Amatie 28

Azezi vo'ore

(Amarkɩ 16:1-10, Aluki 24:1-12, Azã 20:1-10)

1Zifdõma vo'osgo daarɛ n daan tole, tɩ beere wiige Lasrɩ daarɛ bulika yʋ'ʋŋɔ yʋ'ʋŋɔ, tɩ Amaari n ze'ele Magdala, la Amaari ayẽma isge sẽŋɛ tɩ ba ka bɩsɛ yɔɔgɔ la. 2Tɩ tẽŋa daan mĩim zozo'e, tɩ Zuudãana Nawẽnnɛ malɛka ze'ele saazuum sigum wa bilge kugre la bĩŋe kẽnkɛrŋa zẽa a zuo. 3A nẽŋa daan yẽgrɩ wʋ sa-yãka. Tɩ a futo pelge ãna yɩlɩ yɩlɩ. 4Tɩ dabeem yõkɛ sɛba n gu'uri yɔɔgɔ la. Tɩ ba gõgra dee ãna wʋ ba ki mɛ na.

5Tɩ malɛka la yele pɔgsɩ la yetɩ: «Da zoe-ya dabeem, mam mi tɩ ya eerɩ la Azezi tɩ ba ka dɔ-puurŋa zuo kʋ la. 6A ka boe kalam. A vo'oge mɛ wʋ ẽn daan yele se'em na. Wa'am-ya wa bɩsɛ ban daan bĩŋe ẽ zẽ'e-sɛka la, 7dee sẽŋɛ-ya tɔtɔ ka yele a karẽnbiisi la yetɩ, a vo'oge mɛ. La a wʋn dẽŋɛ ya nẽŋa sẽŋɛ Galile. Bilam tɩ ya wʋn ka yẽ ẽ. Sɛla tɩ mam tarɩ tɩ m yele ya n bɛla.» 8Tɩ pɔgsɩ la fõrgɛ yɔɔm na tɔtɔ la dabeem, dee tara sũ-yẽlga zozo'e, zɔta wɛ'ɛsa tɩ ba ka yele Azezi karẽnbiisi la sɛla n ẽŋɛ la.

9Tɩ Azezi darɛ tʋ'ʋsɛ pʋ'ʋsɛ ba. Tɩ ba lɛm ẽ ka dũma tẽŋa a nẽŋam gʋrɛ a nãma nã'asɛ ẽ. 10Tɩ Azezi yele ba yetɩ: «Da zoe-ya dabeem, sẽŋɛ-ya ka yele m sɔbiisi la yetɩ, ba sẽŋɛ Galile, tɩ la de la bilam tɩ ba wʋn yẽ mam.»

11Pɔgsɩ la n daan boe sore wɛ'ɛsa la, tɩ sɛba n gu'uri yɔɔgɔ la nẽrba basɛba sẽŋɛ tẽŋa pʋam ka tɔgɛ pa'alɛ kãabgɔ kẽma nẽŋadõma bõn-sɛba wuu n ẽŋɛ la. 12Tɩ kãabgɔ kẽma nẽŋadõma, la tẽŋa la kẽma la lagsɛ kʋ nõorɛ ayɩla, bɔ sʋdaasɩ la ligri zozo'e, 13dee yele ba yetɩ: «Yele-ya nẽrba la yetɩ, yʋ'ʋŋɔ tɩ yãma gã gĩsra dee tɩ Azezi karẽnbiisi la wa'am wa zũ kũm na. 14La gɔmna la sãn wõm bɛla, tõma wʋn tɔgɛ la ẽ lɛ, yese ya yelle la pʋam.» 15Tɩ sʋdaasɩ la to'oge ligri la, dee ẽŋɛ wʋ ban yele ba se'em na. Tɩ yetɔg-ẽŋa saagɛ Zifdõma la tẽŋasʋka halɩ wa paam zĩna.

Azezi puke a mẽŋa pa'alɛ a karẽnbiisi

(Amarkɩ 16:14-18, Aluki 24:36-49, Azã 20:19-23, Tõoma 1:6-8)

16Karẽnbiisi pia la ayɩla la daan sẽŋɛ la Galile, ka zom tãn-sɛka tɩ Azezi bɔ ba nõorɛ yetɩ ba sẽŋɛ la zuo. 17La ba yẽ ẽ mɛ, ka dũma tẽŋa a nẽŋam nã'asɛ ẽ, la basɛba daan sẽ'enɩ mɛ. 18Tɩ Azezi lɛm ba, yele ba yetɩ: «Nawẽnnɛ bɔ mam pãŋa wuu n boe saazuum, la tẽŋa wã zuo mɛ. 19Bɛla, sẽŋɛ-ya dũnia wuu ka botɩ nẽrba buuri wuu lebge mam karẽnbiisi. Mise-ya ba ko'om pʋam, la Sɔ Nawẽnnɛ, la a Dayʋa, la a Sɩa yʋ'ʋrɛ. 20La ya zãsʋm ba tɩ ba sakɛ bõn-sɛba wuu tɩ mam bɔ ya nõorɛ tɩ ya ɩta la. La bãŋɛ-ya tɩ mam boe la ya mɛ wakatɛ wuu, halɩ tɩ la ka paagɛ dũnia ba'asgɔ.»

Currently Selected:

Amatie 28: gurDBL

Highlight

Copy