ Azezi lerge ba yetɩ: «A'ezayi n yʋʋn to'oge Nawẽnnɛ yetɔga la tɔgɛ ya yelle la, a tarɩ bʋʋrɔ, yãma de la pʋlibsum dõma wʋ lan gʋlsɛ se'em na. La gʋlsɛ tɩ Nawẽnnɛ yetɩ:

‹Nẽr-bãna pẽgrɩ mam na nõorɛ yetɔga,

la ba sũure la zãagɛ la mam mɛ.

7Ban nã'asrɩ mam na,

la de la zãŋa.

Se'ere n soe la, ba zãsnɩ la zãsŋɔ n de nẽrsaalba nõorɛ.›

8Ya basɛ Nawẽnnɛ nõorɛ mɛ dee dɔla nẽrsaalba malŋɔ.»

9Azezi le yele ba yetɩ: «Ya sɩrɩ zagsɛ Nawẽnnɛ lɔɔ mɛ, dee tɩ ya dɔla ya mẽŋa malŋɔ. 10Amoyisi yʋʋn yetɩ: Nanna fʋ sɔ, la fʋ ma. Dee le yetɩ: Nẽr-sɛka sãn tɔgɛ a sɔ bɩɩ a ma be'em, dẽnɩ tɩ ba kʋ ẽ. 11La yãma yetɩ: Nẽra sãn yele a sɔ, bɩɩ a ma yetɩ: Mam n tarɩ bõn-sɛba tɩ m sõŋɛ fʋ la de la ‹Kɔrbã›, (a võorɛ de la ‹Nawẽnnɛ bõnɔ›), 12la ka le masɛ tɩ a ɩta sɛla bɔ'ɔra a sɔ, la a ma. 13Yãma mẽŋa malŋɔ la tɩ ya zãsnɩ nẽrba la, botɩ ya basɛ tɩ Nawẽnnɛ yetɔga la dɛna la zãŋa. La bõnɔ zozo'e n wõm na bɛla tɩ ya ɩtɩ.»

14La Azezi le wi la nẽr-kʋʋŋɔ, tɩ ba wa'am a zẽ'am, tɩ a yele ba yetɩ: «Yãma wuu, selse-ya mam sõŋa wõm a võorɛ. 15Sɛla n ze'etɩ yẽŋa kẽ'erɩ nẽrsaala pʋʋrʋm ka tã wʋn botɩ a dɛna dẽgrɔ. Bõn-sɛka n ze'etɩ nẽrsaala pʋam yɛsra n botɩ a dɛna dẽgrɔ. [ 16Sɛka n wõm yetɔga wã, a selse sõŋa sõŋa.]»

17La a daan ze'ele nẽrba la zẽ'am kẽ la deem. Tɩ a karẽnbiisi la soke ẽ makrɛ la võorɛ. 18Tɩ a yele ba yetɩ: «Yãma yɛm mẽ ka like? Yãma ka bãŋɛ tɩ sɛla n ze'etɩ yẽŋa kẽ'era nẽrsaala pʋʋrʋm ka tã wʋn botɩ a dɛna dẽgrɔ? 19Se'ere n soe la, bõn-bãma ka kẽ'erɩ sũure pʋam, ba kẽ'erɩ la pʋʋrɛ pʋam tɩ ba yẽ'era ba basra.» (Azezi n daan yele bɛla la, a boorɩ tɩ a yetɩ dia ka bɔ'ɔrɩ dẽgrɔ, nẽra tã wʋn di dia wuu mɛ.) 20Dee daan le yetɩ: «La de la bõn-sɛka n ze'etɩ nẽrsaala pʋam yɛsra n botɩ a dɛna dẽgrɔ. 21Se'ere n soe la, pʋtẽ'e-yooro ze'etɩ la nẽrsaala sũure pʋam botɩ a bɔɔra tɩ a ẽŋɛ be'em: yalsɩ, la nayigum, la nẽr-kʋa, 22la taaba pɔgba la taaba sɩrba gã'a, la nẽra n nõŋɛ bõnɔ, la pʋtʋʋlgɔ, la yɛmkẽgsɩga, la tõon-dẽgrɔ, la nẽra n ɩtɩ sũure la a tadãana bõnɔ, la pɔ'ɔrɛ yetɔga, la pa'al-m-mẽŋa, la yalm-tõoma. 23Bõn-be'ero bãna wuu ze'etɩ la nẽrsaala sũure pʋam botɩ a dɛna dẽgrɔ.»

Pɔka n bɔ Azezi sɩra

(Amatie 15:21-28)

24Azezi daan ze'ele zẽ'e-ẽŋa sẽŋɛ la Tiiri so'olʋm ka kẽ yire pʋam, dee ka bɔɔra tɩ nẽra bãŋɛ tɩ ẽŋa boe bilam. La a daan ka tã'agɛ sʋgɛ. 25Tɩ pɔka ayɩla tɩ kʋlkã'arga daan dolɩ a pɔyʋa, wõm Azezi yelle, sẽŋɛ ka ka dũma tẽŋa a nẽŋam, 26sose ẽ yetɩ, a dige kʋlkã'arga la tɩ a yese dee basɛ a pɔyʋa la. Pɔka la daan de la Grɛkɩ, ba dɔgɛ ẽ na Fenisi tẽŋa n boe Siiri so'olʋm pʋam. 27Tɩ Azezi lerge ẽ yetɩ: «Basɛ tɩ kɔma dẽŋɛ di tɩgɛ, se'ere n soe la, la ka masɛ tɩ ba dɩkɛ kɔma dia bɔ baasɩ.» 28Tɩ pɔka la lerge ẽ yetɩ: «M Zuudãana, la de la sɩra, la baasɩ n boe ba dãana taablɩ tilum diti la kɔma di-zõra n luti la.» 29Tɩ Azezi yele ẽ yetɩ: «Fõn lerge se'em wã ĩyã, kule, tɩ kʋlkã'arga la basɛ fʋ pɔyʋa la.» 30Tɩ pɔka la daan lebe kule, la ẽn paagɛ yire la, a yẽ tɩ a pɔyʋa la gã la bõn-gã'ala pʋam, la kʋlkã'arga la sɩrɩ yese dee basɛ ẽ mɛ.

Azezi botɩ bʋraa n de waŋa, dee ka tãna tɔgra sõŋa, tã'agɛ tɔgra dee wõnna

31Azezi le ze'ele Tiiri so'olʋm doose la Sidõ, doose Dekapɔlɩ tẽnsɩ pʋam lebe Galile mõgrɛ la bɔba. 32Tɩ ba tarɩ bʋraa n de waŋa, dee ka tãna tɔgra sõŋa wa'am a zẽ'am, wa belem ẽ yetɩ, a dɩkɛ a nu'ugo paglɛ waŋa la zuo. 33Tɩ Azezi tarɩ ẽ nẽr-kʋʋŋɔ la pʋam yese kẽnkɛrŋa dɩkɛ a nu'ubiɛ tũm a tʋba pʋam, dee tʋbsɛ nõtõorʋm kalʋm bʋraa la zɩlɩŋa. 34Dee gorge saazuo sĩ'im vo'ose fõo, dee yele bʋraa la yetɩ: «Efata», a võorɛ de la «yo'oge!» 35Bilam mẽŋa tɩ bʋraa la tʋba yo'oge, tɩ a zɩlɩŋa lakɛ, tɩ a tɔgra sõŋa sõŋa. 36Tɩ Azezi kã'an ba yetɩ, ba da tɔgɛ bɔ nẽra nẽra. La ẽn daan kã'an ba yetɩ, ba da tɔgɛ bɔ nẽra nẽra la, ba daan tõn tɔgra mɛ zozo'e. 37Tɩ la di'ige ba zozo'e halɩ tɩ ba yɛta tɩ: «A ẽŋɛ sɛla woo la sõŋa, botɩ wansɩ wõnna, tɩ mugro tɔgra.»

Currently Selected:

Amarkɩ 7: gurDBL

Highlight

Copy