Amatie 26

Ba eerɩ sore tɩ ba yõkɛ Azezi

(Amarkɩ 14:1-2, Aluki 22:1-2, Azã 11:45-53)

1Azezi n daan tɔgɛ yetɔg-bãma wuu kɩ'ɩlɩm na, a yele a karẽnbiisi la yetɩ: 2«Yãma mi tɩ la deege la dabsa ayi tɩ Zɔɔg-basɛ kibsa paagɛ, tɩ ba wʋn yõkɛ Nẽrsaala Dayʋa la ka bɔ tɩ ba ka ẽ dɔ-puurŋa zuo kʋ.»

3Nawẽnnɛ kãabgɔ kẽma nẽŋadõma, la tẽŋa la kẽma daan sẽŋɛ ka lagsɛ la taaba Akayifu yire. Akayifu daan de la Nawẽnnɛ kãabgɔ kẽma nẽŋadõma la nẽŋadãana. 4Ba daan tɔgɛ la taaba kʋ yetɩ, ba ẽŋɛ yɛm yõkɛ Azezi kʋ. 5La ba yetɩ: «Tɩ da kãn ẽŋɛ-ya bɛla kibsa la pʋam, tɩ nẽrba la wʋn gire mɛ.»

Pɔka n ka'agɛ tɩdarɛ kaam ẽŋɛ Azezi zuo

(Amarkɩ 14:3-9, Azã 12:1-8)

6Azezi daan boe la Betani tẽŋa, Asimõ n wa dɛna kõnkonne na yire. 7Tɩ ba daan bɔna mĩ dita, tɩ pɔka tarɩ albatrɩ dugla n pɩrɛ la tɩdarɛ ka-sõma ligri n zo'oge, wa'am Azezi zẽ'am wa ka'agɛ kaam na ẽŋɛ Azezi zuugo. 8Tɩ a karẽnbiisi la yẽ bɛla, tɩ ba sũure sã'am. Tɩ ba yele taaba yetɩ: «Bẽm tɩ a sã'am kaam na wãna? 9Ba tã nɩ wʋn koose kaam wã ligri zo'oge mɛ, dɩkɛ bɔ nasdõma.» 10Tɩ Azezi bãŋɛ ba tẽ'esgɔ la, yele ba yetɩ: «Bẽm ẽŋɛ tɩ ya tɔgra pɔka la tɩ a sũure sã'am? Ẽn ẽŋɛ sɛla bɔ mam na de la tõon-sõŋɔ. 11Nasdõma boe la ya lɛ mɛ wakatɛ wuu, la mam kãn bɔna la ya wakatɛ wuu. 12Ẽŋa n ka'agɛ kaam na ẽŋɛ mam zuo la, a ẽŋɛ la ba wʋn ẽŋɛ mam se'em mam laarɛ daarɛ. 13Mam yetɩ ya la sɩra, tɩ dũnia wã zẽ'e-sɛka wuu tɩ ba wʋn mõolɛ Nawẽnnɛ kõ-yẽlga la, ba mẽ wʋn tɔgɛ pɔka wã n ẽŋɛ mam se'em wã, tɩ ba tẽra a yelle.»

Azudaasɩ eerɩ sore tɩ a pa'alɛ tɩ ba yõkɛ Azezi

(Amarkɩ 14:10-11, Aluki 22:3-6)

14Tɩ Azezi karẽnbiisi pia la ayi la nẽra ayɩla yʋ'ʋrɛ n de Azudaasɩ Iskariyo, daan sẽŋɛ kãabgɔ kẽma nẽŋadõma zẽ'am 15ka yele ba yetɩ: «Ya wʋn bɔ mam na bẽm, tɩ m pa'alɛ ya sore tɩ ya yõkɛ Azezi?» Tɩ ba bɔ ẽ lig-kõba pitã. 16La pɔsɛ la wakat-ẽŋa tɩ a ɛɛra sore tɩ a pa'alɛ tɩ ba yõkɛ Azezi.

Azezi diti Zɔɔg-basɛ kibsa la a karẽnbiisi

(Amarkɩ 14:12-26, Aluki 22:7-23, Azã 13:21-30, 1 Korẽntɩ 11:23-25)

17Borborɩ n ka tarɩ dãbɩllɛ kibsa la pɔspɔsɩ daarɛ, tɩ Azezi karẽnbiisi la sẽŋɛ a zẽ'am ka soke ẽ yetɩ: «Fõn boorɩ tɩ tɩ sẽŋɛ la bɛ ka mãasʋm Zɔɔg-basɛ kibsa la tɩ fʋ di?» 18Tɩ a lerge ba yetɩ: «Sẽŋɛ-ya tẽŋa la pʋam Abõnɔ yire ka yele ẽ yetɩ: ‹Karẽnsãama la yetɩ, ẽŋa wakatɛ paagɛ mɛ, la de la fõn yire tɩ ẽŋa wʋn di Zɔɔg-basɛ kibsa la, la a karẽnbiisi.› » 19Tɩ karẽnbiisi la ẽŋɛ Azezi n yele ba se'em na, mãasʋm Zɔɔg-basɛ kibsa la.

20Tɩ wẽnnɛ daan mã'agɛ, tɩ Azezi la a karẽnbiisi pia la ayi la sẽŋɛ yire la pʋam ka zẽa dita. 21Ban daan dita la, tɩ Azezi yele ba yetɩ: «Mam yetɩ ya la sɩra sɩra, tɩ ya nẽra ayɩla n wʋn pa'alɛ tɩ ba yõkɛ mam.» 22Tɩ a karẽnbiisi la sũure sã'am halɩ, tɩ ba sɔkra ẽ ayɩla ayɩla yetɩ: «Zuudãana, la de la mam bɩɩ?» 23Tɩ a lerge ba yetɩ: «Sɛka n wʋn yɛglɛ la mam tũm a nu'ugo laaga pʋam na, la de la ẽŋa n wʋn pa'alɛ tɩ ba yõkɛ mam. 24Nẽrsaala Dayʋa la wʋn ki wʋ la yʋʋn põn gʋlsɛ a yelle se'em Nawẽnnɛ gõŋɔ pʋam na. La nẽr-sɛka n wʋn pa'alɛ tɩ ba yõkɛ Nẽrsaala Dayʋa la wʋn yẽ toogo. Nẽr-ẽŋa ma daan sãn ka dɔgɛ nɩ ẽ n sõɩ.» 25Tɩ Azudaasɩ n de nẽr-sɛka n daan wʋn pa'alɛ tɩ ba yõkɛ Azezi la soke ẽ yetɩ: «Karẽnsãama, la de la mam bɩɩ?» Tɩ Azezi yele ẽ yetɩ: «Fõn yele la bɛla.»

26Ban daan boe mĩ dita la, tɩ Azezi dɩkɛ borborɩ pʋ'ʋsɛ Nawẽnnɛ, dee fiise bɔ a karẽnbiisi la yetɩ: «To'oge-ya di. Ẽna de la mam ĩyã.» 27Dee dɩkɛ bõn-yũula pʋ'ʋsɛ Nawẽnnɛ, dee bɔ ba yetɩ: «To'oge-ya ya wuu yũ. 28Bãna wã de la mam zɩɩm n wʋn yese saagɛ nẽrba zozo'e ĩyã, pa'alɛ tɩ Nawẽnnɛ bĩŋe nõorɛ la ba tɩ a basɛ ba tõon-be'ero taalɛ. 29Mam yetɩ ya tɩ, mam kãn le yũ viinye biɛ bõn-yũula wã, halɩ tɩ la ka paagɛ daar-sɛka tɩ mam wʋn le naagɛ la ya yũ ba mam Sɔ Nawẽnnɛ so'olʋm pʋam.» 30Tɩ ba daan yõom yõoma pẽgɛ Nawẽnnɛ, dee yese wɛ'ɛsa Oliivi tãŋam.

Azezi yetɩ Apɩyɛɛrɩ wʋn sɩ'ɩsɛ ẽŋa

(Amarkɩ 14:27-31, Aluki 22:31-34, Azã 13:36-38)

31Tɩ Azezi yele a karẽnbiisi la yetɩ: «Yãma wuu wʋn lebe la poorʋm dee basɛ mam zĩna yʋ'ʋŋɔ, se'ere n soe la, la gʋlsɛ Nawẽnnɛ gõŋɔ pʋam yetɩ: ‹Mam wʋn kʋ dũnsĩina, dee tɩ piisi la wɩrgɛ.› » 32La Azezi le yele ba yetɩ: «La mam sãn wa vo'oge, mam wʋn dẽŋɛ ya nẽŋa sẽŋɛ Galile.» 33Tɩ Apɩyɛɛrɩ yele yetɩ: «Baa bãna wuu sãn lebe poorʋm dee basɛ fõn, mam kãn malɩn basɛ fõn.» 34Tɩ Azezi yele ẽ yetɩ: «Mam yetɩ fʋ la sɩra, tɩ zĩna yʋ'ʋŋɔ wã, lan dẽŋɛ nõ-rɔɔgɔ n wʋn kaasɛ, fʋ wʋn sɩ'ɩsɛ nõorɛ atã tɩ fõn ka mi mam.» 35Tɩ Apɩyɛɛrɩ yele yetɩ: «Baa la sãn dɛna tɩ mam lagɩm na fõn ki, mam kãn malɩn sɩ'ɩsɛ fõn.» Tɩ Azezi karẽnbiisi la wuu lagɩm yele bɛla.

Azezi pʋ'ʋsɛ Nawẽnnɛ Getsemane

(Amarkɩ 14:32-42, Aluki 22:39-46)

36Azezi la a karẽnbiisi la daan sẽŋɛ ka paagɛ la zẽ'e-sɛka tɩ ba wi'iri tɩ Getsemane, tɩ a yele a karẽnbiisi la yetɩ: «Zĩ'ire-ya kalam, dee tɩ m sẽŋɛ nẽŋa ka pʋ'ʋsɛ Nawẽnnɛ.» 37La Azezi tarɩ la Apɩyɛɛrɩ, la Azebede dayɔɔsɩ bayi la sẽŋɛ. Tɩ a sũure sã'am halɩ zozo'e, tɩ a palẽŋa ẽgra. 38Tɩ a yele ba yetɩ: «Sũ-sã'aŋɔ n tarɩ mam zozo'e tɩ la ãna wʋ mam yetɩ m ki mɛ na. Weege-ya kalam gu'ura mam, da gĩse-ya.» 39La a sẽŋɛ la nẽŋa fẽe ka võglɛ a nẽŋa tẽŋa pʋ'ʋsɛ Nawẽnnɛ yetɩ: «M Sɔ, la sãn tãna, fʋ basɛ tɩ nãmsgɔ ẽna tole dee basɛ ma. La, la da kãn dɛna mam n boorɩ se'em, la dɛna fõn boorɩ se'em.»

40La a lebe a karẽnbiisi la zẽ'am ka yẽ tɩ ba gĩsri mɛ. Tɩ a soke Apɩyɛɛrɩ yetɩ: «Yãma ka tã'agɛ naagɛ la mam gu karf-ayɩla mã'a ka gĩse? 41Basɛ-ya gẽem dee pʋ'ʋsɛ Nawẽnnɛ tɩ yelle da paagɛ ya tɩ ya lui. Ya sɩa boorɩ mɛ, la ya ĩyã la ka tarɩ pãŋa.»

42La a daan le lebe mɛ ka pʋ'ʋsɛ yetɩ: «M Sɔ, nãmsgɔ wã sãn ka tãna wʋn tole dee basɛ mam, la sãn dɛna tɩ mam nãmsɛ, basɛ tɩ fõn boorɩ se'em ẽŋɛ.» 43La a le lebe a karẽnbiisi la zẽ'am ka yẽ tɩ ba le gĩsra mɛ, se'ere n soe la, gẽem n daan ba tara ba.

44Tɩ a basɛ ba, dee le lebe nõorɛ atã pʋam ka pʋ'ʋsɛ Nawẽnnɛ tɔgɛ yetɔg-bãma mẽŋa. 45Dee leme wa'am a karẽnbiisi la zẽ'am wa soke ba yetɩ: «Ya gĩsri mɛ dee vɔ'ɔsra? Wakatɛ paagɛ mɛ, tɩ ba wʋn dɩkɛ Nẽrsaala Dayʋa la ẽŋɛ tõon-be'ero dõma nu'usum. 46Isge-ya tɩ tɩ sẽŋɛ. Sɛka n wʋn pa'alɛ tɩ ba yõkɛ mam na n wãna n sẽm.»

Ba yõkɛ Azezi

(Amarkɩ 14:43-50, Aluki 22:47-53, Azã 18:3-12)

47Azezi n daan ken tɔgra la, tɩ Azudaasɩ n de a karẽnbiisi pia la ayi la nẽra ayɩla doose la nẽr-kʋʋŋɔ zozo'e sẽŋɛ paam. Ba daan tarɩ la sʋkɔbrɔ la dɔa. La de la kãabgɔ kẽma nẽŋadõma, la tẽŋa la kẽma n daan tõm ba. 48La Azudaasɩ n wʋn pa'alɛ tɩ ba yõkɛ ẽ na, põn pa'alɛ ba mɛ yetɩ: «Sɛka tɩ mam wʋn kɔkɛ ẽ na, la de la ẽŋa, yõkɛ-ya ẽ.»

49La ẽn paam na, a sẽŋɛ mɛ tɔtɔ lɛm Azezi, pʋ'ʋsɛ ẽ yetɩ: «Karẽnsãama, zaanõorɛ», dee kɔkɛ ẽ. 50Tɩ Azezi yele ẽ yetɩ: «M sɩrɛ, ẽŋɛ fõn wa'am tɩ fʋ ẽŋɛ se'em na.» Tɩ nẽrba la paagɛ yõkɛ Azezi. 51Tɩ nẽr-sɛba n daan boe la Azezi la, nẽra ayɩla fooge a sʋkɔbgɔ sɛ kãabgɔ kẽma nẽŋadãana tõntõnna tʋbrɛ fiige. 52Tɩ Azezi yele ẽ yetɩ: «Lebse sũm fʋ sʋ'a la a fʋʋgɔ pʋam, se'ere n soe la, sɛba n zɛbrɩ la sʋ'ʋsɩ, sʋ'ʋsɩ n wʋn kʋ ba. 53Fõn ka mi tɩ mam tã wʋn sose m Sɔ Nawẽnnɛ, tɩ a tõm malɛkadõma n gãnnɩ tʋsa tʋsa pia la ayi? 54La mam sãn ẽŋɛ nɩ bɛla, Nawẽnnɛ gõŋɔ n yetɩ la wʋn ẽŋɛ se'em na, wʋn ẽŋɛ la wãne ẽŋɛ?»

55A tɔgɛ bɛla, dee soke nẽr-kʋʋŋɔ la yetɩ: «Yãma sẽm na sʋkɔbrɔ, la dɔa tɩ ya yõkɛ mam wʋ mam de la fãara la? Mam daan boe la yãma mɛ Wẽnde-kãtʋm na daarɛ woo zãsna nẽrba, tɩ yãma ka yõkɛ mam. 56La bõn-bãna wuu ẽŋɛ tɩ Nawẽnnɛ nõtɔ'ɔsrɩba n yʋʋn yele se'em Nawẽnnɛ gõŋɔ pʋam na n ẽŋɛ.» Tɩ a karẽnbiisi la wuu zoe dee basɛ ẽ.

Ba tarɩ Azezi sẽŋɛ Zifdõma sarɩyaditba zẽ'am

(Amarkɩ 14:53-65, Aluki 22:54-55,63-71, Azã 18:13-14,19-24)

57Sɛba n daan yõkɛ Azezi la, tarɩ ẽ sẽŋɛ la kãabgɔ kẽma nẽŋadãana Akayifu yire. Bilam tɩ lɔɔ karẽnsãandõma, la tẽŋa la kẽma daan lagsɛ. 58Tɩ Apɩyɛɛrɩ daan bɔna poorʋm zãazãarɛ dɔla ka paagɛ kãabgɔ kẽma nẽŋadãana la yire, kẽ naagɛ la tõntõnɩba zẽa tɩ a bɩsɛ yelle la n wʋn ba'asɛ se'em. 59Kãabgɔ kẽma nẽŋadõma, la sarɩyaditba la wuu daan eerɩ la yelle tɩ ba parɩm bɔ Azezi botɩ ba kʋ ẽ. 60La ba ka yẽ, baa la nẽrba zozo'e n parɩm põmpɔrŋɔ kaseto bɔ ẽ na. Tɩ nẽrba bayi yãŋa isge 61yetɩ: «Bʋraa wã daan yetɩ, ẽŋa tã wʋn wõrgɛ Wẽnde-kãtɛ la, dee le mẽ ẽ dabsa atã pʋam.»

62Tɩ kãabgɔ kẽma nẽŋadãana la isge soke Azezi yetɩ: «Ban tɔgɛ fõn se'em na, fõn kãn lerge se'ere?» 63Tɩ Azezi ka lerge se'ere. Tɩ kãabgɔ kẽma nẽŋadãana la yele ẽ yetɩ: «Pɔɩ la Nawẽnnɛ n de vɔm dãana la yʋ'ʋrɛ, fʋ sãn dɛna la Krisi, Nawẽnnɛ Dayʋa la, yele to.» 64Tɩ Azezi lerge ẽ yetɩ: «La de la fõn yele se'em na. La mam yetɩ ya tɩ ya wʋn yẽ Nẽrsaala Dayʋa la, tɩ a zĩ Nawẽnnɛ n de pãŋa dãana la zʋʋgɔ bɔba, ya wʋn yẽ tɩ a boe sawara pʋam sẽna.» 65Tɩ kãabgɔ kẽma nẽŋadãana la ãasʋm a mẽŋa futo, dee yetɩ: «A tʋʋrɩ la Nawẽnnɛ. Tɩ ka le ɛɛra tɩ nẽra le bɔ kaseto. Ya wõm ẽn tʋʋrɩ Nawẽnnɛ se'em. 66Yãma tẽ'esɛ la bẽm?» Tɩ ba lerge yetɩ: «A masɛ la kũm.»

67Tɩ ba tʋbsɛ nõtõorʋm mĩ a nẽŋa, dee wẽ ẽ na kũnkũra. Tɩ basɛba wẽ a pɛgsɩ, 68dee yele ẽ yetɩ: «Krisi, bãŋɛ sɛka n wẽ fõn tɔgɛ pa'alɛ tɔ.»

Apɩyɛɛrɩ sɩ'ɩsɛ tɩ ẽŋa ka mi Azezi

(Amarkɩ 14:66-72, Aluki 22:56-62, Azã 18:15-18,25-27)

69Apɩyɛɛrɩ daan zĩ la yire la zẽnzakam, tɩ tõntõn-pɔka lɛm ẽ yele ẽ yetɩ: «Fõn mẽ daan boe la Azezi n de Galile nẽra la lɛ.» 70Tɩ a sɩ'ɩsɛ ba wuu nẽŋam yetɩ: «Mam ka bãŋɛ fõn boorɩ tɩ fʋ yele se'em.» 71Tɩ Apɩyɛɛrɩ yese yaŋa nõorʋm, tɩ tõntõn-pɔka ayẽma yẽ ẽ, yele sɛba n boe mĩ na yetɩ: «Ẽna mẽ daan boe la Azezi n ze'ele Nazarɛtɩ la lɛ.» 72Tɩ Apɩyɛɛrɩ le sɩ'ɩsɛ pɔɩ yetɩ: «Mam ka mi bʋraaga wã.» 73Tɩ la ẽŋɛ fẽe, tɩ sɛba n ze mĩ na, lɛm Apɩyɛɛrɩ yetɩ: «Asɩra, fõn de la ba nẽra ayɩla, se'ere n soe la, fʋ yetɔga n pa'alɛ fõn ze'ele zẽ'a.» 74Tɩ Apɩyɛɛrɩ pɔɩ yetɩ: «Mam ka mi bʋraaga wã, mam sãn parɩm mɛ, Nawẽnnɛ sɩbgɛ ma.» Wakat-ẽŋa mẽŋa tɩ nõ-rɔɔgɔ kaasɛ. 75Tɩ Apɩyɛɛrɩ yãŋa tẽegɛ Azezi n daan yele ẽ yetɩ: «Lan dẽŋɛ nõ-rɔɔgɔ n wʋn kaasɛ, fʋ wʋn sɩ'ɩsɛ nõorɛ atã tɩ fõn ka mi mam» na. Tɩ Apɩyɛɛrɩ yese yẽŋa ka kɛlla la sũ-sã'aŋɔ zozo'e.

Currently Selected:

Amatie 26: gurDBL

Highlight

Copy