Amatie 27

Ba tarɩ Azezi sẽŋɛ gɔmna Apilatɩ zẽ'am

(Amarkɩ 15:1, Aluki 23:1-2, Azã 18:28-32)

1Beere n daan wiige bulika, tɩ kãabgɔ kẽma nẽŋadõma, la tẽŋa la kẽma la wuu lagsɛ tɔgɛ kʋ yetɩ ba kʋ Azezi. 2Tɩ ba lʋ ẽ tarɩ sẽŋɛ Apilatɩ n de gɔmna zẽ'am ka bɔ ẽ.

Azudaasɩ kũm

(Tõoma 1:18-19)

3Azudaasɩ n de sɛka n daan pa'alɛ tɩ ba yõkɛ Azezi la, n yẽ tɩ ba tɔgɛ Azezi yelle kʋ yetɩ ba kʋ ẽ na, a sũure sã'am mɛ. Tɩ a tarɩ lig-kõba pitã la sẽŋɛ tɩ a ka lebse kãabgɔ kẽma nẽŋadõma, la tẽŋa la kẽma la, 4dee yetɩ: «Mam ẽŋɛ la be'em, mam n pa'alɛ tɩ ba yõkɛ sɛka n ka ẽŋɛ be'em tɩ ba kʋ ẽ na.» Tɩ ba yele ẽ yetɩ: «La ka pakɛ tõma. La de la fõn yelle.» 5Tɩ Azudaasɩ dɩkɛ ligri la lobge Wẽnde-kãtɛ la pʋam, dee sẽŋɛ ka pire mĩ'isi ki. 6Tɩ kãabgɔ kẽma la dɩkɛ ligri la yetɩ: «Ba de la zɩɩm ligri, la ka masɛ tɩ tɩ dɩkɛ ba naagɛ la Wẽnde-kãtɛ la ligri.» 7Tɩ ba bãm, dɩkɛ ligri la da yagba va'am tɩ a dɛna sãama laarɛ zẽ'am. 8Bɛla n soe tɩ ba ken wi'ira zẽ'e-ẽŋa tɩ zɩɩm va'am, halɩ wa paam zĩna. 9La de la bɛla tɩ Nawẽnnɛ nõtɔ'ɔsa Azeremi n yʋʋn gʋlsɛ se'em na ẽŋɛ.

A yʋʋn yetɩ: «Ba dɩkɛ la lig-kõba pitã, lig-sɛba tɩ Ɩsrayɛlɩ dõma sakɛ tɩ ba dɩkɛ da ẽ na, 10ba dɩkɛ la bãma da yagba va'am wʋ Zuudãana Nawẽnnɛ n yele mam se'em na.»

Ba tɔgɛ kʋ yetɩ ba kʋ Azezi

(Amarkɩ 15:2-20, Aluki 23:3-5,13-25, Azã 18:33—19:16)

11Ban daan tarɩ Azezi sẽŋɛ gɔmna la zẽ'am na, tɩ a soke ẽ yetɩ: «Fõn de la Zifdõma naba?» Tɩ Azezi lerge ẽ yetɩ: «La de la fõn yele se'em na.» 12La kãabgɔ kẽma nẽŋadõma, la tẽŋa la kẽma daan dõrɛ ẽ mɛ, tɩ a ka lerge se'ere. 13Tɩ Apilatɩ yele ẽ yetɩ: «Fõn ka wõm ban tɔgrɩ se'em wuu dõta fɔ?» 14Tɩ Azezi ka lerge yetɔga la baa ayɩla, tɩ la di'ige gɔmna la halɩ zozo'e.

15La Zɔɔg-basɛ kibsa wakatɛ woo gɔmna la ẽn yese la nẽra ayɩla yʋ'a deem basɛ, nẽr-sɛka tɩ nẽr-kʋʋŋɔ la boorɩ. 16La wakat-ẽŋa bibɛ'a ayɩla n daan boe yʋ'a deem, tɩ a yʋ'ʋrɛ dɛna Abarabasɩ, tɩ nẽrba wuu mina a yelle. 17Tɩ nẽr-kʋʋŋɔ la n lagsɛ la, tɩ Apilatɩ soke ba yetɩ: «Ãne tɩ yãma boorɩ tɩ m yese basɛ bɔ ya, Abarabasɩ bɩɩ Azezi tɩ ba wi'iri tɩ Krisi la?» 18Apilatɩ daan mi tɩ la de la sũure ĩyã tɩ ba yõkɛ Azezi wa bɔ ẽŋa.

19La Apilatɩ n daan zĩ sarɩyadia zẽ'am na, tɩ a pɔga tõm tɩ ba wa yele ẽ yetɩ: «Yese fʋ nu'ugo pʋpeelem dãana la yelle pʋam, se'ere n soe la, mam zãasʋm mɛ a yelle yʋ'ʋŋɔ, tɩ la nãmsɛ mam zozo'e.»

20La kãabgɔ kẽma nẽŋadõma, la tẽŋa la kẽma daan yele nẽrba la mɛ tɩ ba sose Apilatɩ tɩ a basɛ Abarabasɩ bɔ ba, dee kʋ Azezi. 21Tɩ gɔmna la le soke ba yetɩ: «Nẽr-bãna bayi wã, yãma boorɩ tɩ m basɛ la ãne bɔ ya?» Tɩ ba lerge yetɩ: «Abarabasɩ.» 22Tɩ a soke ba yetɩ: «Bɛla, yãma boorɩ tɩ m ẽŋɛ Azezi tɩ ba wi'iri tɩ Krisi la, la wãne?» Tɩ ba wuu lerge yetɩ: «Ka ẽ dɔ-puurŋa zuo.» 23Tɩ a soke ba yetɩ: «A ẽŋɛ la bẽm n de be'em?» Tɩ ba malɩn tɔgra ke'enke'em yetɩ: «Ka ẽ dɔ-puurŋa zuo.» 24La Apilatɩ n yẽ tɩ ẽŋa kãn yãŋɛ ẽŋɛ sɛla, dee tɩ nẽrba la gita pa'asra la, tɩ a dɩkɛ ko'om peege a nu'usi nẽr-kʋʋŋɔ la wuu nẽŋam, dee yele yetɩ: «Mam nẽŋa ka boe ẽna wã kʋa pʋam. La de la yãma yelle.» 25Tɩ nẽr-kʋʋŋɔ la wuu lerge yetɩ: «A kʋa la taalɛ bɔna tõma la tɩ kɔma zuto.» 26Tɩ Apilatɩ basɛ Abarabasɩ bɔ ba, dee botɩ ba wẽ Azezi la ka'asa, dee dɩkɛ ẽ bɔ tɩ ba ka ka ẽ dɔ-puurŋa zuo.

27Tɩ gɔmna la sʋdaasɩ tarɩ Azezi kẽ gɔmna la yire, tɩ sʋdaasɩ wuu lagsɛ kaagɛ ẽ. 28Tɩ ba yɛɛsɛ Azezi futo, dee yɛ ẽ fuugo n de gomusga, 29dɩkɛ gõ'osɩ wʋgɛ mũŋa vuge ẽ, dɩkɛ dasaarɛ zãntɛ a zʋʋgɔ nu'ugo, yãŋa ka dũma tẽŋa a nẽŋam la'ara ẽ yetɩ: «Zifdõma naba, naa!» 30La ba daan tʋbsrɩ la nõtõorʋm ɩta ẽ, dee tɔ'ɔsra dasaarɛ la wẽ'era a zuugo. 31La ban la ẽ kɩ'ɩlɩm na, ba yɛɛgɛ gomusga fuugo la mɛ, dee dɩkɛ a mẽŋa fuugo la lebe yɛ ẽ, tara ẽ wɛ'ɛsa tɩ ba ka ka dɔ-puurŋa zuo.

Ba ka Azezi dɔ-puurŋa zuo

(Amarkɩ 15:21-32, Aluki 23:26-43, Azã 19:17-27)

32Ban daan ze'ele tẽŋa pʋam yɛsra la, ba tʋ'ʋsɛ la bʋraaga ayɩla yʋ'ʋrɛ n de Asimõ n ze'ele Sirɛnɩ, tɩ ba pẽrgɛ ẽ tɩ a to'oge Azezi kũm dɔ-puurŋa la buke. 33Tɩ ba paagɛ zẽ'a tɩ ba wi'iri a yʋ'ʋrɛ tɩ Golgota, a võorɛ de la zuwaŋrɛ zẽ'a, 34dɩkɛ dãam n gaam na tɩɩm n ãn toogo bɔ Azezi tɩ a yũ. Tɩ a leme ba, zagsɛ ka yũ. 35Tɩ ba daan ka ẽ dɔ-puurŋa zuo, dee dɩkɛ a futo tɩ ba pʋɩ la taaba, pɔsɛ tɩ ba bãŋɛ nẽra woo n wʋn to'oge sɛka. 36Dee yãŋa zẽa gu'ura ẽ. 37Ba daan gʋlsɛ la gʋlsgɔ pa'alɛ se'ere n soe tɩ ba kʋ ẽ, lablɛ a zuum dɔ-puurŋa la zuo. Ba daan gʋlsɛ yetɩ:

«Ẽna de la Azezi

n de Zifdõma naba la.»

38Ba daan tarɩ la fãarba bayi wa po ka dɔ-puursi zuto, ayɩla Azezi zʋʋgɔ bɔba, ayẽma a gɔbga bɔba. 39Tɩ sɛba n dolɩ bilam tɔlla la, lɔbra ba zuto dee tʋʋra ẽ 40yetɩ: «Dagɩ fõn daan yetɩ fõn wʋn wõrgɛ Wẽnde-kãtɛ la, dee le mẽ ẽ dabsa atã pʋam? Fʋ sãn sɩrɩ dɛna la Nawẽnnɛ Dayʋa, fãagɛ fʋ mẽŋa ze'ele dɔ-puurŋa la zuo sige.» 41Kãabgɔ kẽma nẽŋadõma, la lɔɔ karẽnsãandõma, la tẽŋa la kẽma mẽ daan tʋʋrɩ ẽ mɛ yetɩ: 42«A daan fãagrɩ nẽrba basɛba mɛ, dee ka tãna wʋn fãagɛ a mẽŋa. A sãn dɛna Ɩsrayɛlɩ dõma naba, a ze'ele dɔ-puurŋa la zuo sige nãnannɛ wã, tɩ tõma wʋn bɔ ẽ sɩra. 43A te'ege Nawẽnnɛ mɛ yetɩ ẽŋa de la Nawẽnnɛ Dayʋa, Nawẽnnɛ sãn nõŋɛ ẽ, a fãagɛ ẽ lɛɛlɛ wã.» 44Tɩ fãarba la tɩ ba ka dɔ-puursi zuto lɛm ẽ na mẽ tɔgra ẽ be'em.

Azezi kũm

(Amarkɩ 15:33-41, Aluki 23:44-49, Azã 19:28-30)

45La daan pɔsɛ la wʋntɛɛŋa zuu-tẽŋasʋka, tɩ tẽŋa la wuu lebge lika tarɩ ka paagɛ zaanõorɛ karf-atã. 46Karf-atã la wakatɛ tɩ Azezi tɔgɛ ke'enke'em yetɩ: «Eli, Eli, lama sabaktani.» La võorɛ de la: «Mam Wẽnnaam, mam Wẽnnaam, bẽm tɩ fõn basɛ mam?» 47Tɩ sɛba n ze lɛm bilam na basɛba wõm bɛla, yetɩ: «A wi'iri la A'eli.» 48Tɩ ba nẽra ayɩla zoe sẽŋɛ ka dɩkɛ nẽtɩŋa lʋsɛ dã-mĩ'isgo pʋam zẽkɛ la dɔɔgɔ bɔ ẽ tɩ a yũ. 49Tɩ sɛba yetɩ: «Basɛ tɩ gu bɩsɛ A'eli la sãn wʋn wa'am wa fãagɛ ẽ.» 50Tɩ Azezi le kaasɛ ke'enke'em, dee ki. 51Tɩ fuugo la n yuli Wẽnde-kãtɛ la pʋam beŋe zẽ'e-sõŋɔ la ãagɛ pʋsʋka saazuum halɩ ka paagɛ tẽŋa. Tɩ tẽŋa mĩim, tɩ tãmpĩisi wõrɛ. 52Tɩ yɔɔrɔ be'ese, tɩ pʋpeelem dõma zozo'e n yʋʋn ki vo'oge. 53Tɩ Azezi n wa vo'oge la, tɩ ba ze'ele yɔɔrɔ pʋam yese kẽ Zerizalɛm, tɩ nẽrba zozo'e yẽ ba. 54La Rom sʋdaasɩ kɛ'ɛma, la sʋdaasɩ la n ze gu'ura Azezi la n yẽ tẽŋa la n mĩim, la bõn-sɛba n ẽŋɛ la, dabeem n yõkɛ ba zozo'e, tɩ ba yetɩ: «A sɩrɩ de la Nawẽnnɛ Dayʋa.»

55La pɔgsɩ zozo'e n daan ze zãazãarɛ dee bɩsra, ba daan ze'ele la Galile doose Azezi tɩ ba sõŋra ẽ. 56Amaari n ze'ele Magdala, la Amaari n de Azakɩ la Azozɛfʋ ma, la Azebede dayɔɔsɩ la ma n daan boe pɔg-bãma pʋam.

Azezi laarɛ

(Amarkɩ 15:42-47, Aluki 23:50-56, Azã 19:38-42)

57Bʋraaga ayɩla n daan de bõntarsa, n ze'ele Arimate, tɩ a yʋ'ʋrɛ dɛna Azozɛfʋ. A de la Azezi karẽnbia. 58Wẽnnɛ n daan mã'agɛ, tɩ a sẽŋɛ Apilatɩ zẽ'am ka sose ẽ tɩ a basɛ tɩ a dɩkɛ Azezi kũm na sẽŋɛ ka laagɛ. Tɩ Apilatɩ bɔ nõorɛ tɩ ba bɔ ẽ. 59Tɩ Azozɛfʋ dɩkɛ kũm na, dɩkɛ tãn-paalɛ n ãn sõŋa vile ẽ, 60tarɩ ẽ ka laagɛ yɔ-paalɛ pʋam tɩ a botɩ ba tũ tãmpĩa ĩyã, a mẽŋa ĩyã. Tɩ ba bilge kug-kãtɛ lige yɔɔgɔ la nõorɛ dee fõrgɛ. 61Amaari n ze'ele Magdala, la Amaari ayẽma la daan zĩ mɛ tɩ ba nẽŋa tɔ yɔɔgɔ la.

62Daar-sɛka tɩ Zifdõma mãasnɩ ba vo'osgo daarɛ la n tole tɩ beere wiige, tɩ kãabgɔ kẽma nẽŋadõma, la Farisi dõma lagsɛ taaba sẽŋɛ Apilatɩ zẽ'am, 63ka yele ẽ yetɩ: «Zuudãana, tõma tẽrɩ tɩ põmpã'asʋm dãana wã, ẽn daan nãn vɔa la, a daan yetɩ: ‹Mam wʋn vo'oge dabsa atã daarɛ.› 64Bɛla, bɔ nõorɛ tɩ ba gu'ura yɔɔgɔ la sõŋa sõŋa ka paagɛ dabsa atã daarɛ, la sãn dagna bɛla, a karẽnbiisi la wʋn wa zũ kũm na mɛ dee yele nẽrba tɩ a vo'oge mɛ. Pã'asgɔ ẽna wã yãŋa wʋn dɛna be'em gãnna pɔspɔsɩ la.» 65Tɩ Apilatɩ yele ba yetɩ: «Tarɩ-ya gu'urba sẽŋɛ ka basɛ tɩ ba gu'ura yɔɔgɔ la wʋ yãma n boorɩ se'em na.» 66Tɩ ba sẽŋɛ ka bɩ yɔɔgɔ la nõorɛ dee basɛ tɩ gu'urba gu'ura ẽ.

Currently Selected:

Amatie 27: gurDBL

Highlight

Copy