Amatie 25

Pug-sarsɩ pia makrɛ

1Azezi ken yetɩ: «Wakat-ẽŋa Nawẽnnɛ so'olʋm wʋn ãna wʋ pug-sarsɩ pia n dɩkɛ ba fɩtladõma yese sẽŋɛ tɩ ba ka tʋ'ʋsɛ pɔgdita. 2Banuu ka tarɩ yɛm, dee tɩ banuu dɛna yɛm dõma. 3Tɩ sɛba n ka tarɩ yɛm na dɩkɛ ba fɩtladõma, dee ka dɩkɛ kaam pa'asɛ. 4La sɛba n tarɩ yɛm na dɩkɛ ba fɩtladõma mɛ, dee dɩkɛ kaam pa'asɛ. 5Tɩ pɔgdita la yuuge ka sẽna, tɩ gẽem yõkɛ ba, tɩ ba wuu gĩse.

6Tɩ sõnsʋa, tɩ ba kaasɛ tagurga yetɩ: ‹Pɔgdita la sẽm mɛ, isge-ya yese tʋ'ʋsɛ ẽ.› 7Tɩ pug-sarsɩ la wuu nẽegɛ malgɛ ba fɩtladõma. 8Tɩ sɛba n ka tarɩ yɛm na, yele yɛm dõma la yetɩ: ‹Pʋrgɛ-ya ya kaam na bɔ tɔ, tɩ tõma fɩtladõma la kĩŋri mɛ.› 9Tɩ yɛm dõma la lerge yetɩ: ‹Ayɛɩ, tõma sãn ẽŋɛ bɛla, kaam na kãn seke tõma, la yãma. Sẽŋɛ-ya ka-kɔɔsrɩba la zẽ'am ka da ya mẽŋa bõnɔ.›

10Tɩ ba sẽŋɛ tɩ ba ka da, dee tɩ pɔgdita la paam, tɩ banuu la n mãasʋm kɩ'ɩlɩm na doose pɔgdita la kẽ pɔgdire la zẽ'am, dee tɩ ba yʋ zanõrɛ.

11Bɛla poorʋm tɩ pug-sarsɩ banuu la n weege la wa'am wa wi'ira yetɩ: ‹Zuudãana, zuudãana, yo'oge bɔ tɔ.› 12Tɩ pɔgdita la lerge yetɩ: ‹Mam yetɩ ya la sɩra, tɩ mam ka mi ya.›

13Bɛla, guuse ya mẽŋa, se'ere n soe la, ya ka mi daar-sɛka bɩɩ wakat-sɛka tɩ Nẽrsaala Dayʋa la wʋn leme wa'am.»

Tõntõnɩba batã makrɛ

(Aluki 19:11-27)

14«Nawẽnnɛ so'olʋm ken ãna wʋ bʋraaga n boorɩ tɩ a sẽŋɛ sore, wi a tõntõnɩba dɩkɛ a bõntarsõm pʋɩ ba tɩ ba bɩsra. 15A bɔ tõntõnna ayɩla la talã banuu, bɔ ayɩla talã bayi, dee bɔ ayɩla talã ayɩla. A bɔ nẽra woo masɛ la ẽn wʋn tã'agɛ se'em tõm, dee sẽŋɛ. 16Tɩ nẽr-sɛka n to'oge talã banuu la darɛ tõm yẽ yõorɔ talã banuu pa'asɛ. 17Tɩ sɛka n to'oge talã bayi la mẽ tõm yẽ talã bayi pa'asɛ. 18La sɛka n to'oge talã ayɩla la sẽŋɛ ka tũ la boko pĩ a zuudãana ligri la.

19Tɩ la yuuge, tɩ tõntõnɩba la zuudãana la leme kulum, wa yele ba tɩ ba geele bãma n tõm se'em. 20Tɩ sɛka n daan to'oge talã banuu la, tarɩ talã banuu la tɩ a yẽ pa'asɛ la wa'am wa yetɩ: ‹M zuudãana, fõn daan bɔ mam na talã banuu, mam tõm yẽ la talã banuu pa'asɛ, ban wãna.› 21Tɩ a zuudãana la yele ẽ yetɩ: ‹La ãn sõŋa. Fʋ de la tõntõn-sõŋɔ n de sɩra dãana. Fõn ẽŋɛ sɩra la sɛla fẽe tɩ mam bɔ fʋ la ĩyã, mam wʋn basɛ tɩ fʋ sɔna bõnɔ zozo'e bɩsra. Wa'am wa naagɛ la mam ẽŋɛ sũ-yẽlga.›

22Tɩ sɛka n to'oge talã bayi la mẽ wa'am wa yetɩ: ‹M zuudãana, fõn daan bɔ mam na talã bayi, mam tõm yẽ la talã bayi pa'asɛ, ban wãna.› 23Tɩ a zuudãana la yele ẽ yetɩ: ‹La ãn sõŋa. Fʋ de la tõntõn-sõŋɔ n de sɩra dãana. Fõn ẽŋɛ sɩra la sɛla fẽe tɩ mam bɔ fʋ la ĩyã, mam wʋn basɛ tɩ fʋ sɔna bõnɔ zozo'e bɩsra. Wa'am wa naagɛ la mam ẽŋɛ sũ-yẽlga.›

24Tɩ sɛka n to'oge talã ayɩla la wa'am wa yetɩ: ‹M zuudãana, mam mi tɩ fõn de la nẽra yelle n tɔɩ. Fõn lagsrɩ la bõnkɔɔla sɛba tɩ fõn ka bʋrɛ, dee vaara bõn-sɛba tɩ fõn ka yɛrgɛ. 25Bɛla tɩ mam zoe dabeem dɩkɛ fʋ ligri la sẽŋɛ ka tũ boko pĩ. Fʋ bõnɔ n wãna, to'oge.› 26Tɩ a zuudãana la yele ẽ yetɩ: ‹Tõntõn-be'ego wã, fʋ de la zẽyãka. Fõn mi tɩ mam lagsrɩ la bõnkɔɔla sɛba tɩ mam ka bʋrɛ, dee vaara bõn-sɛba tɩ mam ka yɛrgɛ la, 27bɛla, la de nɩ na fʋ dɩkɛ m ligri la bĩŋe bãnkɩ pʋam, tɩ mam sãn leme wa'am, m to'oge m ligri la, la yõorɔ.› 28A yele bɛla dee yetɩ: ‹To'oge-ya a talã la bɔ sɛka n tarɩ talã pia la. 29Se'ere n soe la, nẽr-sɛka n tarɩ, a wʋn to'oge pa'asɛ tɩ la zo'oge. La sɛka n ka tarɩ, baa sɛla fẽe tɩ a tarɩ la, ba wʋn to'oge ẽ. 30La tõntõn-sɛka n ka tarɩ yõorɔ la, lobe-ya ẽ basɛ yẽŋa lika pʋam. Zẽ'e-ẽŋa tɩ ba wʋn kɛlla, dee dɩkɛ ba nu'usi gɩ nõorʋm.› »

Azezi wʋn di buuri wuu sarɩya dũnia ba'asgɔ daarɛ

31«Nẽrsaala Dayʋa la sãn leme wa'am la a na'am pãŋa, la a malɛkadõma wuu, a wʋn zĩ'ire la a na'am bĩmbĩnne zuo. 32Tɩ dũnia so'olʋm wuu nẽrba wʋn lagsɛ a nẽŋam, tɩ a welge nẽrba la yẽma yẽma wʋ dũnsĩina n welgrɩ a piisi, la a bʋʋsɩ se'em na. 33La a wʋn ze'ele piisi la a zʋʋgɔ bɔba, dee ze'ele bʋʋsɩ a gɔbga bɔba.

34Tɩ naba la wʋn yele sɛba n boe a zʋʋgɔ la yetɩ: ‹Wa'am-ya, yãma sɛba n tarɩ mam Sɔ Nawẽnnɛ yel-sõnnɛ na. To'oge-ya so'olʋm na tɩ Nawẽnnɛ daan põn mãasʋm tɩ a bɔ ya halɩ lan dẽŋɛ dũnia pĩ'iluŋo la. 35Se'ere n soe la, mam kɔm daan dõnnɩ mɛ, tɩ yãma bɔ mam dia. Koyũuro daan tarɩ mam mɛ, tɩ yãma bɔ mam ko'om tɩ mam yũ. Mam daan de la sãana, tɩ yãma to'oge mam. 36Mam daan de la beele, tɩ yãma bɔ mam futo tɩ mam yɛ. Mam daan bẽ'erɩ mɛ, tɩ yãma wa'am wa bɩsɛ mam, la mam daan boe la yʋ'a deem, tɩ yãma wa'am mam zẽ'am.› 37La nẽr-sɛba n ẽŋɛ sɛla n masɛ la wʋn lerge yetɩ: ‹Zuudãana, la de la wakat-kãna tɩ tõma yẽ fõn, tɩ fõn kɔm dõnnɩ, tɩ tõma bɔ fõn dia? Bɩɩ koyũuro tarɩ fõn, tɩ tõma bɔ fõn ko'om? 38La wakat-kãna tɩ tõma yẽ fõn, tɩ fõn dɛna sãana, tɩ tõma to'oge fõn? Bɩɩ fõn de beele, tɩ tõma bɔ fõn futo tɩ fõn yɛ? 39La wakat-kãna tɩ fõn bẽ'erɩ, tɩ tõma wa'am wa bɩsɛ fõn, bɩɩ fõn boe yʋ'a deem, tɩ tõma wa'am fõn zẽ'am?› 40Tɩ naba la wʋn lerge ba yetɩ: ‹Mam yetɩ ya la sɩra, tɩ yãma n daan ẽŋɛ sɛla wuu bɔ mam nẽrba la, baa la sãn dɛna la nẽr-pɩka ayɩla tɩ ya ẽŋɛ bɔ, la de la mam tɩ ya bɔ.›

41La a wʋn yele sɛba n boe a gɔbga bɔba la yetɩ: ‹Sẽŋɛ-ya fõrgɛ, Nawẽnnɛ kã'a-be'ego boe ya zuo. Sẽŋɛ-ya ka kẽ bugum n ka kĩŋri tɩ Nawẽnnɛ mãasʋm tɩ a kẽ'esɛ Asũtãana, la a malɛkadõma la pʋam. 42Se'ere n soe la, mam kɔm daan dõnnɩ mɛ, tɩ yãma ka bɔ mam dia. Tɩ koyũuro daan tara mam, tɩ yãma ka bɔ mam ko'om tɩ mam yũ. 43Mam daan de la sãana, tɩ yãma ka to'oge mam. Mam daan de la beele, tɩ yãma ka bɔ mam futo tɩ mam yɛ. Mam daan bẽ'erɩ mɛ, tɩ yãma ka wa'am wa bɩsɛ mam. Mam daan boe la yʋ'a deem, tɩ yãma ka wa'am mam zẽ'am.› 44La ba wʋn lerge ẽ yetɩ: ‹Zuudãana, la de la wakat-kãna tɩ tõma daan yẽ fõn, tɩ fõn kɔm dõnnɩ, bɩɩ koyũuro tarɩ fõn, bɩɩ fõn de sãana, bɩɩ beele, bɩɩ fõn bẽ'erɩ, bɩɩ fõn boe yʋ'a deem, dee tɩ tõma ka sõŋɛ fõn?› 45Tɩ a wʋn lerge ba yetɩ: ‹Mam yetɩ ya la sɩra, tɩ yãma n daan ka ɩtɩ bɛla bɔ'ɔra mam nẽrba la, baa la sãn dɛna la nẽr-pɩka ayɩla tɩ ya ka ẽŋɛ bɔ ẽ, la de la mam tɩ ya ka ẽŋɛ bɔ.›

46La bãma wʋn sẽŋɛ ka kẽ nãmsgɔ n ka ba'asrɩ pʋam. La sɛba n ẽŋɛ sɛla n masɛ la wʋn yẽ vɔm n ka ba'asrɩ.»

Currently Selected:

Amatie 25: gurDBL

Highlight

Copy